Á morgun verður aðalfundur Verkalýðsfélags Akraness haldinn. Fundur verður settur kl. 13:00 í matsal Sementsverksmiðjunnar, Mánabraut (Fortuna).

Dagskrá fundarins er á þessa leið:

1.   Skýrsla stjórnar fyrir liðið starfsár

2.   Endurskoðaðir reikningar lagðir fram til afgreiðslu

3.   Kosningar sem þurfa að fara fram samkvæmt 28. grein

4.   Ákvörðun félagsgjalda

5.   Önnur mál

Félagsmenn eru eindregið hvattir til að mæta og láta málefni síns stéttarfélags sig varða.

Eftir fundinn verður boðið upp á veglegar veitingar úr eldhúsi Fortuna.

Aðalfundur Verkalýðsfélags Akraness var haldinn í dag laugardaginn 26. apríl í matstofu Fortuna í sal Sementsverksmiðjunnar. Formaður félagsins, Vilhjálmur Birgisson, flutti skýrslu stjórnar og greindi frá því helsta sem stjórn og starfsmenn fengust við á annasömu ári. Félagsmönnum fjölgaði um 722 á síðasta ári og hagnaður af rekstri sjóða félagsins nam rúmlega 77 milljónum króna, samanborið við rúmlega 54 milljónir árið á undan. Félagssjóður skilaði rekstrarafgangi upp á tæpar 23 milljónir en var rekinn með halla þegar þessi stjórn tók við í árslok 2003. Staða sjúkrasjóðs er sterk og jókst hagnaður um 30% á milli ára þrátt fyrir auknar styrkveitingar, sem jukust um 37%. Sama er upp á teninginn með aðra sjóði félagsins, Orlofssjóð og Verkfallssjóð, staða þeirra hefur styrkst verulega.

Áhyggjur af þróun efnahags- og atvinnumála

Í máli Vilhjálms  kom fram að stjórn félagsins hefði áhyggjur af þróun efnahagsmála síðustu tveggja mánaða sem hefði leitt til þess að ávinningur nýrra kjarasamninga hefði tapast. Telur stjórn félagsins að allt stefni í að samningum yrði sagt upp strax í mars á næsta ári.

Formaður félagsins lét í ljós þungar áhyggjur af þróun atvinnumála í sjávarútvegi á Akranesi og var ómyrkur í máli um afleiðingar sameiningar HB hf og Granda sem leitt hefði til þess að yfir 150 manns hafi misst atvinnuna. Sagði Vilhjálmur forsvarsmenn HB Granda hafa sýnt Skagamönnum ótrúlegan fantaskap og að ekkert lát virtist ætla að verða á honum.

Setja markið hátt

Í skýrslu stjórnar kemur fram að hún sé stolt yfir því hvernig til hefur tekist þau fjögur ár sem stjórnin hefur starfað. Stórbætt afkoma félagsins og aukin þjónusta sjáist m.a. í því að yfir 90% félagsmanna eru ánægðir með það sem félagið hefur upp á að bjóða, samkvæmt könnun Capacent Gallup á síðasta ári. Markmið núverandi stjórnar er að Verkalýðsfélag Akraness verði það stéttarfélag sem mest og best þjónar sínum félagsmönnum hér á landi.

Í fundarlok var fundarmönnum boðið uppá lambalæri með öllu tilheyrandi.

Óhætt er að segja að sá ávinningur sem náðist í síðustu kjarasamningum á hinum almenna vinnumarkaði sé nú í frjálsu falli. Samkvæmt nýustu mælingum hjá Hagstofunni mælist verðbólgan í apríl 11,8% en þegar kjarasamningar voru gerðir þann 17. febrúar sl. var verðbólgan 5,7% og hefur því hækkað um 6,1% frá undirritun samninganna.

Það er algjörlega ljóst að kjarasamningar á hinum almenna vinnumarkaði geta komist í mikið uppnám þegar endurskoðun á sér stað í febrúar 2009 og eins og staðan er núna er fátt sem bendir til annars en að samningunum verði sagt upp.

Það er grátlegt að sjá þann ávinning sem náðist í síðustu samningum hvað varðar hækkun á lægstu launum hverfa á jafnskömmum tíma og raunin hefur orðið.

