Landsbyggðafélögin höfðu rétt fyrir sérEnn fjölgar í hópi þeirra fyrirtækja sem hafa tekið ákvörðun um að láta áður umsamdar launahækkanir upp á kr. 13.500 til þeirra sem vinna á töxtum koma til framkvæmda frá 1. mars sl.

Formaður félagsins heyrði í forsvarsmönnum Brims í  morgun og kom fram í máli þeirra að þeir hafi tekið ákvörðun um að láta áður umsamdar launahækkanir taka gildi eins og kjarasamningurinn kveður á um.  Formaður félagsins hefur heyrt í fulltrúm nokkra fyrirtækja í morgun og eru nokkur fyrirtæki að íhuga það sterklega að koma með áður umsamdar launahækkanir sem áttu að taka gildi 1. mars.

Það er frábært að sjá að sú mikla vinna sem Verkalýðsfélag Akraness og hin fimm landsbyggðarfélögin hafa lagt í þessi mál er að skila íslensku verkafólki vítt og breytt um landið ávinningi. 

Verkalýðsfélag Akraness fagnar þessari ákvörðun forsvarsmanna Brims innilega en Brim á og rekur fiskþurrkunina Laugafisk hér á Akranesi þar sem starfa um 30 manns. Einnig er Brim með starfsemi víðar um land m.a. á Akureyri, á Grenivík og á Laugum í Reykjadal. Samkvæmt heimasíðu fyrirtækisins starfa alls um 200 manns við landvinnslu hjá fyrirtækinu á landsvísu.

Rétt er að minna á að forsvarsmenn Brims létu starfsmenn sína njóta góðs af góðri afkomu vegna ársins 2006 þegar þeir greiddu starfsfólki sínu 125.000 kaupauka í janúar 2007 og er það til fyrirmyndar þegar fyrirtæki hafa þann skilning að ekkert fyrirtæki skilar góðu starfi nema með góðu starfsfólki.

Núna liggur fyrir að sú barátta sem Verkalýðsfélag Akraness og fimm önnur landsbyggðarfélög hafa staðið að, þ.e.a.s. að þau fyrirtæki sem hefðu fjárhagslega burði til, myndu standa við þá samninga sem undirritaðir voru 17. febrúar 2008. Þau fyrirtæki sem nú þegar hafa tekið ákvörðun um að greiða þessar hækkanir eru eins og áður hefur komið fram: Hrognavinnsla Vignis G. Jónssonar, HB Grandi, Brim og fyrirtæki á Grundartangasvæðinu sem ekki vill láta nafns síns getið.

Á þessu sést að landsbyggðarfélögin höfðu klárlega rétt fyrir sér þegar þau bentu á að það væru svo sannarlega til fyrirtæki sem gætu og vildu standa við gerða kjarasamninga og á þeirri forsendu harmar félagið þá ákvörðun samninganefndar ASÍ að hafa samþykkt að fresta þeim launahækkunum sem áttu að taka gildi 1. mars sl.

Formaður Verkalýðsfélags Akraness gerir þá skýlausu kröfu að samkomulaginu við Samtök atvinnulífsins verði tafarlaust rift enda er það komið í ljós að það voru stórkostleg mistök að fresta áður umsömdum launahækkunum enda eru fyrirtæki vítt og breytt um landið sem hafa fjárhagslega burði til að standa við gerða kjarasamninga.

Rétt í þessu var Ísak Ak 67 að leggjast upp að bryggju með fullfermi, en Ísak er 11,2 tonn að stærð.  Að sögn þeirra félaga Eiðs Ólafssonar og Kristófers Jónssonar þá reiknuðu þeir með að aflinn væri á bilinu 12 til 14 tonn af slægðu, sem gerir um 18 tonn uppúr sjó. Þeir félagar hirða einnig hrogn og lifur og giskuðu þeir félagar á að hrognin væru um 600 kg.

