Haldinn var fundur í dag þar sem hagfræðingur ASÍ fór yfir drög að launasamanburði sem hann hefur verið að vinna að undanförnu.  Á þeim fundi voru trúnaðarmenn Norðuráls og formenn þeirra félagana sem eiga aðild að sameiginlegum kjarasamningi við Norðurál.  Hagfræðingur ASÍ fór yfir  þá vinnu sem hann vann í samráði við VLFA og aðaltrúnaðarmann Norðuráls í að bera saman laun í þremur verksmiðjam þ.e Norðurál, Ísal og Íslenska járnblendifélaginu.

Niðurstaða þeirra athugunar leiðir í ljós eftir þeim forsendum sem unnið var eftir,  að um töluverðan launamun er um að ræða hjá verkamönnum í dagvinnu sem og verkamönnum í vaktavinnu.  Menn telja að launamunur á milli Norðuráls og Ísals hjá verkamönnum í dagvinnu geti verið í kringum 10%.  Því til viðbótar eiga starfsmenn Ísals sem starfa sem dagmenn og starfað hafa í þrjú ár eða lengur rétt á vetrarfríi upp á 6 daga.  Þess ber að geta að  dagmenn Norðuráls eiga ekki rétt á vetrarfríi.  Hjá verkamönnum í vaktavinnu telja menn eftir þeim forsendum sem unnið var eftir, að launamunur milli Norðuráls og Ísals geti verið  í kringum 11%. Að auki stendur verkamönnum sem starfa hjá  Ísal  til boða að fara í stóriðjuskóla sem veitir þeim launahækkun frá 9.5% til 10.5% ofan á grunnlaunin, námið er í 325 klukkustundir og er kostað af Ísal.  Meirihluti verkamanna hjá Ísal hefur nú þegar lokið námi í stóriðjuskólanum sem hefur veitt þeim þær launahækkanir sem í boði eru.  Því liggur það nokkuð ljóst fyrir að launamunur þessara verksmiðja er allverulegur, og getur því orðið yfir 20% hjá þeim sem lokið hafa námi í stóriðjuskólanum.  Hægt er að skoða myndir af fundinum með því að smella á myndir og smella síðan á Norðurál.

Stjórnarfundur var haldinn í kvöld á dagskrá voru  átta mál til umræðu.  Það sem  stjórnin gerði m.a á þessum fundi var að hún skipaði þriggja manna nefnd sem hefur það hlutverk að undirbúa afmæli félagsins sem er 14. október.   Stjórn félagsins ákvað að bjóða félagsmönnum upp á kaffiveitingar í tilefni af 80 ára afmæli félagsins, mun það verða auglýst nánar þegar nær dregur.

Ennfremur ákvað stjórn félagsins að boða til trúnaðarráðsfundar og er fyrirhugað að hann verði um miðjan september.  Þá tilkynnti formaður félagsins að það væri verið að leggja loka hönd á hvernig  ferðatilhögun í ferð félag eldriborgara verði háttað, en fyrirhugað er að fara í þá ferð um miðjan september.