Þetta mun ekki aðeins koma niður á nýgerðum kjarasamningum heldur verður gríðarlega erfitt að ganga frá þeim kjarasamningum sem nú eru lausir svo sem við ríkið, sjómenn og stóriðjurnar enda eru allt aðrar forsendur nú en þegar gengið var frá kjarasamningum á hinum almenna vinnumarkaði.

Það er mat formanns að það verði ekki hægt að ganga frá áðurnefndum samningum á sömu forsendum og gert var 17. febrúar sl. vegna þeirrar þróunar sem verið hefur á hækkun neysluvísitölunnar.

Það er með ólíkindum hversu hratt áhrif gengisfalls krónunnar hafa skilað sér út í verðlagið og spurning hvort einhverjir verslunareigendur séu að nýta sér það ástand sem nú er í íslensku efnahagslífi. Það verður fróðlegt að sjá, þegar að krónan styrkist aftur, hvort verslunareigendur verði jafn fljótir að lækka sínar vörur og þeir hafa verið fljótir að grípa til hækkana. Það var aðdáunarvert að sjá tilkynningu frá forsvarsmönnum IKEA sem tóku þá ákvörðun að grípa ekki til hækkana þrátt fyrir fall krónunnar. Það er einnig ljóst að fleiri verslanir mættu taka sér IKEA til fyrirmyndar.

Það er mjög mikilvægt að verðlagseftirlit Alþýðusamband Íslands hafi fengið aukafjármagn til þess að sinna verðlagseftirliti og vonandi mun slíkt eftirlit skila tilsettum árangri.

Eins og fram kom í fréttum í gær þá var farið skapast ófremdarástand í skólum bæjarins vegna þeirrar ákvörðunar kennara að vinna ekki tilfallandi yfirvinnu.  Með þeirri ákvörðun voru kennarar að mótmæla því að ekki hafi komið til viðbótargreiðslur og sértækar aðgerðir í launamálum hjá starfsmönnum Akraneskaupstaðar eins og gerst hefur hjá nágrannasveitarfélögunum á undanförnum mánuðum.

Öll sveitarfélögin á stór Reykjavíkursvæðinu hafa komið með sértækar aðgerðir í launamálum sinna starfsmanna vegna aukins álags og manneklu.  Á undanförnum vikum hafa sveitarfélögin á Reykjanesi einnig verið að tilkynna um sértækar aðgerðir til handa sínum starfsmönnum. 

Verkalýðsfélag Akraness var búið að óska eftir því við bæjarráð Akraneskaupstaðar ekki alls fyrir löngu að það myndi fara að fordæmi nágrannasveitarfélaganna og taka upp álíka sértækar aðgerðir í launamálum og önnur sveitarfélög hafa verið að kynna.  Þeirri ósk félagsins var hafnað.

Eftir aðgerðir kennara ákvað bæjarráð að greiða kennurum eingreiðslu kr. 60.000.- miðað við fullt  starf  þegar kjarasamningar kennara og Launanefndar sveitarfélaga hafa verið undirritaðir og samþykktir.  Eins fram hefur komið í fréttum þá er búið að undirrita nýjan kjarasamning fyrir grunnskólakennara og verður væntanlega kosið um þá fljótlega.

Bæjarráð samþykkti hins vegar að öðrum starfsmönnum Akraneskaupstaðar yrði greidd eingreiðsla kr. 60.000.- þegar þeirra kjarasamningar hafa verið undirritaðir að loknu núverandi samningstímabili en kjarasamningur við launanefnd sveitarfélaga rennur ekki út fyrr en 30. nóvember nk. Þetta þýðir að umrædd eingreiðsla mun ekki berast öðrum starfsmönnum bæjarins fyrr en eftir rúma sex mánuði.

