Fréttablað Verkalýðsfélag Akraness kemur  út í næstu viku, en verið er að leggja lokahönd á blaðið þessa dagana. 

Í blaðinu verður farið yfir helstu mál sem félagið hefur verið að vinna að á síðustu mánuðum.  Einnig er er farið yfir þá þjónustu sem félagið er að veita sínum félagsmönnum bæði hvað varðar orlofssjóð sem og réttindi úr sjúkrasjóði félasins.  Blaðinu verður dreift í öll hús í póstnúmeri 300 og 301.  

Í skýrslu sem forsætisráðherra lét gera um fátækt barna hér á landi kemur fram að um 4600 börn eða rétt tæp 7% allra barna á Íslandi búa við fátækt. Hjálparstofnun Kirkjunnar hefur einnig sagt að um 3000 barnafjölskyldur búi við fátækt á Íslandi í dag.  Það verður að segjast alveg eins og er að það er þjóðarskömm að hér á landi skuli tæplega 7% barna búa við fátæktarmörk og það hjá þjóð sem státar sig af því að vera ein af ríkustu þjóðum heims.

En hvað er það sem veldur því að hér á landi skuli 3000 fjölskyldur búa við fátækt?  Vissulega eru að öllum líkindum margir samverkandi þættir sem valda því að fólk býr við fátækt hér á landi t.d atvinnuleysi og langvarandi veikindi, sumir þessara einstaklinga búa við skerta starfsorku og einnig er rétt að nefna þær aðstæður sem einstæðir foreldrar þurfa að búa við.

En það eru sannarlega fleiri þættir sem valda fátækt hér á landi og lúta þeir þættir að íslenskum stjórnvöldum.  Það liggur fyrir að íslensk stjórnvöld leggja mun minna en aðrar Norðurlandaþjóðir til velferðarmála, t.d eru barnabætur hér á landi með þeim lægstu sem þekkjast á Norðurlöndunum.  Það þekkist heldur ekki á hinum Norðurlöndunum að tekjutengja barnabætur eins og gert er hér á landi. Ekki er nóg með að þær séu tekjutengdar hér heldur eru skerðingamörkin afar lág.  Einnig ber að nefna að skattleysismörkin hafa ekki fylgt verðlagsþróun sem hefur gert það að verkum að skattar á meðaltekjur og lágar tekjur hafa aukist umtalsvert á liðnum árum.  Hins vegar hefur ekki staðið á ríkisvaldinu að aðstoða þá sem eru efnameiri og nægir þar að nefna að hátekjuskattur og eignaskattur hafa nýlega verið aflagðir. Rétt er að vekja athygli á því að þegar endurskoðun á kjarasamningum fór fram í sumar náði verklýðshreyfingin samkomulagi við ríkisstjórnina um að skattleysismörkin skuli framvegis fylgja verðlagsþróun. Þetta er mjög mikilvægt atriði fyrir þá tekjulægstu.

Það er alveg ljóst að ef ríkisstjórn Íslands myndi  verja meiri fjármunum til velferðarmála þá myndi það leiða af sér mun minni fátækt en raunin er í dag.

Við í verkalýðshreyfingunni verðum líka skoða það sem okkur stendur næst og það eru lágmarkslaunin en það hefur verið skoðun formanns félagsins lengi að þau séu einfaldlega allt of lág.  Það þýðir ekki fyrir okkur sem erum í forsvari í verkalýðshreyfingunni að benda eingöngu á ríkisvaldið þegar umræðan um fátækt ber á góma.  Það sér það hver maður að það er nánast útilokað að lifa á þeim lágmarkslaunum sem nú eru í gildi á íslenskum vinnumarkaði en lágmarkslaun í dag eru einungis 123 þúsund á mánuði fyrir fullt starf.  Það er alls ekki hægt að bjóða íslensku verkafólki upp á lágmarkslaun sem vart duga fyrir lágmarksframfærslu.    

Það verður að vera forgangskrafa í næstu kjarasamningum að hækka lágmarkslaun til jafns við þau markaðslaun sem nú eru almennt í gildi á íslenskum vinnumarkaði.  Til að það takist þurfa laun að hækka í það minnsta um 30% við undirritun nýs kjarasamnings.

Nú þurfa íslensk stjórnvöld, Samtök atvinnulífsins og verkalýðshreyfingin að leggjast á eitt til að útrýma fátækt úr íslensku samfélagi.  Stjórnvöld þurfa að leggja meira til velferðarmála og verkalýðshreyfingin þarf að berjast með oddi og egg fyrir verulegri hækkun lágmarkslauna. Með því mun okkur takast að útrýma fátækt úr íslensku samfélagi.

Í dag átti formaður félagsins fund með pólskum verkamönnum sem starfa hér á Akranesi.  Tilefni fundarins laut að hinum ýmsu réttindamálum hjá pólsku starfsmönnunum og naut formaðurinn aðstoðar túlks frá Póllandi.