Á sama tíma kom Ebbi Ak að landi með rúm 10 tonn af slægðu sem verður að teljast mjög góður afli.

Gríðarleg vinna liggur að baki 14 tonna róðri þegar einungis er um tvo skipverja er um að ræða, en það þekkja allir þeir sem stundað hafa sjómennsku á smábátum. Með öðrum orðum, það þarf algjöra jaxla til stunda smábátasjómennsku og það í svona landburði eins og raunin er þessa daganna.

Þeir félagar á Ísaki og hásetinn á Ebba Ak eru félagsmenn í sjómannadeild Verkalýðsfélags Akraness.  

Formaður félagsins hefur í morgun haft samband við nokkur fyrirtæki vegna þeirrar ákvörðunar HB Granda að koma strax með áður umsamdar launahækkanir til handa starfsfólki.

Eitt af þeim fyrirtækjum sem formaður hafði samband við í morgun er að skoða hvort fyrirtækið muni flýta áður umsömdum launahækkunum til handa starfsmönnum og mun niðurstaða í því máli liggja fyrir innan örfárra daga.

Það er skemmst frá því að segja að þegar að haft var samband við hrognavinnslu Vignis G. Jónssonar á Akranesi þá var formanni tjáð að fyrirtækið hefði tilkynnt starfsmönnum sínum í síðustu viku að áður umsamdar launahækkanir myndu taka gildi frá og með 1. mars sl. eins og samningar kváðu á um.

Stjórn Verkalýðsfélags Akraness vill taka ofan fyrir forsvarsmönnum þessa góða rótgróna fjölskyldufyrirtækis þar sem starfa nú um 30 manns. Ljóst er að þessi ákvörðun forsvarsmanna fyrirtækisins um launahækkun mun koma því góða starfsfólki sem þar starfar klárlega til góða.

Stjórn Verkalýðfélags Akraness vill halda áfram að skora á öll fyrirtæki sem hafa fjárhagslega burði til að standa við áður umsamdar launahækkanir, að láta þær taka gildi strax.

Það er ljóst að til eru fyrirtæki sem standa vel og hafa, eins og Verkalýðfélag Akraness og 5 önnur landsbyggðarfélög hafa bent á, alla burði til að standa við kjarasamninginn sem gerður var 17. febrúar 2008. Nú þegar hafa tvö þeirra brugðist snarlega við og hækkað laun síns fólks. Ljóst er að fyrirtæki eru hvert af öðru að svara kalli Verkalýðsfélags Akraness um að standa við þann samning og ljóst að sú mikla vinna sem félagið hefur lagt í þessi mál er að skila árangri, íslensku verkafólki til hagsbóta.

Rétt í þessu var að ljúka fundi með forstjóra HB Granda, starfsmönnum fyrirtækisins á Akranesi og formanni Verkalýðsfélags Akraness. Eins og fram hefur komið í fréttatilkynningu þá hefur stjórn HB Granda ákveðið að láta áður umsamdar launahækkanir upp á 13.500 kr. taka gildi eins og samningurinn kvað á um.

Formaður Verkalýðsfélags Akraness sagði á fundinum að hann fagnaði innilega þessari ákvörðun forsvarsmanna HB Granda og benti á að þetta væri það sem félagið hefði farið fram á þegar að í ljós hefði komið að fyrirtækið væri að skila ágætis afkomu.

Það fór ekki á milli mála að starfsmenn fyrirtækisins voru afskaplega ánægðir með þessi málalok og endurspeglaðist það í lófaklappi sem fylgdi í kjölfarið á tilkynningu um að laun starfsmanna myndu hækka eins og kjarasamningar kvæðu á um.

Ljóst er að sú vinna sem Verkalýðsfélag Akraness hefur lagt í þetta mál hefur nú skilað starfsmönnum fyrirtækisins umtalsverðum ávinningi.

