Minnum á fundinn á morgunStjórn félagsins minnir á fræðslufund um efnahagsmál og framtíðarhorfur í íslensku samfélagi sem haldinn verður á morgun miðvikudaginn 18. febrúar í safnaðarheimilinu Vinaminni á Akranesi kl 20:00. 

Vilhjálmur Bjarnason formaður félags fjárfesta flytur erindi en hann mun fjalla um efnahagsmál þjóðarinnar - stöðuna, tilurðina og horfurnar.  Einnig mun Stefán Einar Stefánsson guðfræðingur og viðskiptasiðfræðingur flytja erindi er hann nefnir: Mammon, Guð og manneskjan.

Að loknum erindum gefst tóm til fyrirspurna og almennra umræðna.

Fundarstjórar verða Vilhjálmur Birgisson, formaður Verkalýðsfélags Akraness og sr. Þorbjörn Hlynur Árnason prófastur.

Það eru Borgarfjarðarprófastsdæmi og Verkalýðsfélag Akraness sem efna til þessa fræðslufundar um efnahagsmál og horfur á Íslandi og er fundurinn öllum opinn.

Eins fram hefur komið hér á heimasíðunni þá verður haldinn fundur með formönnum aðildarfélaga Alþýðusambands Íslands. Aðalmálið sem verður til umfjöllunar er hugmynd miðstjórnar og forseta ASÍ um að fresta endurskoðun kjarasamninga og þeim launahækkunum til félagsmanna á hinum almenna vinnumarkaði sem eiga að koma til 1. mars nk.

Nú liggur fyrir að mjög skiptar skoðanir eru um þessa hugmynd og hafa fjölmörg félög innan Starfsgreinasambands Íslands ályktað um að krafa sé um að atvinnurekendur standi við gerða samninga og hafnar því algerlega að fresta endurskoðun og hækkun á launalið samninganna.

Þau félög sem hafa gagnrýnt þessa hugmynd harðlega eru t.d. Verkalýðsfélag Akraness, Framsýn á Húsavík, Verkalýðsfélag Vestfirðinga, Afl - starfsgreinafélag Austurlands og Drífandi í Vestmannaeyjum.

Það er ljóst að á fundinum í dag verður tekist á um þetta atriði, en afstaða áðurnefndra félaga er skýr, það er að atvinnurekendur standi við þá samninga sem við þá hafa verið gerðir enda er ekki hægt að þeir sem eru með hvað lægstu launin verði af þeim hækkunum sem um hefur verið samið.

Væntanlega mun verða tekin afstaða til þessar hugmyndar ASÍ á fundinum og verður fjallað ítarlega um þá niðurstöðu hér á heimasíðunni á morgun.

Vilhjálmur BjarnasonFræðslufundur um efnahagsmál og framtíðarhorfur í íslensku samfélagi verður haldinn miðvikudaginn 18. febrúar í safnaðarheimilinu Vinaminni á Akranesi kl 20:00. 

Vilhjálmur Bjarnason formaður félags fjárfesta flytur erindi en hann mun fjalla um efnahagsmál þjóðarinnar - stöðuna, tilurðina og horfurnar.  Einnig mun Stefán Einar Stefánsson guðfræðingur og viðskiptasiðfræðingur flytja erindi er hann nefnir: Mammon, Guð og manneskjan.

Að loknum erindum gefst tóm til fyrirspurna og almennra umræðna.

Fundarstjórar verða Vilhjálmur Birgisson, formaður Verkalýðsfélags Akraness og sr. Þorbjörn Hlynur Árnason prófastur.

Það eru Borgarfjarðarprófastsdæmi og Verkalýðsfélag Akraness sem efna til þessa fræðslufundar um efnahagsmál og horfur á Íslandi og er fundurinn öllum opinn.

Á mánudaginn verður haldinn fundur með formönnum aðildarfélaga Alþýðusambands Íslands. Aðalmálið sem verður til umfjöllunar er hugmynd miðstjórnar og forseta ASÍ um að fresta endurskoðun kjarasamninga og þeim launahækkunum til félagsmanna á hinum almenna vinnumarkaði sem eiga að koma til 1. mars nk.

