Eins og fram hefur komið á heimasíðu Norðuráls þá hefur Norðurál til athugunar að taka upp lyfjaskimun sem lið í heildaráætlun um öryggi starfsmanna sinna. Í þessu skyni hefur Norðurál fengið til liðs við sig innlent sérfræðifyrirtæki sem hefur áralanga reynslu af framkvæmd lyfjaskimunar fyrir fyrirtæki á Íslandi. Komi til lyfjaprófana á vegum Norðuráls verða þau útfærð að höfðu samráði við verkalýðsfélög, innan ramma viðeigandi laga og í samræmi við reglur þeirra opinberu stofnana sem í hlut eiga.

Á miðvikudaginn var áttu stéttarfélögin mjög góðan fund með forsvarsmönnum Norðuráls þar sem þessi mál voru rædd.  Á fundinum var ákveðið að setja málið í ákveðinn farveg til skoðunar í fullri samvinnu við stéttarfélögin sem eiga aðild að kjarasamningi Norðuráls. 

Formaður Verkalýðsfélags Akraness fagnar því að fyrirtækið leiti allra leiða til að tryggja öryggi starfsmanna sem best.  En það er skoðun formanns félagsins að það þurfi að liggja algerlega fyrir að þegar tekið er fíkniefnapróf á starfsmönnum þá sé það innan ramma þeirra laga sem gilda um slík próf. 

Það verður að kanna það mjög vel hvort verið sé að brjóta á réttindum starfsmanna þegar slík próf fara fram eins og t.d. lög um persónuvernd einstaklinga sem og önnur þau lög sem kunna að gilda um lyfjaskimun af því tagi sem Norðurál hefur í hyggju að taka upp í fyrirtækinu.

Þá má nefna það að maður að nafni Ólafur Skorrdal sendi fyrirspurn til Dómsmálaráðuneytisins, 8. janúar 2004 varðandi fíkniefnaprófanir á lögregluþjónum, bæði almennum og öðrum innan rannsóknardeilda lögreglunnar.  Í svari frá Dómsmálaráðuneytinu sem barst 13. janúar 2004 kom eftirfarandi fram.

"Vísað er til fyrirspurnar þinnar til dómsmálaráðuneytisins varðandi fíkniefnaprófanir á lögreglumönnum, bæði almennum og öðrum innan rannsóknardeilda lögreglunnar.

Lögreglumenn eru ekki látnir gangast undir líkamsrannsókn vegna leitar að fíkniefnum. Til að lögreglan framkvæmi slíka rannsókn þarf að vera fyrir hendi rökstuddur grunur um lögbrot og gildir þá einu hvort sá einstaklingur er lögreglumaður eða ekki. Heimild til líkamsrannsóknar (líkamsskoðunar) grundvallast á 92., 93. og 96. gr. laga um meðferð opinbera mála nr. 19/1991. Ekki er tilefni til að leggja þær kvaðir á lögreglumenn sem þú nefnir í fyrirspurn þinni. Fyrrnefnd lög er unnt að nálgast á vef Alþingis".

Undir þetta ritaði
Guðmundur Guðjónsson
yfirlögregluþjónn
hjá ríkislögreglustjóranum

Á þessi svari sést að vanda þarf vel til verka þegar ákveðið er að taka upp lyfjaskimun í fyrirtækjum.  Formaður VLFA vill samt að það komi skýrt fram að hann er hlynntur öllum þeim aðgerðum sem stuðla að bættu öryggi starfsmanna, en það verður að vera eins og áður sagði gulltryggt að þær aðgerðir séu innan ramma þeirra laga sem gilda um slík lyfjapróf.

Laun á almenna vinnumarkaðnum samkvæmt kjarasamningi SGS og SA hækka um 2,9%. 1. janúar 2007 og einnig laun þeirra sem starfa samkvæmt kjarasamningi SGS við ríkið, 2,9% .

