Aðalfundur félagsins verður haldinn á morgun að Kirkjubraut 40. 3, hæð og hefst fundurinn kl. 20.00.   Félagsmenn eru hvattir til að mæta.  Boðið verður upp á kaffiveitingar í fundarlok

Nokkuð hefur verið um að félagsmenn hafi hringt á skrifstofu og verið að velta því fyrir sér hvers vegna þeir hafi ekki fengið úthlutað orlofhúsi, en næsti maður hafi kannski fengið tvö ár í röð.  Því ræður punktakerfið sem er innifalið í því tölvukerfi sem félagið notar við skráningu iðgjalda og heldur utan um upplýsingar um félagsmenn.  Hér til hliðar undir liðnum orlofshús er að finna allar nánari upplýsingar um úthlutunarkerfið og eru félagsmenn hvattir til að kynna sér þær reglur vel. 

Aðalfundi Verkalýðsfélags Akraness var að ljúka rétt í þessu það voru um 40 félagsmenn sem mættu á fundinn.   Það kom fram hjá endurskoðanda félagsins að heildarhagnaður allra sjóða félagsins hefði verið um 21 milljón króna.  Sem þýðir að hagnaður félagsins hafi aukist um 115% á milli ára sem verður að teljast góður árangur hjá nýrri stjórn. 

Tillaga kom frá aðalstjórn um óbreytt félagsgjald sem er 1% og er með því lægsta sem gerist innan Starfsgreinasambands Íslands.

Tillaga kom frá stjórn sjúkrasjóðs um að stórauka sjúkradagpeninga eða úr rétt rúmum 2.700 pr dag í tæpar 3.500 á dag.  Einnig kom tillaga um að hækka greiðslu vegna krabbameinsleitar úr 1.500 í 2.500 er þetta gert vegna góðrar afkomu sjóðsins.  Allar þessar tillögur voru samþykktar. 

Það kom fram að sjúkradagpeningar til handa félagsmönnum hefðu hækkað um 30% frá því að ný stjórn tók við.  

Nokkrir fundarmenn lýstu yfir mikilli ánægju með hvernig til hefði tekist hjá stjórn félagsins á sínu fyrsta starfsári og ljóst að allt annar bragur væri komin á Verkalýðsfélag Akraness til hins betra.   Ljóst er orðið að þær hremmingar sem Verkalýðsfélag Akraness hefur gengið í gegnum á liðnum árum eru að baki. 

Það kom fram í skýrslu stjórnar að það hefði fjölgað um 199 félagsmenn á milli ára sem er afar ánægjulegt.  Markmið stjórnar Verkalýðfélags Akraness er hvellskýrt það er að vera það stéttarfélag á Íslandi sem mest og best þjónar sínum félagsmönnum.  Vissulega eru þetta háleit markmið, en með viljann að vopni er allt hægt.

Verkalýðsfélag Akraness vill minna félagsmenn sína á dagskrána vegna 1. maí hátíðarhaldanna.  Dagskráin hefst með kröfugöngu frá  Kirkjubraut 40. kl 14:00.   Að lokinni kröfugöngunni mun hefjast eftirfarandi dagskrá í sal Verkalýðsfélags Akraness að kirkjubraut 40. 3ju hæð.  Rétt er að minna börnin á að frítt verður í bíó og hefst bíósýningin kl. 15:00.   Fundarstjóri verður Gísli S Einarsson fyrrverandi alþingismaður 

Samspil á klarinett.

Undir stjórn Heiðrúnar Hámundardóttur.

Hátíðarræða.

Ólafur Darri Andrason

Deildarstjóri hagfræðideildar ASÍ.

Fjöldasöngur.

Maístjarnan,

stjórnandi Gísli Einarsson.

Gospel-Kórinn.

            Undir stjórn Rósu Guðrúnar Sveinsdóttur.

Fjöldasöngur.

Alþjóðasöngur Verkalýðsins,

stjórnandi Gísli Einarsson.

Kaffiveitingar. 

