Það er stefna stjórnar VLFA að vera með góða orlofskosti handa félagsmönnum og það kallar á að halda þarf orlofshúsum félagsins vel við. Nú var verið að setja upp nýtt gestahús við Ásenda 9 en um er að ræða rúmgott hús með salerni, sturtu og svefnaðstöðu fyrir fjóra. Þetta er afar jákvæð viðbót við bústaðinn. Gamla gestahúsið var úr sér gengið og því bráðnauðsynlegt að ráðast í þessa endurnýjun sem hefur heppnast gríðarlega vel.

Einnig var orðin mikil þörf á að taka bústaðinn að Ásenda 10 í gegn að utan en klæðningin var farin að láta verulega á sjá. Þar hefur klæðningin nú að stórum hluta verið endurnýjuð og einnig þakkanturinn. Gluggar voru pússaðir niður sem og hurðar og má segja að bústaðurinn sé eins og nýr að utan eftir þessar viðamiklu endurbætur. Það er eins og áður sagði mikið lagt upp úr því hjá félaginu að hafa bústaðina eins góða og kostur er og það er mikilvægt að brýna fyrir félagsmönnum að ganga vel um bústaðina og muna að þetta eru jú eigur okkar allra.

Fleiri myndir af endurbótum í Ásenda 10 og af flutningi gestahússins í Ásenda 9 má sjá hér.

Formannafundur Starfsgreinasambands Íslands var að þessu sinni haldinn á Vestfjörðum eða nánar tiltekið í Bolungarvík og heppnaðist hann mjög vel. Meðal annars var farið í vinnustaðaheimsóknir í mjólkurvinnsluna Örnu og fiskeldisfyrirtækið Arctic Fish ehf. Það var afar fróðlegt fyrir formenn vítt og breitt um landið að sjá þá víðtæku starfsemi sem þar er en nú byggist atvinnulífið í Bolungarvík upp á þremur meginstoðum; fiskeldinu, mjólkurvinnslunni Örnu og almennum sjávarútvegi. Lengi vel bjuggu Bolvíkingar einungis við eina meginstoð sem var sjávarútvegur en nú hafa færst fleiri egg í þeirra körfu.

Á fundinum var einnig farið yfir stöðuna á vinnumarkaðnum en Róbert Farestveit hagfræðingur hjá ASÍ hélt erindi um hinar ýmsu hagfræðistærðir í islensku samfélagi um þessar mundir. Eðli málsins samkvæmt var rætt um þá kjarasamninga sem á eftir að ganga frá sem eru við Samband íslenskra sveitarfélaga og við ríkið. Fundurinn stóð yfir á fimmtudag og föstudag og heppnaðist eins og áður sagði mjög vel.