Laun þeirra sem starfa samkvæmt kjarasamningi SGS og Launanefndar sveitarfélaga hækka hins vegar um 3% 1. janúar 2007.  Hjá Íslenska járnblendifélaginu, Fangi og Klafa hækka laun um 3,15%   Hjá Norðuráli hækka laun um 3,65%

 Framlag atvinnurekenda í lífeyrissjóði starfsmanna hækkar úr 7% í 8% um áramótin samkvæmt kjarasamningi SA og SGS.  Einnig hækkar framlag atvinnurekanda í starfsmenntasjóð úr 0,05% í 0,15%

Lágmarkslaun fyrir dagvinnu hækka í 125.000 krónur á mánuði 1. janúar 2007, samkvæmt kjarasamningi SGS og SA en þau voru 123.000  frá 1. júlí s.l.

Persónuafsláttur einstaklinga hækkar úr 29.029 krónum í 32.150 samkvæmt samkomulagi ASÍ við ríkisstjórnina 22. júní s.l.

Vinnumálastofnun hefur í hyggju að láta lögregluna stöðva starfsemi hjá fyrirtækinu Geymir ehf.  Eins og fram hefur komið hér á heimasíðunni þá hefur umrætt fyrirtæki leigt pólska verkamenn til verka hér á Akranesi án þess að hafa tilskilin leyfi til að starfa sem starfsmannaleiga.  Formaður félagsins upplýsti Vinnumálastofnun um grunsemdir sínar um umrætt fyrirtæki fyrir áramót og afhenti stofnuninni einnig gögn sem staðfestu að fyrirtækið var að leigja erlenda starfsmenn án tilskilinna leyfa.

Formaður félagsins er afar ánægður með hvernig Vinnumálastofnun hefur tekið á þessu máli.  Hafa vinnubrögð Vinnumálastofnunar einkennst af mikilli einurð og ákveðni og lét Gissur Pétursson forstjóri stofnunarinnar t.d hafa það eftir sér í Blaðinu að þetta mál hefði algeran forgang hjá Vinnumálastofnun.

Verkalýðsfélag Akraness hefur annað fyrirtæki grunað um að leigja út erlenda starfsmenn hér á Akranesi, án þess að hafa tilskilin leyfi til að starfa sem starfsmannaleiga.  Hefur formaður félagsins einnig gert Vinnumálastofnun grein fyrir því máli.

Óhætt er að segja að það sé bjart yfir atvinnuhorfum hjá okkur Skagamönnum á næstu misserum.  Formanni Verkalýðsfélags Akraness reiknast til að það séu að skapast allt að 100 ný störf bæði hér á Akranesi og störf tengd stóriðjunni á Grundartangasvæðinu. 

Í desember byrjaði Norðurál að ráða starfsmenn vegna loka stækkunarinnar, en í lokaáfangann þurfti Norðurál að ráða á milli 50 til 60 nýja starfsmenn.  Í dag á Norðurál eftir að ráða í kringum 30 starfsmenn og munu þær ráðningar fara fram í janúar og febrúar.  Þegar stækkuninni er lokið er áætlað að starfsmenn Norðuráls verði í kringum 430.

Síðan er rétt að nefna það að Íslenska járnblendifélagið hefur ákveðið að hefja framleiðslu á sérefni sem nefnist FSM og er áætlað að sú framleiðsla hefjist í febrúar 2008.  Reiknað er með að starfsmönnum Íslenska járnblendifélagsins fjölgi um allt að 35 við þessa nýju framleiðslu.

Einnig hafa forsvarsmenn HB Granda gefið það út að þeir hafi í hyggju að hefja beinabræðslu hér á Akranesi í það minnsta tímabundið, en sú starfsemi hefur verið í Reykjavík undanfarin ár.  Við þessa tilfærslu munu einhver ný störf skapast í verksmiðjunni að nýju.  Einnig hefur verið haft eftir forsvarsmönnum HB Granda að hugsanlegt sé að landvinnslan verði aukin í kjölfar þess að fjölveiðiskipið Engey hefur verið sett í ný verkefni útí heimi.  Vonandi mun það skapa einhver ný störf, en það er alls óvíst.

