Samningafundur var haldinn í dag um nýjan kjarasamning fyrir starfsmenn Klafa.  Samningsaðilar voru að fara yfir samningstextann á fundinum í dag, er þeirri vinnu nánast lokið.  Kjarasamningur Íslenska járnblendifélagsins er sá samningur sem starfsmenn Klafa hafa unnið eftir á liðnum árum.  Nú verður gerður sjálfstæður kjarasamningur fyrir starfsmenn Klafa.  Kjarasamningurinn  sem nú er í vinnslu fyrir starfsmenn Klafa byggist nánast að öllu leiti á kjarasamningi Íslenska járnblendifélagsins.  Samningsaðilar munu hittast á þriðjudaginn nk og eru aðilar sammála um að stefna að því að ljúka við nýjan kjarasamning í næstu viku.

Bæjarráð hefur haft samband við forsvarsmenn Laugfisks og óskað eftir að funda með þeim strax á mánudaginn.  Eins og fram hefur komið hér á síðunni þá snýst málið um þá ákvörðun heilbrigðisnefndar Vesturlands að  fyrirtækinu verði skylt að draga úr starfssemi sinni um 50% yfir sumarmánuðina.  Ákvöðun þessi er byggð á kvörtunum sem hafa borist yfir lyktarmengun frá fyrirtækinu.  Ætlar bæjarráð að heyra í forsvarsmönnum fyrirtækisins og fara yfir stöðuna  eins og hún er í dag.  Það er greinilegur vilji bæjarráðs að viðunandi lausn finnist á málefnum fyrirtækisins.  Verkalýðsfélag Akraness er afar ánægt með þau hröðu viðbrögð sem bæjarráð Akraneskaupstaðar sýna í málefnum Laugafisks.  Eins og fram hefur komið áður hér á síðunni þá starfa 35 manns hjá Laugafiski og laun og launatengd gjöld námu um 100 hundrað milljónum á síðast ári.  Það fer því ekkert á milli máli hversu mikilvægt það er fyrir okkur Akurnesinga að starfsemi Laugafisks haldi áfram hér á Akranesi. 

Stjórn Verkalýðsfélags Akraness hefur ákveðið að gefa árlega verðalaun þegar nemendur útskrifast af námsbraut í húsasmíði frá Fjölbrautarskóla Vesturlands.  Er hér um að ræða nemendur sem ná framúrskarandi árangri í verklegum greinum.  Með þessu vill Verkalýðsfélag Akraness leggja sitt að mörkum til að auka veg og virðingu handverks og verkmennta við Fjölbrautaskóla Vesturlands.  Í gær voru verðlaunin veitt í fyrsta sinn.  Það voru tveir nemendur sem skarað hafa fram úr í verklegum greinum í húsasmíði.  Þeir eru Sindri Hlífar Guðmundsson og Vésteinn Sigmundsson og hlutu þeir báðir verðlaun frá Verkalýðsfélagi Akraness.  Hörður Helgason skólameistari við Fjölbrautarskóla Vesturlands þakkaði Verkalýðsfélagi Akraness fyrir þessar gjafir.  Sagði jafnframt að með þessum gjöfum sýnir félagið góðan hug til skólans og það sé okkur mikils virði.  Stjórn félagsins óskar þeim Sindra og Vésteini kærlega til hamingju með frábæran námsárangur

Nú standa yfir miklar endurbætur á húseignum félagsins að Furugrund 8 á Akureyri.  Verkalýðsfélag Akraness á þrjár íbúðir á Akureyri.  þær endurbætur sem nú er verið að gera er að allar íbúðirnar eru málaðar að innan, nýjar eldhúsinnréttingar eru settar í allar íbúðirnar,  skipt um sturtuklefa í öllum íbúðunum.  Það kemur ný eldavél í eina íbúðina.  Einnig er skipt um ljós í þeim öllum og rimlagardínur endurnýjaðar.  Verkalýðsfélag Akraness hvetur sína félagsmenn til að ganga vel um orlofshús félagsins þetta er jú eign okkar allra.