Nú liggur fyrir að mjög skiptar skoðanir eru um þessa hugmynd og hafa fjölmörg félög innan Starfsgreinasambands Íslands ályktað um að krafa sé um að atvinnurekendur standi við gerða samninga og hafnar því algerlega að fresta endurskoðun og hækkun á launalið samninganna.

Þau félög sem hafa gagnrýnt þessa hugmynd harðlega eru t.d. Verkalýðsfélag Akraness, Framsýn á Húsavík, Verkalýðsfélag Vestfirðinga, Afl - starfsgreinafélag Austurlands og Drífandi í Vestmannaeyjum.

Það er ljóst að á fundinum á mánudaginn verður tekist á um þetta atriði, en afstaða áðurnefndra félaga er skýr, það er að atvinnurekendur standi við þá samninga sem við þá hafa verið gerðir enda er ekki hægt að þeir sem eru með hvað lægstu launin verði af þeim hækkunum sem um hefur verið samið.

Það er óhætt að segja að atvinnuleysi haldi áfram að aukast jafnt og þétt og í dag eru rétt tæplega 500 manns án atvinnu á Vesturlandi öllu en af þessum 500 eru 130 í hlutastarfi. Á Akranesi og í nærsveit eru 313 manns án atvinnu, þar af eru 170 karlar og 143 konur.

Á öllu landinu er atvinnulausir orðnir hvorki fleiri né færri en 14.746 og eykst eins og áður sagði dag frá degi. Vinnumálastofnun gerir ráð fyrir því að atvinnulausir geti orðið allt að 20.000 þegar kemur fram á vorið og á þeirri forsendu er gríðarlega mikilvægt að ríkisstjórn Íslands komi með raunhæfan aðgerðapakka til hjálpar heimilum og fyrirtækjum.

Nú liggur fyrir að sjávarútvegsráðherra mun kynna í næstu viku niðurstöðu um auknar hvalveiðar en það hefur verið til skoðunar hjá honum frá því ráðherrann tók við embættinu ekki alls fyrir löngu. Eins og fram kom hér á heimasíðunni þá ýjaði ný ríkisstjórn að því að þau myndu afturkalla auknar heimildir til hvalveiða sem fyrrverandi sjávarútvegsráðherra hafði heimilað. En niðurstaða kemur eins og áður sagði í næstu viku.

Það er alveg ljóst að ef reglugerðin um auknar hvalveiðar fær að standa óbreytt þá mun það hafa verulega jákvæða þýðingu fyrir atvinnulífið hér á Vesturlandi enda er talið að það muni skapa um 200 til 300 störf. Á þeirri forsendu er sjávarútvegsráðherra ekki stætt á því að afturkalla áðurnefnda reglugerð.

Fram hefur komið fréttum að vilji sé innan miðstjórnar ASÍ um að fresta endurskoðun á kjarasamningum fram til loka júní nk.  Hefur forseti ASÍ óskað eftir afstöðu aðildarfélaga innan ASÍ  til þess að fresta endurskoðun og umsömdum launahækkunum loka júní.

Stjórn og trúnaðarráð Verkalýðsfélags Akraness fjallaði um þennan möguleika á fundi sínum í kvöld og samþykkti ályktun um frestun kjarasamninga en í ályktuninni kemur m.a. fram að stjórn og trúnaðarráð Verkalýðsfélags Akraness krefjist þess að Samtök atvinnulífsins standi við þau ákvæði aðalkjarasamninga er varða launahækkanir 1. mars nk. Kjarasamningarnir sem undirritaðir voru 17. febrúar sl. voru hófstilltir og skynsamir og voru samningarnir einnig framlag verkafólks til að tryggja stöðugleika í íslensku samfélagi.

Eftirfarandi ályktun samþykkti stjórn og trúnaðarráð á fundi sínum í kvöld:

Nú liggur fyrir að forsendur kjarasamninga er undirritaðir voru í febrúar 2008 eru kolbrostnar. Nú hafa Samtök atvinnulífsins ýjað að því að þau muni segja kjarasamningum upp þegar endurskoðunin mun eiga sér stað í þessum mánuði ef ekki næst samkomulag við forsendunefnd ASÍ um frestun á þeim launahækkunum sem koma eiga til 1. mars n.k.

