Forsvarsmenn Íj hafa boðað trúnaðarmenn og trúnaðartengiliðina hjá Íslenska járnblendifélaginu til fundar á morgun kl 13:30.  Tilefni fundarins er  að fara yfir samskiptin á milli starfsmanna og stjórnenda fyrirtækisins.  Það hefur vart farið fram hjá neinum starfsmanni sem starfað hefur hjá fyrirtækinu  á síðastliðnum sex árum,  að starfsmannastefna fyrirtækisins hefur gjörbreyst eftir að Elkem eignaðist meirihluta í Íslenska járnblendifélaginu.  Sú harða starfsmannastefna sem eigendur IJ hafa tileinkað sér hefur leitt það af sér að óánægja starfsmanna hefur aukist til mikilla muna á liðnum árum.  Því er það afar jákvætt ef forsvarsmenn Íj vilja leggja sitt af mörkum til að laga þennan neikvæða starfanda, sem orðin er ríkjandi á athafnasvæði fyrirtækisins.

 Verkalýðsfélag Akraness vonar það innilega að þessi fundur á morgun muni leiða það af sér að samskipti stjórnenda og eigenda fyrirtækisins gjörbreytist til hins betra öllum til heilla.

Atvinnuleysisbætur hækkuðu um 3% þann 1. janúar.
Eftirfarandi tilkynning kemur af vef Vinnumálastofnunnar.
Með vísun til 7. gr. laga nr. 12/1997, um atvinnuleysistryggingar, og yfirlýsingar ríkisstjórnarinnar sem gerð var vegna kjarasamninga á almennum markaði frá 7. mars sl. hefur félagsmálaráðherra ákveðið að hækka atvinnuleysisbætur um 3% frá 1. janúar 2005.
Hámarksbætur atvinnuleysistrygginga verða þá 4.219 kr. á dag, eða kr. 91.426 á mánuði

Fundað verður hjá ríkissáttasemjara á morgun vegna kjaradeilu stéttarfélaganna við Íslenska járnblendifélagið.  Það nokkur atriði sem eftir standa í þessari kjaradeilu, og líklegt að reynt verði til þrautar á fundinum á morgun að ná niðurstöðu í þeim atriðum sem ágreiningur er um.  Formaður félagsins  hefur fundað með öllum verkamönnum íj að undanförnu.  Voru fundirnir afar gagnlegir því það kom skýrt fram hvaða atriði það eru sem starfsmenn vilja leggja mestu áherslu á, af þeim atriðum sem eftir eru í þessari deilu.  

Launahækkanir frá 1.1 2005 í þeim kjarasamningum sem félagsmenn Verkalýðsfélags Akraness eiga aðild að eru eftirfarandi: 

Samkvæmt eftirtöldu eru launahækkanir frá 1.1. 2005 í kjarasamningum sem Verkalýðsfélag Akraness á aðild að.

• Kjarasamningur SGS og SA launahækkun 1.1.2005   3,0%
• Kjarasamningur SGS og ríkisins                                  3,0%
• Kjarasamningur  LÍV og SA                                        3,0%
• Kjarasamningur Samiðnar og SA                                 3,0%
• Kjarasamningur SGS og launanefndar Sv.félaga           1,75%

Þá hækkar framlag atvinnurekenda í samtryggingarlífeyrissjóði frá 1. janúar 2005 í 7,0%  í kjarasamningi SGS og SA, LÍV og SA og og jafnframt fellur niður skylda til að greiða 1,0% fast í séreignasjóð  til þeirra starfsmanna sem greiða ekki viðbótarframlag í lífeyrissjóð ( sameignar eða séreignarsjóð)

Framlag starfsmanna í samtryggingarsjóði verður óbreytt 4,0%

Í samningi SGS og ríkisins hækkar mótframlag vinnuveitanda  í lífeyrissjóð frá 1. janúar 2005 í 9,0%

Framlag starfsmanns verður óbreytt 4,0%

Í samningi SGS og launanefndar Sv.félaga hækkar mótframlag vinnuveitanda í lífeyrissjóð frá 1. janúar 2005 í 10,5 %

Framlag starfsmanns verður  5,0%

Næsti fundur vegna kjarasamnings Norðuráls verður haldinn fimmtudaginn 6. janúar.  Á þeim fundi munu formenn og trúnaðarmenn funda með lögmanni stéttarfélaganna.  Umræðuefnið á þeim fundi verður gildissvið kjarasamningsins. 