Verkalýðfélag Akraness hvetur félagsmenn til að fjölmenna

Forsvarsmenn Íj funduðu með trúnaðarmönnum og trúnaðartengiliðum í dag.  Tilgangur með þessum fundi var að fara yfir samskiptamálin á milli stjórnenda og starfsmanna, sem því miður hafa alls ekki verið nógu góð á liðnum árum.  Starfsmenn hafa kvartað yfir stórauknu álagi sem hefur lent á starfsmönnum á liðnum árum, ásamt ýmsum öðrum atriðum sem betur hefðu mátt fara í samskiptum við starfsmenn.  Það er mat flestra þeirra sem sátu fundinn í dag að hann lofi nokkuð góðu, og geti leitt til þess að samskiptin á milli stjórnenda og starfsmanna geti færst til betri vegar.  Forsvarsmenn Íj sýndu vilja á fundinum í dag til að leggja sitt af mörkum við að  bætta samskiptin á milli stjórnenda og starfsmanna, og er það vel.  Nú er ekkert annað hægt, en að vona að hugur fylgi máli hjá stjórnendum ÍJ

Verkalýðsfélag Akraness náði samkomulagi við forsvarsmenn Klafa í morgun.   Ágreiningurinn var um það hvort starfsmenn sem hæfu störf hjá Klafa og væru fyrrverandi starfsmenn Íslenska járnblendifélagsins, ættu rétt á að flytja þau áunnu réttindi  yfir til Klafa, t.b starfsaldurshækkanir.  Það eru fjórir  starfsmenn hjá Klafa sem munu fá leiðréttingu á sínum  launakjörum aftur í tíman og einn hækkar um 18% í launum.  Leiðréttingin aftur í tíman fyrir þessa fjóra starfsmenn hljóðar upp á 412.000 þúsund krónur.   Um töluverða hagsmuni voru því í húfi fyrir starfsmenn Klafa .   Eins og fyrr sagði þá náðist samkomulag um þetta í morgun við framkvæmdastjóra Klafa  og er Verkalýðsfélag Akraness afar ánægt  með viðbrögð Klafa í þessu máli.  

Formaður félagsins mun funda með trúnaðartengiliðnum Íslenska járnblendifélagsins á morgun kl 13:30 á skrifstofu félagsins.  Tilefni fundarins er að félagið og trúnaðartengiliðirnir ætla að undirbúa sig eins vel og kostur er   fyrir fundinn með forsvarsmönnum Íslenska járnblendifélagsins sem haldinn verður á þriðjudaginn n.k.   Það er mat Verkalýðsfélags Akraness að  alger úrslitastund í þessari kjaradeilu sé nú að renna upp.  Annað hvort leysa deiluaðilar þessa kjaradeilu á þriðjudaginn n.k, ella er líklegt að það þessi kjaradeila endi í átökum 

Formaður félagsins fundaði með trúnaðartengiliðum Íslenska járnblendifélagsins í dag.  Fóru tengiliðirnir yfir stöðuna ásamt formanni og kom skýrt fram hjá trúnaðartengiliðinum að mjög góð samstaða væri á meðal starfsmanna í þessari kjaradeilu.  Ef forsvarsmenn Íj koma ekki til móts við kröfur starfsmanna að einhverju leiti þá stefnir í virkilega hörð átök.  Þetta var mat trúnaðartengiliðina og tekur Verkalýðsfélag Akraness heilshugar undir þessar skoðanir tengiliðina. 

Næsti samningafundur við forsvarsmenn Norðuráls verður  miðvikudaginn 9. mars.  Eru viðræðurnar væntanlega að fara á fulla ferð aftur, eftir nokkurt hlé.  Krafa starfsmanna liggur fyrir og er krafan hvell skýr.   það er að jafna launamuninn sem er á milli Norðuráls og annarra sambærilegra verksmiðja.   Þetta er verkefnið sem bíður samninganefndarinnar og Verkalýðsfélag Akraness mun að sjálfsögðu vinna eftir vilja starfsmanna.

Stjórn orlofssjóðs fór í alla sumarbústaði sem eru í eigu félagsins  og kynnti sér ástand þeirra og hvað þyrfti að lagfæra áður en sumarúthlutunin hæfist.  Það er mat stjórnar orlofssjóðs að  ástand bústaðanna sé í nokkuð góðu lagi, samt er alltaf eitthvað sem þarf að lagfæra.   Það er nú þegar búið að mála (lakka) þrjá bústaði að innan þ.e í Hraunborgum, Svínadalnum og í Húsafelli.  Einnig hefur verið ákveðið að setja nýtt parket á bústaðin í Húsafelli fljótlega.  Í bústaðnum í Svínadal verður skipt um eldavél og ísskáp svo eitthvað sé nefnt.  Einnig eru nokkur smáatriði sem þarf að lagfæra í  flestum bústöðunum.  Það er gríðarlega mikilvægt að allir sem einn gangi vel um bústaðina þetta eru jú eigur okkar allra sem erum félagsmenn í Verkalýðsfélagi Akraness.  Því miður ganga einstaka félagsmann ekki nægilega vel um.  Rétt er það það komi skýrt fram að lang flestir félagsmenn ganga mjög vel um og skila bústöðunum í góðu ásigkomulagi.