Í lögfræðilegu áliti sem stjórn Verkalýðsfélags Akraness lét gera kemur fram að forsendunefnd og samninganefnd ASÍ hafi ekki heimild til að lækka eða fresta þeim launahækkunum sem um var samið 17. febrúar sl.  Umboð forsendunefndar ASÍ og SA er því klárlega umdeilt í ljósi þessa.

Stjórn og trúnaðarráð Verkalýðsfélags Akraness vill að staðið verði við þau  ákvæði aðalkjarasamninga  er varða launahækkanir 1. mars nk. þó svo að forsendur samningsins er lúta að verðbólgumarkmiði samningsins séu kolbrostnar.

Stjórn og trúnaðarráð Verkalýðsfélags Akraness krefst þess að  Samtök atvinnulífsins standi við þau  ákvæði aðalkjarasamninga  er varða launahækkanir 1. mars nk.  Kjarasamningarnir sem undirritaðir voru 17. febrúar sl. voru hófstilltir og skynsamir og voru samningarnir einnig framlag verkafólks til að tryggja stöðugleika í íslensku samfélagi.

Á þeirri forsendu harmar stjórn og trúnaðaráð VLFA það ef Samtök atvinnulífsins taka upp á því að segja samningum upp eins og margt bendir til að verði raunin þessa stundina.

Íslensku verkafólki er fullkunnugt um þá erfiðleika sem íslenskt atvinnulíf á við að etja í kjölfar þeirra hamfara sem riðið hafa yfir Íslenskt efnahagslíf á undanförnum mánuðum.    

Það er hins vegar mat stjórnar og trúnaðarráðs VLFA að ekki sé hægt að fresta launahækkunum til handa þeim allra tekjulægstu, einfaldlega vegna þess að þeir einstaklingar sem eru með hvað lægstu launin blæðir hratt út þessa daganna.  Það er ljóst að íslenskt verkafólk getur ekki undir nokkrum kringumstæðum axlað meiri ábyrgð á íslensku efnahagslífi en það gerði í síðustu kjarasamningum.

Komi hins vegar til þess að forsendunefndin telji í ljósi þungra aðstæðna í efnahagslífi að unnt sé að ná samkomulagi um frestun á endurskoðunarákvæðinu sem telja megi til hagsbóta fyrir félagsmenn, þá er afar mikilvægt að fram fari allsherjaratkvæðagreiðsla á meðal félagsmanna sem vinna eftir umræddum kjarasamningum.

Það er mat stjórnar og trúnaðarráðs VLFA að ekki sé hægt að fresta endurskoðun og umsömdum launahækkunum án þess að slík allsherjaratkvæðagreiðsla fari fram á meðal félagsmanna sem vinna efir þeim kjarasamningum sem um ræðir. Allt annað eru ólýðræðisleg vinnubrögð og verkalýðshreyfingunni til vansa verði slíkt gert.

Akranesi 11. febrúar 2009

 Í gærkvöldi kynnti formaður félagsins nýtt samkomulag um launahækkanir til handa starfsmönnum Norðuráls fyrir starfsmönnum á C og B vakt. Farið var yfir samkomulagið í heild sinni og hverjar hækkanir til handa starfsmönnum verða eftir undirskrift samkomulagsins.

Fundurinn var mjög góður og komu fjölmargar spurningar frá starfsmönnum og virtust starfsmenn almennt vera sáttir með það samkomulag sem gengið var frá þó vissulega sé það einu sinni þannig að alltaf vilji menn ná fram hærra kjarabótum.

Á föstudagskvöldið mun formaður taka tvær síðustu vaktirnar sem eru A og D vakt og kynna samkomulagið fyrir þeim. Ekki er greitt atkvæði sérstaklega um þetta samkomulag þar sem það var hluti af samningi frá árinu 2005. Kjarasamningur starfsmanna Norðuráls verður laus um næstu áramót og er allt eins líklegt að undirbúningur fyrir komandi kjarasamningaviðræður muni hefjast von bráðar.

Í gær náðist samkomulag við forsvarsmenn Norðuráls um þær launahækkanir sem taka eiga gildi hjá starfsmönnum frá og með 1. janúar sl. Samningsaðilar voru búnir að reyna ítrekað að ná saman og var samninganefnd stéttarfélaganna búin að taka ákvörðun um að vísa deilunni til félagsdóms til úrlausnar en eins og áður sagði þá náðist lausn í deilunni í gær.