Félagið sendi stjórn HB Granda bréf þar sem félagið fagnaði góðri afkomu fyrirtækisins og skoraði jafnframt á stjórn fyrirtækisins að koma með áður umsamdar launahækkanir til handa starfsmönnum í ljósi góðrar afkomu. Hægt er að lesa bréfið hér.

Verkalýðsfélag Akraness var fyrst allra félaga til að fjalla um þetta mál þann 12. mars sl. og það var gríðarlega ánægjulegt og jákvætt að finna þann mikla stuðning sem félagið hefur fengið í baráttunni í þessu máli enda hefur þessi barátta skilað fiskvinnslufólki sem starfar hjá HB Granda launahækkunum sem munu koma því til góða.

Stjórn Verkalýðsfélags Akraness vill skora á fyrirtæki sem eru vel sett að taka ákvörðun forsvarsmanna HB Granda til fyrirmyndar og láta áður umsamdar launahækkanir taka gildi strax, enda var tilgangur Verkalýðsfélags Akraness í þessu máli einvörðungu sá að bæta kjör síns fólks.

Að lokum vill félagið ítreka þakklæti til forsvarsmanna HB Granda fyrir að láta það góða starfsfólk sem hjá þeim starfar njóta ávinning af góðri afkomu fyrirtækisins og er þetta farsæll endir á þessu máli.

Hægt er að skoða myndir frá fundinum í dag með því að smella hér.

Fundur formanna aðildarfélaga Starfsgreinasambands Íslands sem haldinn var í dag skorar á HB Granda að láta launahækkanir upp á 13.500 krónur koma strax til framkvæmda.

Einnig  hvetur Formannafundurinn öll fyrirtæki sem standa vel, að láta launataxtahækkanirnar koma til framkvæmda strax.

Fram kom í máli formanns að hann væri afar ósáttur með ályktun frá miðstjórn ASÍ frá því í gær.  Í þeirri ályktun kemur meðal annars fram að miðstjórnin skori á HB Granda að draga arðgreiðslunar til baka ella greiða starfsfólki áður umsamdar launahækkanir án tafar. 

Að miðstjórn ASÍ skuli leggja málið upp með þeim hætti að ef ekki verði greiddur út arður til hluthafa þá þurfi ekki að greiða starfsmönnum áður umsamdar launahækkanir er óskiljanleg nálgun.  Rædd var við formann félagsins í morgunfréttum rúv í morgun hægt að hlusta hér

Formaður Verkalýðsfélags Akraness sagði einnig á formannafundinum í dag að það væri gríðarlega jákvætt að HB Grandi væri að skila hagnaði uppá 2,3 milljarða og á þeirri forsendu ætti fyrirtækið að greiða áður umsamdar launahækkanir til handa starfsmönnum. 

Líflegar og góðar umræður urðu á fundinum í dag og mikil samstaða um að álykta um málið. Fundurinn samþykkti einróma eftirfarandi ályktun:

„Sú ávörðun stjórnar HB Granda, að leggja til að greiða hluthöfum 8% arð er forkastanleg og óásættanleg með öllu í því ástandi sem nú ríkir. SGS skorar á fyrirtækið að láta launahækkanir upp á 13.500 krónu koma strax til framkvæmda.

Vissulega eru til fyrirtæki, eins og HB Grandi, sem vel geta staðið undir þeim kjarabótum sem hefðu komið til framkvæmda 1. mars s.l. ef kjarasamningar hefðu verið framlengdir. Formannafundurinn hvetur þess vegna þau fyrirtæki sem standa vel, að láta launataxtahækkanirnar koma til framkvæmda strax.