Formaður félagsins fundaði með samninganefnd sveitarfélaga í gær í húsakynnum ríkissáttasemjara.  Það voru sérkröfur sem Verkalýðsfélag Akraness hefur lagt fram í núverandi kjaraviðræðum við Launanefnd sveitarfélaga sem var til umræðu á þessum fundi.   Í ljós hefur komið að félagsmenn í Starfsmannafélaginu hafa í nokkrum tilfellum betri kjör heldur en félagsmenn í Verkalýðsfélagi Akraness.  Þó svo að um sömu störf sé um að ræða.  Við það mun Verkalýðsfélag Akraness ekki una.  Formaður félagsins hefur gert bæjarráði Akraneskaupstaðar grein fyrir þessum mismun.   Fulltrúar bæjarráðs voru sammála að mismunur á launakjörum á milli stéttarfélaga fyrir sömu störf væri óeðlilegt .  Vilji er hjá bæjarráði að þessi mismunur verði lagfærður í nýjum kjarasamningi sem verið er að vinna að.

Fundað verður um nýjan kjarasamning fyrir starfsmenn Klafa á morgun og hefst fundurinn kl 15:30.  Samningsaðilar hafa lokið við að taka þau ákvæði sem eru í kjarasamningi Íslenska járnblendifélagsins og notuð verða i nýjum kjarasamningi fyrir starfsmenn Klafa.  Á fundinum á morgun kemur í ljós hvort gengið verður frá nýjum samningi á næstu dögum eða ekki. 

Í dag var fundað vegna nýs kjarasamnings fyrir starfsmenn Klafa.  Menn fóru yfir þær kröfur sem ágreiningur hefur verið um t.b hagnaðarhlutdeild handa starfsmönnum.  Það eru nokkur atriði sem Verkalýðsfélag Akraness mun ekki hvika frá í þessum kjaraviðræðum.  Megin forsenda fyrir því að gengið verði frá nýjum kjarasamningi við forsvarsmenn Klafa.   Er að kostnaðaráhrif samningsins verði eigi lakari en sá sem gerður var við Íslenska járnblendifélagið fyrir nokkrum mánuðum, sem var 20.5% samningstímanum.  Eftir fundinn í dag ríkir ekki mjög mikil bjartsýni um að samningsaðilar nái saman á næstu dögum.  Töluvert ber á milli samningsaðila.  Næsti fundur er á morgun kl 13:00

Samningafundur um nýjan kjarasamning fyrir starfsmenn Klafa var haldinn  í gær.  Ræddu samningsaðilar þær kröfur sem stéttarfélagið hefur lagt fram.  Einnig var klárað að fara yfir þann samningstexta sem verður í nýjum kjarasamningi fyrir starfsmenn Klafa.  Þeirri vinnu er nánast lokið.  Eftir stendur að um verulegan ágreining er um einn fimm samningsatriði og ekki útlit á þessari stundu að aðilar nái saman hvað þau atriði  varðar.  Næsti fundur er á þriðjudaginn kemur og munu forsvarsmenn Klafa leggja fram heilstætt tilboð á þeim fundi.  Ef það tilboð verður ekki viðunandi mun Verkalýðsfélag Akraness vísa deilunni til ríkissáttasemjara

Formenn aðildarfélaga innan Starfsgreinasambands Íslands voru  boðaðir til fundar í húsakynnum ríkissáttasemjara og hófst fundurinn kl 13:00.  Þegar þetta er skrifað 17:30 eru samningaviðræður við Launanefnd sveitarfélaga á lokastigi og mjög líklegt að skrifað verði undir nýjan kjarasamning við  Launanefnd sveitarfélaga von bráðar.  Verkalýðsfélag Akraness telur að samningurinn sé nokkuð góður.  En Launanefnd sveitarfélaga hafnaði algerlega þeirri kröfu frá Verkalýðsfélagi Akraness um að þau sérákvæði sem gilda fyrir félagsmenn STAK, gildi líka fyrir félagsmenn VLFA.  Þetta gróflega misrétti vegna félagaaðildar getur Verkalýðsfélag Akraness ekki sætt sig við og mun því ekki skrifa undir kjarasamningin við Launanefnd sveitarfélaga. 

Samningafundur við forsvarsmenn Klafa verður haldinn í dag og hefst hann kl 14:00.  Á fundinum í dag munu forsvarsmenn Klafa leggja fram heildstætt tilboð.  Krafa Verkalýðsfélags Akraness er að þessi samningur sem nú er verið að gera fyrir starfsmenn Klafa.   Verði eigi lakari en kjarasamningur sem gerður var við starfsmenn Íslenska járnblendifélagsins í vor.  Það er mat félagsins að brugðið geti til beggja átta á fundinum í dag, þar sem töluvert ber á milli aðila hvað varðar nokkur atriði.