Í kjarasamningnum frá árinu 2005 er kveðið á um að laun starfsmanna Norðuráls taki að meðaltali sömu breytingum og laun í sambærilegum orkufrekum iðnaði. Ágreiningurinn sneri um það hvernig þetta meðaltal skyldi fundið út og einnig við hvaða fyrirtæki ætti að miða.

Samkomulagið í gær felur það í sér að laun verkamanna hækka að meðaltali um 10,7% upp í 12,5%.  Heildarlaun byrjanda munu því hækka um tæpar 35.000 kr. á mánuði og starfsmaður sem starfað hefur í 10 ár hækkar um 45.126 kr. á mánuði.

Orlofs- og desemberuppbætur hækka úr 212.676 kr. í 252.232 kr. sem er hækkun uppá 39.556 kr.

Rétt er að minna á að forsvarsmenn Norðuráls ákváðu einhliða að koma með hækkun á launum um 3% 1. janúar 2008 umfram kjarasamningsbundar hækkanir og átti sú hækkun að gilda tímabundið til síðustu áramóta.  Forsvarsmenn Norðuráls tilkynntu samninganefnd stéttarfélaganna að áðurnefnd hækkun frá 1. janúar 2008 hefði verið felld niður frá og með 1. janúar 2009.

Samkomulagið byggist á því að grunnlaun byrjanda hækkar úr 156.973 kr, í 167.176 kr. og hámarksbónusinn hækkaður úr 4% í 7,5%.  Meðaltalsbónus á síðasta ári var 3,2% sem er 80% nýtni á bónusum.  Með því að hækka hámarkið á bónusnum þá á hann að geta gefið starfsmönnum 6% ef sama nýtni verður á honum og undanfarin ár.  Það þýðir að bónusinn mun hækka um 2,8% frá því sem verið hefur.  Einnig verður breyting á greiðslu á bónusnum en sá þáttur sem lýtur að öryggisþætti verður greiddur út mánaðarlega en sá þáttur bónusins getur gefið að hámarki 4,1%

Það var mat samninganefndar stéttarfélaganna að ekki væri lengra komist og væri þetta því mun betri leið heldur en að fara með málið fyrir félagsdóm þar sem ekkert er öruggt hvað varðar niðurstöðu félagsdóms og einnig tæki nokkra mánuði að fá niðurstöðu frá dómnum. 

Formaður hvetur félagsmenn sína til að hafa samband vilji þeir fá nánari upplýsingar um samkomulagið og einnig er formaður finna út tíma til að kynna samkomulagið fyrir félagsmönnum sínum.  Mun það verða auglýst fljótlega hvenær kynning verður. 

Formaður fór í vinnustaðaheimsókn í Síldarbræðsluna á Akranesi í gær en þar hefur staðið yfir bræðsla á gulldeplu síðastliðna viku og hafa starfsmenn nú staðið vaktir sleitulaust í 7 daga.

Þetta er ágætis búbót fyrir starfsmenn, en þeir tjáðu formanni að búið væri að landa um 4000 tonnum af gulldeplu á þessari vertíð. Þetta er í fyrsta sinn sem slík afurð er brædd í verksmiðjunni á Akranesi og að sögn starfsmanna hafa verið svolitlir byrjunarörðugleikar á vinnslunni.

Bræðsla á gulldeplu mun að öllum líkindum standa til 15. þessa mánaðar en það er sá tími sem skipin hafa leyfi til veiða á gulldeplu. Vonuðust þeir til að í framhaldinu myndi loðnuvertíð hefjast en eins og staðan er í dag er alls óvíst hvort gefinn verður út loðnukvóti eða ekki.

Eins og fram kom í fréttum í gær þá var verið að landa úr Ingunni AK um 1000 tonnum af gulldeplu þegar tveir starfsmenn sem voru að störfum við löndun urðu fyrir súrefnisleysi í lest skipsins og liðu út af. Má segja að skjót viðbrögð sjúkraflutningamanna og starfsmanna á staðnum hafi bjargað því að ekki fór verr. Samkvæmt upplýsingum sem formaður hefur þá voru löndunarmennirnir fluttir á gjörgæslu í Reykjavík en voru báðir komnir til meðvitundar í gærkvöldi.