Launafólk á Íslandi hefur ekki vikist undan því að bera ábyrgð í samfélaginu. Á sama hátt krefst formannafundurinn þess að atvinnulífið í landinu, með samtök sín í farabroddi, axli einnig samfélagslega ábyrgð.“

Í gær var viðtal við formann félagsins í Íslandi síðdegis á Bylgjunni. Til umfjöllunar var starfsemi lífeyrissjóðanna og þau ofurlaun sem forstjórar, framkvæmdastjórar og stjórnarformenn sumra sjóðanna hafa fengið greitt fyrir störf sín. Stjórn Verkalýðsfélags Akraness hefur oft fjallað um málefni lífeyrissjóðanna á stjórnarfundum og lagt fram gagnrýni bæði á áðurnefnd ofurlaun og einnig aðkomu atvinnurekenda að stjórnum sjóðanna.   Það er mat stjórnar VLFA að atvinnurekendur eigi ekkert með að véla með lífeyri verkafólks og ómögulegt sé að treysta því að fjárfestingarstefna sjóðanna litist ekki af setu atvinnurekenda í stjórnum þeirra. Einnig fjallaði formaður um málefni HB Granda og fyrirhugaðar arðgreiðslur til hluthafa. Hægt er að hlusta á viðtalið hér.

Í kvöldfréttum Stöðvar 2 í gær var einnig fjallað um fyrirhugaðar arðgreiðslur HB Granda og rætt við Aðalstein Baldursson sviðsstjóra matvælasviðs Starfsgreinasambandsins og formann Framsýnar á Húsavík þar sem hann segir m.a. HB Granda eiga að sjá sóma sinn í því að hætta við fyrirhugaða arðgreiðslu og láta hana þess í stað renna til starfsmanna í formi launahækkunar. Hægt er að horfa á fréttina hér.

Eins og fram hefur komið hér á heimasíðunni þá var Verkalýðsfélag Akraness ásamt fimm öðrum landsbyggðarfélögum algjörlega ósammála meirihluta verkalýðshreyfingarinnar að fresta áður umsömdum launahækkunum sem áttu að taka gildi 1. mars sl.

Forseti ASÍ boðaði til tveggja funda með formönnum aðildarfélaga Alþýðusambandsins til að fjalla um það hvort fresta ætti endurskoðun og umsömdum launahækkunum og lögðust sex landsbyggðarfélög algerlega gegn því að áðurnefndum launahækkunum yrði frestað.

Rök Verkalýðfélags Akraness og hinna fimm landsbyggðarfélaganna voru þau að til væru fyrirtæki sem klárlega hefðu borð fyrir báru til að standa við þær hækkanir sem áttu að taka gildi 1. mars sl. Bentu félögin á að þau fyrirtæki sem störfuðu í útflutningi, t.d. fiskvinnslan, gætu vel komið með 13.500 kr. taxtahækkun til handa sínu fólki.

Því miður var ekki hljómgrunnur á meðal meirihluta verkalýðshreyfingarinnar fyrir þessum rökum og á þeirri forsendu gekk samninganefnd Alþýðusambands Íslands frá frestun á endurskoðun og umsömdum launahækkunum til 1. júlí nk. Eins og einnig hefur komið fram í fréttum þá lágu þessi sex aðildarfélög undir ámælum víða í verkalýðshreyfingunni fyrir að hafa haldið þessari skoðun sinni hátt á lofti og barist fyrir henni af alefli.

Gekk þetta t.a.m. svo langt að forseti ASÍ lagði til við þessi sex félög að þau myndu slíta sig frá því samkomulagi sem gert yrði við Samtök atvinnulífsins. Það er alvitað að það þýðir lítið fyrir sex félög á landsbyggðinni að ætla að reyna að fá eitthvað meira fyrir sína félagsmenn þegar 85% verkalýðshreyfingarinnar hefur ákveðið að fresta umsömdum launahækkunum til 1. júlí nk. Á þeirri forsendu var enginn grundvöllur fyrir þessi sex félög að slíta sig frá samkomulaginu.