Þessir pólsku verkamenn eru leigðir til byggingarverktaka hér á Akranesi frá fyrirtæki í Kópavogi sem ekki hefur tilskilinn leyfi frá Vinnumálastofnun til að reka starfsmannaleigu hér á landi.  Formaður félagsins hefur verið í sambandi við Vinnumálastofnun vegna þessa máls. 

Ráðningarsamningar pólsku verkamannanna sýndu að þeir fá einungis greitt eftir lágmarkstöxtum.

Félagið hefur verið í góðu sambandi við byggingarverktakann sem leigði pólsku verkamennina frá fyrirtækinu sem hefur aðsetur í Kópavogi.  Byggingarverktakanum var ekki kunnugt um að fyrirtækið sem leigði honum pólsku verkamennina hefði ekki tilskilin leyfi frá Vinnumálastofnun.  Byggingarverktakinn sá ekki um launagreiðslu til pólsku starfsmannanna heldur greiddi beint til  fyrirtækisins sem sjá um að leigja þeim  pólsku verkamennina.

Byggingarverktakinn hefur boðið að ráða alla pólsku verkamennina í beint ráðningarsamband og hætta viðskiptum við fyrirtækið sem ekki hefur tilskilin leyfi til að starfrækja starfsmannaleigu hér á landi. Pólsku verkamennirnir hafa nú þegar þegið það boð. 

Við það hækka laun pólsku verkamannanna um allt að 70%, eða úr rúmum 730 kr. uppí 1.241 kr. á dagvinnutímann. Formaður félagsins hefur aðstoðað byggingarverktakann við að útbúa nýja ráðningarsamninga handa pólsku starfsmönnunum og eins og áður sagði er þeim þar með tryggð hækkun sem nemur allt að 70%.

Það er afar ánægjulegt þegar hægt að að verja þau markaðslaun sem eru í gildi á íslenskum vinnumarkaði eins og raunin varð í dag.  Því ef fyrirtæki nýta sér erlent vinnuafl til komast hjá því að greiða hefðbundin markaðslaun mun það klárlega hafa slæmar afleiðingar á launkjör íslenskra verkamanna þegar til lengri tíma er litið.

Í byrjun þessa árs gerði Verkalýðsfélag Akraness mjög góðan viðskiptasamning við Landsbankann á Akranesi.  Í einu ákvæði samningsins er kveðið á um að Landsbankinn greiði 500 þúsund krónur til Verkalýðsfélags Akraness ár hvert á samningstímanum.

Stjórn félagsins ákvað í samráði við Landsbankann að þessum fjármunum skuli varið til góðgerðamála.  Á stjórnarfundi sem haldinn var 14. desember sl. var ákveðið hvaða aðilar skyldu fá styrk úr þessum sjóði félagsins í ár.  Þeir sem fá styrk í ár eru eftirfarandi:

• Styrktar- og líknarsjóður Akraneskirkju 100 þúsund krónur.  (Eyrnamerkt þeim sem minna mega sín fyrir þessi jól)
• Björgunarfélag Akraness 100 þúsund krónur.
• Fjöliðjan 100 þúsund krónur.
• Fyrr í vetur var unglingadeild SÁÁ veittur 100 þúsund króna styrkur.
• Einnig fengu önnur góðgerðafélög smærri styrki úr þessum sjóði.

Nánar verður fjallað um þessar styrkveitingar Verkalýðsfélags Akraness í félagsblaðinu sem kemur út á fimmtudaginn kemur.

Í morgun undirrituðu Verkalýðsfélag Akraness og Stéttarfélag Vesturlands samkomulag við vinnu og hæfingarstaðinn Fjöliðjuna. Þar starfar fólk sem er fatlað og með skerta starfsorku. Með samkomulagi þessu er verið að staðfesta þau starfskjör sem starfsmenn Fjöliðjunnar hafa notið á undanförnum árum. Kjör þeirra miðast við kjarasamning Starfsgreinasambands Íslands og Samtaka Atvinnulífsins.

Við undirritun samningsins lýsti formaður félagsins yfir mikilli ánægju með það góða starf sem unnið er af starfsmönnum Fjöliðjunnar og minnti starfsmenn á að þeir væru fullgildir félagsmenn Verkalýðsfélags Akraness. Hann hvatti þá eindregið til að nýta sér þá þjónustu sem félagið hefur upp á að bjóða. Þó nokkuð margir starfsmenn hafa t.a.m. nýtt sér orlofshús félagsins.