Það er óhætt að segja að fundurinn sem Verkalýðsfélag Akraness og bæjaryfirvöld stóðu fyrir í gær hafi heppnast fullkomlega. Bíóhöllin var kjaftfull af fólki og mikill stuðningur var við því að reglugerð fyrrverandi sjávarútvegsráðherra sem heimilar auknar hvalveiðar yrði látin standa.

Fundurinn byrjaði á ávarpi frá formanni Verkalýðfélags Akraness. Sagði hann m.a. þetta hér:

"Það er óhætt að segja að það ríki skelfingarástand í atvinnumálum okkar Íslendinga eftir þær efnahagslegu hamfarir sem hafa riðið yfir íslenskt samfélag á undanförnum vikum og mánuðum.  Í dag eru 13.468 einstaklingar skráðir atvinnulausir á hér á landi og fer þeim ört fjölgandi. Til dæmis gerir Vinnumálastofnun ráð fyrir því að allt að 20.000 manns verði án atvinnu þegar líður á vorið.

Það voru því afar ánægjulegt tíðindi sem bárust 27. janúar síðastliðinn þegar fyrrverandi sjávarútvegsráðherra tilkynnti að gefin hefði verið út reglugerð um auknar hvalveiðar til ársins 2013.  Í þessari reglugerð er veiðiréttarhöfum heimilt að  veiða  100 hrefnur og 150 langreyðar á ári.  Fram hefur komið í fréttum að þessar veiðar geti skilað allt að 300 hundruð nýjum störfum á ársgrundvelli."

Eftir að formaður hafði lokið máli sínu tók bæjarstjóri Akraneskaupstaðar til máls og skoraði hann á sjávarútvegsráðherra að vera ekki með neinn gunguskap og láta áðurnefnda reglugerð standa óhaggaða.

Allir þeir sem tóku til máls, sama hvort það voru þingmenn NV-kjördæmis eða þá núverandi eða fyrrverandi sjávarútvegsráðherrar, voru sammála því að Íslendingar ættu að nýta sínar sjávarauðlindir að gefnu áliti frá Hafrannsóknarstofnun. Með öðrum orðum þá virtust allir vera sammála því að við ættum að hefja auknar hvalveiðar.

Hins vegar sagði núverandi sjávarútvegsráðherra, Steingrímur J. Sigfússon, að hann ætlaði sér að kanna lagalegt gildi þess að fyrrverandi sjávarútvegsráðherra hafi heimilað þessar auknu hvalveiðar á síðustu starfsdögum sínum og dró Steingrímur í efa að ráðherra í starfsstjórn hefði heimild til að setja slíka reglugerð. Hann ætlaði einnig að kalla alla þá hagsmunaaðila sem koma að þessu máli til fundar við sig og vonaðist hann til að niðurstaða myndi liggja fyrir í málinu fljótlega. Hann lofaði þó ekki að það myndi taka einhverja daga, frekar vikur.

Magnús Stefánsson frá Framsóknarflokki sagði að ef Steingrímur drægi það í efa að Einar K. Guðfinnsson hefði haft heimild til að gefa þessa reglugerð út þá væri ekki nema eitt að gera fyrir Steingrím, það er að gefa út nýja reglugerð á sömu forsendum.

Kristinn H. Gunnarsson Frjálslynda flokki sagði að ef sjávarútvegsráðherra vogaði sér að afturkalla áðurnefnda reglugerð þá yrði lögð fram vantrauststillaga á Steingrím J. Sigfússon.

Herdís Þórðardóttir, Sjálfstæðisflokki, sagði að það væri skýlaus réttur okkar að nýta okkar sjávarauðlindir og því væri það glapræði ef núverandi sjávarútvegsráðherra myndi afturkalla þessa reglugerð.

Sturla Böðvarsson lýsti yfir fullum stuðningi við þessa ákvörðun Einars K Guðfinnssonar og það gerði einnig Guðjón Arnar Kristjánsson og tóku þeir sterkt til orða um að það væri skylda okkar að nýta okkar sjávarauðlindir með skynsömum hætti.

Guðbjartur Hannesson frá Samfylkingu gagnrýndi fyrrverandi sjávarútvegsráðherra fyrir það hvernig hann stóð að þessari reglugerð og sagðist ekki skilja hvers vegna hann hefði ekki fyrir löngu verið búinn að heimila auknar hvalveiðar. Með því að hafa ekki verið búinn að því hefði hann stefnt málinu í hættu. En hann vildi ítreka það að hann væri talsmaður þess að hefja hvalveiðar og nýta þá stofna í samráði við veiðiráðgjöf Hafrannsóknarstofnunar.