Eins og Verkalýðfélag Akraness, fyrst allra félaga, hefur bent á er HB Grandi að skila 2,3 milljörðum í hagnað og hefur tilkynnt að til standi að greiða út 8% arð til hluthafa. Þessa ákvörðun hefur VLFA gagnrýnt harðlega og sent stjórn HB Granda áskorun um að standa við áður umsamdar hækkanir. Með þessum hagnaði HB Granda og ákvörðun þeirra um arðgreiðslu til hluthafa hefur komið í ljós að landsbyggðarfélögin höfðu rétt fyrir sér í því að til væru fyrirtæki sem klárlega gætu staðið við áður umsamdar launahækkanir. Einnig kom fram hjá Guðmundi Gunnarssyni, formanni Rafiðnaðarsambandsins í Kastljósþætti í gær, að RSÍ hafi gengið frá samkomulagi við nokkra atvinnurekendur vegna áðurnefndra hækkana sem áttu að koma til 1. mars.

Það er því gríðarlega jákvætt að forystumenn Alþýðusambands Íslands, þ.e.a.s. forseti ASÍ Gylfi Arnbjörnsson, Guðmundur Gunnarsson formaður RSÍ, Sigurður Bessason formaður Eflingar og Kristján Gunnarsson formaður SGS, skuli vera orðnir sammála þeim landsbyggðarfélögum sem hafa verið að benda á að til væru fyrirtæki sem hefðu bolmagn til að standa við gerða samninga. Allir áðurnefndir aðilar hafa skorað á HB Granda að koma með áður umsamdar launahækkanir til starfsmanna sinna og er það eins og áður sagði jákvætt að þeir skuli vera orðnir sammála landsbyggðarfélögunum.

Kristján Gunnarsson, formaður Starfsgreinasambandsins, segir í Morgunblaðinu í dag um þá ákvörðun stjórnar HB Granda að greiða hluthöfum 8% arð:

"Þetta neyðir okkur til að endurmeta þá ákvörðun að fresta endurskoðun kjarasamninga, því það er greinilega meiri innistæða fyrir hendi heldur en upp var gefin, a.m.k. í þessari starfsgrein." Þetta er akkúrat nákvæmlega það sama og formaður Verkalýðsfélags Akraness sagði á formannafundi ASÍ, að fiskvinnslan hefði bolmagn til að standa við áður umsamdar launahækkanir. Á þeirri forsendu voru það stór mistök að hafa gengið frá samkomulagi við Samtök atvinnulífsins á þeim nótum sem gert var og einnig að hafa hunsað vilja sex landsbyggðarfélaga um að samkomulagið skyldi lagt í allsherjaratkvæðagreiðslu á meðal þeirra félagsmanna sem unnu eftir þeim kjarasamningum sem frestunin á launahækkununum náði til. Það er því full ástæða til að kanna hvort það séu lagalegar forsendur til að rifta því samkomulagi sem samninganefnd ASÍ gekk frá við Samtök atvinnulífsins þann 25. febrúar sl.

Að lokum, það veit á gott að forystumenn Alþýðusambands Íslands eru að hluta til orðnir sammála þeim aðilum sem héldu uppi háværum mótmælum um frestun á endurskoðun og umsömdum launahækkunum sem áttu að taka gildi 1. mars. Það er mikilvægast, því batnandi mönnum er best að lifa.

Kristinn H. Gunnarsson alþingismaður hefur óskað eftir því við forsætisráðherra að fram færi hið fyrsta umræða utan dagskrár á Alþingi um arðgreiðslur til eigenda HB Granda hf og frestun kauphækkunar launafólks.

Kristinn vekur í þessu sambandi athygli á því að fyrri ríkisstjórn kom til móts við útgerðir í landinu með því að lækka veiðigjald fyrir aflaheimildir. Þetta var gert þegar aflaheimildir í þorski voru skertar úr 190 þúsundum tonnum í 130 þúsund tonn. „Ætla má að ávinningur HB Granda af lækkuninni sé um 60 milljónir króna á ári. Fleira má nefna sem stjórnvöld hafa beitt sé fyrir og gagnast fyrirtækjum í sjávarútvegi,“ segir Kristinn H. Gunnarsson alþingismaður.