Í fréttum í gær kom fram hjá forstjóra Sementsverksmiðjunnar að þeir hafi áhuga á að auka framleiðsluna um allt að 50% sem þýðir að 6 ný störf myndu skapast við þá aukningu. 

Ef við listum þetta nánar upp þá eru eftirfarandi störf í boði á næstu 12 mánuðum á félagssvæði Verkalýðsfélags Akraness:

• Norðurál 30 ný störf.
• Íslenska járnblendið 35 ný störf.
• HB Grandi í það minnsta 6 ný störf (tímabundið)
• Sementsverksmiðjan 6 ný störf (ekki öruggt)
• Gámaþjónustan auglýsir eftir starfsmönnum (ekki vitað hversu mörgum)
• Trésmiðjan Akur auglýsir eftir smiðum (ekki vitað hversu mörgum)

Á þessu sést að atvinnuhorfur á Akranesi eru feiki góðar um þessar mundir.

Stjórn Sjúkrasjóðs Verkalýðsfélag Akraness ákvað á fundi í gær að styrkja myndalega kaup á sneiðmyndatæki fyrir Sjúkrahús og heilsugæslustöð Akraness. Styrkurinn nemur 1 milljón króna.

Að sögn Guðjóns Brjánssonar framkvæmdastjóra SHA er áætlað að taka sneiðmyndatækið í notkun seinni partinn í janúar og er áætlað að í það minnsta muni á milli 400 og 500 sjúklingar fara í rannsókn í umræddu sneiðmyndatæki ár hvert.  

Sjúkrahúsið á Akranesi hefur til þessa flutt sína sjúklinga til Reykjavíkur þegar sjúklingur hefur þurft að fara í rannsókn í sneiðmyndatæki.  Það mun brátt heyra sögunni til og það til mikillar hagræðingar fyrir sjúklinga hér á Akranesi sem og á öllu Vesturlandi.

Stjórnarfundur verður í kvöld hjá aðalstjórn félagsins.   Á fundinum í kvöld verður lögð lokahönd á undirbúning fyrir aðalfundi deildanna.  En eins og lög félagsins kveða á um þá á að vera búið að halda aðalfundi deildanna fyrir janúarlok.  Þegar endanleg niðurröðun á fundartíma hverjar deildar fyrir sig liggur fyrir þá verður það auglýst hér á heimasíðunni sem og í Póstinum og Skessuhorni.

Einnig er verið að leggja lokahönd á dagbók sem jafnframt gildir sem félagsskírteini og verður dagbókin send út til félagsmanna fyrir mánaðarlok ásamt iðgjaldayfirliti og skorar stjórn félagsins á félagsmenn að bera yfirlitið saman við launaseðla sína. Vakni einhverjar spurningar hjá félagsmönnum þá endilega hafið samband við skrifstofu félagsins.

Félagsmenn Verkalýðsfélags Akraness athugið!

Aðalfundir deilda félagsins verða haldnir sem hér segir:

Iðnsveinadeild...........mánudaginn 22. janúar kl. 20:00

Matvæladeild.......... fimmtudaginn 25. janúar kl. 18:00

Almenn deild.............mánudaginn 29. janúar kl. 18:00

Opinber deild............þriðjudaginn 30. janúar kl. 18:00

Stóriðjudeild..........miðvikudaginn 31. janúar kl. 18:00

Dagskrá:

1.  Venjuleg aðalfundarstörf

  2.  Önnur mál

Fundirnir verða allir haldnir í fundarsal félagsins að Sunnubraut 13.

Félagsmenn eru eindregið hvattir til að mæta á fund sinnar deildar.

