Mótmælendur, trúðar, ungabörn, draugar, bændur og búalið eru á meðal þeirra furðuvera sem litið hafa inn á skrifstofu félagsins í dag, öskudag, og skemmt starfsfólki með söng og einstaka dansspori. Þeim hefur að sjálfsögðu verið vel launað fyrir vikið.

Hér má sjá nokkrar myndir sem teknar voru á skrifstofunni í dag.

Boðaður hefur verið fundur fimm félaga innan Así vegna erindis sem borist hefur frá forseta ASÍ þar sem félögin eru spurð hvort þau óski að segja sig frá samfloti aðildarfélaga ASÍ.

Formenn viðkomandi félaga eru nú að leita samráðs við samninganefndir félaganna og samverkafólk sitt hjá félögunum.

Fundurinn í dag verður símafundur en búast má við að félögin haldi fund á morgun eða fimmtudag þar sem formenn og aðrir í forystu félaganna hittist til að ræða óvænt erindi forseta ASÍ.

Rétt í þessu var að ljúka kynningarfundi um nýgerðan kjarasamning starfsmanna Sementsverksmiðjunnar. Að aflokinni kynningu voru greidd atkvæði um samninginn og er skemmst frá því að segja að hann var samþykktur með öllum greiddum atkvæðum nema einu.

Fram kom hjá fundarmönnum að þeir voru almennt ánægðir með samninginn og þá sérstaklega í ljósi þess ástands sem nú ríkir á íslenskum vinnumarkaði.

Eins og flestir vita þá gaf sjávarútvegsráðherra á dögunum út 15.000 tonna rannsóknarloðnukvóta en í hlut HB Granda komu um 2.800 tonn.  Í frétt á heimasíðu HB Granda kemur fram að áhöfnin á Lundey NS hafi á föstudaginn sl. haldið til loðnuveiða út af Reykjanesi og fengust þar 1.100 til 1.200 tonn af loðnu í þremur köstum.

Einnig kom fram í fréttinni að skipið væri á leiðinni til Vopnafjarðar þar sem loðnan fer til hrognatöku, í frystingu og bræðslu.  Það kom líka fram á heimasíðunni að allur aflinn fari til hrognatöku hjá fiskiðjuveri HB Granda á Vopnafirði. 

Þessa stundina er verið að landa úr Lundey NS á Vopnafirði, Faxi RE er á leiðinni með loðnu til hrognatöku á Vopnafirði og Ingunn Ak er að veiðum við Reykjanesið þessa stundina.

Formaður félagsins gerir að sjálfsögðu ekki athugasemdir við það að fyrirtækið leiti allra leiða til að hagræða í rekstri sínum og ef það er styttra fyrir uppsjávarskip fyrirtækisins að sigla með aflann til vinnslu annars staðar en á Akranesi þá er ekkert við því að segja.  Enda eiga hagræðissjónarmið fyrirtækisins ávalt að vera höfð að leiðarljósi þegar tekin er ákvörðun um hvar vinna á aflann. 

Forsvarsmenn HB Granda verða hins vegar að útskýra það fyrir okkur Skagamönnum á hvað forsendum þeir taka ákvörðun um að láta skip fyrirtækisins sigla með aflann í 35 tíma og það bara aðra leiðina til Vopnafjarðar til hrognatöku.

Eins og áður hefur komið fram þá er loðnan að veiðast við Reykjanesið og það tekur skipin einungis 2 tíma að sigla með aflann á Akranes.  Samkvæmt upplýsingum sem formaður hefur aflað sér þá er allt klárt í vinnslunni hér á Akranesi til að hefja hrognatöku þannig að það er ekki skýringin á því að siglt er með aflann til Vopnafjarðar.

Formaður spyr: hvaða hagræðissjónarmið ráða því að skip fyrirtækisins eru látin sigla með afla sinn í 35 tíma og það með ærnum olíukostnaði?  Það er alveg ljóst að nokkrar milljónir myndu sparast í olíukostnað yrðu skipin látin landa á Akranesi. 

Það hljóta að vera einhverjar eðlilegar skýringar á þessari ákvörðun forsvarsmanna HB Granda en því miður sér formaður félagsins þær ekki. Óhagræðið æpir á fólk þegar það sér skip fyrirtækisins á veiðum örfáar mílur frá Akranesi og þau síðan látin sigla í 35 tíma með aflann til vinnslu. Á þeirri forsendu er mikilvægt að skýring komi á þessari ákvörðun forsvarsmanna HB Granda

Tap varð á rekstri Century, móðurfélags Norðuráls á Grundartanga, á síðasta ári. Var það fyrst og fremst vegna reiknaðra liða, svo sem skatta- og afleiðusamninga. 

Hagnaður var hins vegar af reglubundnum rekstri, að sögn Ágústar Hafberg framkvæmdastjóra viðskiptaþróunar og samskipta hjá Norðuráli.  Hann segir að rekstur Norðuráls á Grundartanga hafi gengið vel í fyrra. Þar voru framleidd 272.000 tonn af áli og var útflutningsverðmæti þess ríflega 60 milljarðar króna.