_{Heimild Skessuhorn}

Í gær kom nýkjörinn formaður VR, Kristinn Örn Jóhannsson, í heimsókn á skrifstofu félagsins og fundaði með formanni Verkalýðsfélags Akraness.

Fundurinn stóð í tæpa tvo tíma og var afar gaman og fróðlegt að heyra í Kristni og greinilegt var á máli hans að hann er fullur tilhlökkunar að takast á við það ábyrgðarmikla starf sem formennska í VR er.

Formaður félagsins ítrekaði hamingjuóskir með nýja embættið frá stjórn félagsins og færði Kristni blómvönd og bókina Með oddi og egg, sem fjallar um stéttarfélög á Íslandi. Þakkaði Kristinn kærlega fyrir þær móttökur sem hann fékk og vonaðist hann til að eiga gott samstarf við Verkalýðfélag Akraness í framtíðinni.

Það er óhætt að segja að fréttin um nýlega ákvörðun stjórnar HB Granda hafi vakið mikla athygli. Þessi ákvörðun snerist um að leggja það til við hluthafafund að greiða út 8% arð til hluthafa, á sama tíma og launafólk hefur frestað sínum umsömdu launahækkunum um allt að 3 mánuði til að koma til móts við atvinnurekendur í því árferði sem nú ríkir í íslensku atvinnulífi.

Stjórn Verkalýðsfélags Akraness fagnar því innilega að fyrirtækið skuli hafa skilað 2,3 milljörðum í hagnað, sem sýnir það að fyrirtækið hefur vel borð fyrir báru til að standa við þær launahækkanir sem áttu að koma til 1. mars sl. En þær hækkanir áttu að nema 13.500 krónum til þeirra sem vinna eftir kauptöxtum, og 3,5% til handa þeim sem eru með einhvers konar yfirborganir.

Það stenst ekki nokkra skoðun að almennt launafólk afsali sér tímabundið sínum umsömdu launahækkunum, á sama tíma og greiddur er út arður til hluthafa. Arðgreiðslan nemur 150 milljónum króna sem myndi duga til að greiða landvinnslufólki fyrirtækisins hækkunina í 8 ár. Þetta sýnir svo ekki verður um villst að fyrirtækið getur staðið við þann samning sem gerður var þann 17. febrúar 2008 og á þeirri forsendu hefur stjórn Verkalýðsfélags Akraness sent forsvarsmönnum HB Granda bréf þar sem skorað er á stjórn fyrirtækisins að greiða þá launahækkun sem átti að taka gildi 1. mars sl. Með því myndi fyrirtækið sýna feikilega gott fordæmi. Bréfið má lesa með því að smella hér.

Það er einnig ljóst að það kraumar mikil reiða á meðal launþega yfir þeirri ákvörðun að fresta umsömdum launahækkunum og horfa síðan upp á tillögur um að greiddur skuli út arður vegna góðrar afkomu fyrirtækja. Slíkt er argasta móðgun við íslenska launþega sem Verkalýðsfélag Akraness mun ekki og getur ekki sætt sig við.

Hér fyrir neðan eru tenglar á vefsíður sem fjalla um þetta efni:

Arðgreiðsla móðgun við fiskvinnslufólk

Hófsamar arðgreiðslur

Hagnaður hjá HB Granda

HB Grandi greiðir út arð en hækkar ekki laun starfsmanna

Greiða sér arð í stað þess að hækka laun starfsmanna

Erfitt að fá svör hjá stjórn HB Granda

Arðgreiðslur HB Granda afar hófsamar

Starfsmenn Granda viðja fá launauppbót

Hér má heyra þáttinn Vikulokin á Rás 1 frá 14.03.2009 en formaður félagsins var einn af gestum þáttarins.