Í ljósi þeirra staðreynda að þarna er unnið gríðarlega gott starf fyrir fatlaða einstaklinga ákvað stjórn Verkalýðsfélags Akraness að styðja Fjöliðjuna um 100.000 krónur og tók Þorvarður Magnússon forstöðumaður Fjöliðjunnar við ávísun úr hendi formannsins. Upplýsti Þorvarður að þessar 100.000 krónur yrðu eyrnamerktar starfsmönnum og sagði hann að þegar vora tæki myndu starfsmenn Fjöliðjunnar nota þetta framlag til að gera sér glaðan dag. Einnig afhenti formaður félagsins öllum starfsmönnum spil merkt Verkalýðsfélagi Akraness. Að lokum sagði formaður að stjórn Verkalýðsfélags Akraness væri stolt af því að hafa starfsmenn Fjöliðjunnar innan félagsins enda væri þar um harðduglega félagsmenn að ræða.

Þann 1. mars nk. verða gerðar breytingar á opinberum álögum á matvöru þegar matarskatturinn svokallaði verður lækkaður úr 14% niður í 7%. Mikilvægt er að þessar aðgerðir stjórnvalda skili sér til heimila í landinu í formi lægra vöruverðs í verslunum.

Til að fylgjast með því að hvaða leyti þessi lækkun skilar sér í vasa neytenda hefur verðlagseftirlit ASÍ, í samráði við aðildarfélög sín, hrundið af stað viðamiklum verðmælingum um allt land. Þessar mælingar verða framkvæmdar reglulega fram á mitt næsta ár. Tilgangurinn er fyrst og fremst að fylgjast með þeim breytingum sem verða á vöruverði innan hverrar verslunar á næstu mánuðum en síður að bera saman verð á milli einstakra aðila.

Starfsmaður á vegum Verkalýðsfélags Akraness fór í síðustu viku í allar verslanir á Akranesi í þessum tilgangi og var vel tekið á öllum stöðum. Þegar gagnasöfnun er lokið verða niðurstöður mælinganna birtar á heimasíðu félagsins um leið og þær liggja fyrir.

Áætlað er að umrætt lækkun á virðisaukaskatti eigi að geta skilað neytendum um 6-7 milljörðum á ári. Því er afar mikilvægt að halda úti öflugu eftirliti þannig að umrædd virðisaukalækkun skili sér í vasa neytenda en ekki til verslunareigenda.

Í dag var gerð ný könnun á vegum félagsins og var athugað verð á 50 vörutegundum úr flestum vöruflokkum í fjórum verslunum á Akranesi. Verslanirnar sem um ræðir eru Kaskó, Skagaver, Samkaup Strax (Grundaval) og Krónan. Verslun Einars Ólafssonar neitaði að taka þátt í þeirri könnun sem hér er birt. Vert er að taka fram að hér er aðeins um beinan verðsamanburð að ræða, en ekki er lagt mat á gæði eða þjónustu söluaðila.

Til að hægt væri að taka mark á verðsamanburði milli þessara verslana reyndist nauðsynlegt að fækka vörutegundum um þær sem ekki fengust í öllum verslunum og því voru að lokum 28 vörutegundir í matarkörfu Verkalýðsfélagsins.

Niðurstöður könnunarinnar eru þær að ódýrust var matarkarfan í Kaskó en þar kostaði hún kr. 10.505. Í Skagaver kostaði karfan 11.653, í Krónunni kostaði hún kr. 12.163 og í Samkaup-Strax kostaði hún kr 13.591. Karfan kostaði því að meðaltali kr. 11.978. 

Verðlagseftirlit Verkalýðsfélags Akraness mun á næstu dögum og vikum gera reglulegar verðkannanir í þessu verslunum til að fylgjast með verðlagsþróun félagsmönnum sínum sem og öðrum neytendum hér á Akranesi til hagsbóta.

Hægt er að skoða könnunina í heild sinni með því að smella hér.

Stjórn og starfsfólk Verkalýðsfélags Akraness sendir félagsmönnum sínum og landsmönnum öllum bestu óskir um gleðilega jólahátíð og farsæld á komandi ári.

Aðalfundur sjómannadeildar verður haldinn í kvöld og hefst fundurinn kl. 20:00.

Á dagskrá fundarins eru venjuleg aðalfundarstörf sem og önnur mál.  Fundurinn er haldinn í fundarsal félagsins að Sunnubraut 13.

Sjómenn eru eindregið hvattir til að mæta.

Jólatrúnaðarráðsfundur var haldinn í gær og hófst fundurinn kl. 18.00.  Formaður félagsins fór yfir það helsta sem gerst hefur í starfsemi félagsins á árinu sem nú er að líða.

Fram kom í máli formanns að árið hefur verið Verkalýðsfélagi Akraness afar hagstætt, t.d. hefur verið gríðarleg fjölgun í félaginu á liðnu ári.  Einnig kom fram hjá formanni að mjög erilsamt hefur verið hjá starfsmönnum félagsins á þessu ári og greinilegt að félagsmenn nýta sér þjónustu félagsins í auknu mæli, sem er afar jákvætt.