Aðalstjórn Verkalýðsfélags Akraness

Eins fram hefur komið á heimasíðu Skessuhorns að undanförnu þá eru hin ýmsu gjöld Akraneskaupstaðar að hækka umtalsvert.  Vitnar vefur Skessuhorns í úttekt sem verðlagseftirlit ASÍ gerði á breytingum á álagninga- og gjaldskrám hjá 15 fjölmennustu sveitarfélögum landsins.  Í þessari úttekt hjá ASÍ kemur fram að gjaldskrá Akraneskaupstaðar hækkar umtalsvert á þessu ári, t.d. hækka fasteignargjöld um 12.5%, holræsagjöld um 10% og sorphirðugjöld um 8%. 

Sjö sveitarfélög sáu sig knúin til að hækka fasteignargjöldin, en rétt er að nefna það að fjögur sveitarfélög lækkuðu hjá sér fasteignagjöldin.    

Einnig kemur fram að níu af 15 fjölmennustu sveitarfélögum landsins eru með lægri dagvistunargjöld en Akraneskaupstaður. 

Formaður Verkalýðsfélags Akraness harmar þessar gjaldskrár hækkanir hjá Akraneskaupstað sem og hjá öðrum sveitarfélögum sem hækkuðu gjaldskrár sínar.  Einfaldlega vegna þess að þessar hækkanir eru ekki til þess fallnar að hjálpa til við að ná niður þeirri verðbólgu sem verið hefur alltof há hér á landi að undanförnu.

Formanni félagsins þætti fróðlegt að vita á hvaða forsendum þessar gjaldskrárhækkanir eru byggðar hjá Akraneskaupstað og sér í lagi vegna þess mikla hagvaxtar sem orðið hefur hér á Akranesi í kjölfar þenslunnar á Grundartangasvæðinu. Það er til að mynda mun skiljanlegra að sveitarfélög sem orðið hafa fyrir töluverðri fólksfækkun og þar af leiðandi minnkandi tekjum á undanförnum árum vegna ýmissa ástæðna þurfi að hækka sínar gjaldskrár eins og t.d. sveitarfélög á borð við Ísafjörð, Vestmannaeyjar og Sauðárkrók.

Eins og áður hefur komið fram þá á formaður férlagsins mun erfiðra með að skilja gjaldskrárhækkanir þeirra sveitarfélaga sem notið hafa umtalsverðs hagvaxtar að undanförnu eins og Akraneskaupstaður. 

Það liggur fyrir að aldrei hafa fleiri búið á Akranesi eins og akkúrat núna og væntanlega hafa tekjur sveitafélagsins hækkað umtalsvert á liðnum árum í kjölfar fólksfjölgunar.  Það gengur ekki upp lengur að almennt verkafólk sé eitt og sér látið viðhalda stöðugleikanum hér á landi, það verða allir að taka þátt í því, líka sveitarfélögin.

Það verður ekki annað sagt en að einar mestu framfarir í samgöngu-málum okkar Íslendinga hafi verið þegar Spölur ákvað að ráðast í það stóra verkefni að grafa göng undir Hvalfjörð.  Það ber að þakka þeim einstaklingum sem höfðu á sínum tíma kjark og þor til að ráðast í jafn viðamikið verkefni og framkvæmd Hvarfjarðarganga var. 

Gríðarleg aukning hefur orðið á umferð um göngin á liðnum árum og því hefur Spölur nú svigrúm til að lækka veggjaldið um 15% til 20% eins og kom fram hjá Gísla Gíslasyni stjórnarformanni Spalar í Morgunblaðinu í gær. Einng kom fram í Morgunblaðinu í gær að Spölur muni ekki nýta sér það svigrúm sem það hefur til lækkunar á veggjaldinu heldur safni upp í ný göng með því að lækka ekki veggjaldið.  Þess í stað á nota þessar umframtekjur til undirbúnings tvöföldunar hringvegarins á Kjalarnesi og tvöföldunar Hvalfjarðarganga. Það getur vart talist eðlilegt að við sem notum göngin hvað mest eigum að standa straum af þeim kostnaði sem hlýst af vegaframkvæmdum hér á Vesturlandi.  Í könnun sem gerð var fyrir nokkrum árum kom fram að fimmti hver bíll sem ekur um Hvalfjarðargöng kemur af Vesturlandi.