Jón Bjarnason sagði að við ættum að veiða og nýta en það væri mikilvægt að þetta væri gert í sátt og samlyndi við ferðaþjónustuna í landinu.

Sent var beint út frá fundinum í tíu-fréttum RUV í gær, sjá hér.

Einnig var viðtal við formann í síðdegisútvarpi rásar 2, hlusta hér

Hægt er að lesa ræðu formanns í heild sinni með því að smella á meira.

Fundarstjóri, sjávarútvegsráðherra þingmenn, fulltrúi Hafrannsóknarstofnunnar, ágætu fundarmenn.

Það er óhætt að segja að það ríki skelfingarástand í atvinnumálum okkar Íslendinga eftir þær efnahagslegu hamfarir sem hafa riðið yfir íslenskt samfélag á undanförnum vikum og mánuðum.  Í dag eru 13.468 einstaklingar skráðir atvinnulausir á hér á landi og fer þeim ört fjölgandi. Til dæmis gerir Vinnumálastofnun ráð fyrir því að allt að 20.000 manns verði án atvinnu þegar líður á vorið.

Það voru því afar ánægjulegt tíðindi sem bárust 27. janúar síðastliðinn þegar fyrrverandi sjávarútvegsráðherra tilkynnti að gefin hefði verið út reglugerð um auknar hvalveiðar til ársins 2013.  Í þessari reglugerð er veiðiréttarhöfum heimilt að  veiða  100 hrefnur og 150 langreyðar á ári.  Fram hefur komið í fréttum að þessar veiðar geti skilað allt að 300 hundruð nýjum störfum á ársgrundvelli. 

Það liggur fyrir að hrefnuveiðimenn hafa í hyggju að stunda veiðar og vinnslu frá Akranesi, en slíkt myndi að sögn hrefnuveiðimanna skapa allt að 30 ný störf  í okkar samfélagi og veitir ekki af þegar um 300 manns eru nú án atvinnu í bæjarfélaginu. 

Það er ljóst að verði hafnar hvalveiðar á grundvelli þeirrar reglugerðar sem hefur verið gefin út myndi það þýða gríðarlega innspýtingu fyrir atvinnulífið hér á Vesturlandi og það mun einnig skapa þjóðinni umtalsverðar útflutningstekjur.

Það var því sorglegt að heyra í fulltrúum nýrrar ríkisstjórnar og það strax á meðan viðræður um stjórnarmyndun áttu sér stað að það yrði eitt af fyrstu verkum nýrrar ríkisstjórnar að endurskoða þá ákvörðun að heimila hvalveiðar og það var gefið sterklega í skyn að heimildin um auknar hvalveiðar yrði jafnvel afturkölluð.

Í fyrradag samþykkti síðan ríkisstjórnin tillögu Steingríms J. Sigfússonar sjávarútvegsráðherra um að hvalveiðiréttarhöfum yrði send formleg viðvörun um að ákvörðun fyrri ríkisstjórnar hafi verið tekin til endurskoðunar.  Sagði sjávarútvegsráðherra að viðvörunin væri send út  til að tryggja að umræddir veiðiréttarhafar ættu ekki bótarétt á hendur ríkinu.

Þessi samþykkt ríkisstjórnar er með öllu óskiljanleg sérstaklega í ljósi þess að ný ríkisstjórn hefur sagt að eitt af brýnustu verkefnum hennar sé að koma tannhjólum atvinnulífsins að stað aftur og koma í veg fyrir stóraukið atvinnuleysi. 

Í starfi mínu sem formaður í Verkalýðsfélagi Akraness fæ ég oft í viku til mín félagsmenn sem hafa misst atvinnu sína og það er oft nöturlegt að sjá þann ótta,vonleysi og angist sem skín úr andlitum þessara einstaklinga.  Því spyr ég, hvernig geta menn svo mikið sem leyft sér að hugsa um að slá allt að 300 störf út af borðinu í því skelfilega ástandi sem nú ríkir á íslenskum vinnumarkaði?