“Veruleg verðlækkun sem orðið hefur á áli hefur að sjálfsögðu mikil áhrif á rekstrargrundvöll álvera og hefur Century þegar hætt framleiðslu í einu álveri í Bandaríkjunum sem komið var til ára sinna og því ekki lengur samkeppnisfært við núverandi áðstæður. 

 Staða Norðuráls er hinsvegar mjög traust enda er reksturinn á Grundartanga á heimsmælikvarða.  Brugðist hefur verið við erfiðum aðstæðum með lækkun kostnaðar og hagræðingu en engin áform eru uppi um niðurskurð framleiðslu hjá Norðuráli,” segir Ágúst.

Samninganefnd starfsmanna Sementsverksmiðjunnar skrifaði undir framlengingu á kjarasamningi starfsmanna Sementsverksmiðjunnar í gær í húsakynnum ríkissáttasemjara.  Samningurinn gildir frá 1. febrúar 2009 til 31.desember 2010.

Frá 1. febrúar 2009 hækka launataxtar um 3,25% og frá og með 1. ágúst 2009 munu launataxtar hækka  í kringum 4%.  1. janúar 2010 munu mánaðarlaun hækka um 2,5%

Orlofs- og desemberuppbætur munu hækka úr 169.468 kr. í 202.000 eða um 32.532 kr. á ári.  Einnig verður greidd sérstök eingreiðsla uppá 20.000 kr. við næstu launaútborgun eftir gildistöku samningsins.

Á milli 60 og 70 manns mættu á fræðslufund um efnahagsmál og framtíðarhorfur í íslensku samfélagi sem haldinn var í gær miðvikudaginn 18. febrúar í safnaðarheimilinu Vinaminni á Akranesi.  Fundurinn hófst  kl 20:00 og lauk ekki fyrir kl 22:30.

Það voru Borgarfjarðarprófastsdæmi og Verkalýðsfélag Akraness sem efndu til þessa fræðslufundar um efnahagsmál og horfur á Íslandi og var fundurinn öllum opinn.

Þeir Vilhjálmur Bjarnason formaður félags fjárfesta og Stefán Einar Stefánsson guðfræðingur og viðskiptasiðfræðingur fluttu erindi á fundinum.  Erindi Vilhjálms fjallaði um efnahagsmál þjóðarinnar - stöðuna, tilurðina og horfurnar, erindi Stefáns var um Mammon, Guð og manneskjan og viðskiptasiðferði.

Vilhjálmur Bjarnason sagði að ljóst væri að allir eftirlitsaðilar hefðu brugðist hlutverki sínu hvað varðar eftirlit með fjármálakerfinu.  Hann sagði einnig mjög mikilvægt væri að fram færi uppgjör vegna þess hruns sem orðið hefði samhliða hruni bankanna og miklar væntingar væru bundnar við ráðningu sérstaks saksóknara sem á að rannsaka hvort lögbrot hafi verið framið í kjölfar bankahrunsins.  Vilhjálmur sagðist aðspurður ekki vera í neinum vafa að lögbrot hafi verið framið í starfsemi bankanna. 

Stefán Einar Stefánsson viðskiptasiðfræðingur fjallaði að stórum hluta um siðferði í viðskiptum í sínu erindi.  Erindi Stefáns var afar fróðlegt og kom til að mynda fram hjá Stefáni að hann taldi það hafa verið mikil mistök hjá forseta Íslands að neita að staðfesta fjölmiðlalögin á sínum tíma.  Stefán taldi að það væri afar óheppilegt að stór hluti fjölmiðla í landinu væru á hendi sömu aðila. 

Eftir að þeir félagar voru búnir að flytja sín erindi þá var opnað fyrir fyrirspurnir og komu fjölmargar spurningar til þeirra Vilhjálms og Stefáns sem þeir svöruðu eftir bestu getu og vitund.

Í lokin sagði sr. Þorbjörn Hlynur Árnason prófastur að mjög mikilvægt væri að þjóðin yrði að geta fyrirgefið og sátt þyrfti að nást íslensku samfélagi.  En það kom einnig fram í hans lokaávarpi að kalla þyrfti fram sannleikann varðandi hrun íslensks efnahagslífs og þeir aðilar sem hafa brotið lög verða að sæta ábyrgð.

Fundarstjórar voru Vilhjálmur Birgisson, formaður Verkalýðsfélags Akraness og sr. Þorbjörn Hlynur Árnason prófastur.

Steingrímur J. Sigfússon sjávarútvegsráðherra tilkynnti í sjávarútvegsráðuneytinu í dag að ákvörðun Einars K. Guðfinnssonar, forvera síns, standi óbreytt fyrir yfirstandandi ár. Á hinn bóginn tók hann af öll tvímæli um að hvalveiðimenn geti ekki gengið að því sem vísu að ákvörðun fyrrverandi ráðherra standi hvað varðar veiðar næstu fjögur ár.