Deiluaðilar funduðu undir dyggri stjórn ríkissáttasemjara í tæpa tvo tíma í dag án þess að nálgast hvorn annan nægilega mikið til að hægt hefði verið að halda áfram viðræðum í dag.  Ákvað sáttasemjari að boða til fundar þriðjudaginn 11. janúar.  Það er gildissvið samningsins sem ágreiningur er um,  ekki hefur náðst endanleg sátt þar um.  Á fundum milli jóla og nýárs sem formaður félagsins hélt með starfsmönnum kom skýrt fram hjá verkamönnum Íj að þeir vildu fá yfirlýsingu frá forsvarsmönnum Íj  um að ekki yrði um frekari úthýsingu á starfsemi fyrirtækisins á samningstímabilinu að ræða.   Á fundinum í dag urðu forsvarsmenn Íj við þessari kröfu verkamanna Íj.  

Telur Verkalýðsfélag Akraness það vissan áfangasigur að fá þessa yfirlýsingu frá forsvarsmönnum Íj og hafa þeir því komið til móts við kröfu verkamanna hvað þetta atriði varðar.   Eftir stendur að það eru ennþá nokkur atriði sem ekki hefur náðst samkomulag um.  Ljóst er orðið að þriðjudaginn 11. janúar verður að öllum líkindum úrslitastund, hvort gengið verði frá nýjum kjarasamningi eða hvort það  slitni endanlega uppúr viðræðunum.

Fundað verður á morgun um gildissviðið í kjarasamningi  Norðuráls.  Til fundarins mun lögmaður stéttarfélaganna koma og ráðleggja samninganefndinni hvað sé heppilegasta leiðin fyrir stéttarfélögin að fara hvað varðar gildissviðið.  Fyrir liggur tillaga frá forsvarsmönnum Norðuráls um gildissviðið, samninganefndin mun væntanlega taka endanlega afstöðu til þeirrar tillögu á fundinum á morgun. 

Fjárhæðir sjúkrabóta sem greiddar eru úr sjúkrasjóði félagsins hafa verið hækkaðar um 3% frá og með 1. janúar 2005, samkvæmt almennum launahækkunum, og eru nú sem hér segir:

Sjúkradagpeningar                    kr.           2.709

Barnadagpeningar                     kr.              325

Fæðingarstyrkur                       kr.         32.500

Fæðingarstyrkur 50%               kr.         16.250

Dánarbætur                              kr.       190.530

Sjúkraþjálfun                            kr.         19.000

Endurgreiðsla á kostnaði vegna krabbameinsleitar er þó óbreytt eða kr. 1.500, sem greidd er á tveggja ára fresti, gegn framvísun reiknings.

Samninganefnd stéttarfélaganna hittist á fundi í dag, til umræðu var tillaga sem  forsvarsmenn NA hafa lagt fram til að koma til móts við kröfu stéttarfélaganna um breytingu á gildissviði samningsins.   Samninganefndin er að skoða hvort þessi tillaga forsvarsmanna NA gangi nógu langt.  Líklegt er að samningsaðilar nái niðurstöðu fljótlega hvað þetta atriði varðar. 

Sjómenn samþykktu kjarasamning sem var undirritaður þann 30. október síðastliðinn, með  57,6% gildra atkvæða. Atkvæði voru talin í húsakynnum Ríkissáttasemjara í dag. Þátttaka í atkvæðagreiðslunni var 43,2%.

Samningurinn var gerður milli Sjómannasambands Íslands, Alþýðusambands Vestfjarða og Farmanna- og fiskimannasambands Íslands annars vegar og Landssambands ísl. útvegsmanna hins vegar.

 Atkvæði voru talin sameiginlega hjá Sjómannasambandi Íslands, Alþýðusambandi Vestfjarða og Farmanna- og fiskimannasambandi Íslands.

Á kjörskrá voru 3.505.

Atkvæðu greiddu 1.513 eða 43,2%

Já sögðu 861 eða 56,9%

Nei sögðu 635 eða 42,0%

Auðir og ógildir seðlar voru 17 eða 1,1%

Af gildum atkvæðum sögðu því 57,6% já og 42,4% nei.  Samningurinn var því samþykktur með 57,6% gildra atkvæða.