Formaður félagsins getur vart orða bundist yfir þessum áformum og spyr sig hví í ósköpunum á að greiða veggjald í Hvalfjarðargöngum?  Þessi gjaldtaka þekkist ekki í öðrum jarðgöngum, nægir þar að nefna í því sambandi Vestfjarðagöng, Fáskrúðsfjarðargöng og í Héðinsfjarðargöngum þegar vinnu við þau lýkur. 

Látum vera að Spölur standi við þá samninga sem gerðir hafa verið vegna Hvalfjarðarganga og klári að innheimta veggjald til ársins 2018 eins og samningar segja til um, en það er algerlega óeðlilegt og óviðunandi að gjaldtaka skuli vera nefnd í hvert sinn sem rætt er um samgöngubætur á Vesturlandi.  Gjaldtakan er óeðlileg vegna þess að hún þekkist ekki annarsstaðar í vegakerfinu, hvorki í öðrum jarðgöngum né við tvöföldun Reykjanesbrautar og ekki eru hugmyndir um að innheimta vegtoll vegna tvöföldunar á Suðurlandsvegi. 

Rétt er að nefna það að ávinningur Vegagerðarinnar af tilkomu Hvalfjarðarganga er gríðarlegur og nægir þar að nefna það að Akraborgin fékk umtalsverðan styrk frá Vegagerðinni ár hvert meðan hún var í siglingum á milli Akraness og Reykjavíkur og einnig hefur viðhaldskostnaður á veginum í Hvalfirði nánast horfið eftir að göngin opnuðu 1998.  Það er alveg ljóst að verulegar upphæðir hafa sparast hjá Vegagerðinni vegna þessara tveggja þátta. 

Fjölmargir félagsmenn Verkalýðsfélags Akraness þurfa að aka um Hvalfjarðargöng á hverjum degi vegna vinnu sinnar og ljóst er að umtalsverður kostnaður leggst á þessa félagsmenn.  Svo dæmi sé tekið þá þarf félagsmaður sem ekur göngin fimm daga vikunnar að greiða 140.421 kr. á ári sé miðað við ódýrasta veggjaldið.  Sé tekið tillit til skatta og annarra gjalda þá er kostnaðurinn um 200 þúsund krónur á ári.  Á þessu sést að hér er um umtalsverða hagsmuni að ræða fyrir þá félagsmenn sem aka göngin vinnu sinnar vegna.

Það er mat formanns félagsins að það sé algerlega óviðunandi ef innheimta á veggjaldi heldur áfram eftir að búið verður að greiða niður þau lán sem eftir eru tengd Hvalfjarðargöngum.  Það er algert lágmark að við Vestlendingar sitjum við sama borð og aðrir landsmenn hvað varðar gjaldfrjáls jarðgöng. Það er löngu orðið tímabært að samgöngumálaráðherra taki til hendinni hvað varðar vegaframkvæmdir hér á Vesturlandi og þá sér í lagi hvað varðar tvöföldun á einum hættulegasta vegi landsins, Vesturlandsvegi. 

Vissulega ber að fagna því að það er komin hreyfing á vegaframkvæmdir hér á Vesturlandi, en það er alls ekki hægt að fagna því ef þær framkvæmdir eiga að vera fjármagnaðar með veggjöldum.  Það verða allir landsmenn að sitja við sama borð hvað varðar kostnað vegna vegaframkvæmda. 

Minnum á aðalfund iðnsveinadeildar sem haldinn verður í kvöld kl.20:00 að Sunnubraut 13.  Dagskrá fundarins er venjubundin aðalfundastörf sem og önnur mál.  Félagsmenn sem tilheyra iðnsveinadeildinni eru hvattir til að mæta.