Þetta verða að teljast afar jákvæð tíðindi og ljóst að með þessari ákvörðun mun störfum hér á Vesturlandi fjölga töluvert og ekki veitir af í þeim hremmingum sem atvinnulífið á við að etja þessa daganna.  Það er einnig ljóst að sú harða barátta sem margir hagsmunaaðilar hafa háð að undanförnu hefur skilað árangri. 

Í gær fjallaði formannafundur ASÍ um beiðni SA um frestun á endurskoðun kjarasamninga til sumars og þar með frestun launahækkana. Fundurinn var líflegur og stóð í fjórar klukkustundir.  Skoðanir voru skiptar en þó virtist meirihluti fundarmanna vera fylgjandi frestun vegna þeirrar alvarlegu stöðu sem efnahags- og atvinnumál þjóðarinnar eru í. 

Fjörugar umræður sköpuðust á fundinum og voru það einkum formenn nokkurra félaga á landsbyggðinni sem höfnuðu hugmyndinni um frestun algerlega.  Þeir vildu launahækkanir 1. mars eins og samningar kvæðu á um.  Það var mat þeirra formanna sem voru á móti því að fresta launahækkunum að ekki væri grundvöllur fyrir því að fresta hækkunum til handa þeim sem starfa á lágmarkstöxtum.

Í máli formanns Verkalýðsfélags Akraness á fundinum í gær kom fram að það væri með öllu óviðunandi að lágmarkslaun væru lægri en atvinnuleysisbætur og það væri eitthvað sem þyrfti klárlega að lagfæra við þessa endurskoðun.

Því miður náðu sjónarmið þeirra stéttarfélaga sem vildu fresta umræddum launahækkunum fram að ganga, en eins áður hefur komið fram þá vildi meirihluti þeirra formanna sem sátu fundinn fresta endurskoðun og launahækkunum fram á sumar.

Afstaða stjórnar og trúnaðarráðs Verkalýðsfélags Akraness kemur skýrt fram í ályktun sem félagið samþykkti á fundi sínum á miðvikudaginn í síðustu viku um þetta mál. Í þeirri ályktun kom meðal annars þetta fram:

Stjórn og trúnaðarráð Verkalýðsfélags Akraness vill að staðið verði við þau  ákvæði aðalkjarasamninga  er varða launahækkanir 1. mars nk. þó svo að forsendur samningsins er lúta að verðbólgumarkmiði samningsins séu kolbrostnar 

Stjórn og trúnaðarráð Verkalýðsfélags Akraness krefst þess að Samtök atvinnulífsins standi við þau ákvæði aðalkjarasamninga  er varða launahækkanir 1. mars nk.  Kjarasamningarnir sem undirritaðir voru 17. febrúar sl. voru hófstilltir og skynsamir og voru samningarnir einnig framlag verkafólks til að tryggja stöðugleika í íslensku samfélagi.

Á þeirri forsendu harmar stjórn og trúnaðaráð VLFA það ef Samtök atvinnulífsins taka upp á því að segja samningum upp eins og margt bendir til að verði raunin þessa stundina.

Íslensku verkafólki er fullkunnugt um þá erfiðleika sem íslenskt atvinnulíf á við að etja í kjölfar þeirra hamfara sem riðið hafa yfir Íslenskt efnahagslíf á undanförnum mánuðum.    Það er hins vegar mat stjórnar og trúnaðarráðs VLFA að ekki sé hægt að fresta launahækkunum til handa þeim allra tekjulægstu, einfaldlega vegna þess að þeir einstaklingar sem eru með hvað lægstu launin blæðir hratt út þessa daganna.  Það er ljóst að íslenskt verkafólk getur ekki undir nokkrum kringumstæðum axlað meiri ábyrgð á íslensku efnahagslífi en það gerði í síðustu kjarasamningum.

Komi hins vegar til þess að forsendunefndin telji í ljósi þungra aðstæðna í efnahagslífi að unnt sé að ná samkomulagi um frestun á endurskoðunarákvæðinu sem telja megi til hagsbóta fyrir félagsmenn, þá er afar mikilvægt að fram fari allsherjaratkvæðagreiðsla á meðal félagsmanna sem vinna eftir umræddum kjarasamningum.

 Á fundinum í gær lögðu Verkalýðsfélag Akraness, Framsýn á Húsavík, Verkalýðsfélag Vestfirðinga, Afl - starfsgreinafélag Austurlands og Drífandi í Vestmannaeyjum fram tillögu um að ef gert yrði samkomulag við Samtök atvinnulífsins um frestun á hækkun launa 1. mars nk. þá skyldi sú frestun lögð til atkvæðagreiðslu á meðal allra félagsmanna sem vinna eftir þeim samningum sem um ræðir.  Því miður taldi forseti ASÍ fundinn ekki geta afgreitt umrædda tillögu og var tillögunni því vísað til samninganefndar ASÍ.

Það verður því fróðlegt að sjá hvort samninganefnd ASÍ afgreiðir þessa frestun án þess að leggja hann í atkvæðagreiðslu á meðal félagsmanna sem starfa eftir þeim samningum sem um ræðir.