Ágætu fundarmenn

Það eina sem ég get gagnrýnt fyrrverandi sjávarútvegsráðherra fyrir í þessu máli er að hafa ekki verið búinn að tilkynna auknar hvalveiðar mikið fyrr.  Hann hefði til að mynda getað gert það samhliða tilkynningunni um 30 tonna aukningu í þorski. Aðalmálið hins vegar er að það búið er að heimila auknar veiðar á hval, íslensku þjóðinni til hagsbóta. 

Hver eru rök þeirra sem ekki vilja auknar hvalveiðar?  Jú, þau eru þau að hvalveiðar geti skaðað ferðaþjónustuna hér á landi.  Þessi rök halda ekki, einfaldlega vegna þess að frá því við hófum veiðar á hrefnu árið 2003 hefur verið gríðarleg aukning á ferðamönnum ár frá ári.  Það er búið að veiða uppundir 300 hvali frá árinu 2003, samt fjölgar erlendum ferðamönnum stöðugt. Það er mat mitt að hvalaskoðun og hvalveiðar geti vel farið saman ef báðir aðilar sýna hvorum öðrum fullan skilning.

Ég man hér á árum áður, þegar vinnsla var í Hvalstöðinni í Hvalfirði, þann mikla fjölda erlendra ferðamanna sem þangað komu og oft og tíðum voru fimm eða sex rútur fullar af erlendum ferðamönnum að skoða hvalskurð.

Önnur rök sem heyrst hafa eru þau að hvalveiðar skaði okkar fiskmarkaði erlendis. Við þessu er ekki nema eitt að segja: Samtök fiskvinnslustöðva og Landssamband íslenskra útvegsmanna  styðja þessar hvalveiðar. Það eru þessir aðilar sem eru að selja sínar afurðir á erlendum fiskmörkuðum og ef þeir hafa ekki áhyggjur af sínum viðskiptamörkuðum þá er ástæðulaust að vera með einhverja forræðishyggju í þeim efnum.

Þriðju rökin eru þau að ekki sé til markaður fyrir þessar afurðir.  Því vísa þeir aðilar sem munu stunda þessar veiðar alfarið á bug og telja að þeir geti hæglega selt allar sínar afurðir bæði á erlendum mörkuðum og á innlendum markaði.  Það er engin ástæða né rök til að draga orð þeirra í efa.

Að sjálfsögðu eigum við að nýta allar okkar sjávarauðlindir að gefnu áliti frá Hafrannsóknarstofnun.  Það er skýlaus réttur okkar sem sjálfstæðar þjóðar að nýta okkar auðlindir á skynsaman hátt.

Kæru fundarmenn

Rétt er minna menn á að einstaka þingmönnum sem nú eru orðnir ráðherrar hefur verið tíðrætt um að það eigi að viðhafa lýðræðisleg vinnubrögð í íslensku samfélagi og þessir sömu aðilar hafa kallað eftir því að hlustað sé á þjóðina

Málið er einfalt, það liggur fyrir að hagsmunaaðilar vítt og breitt um samfélagið hafa lýst yfir fullum stuðningi við þessa ákvörðun fyrrverandi sjávarútvegsráðherra.  Þessu til viðbótar var birt skoðanakönnun í fyrradag sem Sjávarnytjar lét gera, þar kom fram að um 70% þjóðarinnar styðja hvalveiðar og allt bendir til þess að þingmeirihluti sé fyrir þeirri ákvörðun sem nú liggur fyrir. Á þeirri forsendu verður fróðlegt að sjá hvort þeir aðilar sem nú stjórna hlusti ekki örugglega á þjóðina, vilji þjóðarinnar er skýr.

Ágætu fundarmenn

Það er hlutverk Verkalýðsfélags Akraness að verja öll þau störf sem eru á okkar félagssvæði og það er einnig hlutverk félagsins að leggja okkar af mörkum til þess að störfum fjölgi. Á þeirri forsendu styður Verkalýðsfélag Akraness þessa ákvörðun heils hugar.  Einfaldlega vegna þess að auknar hvalveiðar stuðla að endurreisn íslensks efnahagslífs.

Að lokum skora ég á sjávarútvegsráðherra að láta reglugerðina frá 27 janúar sl. um auknar hvalveiðar standa óhaggaða.  Takk fyrir….