Formaður félagsins harmar þá ákvörðun að ekki skuli allir starfsmenn Akraneskaupstaðar fá eingreiðsluna á sama tíma og telur fullvíst að þessi ákvörðun bæjarráðs muni valda umtalsveðri úlfúð hjá starfsmönnum bæjarins, enda er hún með öllu óskiljanleg.  Það er einnig óskiljanlegt að bæjrráð skuli tengja þessa eingreiðslu við komandi kjarasamninga en það hafa önnur sveitarfélög ekki gert

Verkalýðsfélag Akraness skorar á bæjaryfirvöld að endurskoða þessa ákvörðun og greiða öðrum starfsmönnum áðurnefnda eingreiðslu á sama tíma og gera á við kennara, enda er morgunljóst að aðrir starfsmenn bæjarins munu ekki sætta sig við slíka mismunun.  Einnig skorar Verkalýðsfélag Akraness á bæjaryfirvöld að hækka áðurnefnda eingreiðslu til samræmis við það sem Seltjarnnesbær er búinn að samþykkja handa sínum starfsmönnum.  En allir starfsmenn Seltjarnnesbæjar að undanskildum bæjarstjóranum munu fá eingreiðslu sem nemur 120.000 1. maí nk.

Viðtal var við formann félagsins í morgun í Ísland í bítið. Þar fór formaður yfir það ástand sem ríkir nú í íslensku efnahagslífi og atvinnuástandið á félagssvæði Verkalýðsfélags Akraness.

Fram kom í máli formanns að sá ávinningur sem náðist í síðustu kjarasamningum hefur nánast verið í frjálsu falli eftir gengisfall krónunnar. Einnig kom fram í máli formanns að það sé skoðun hans að umtalsverðar líkur séu á að kjarasamningum verði sagt upp í mars á næsta ári þegar endurskoðun þeirra mun eiga sér stað.

Það kom líka fram í máli hans að það sé gríðarlega mikilvægt að allir leggist á eitt við að koma böndum á verðbólguna og taldi hann að mikilvægt væri að ráðamenn þessarar þjóðar myndu sýna gott fordæmi með því að fella úr gildi lög um eftirlaun alþingismanna, en mikill styrr hefur staðið um þessi lög frá því þau voru sett á.

Hægt er að hlusta á viðtalið með því að smella hér. 

Kynningarfundur verður haldinn í kvöld um nýgerðan kjarasamning Samiðnar. 

Fundurinn hefst kl. 19:00 í fundarsal félagsins að Sunnubraut 13 og mun formaður félagsins fara nokkuð ítarlega yfir samninginn.  Fundarmönnum mun gefast kostur á að kjósa um samninginn að lokinni kynningu.

Stjórn félagsins vill hvetja alla þá sem vinna eftir kjarasamningi Starfsgreinasambandsins og einnig þá iðnaðarmenn sem taka launa eftir kjarasamningi Samiðnar að kynna sér samningana í þaula.

Einnig hvetur stjórn félagsins félagsmenn að nýta sér kosningarétt sinn og kjósa um samningana.  Hægt verður að kjósa um samningana á skrifstofu félagsins fram til kl 16:00 föstudaginn 7. mars.   

Formaður félagsins fundaði í morgun með starfsmannastjóra Norðuráls og yfirmannauðsstjóra Century Aluminum. Mannauðsstjórinn var í kynnisferð hér á landi og óskaði hann eftir því að fá að hitta formenn þeirra félaga á Vesturlandi sem eiga aðild að kjarasamningi Norðuráls.

Þetta var fínn fundur og vildi mannauðsstjórinn fá upplýsingar um hvernig stéttarfélög hér á landi starfa og gafst formanni tækifæri til að koma með ábendingar sem lúta að réttindum starfsmanna Norðuráls.

Formaður hefur áður bent á að það er launamunur á milli Alcan og Norðuráls og er afar brýnt að þeim launamun verði eytt þegar samningar fyrirtækisins verða næst lausir. Einnig benti formaður VLFA mannauðsstjóranum á að hugsanlega væri 8 tíma vaktakerfi mun betra en það 12 tíma kerfi sem nú er við lýði hjá Norðuráli.

Margt jákvætt hefur verið að gerast hjá Norðuráli síðustu vikurnar og sem dæmi þá er fyrirtækið að vinna að nýju hæfnismati fyrir starfsmenn sem mun væntanlega skila starfsmönnum þó nokkrum ávinningi þegar það tekur gildi.  Reiknað er með að nýtt hæfnismat fyrir starfsmenn verði klárt á næsta ári.

Um sex þúsund tonn hafa komið til bræðslu hingað á Akranes það sem af er af þessari vertíð, en unnið hefur verið á vöktum frá síðasta sunnudag. 

Það er löngu vitað að tekjur starfsmanna bræðslunnar byggjast að miklu leiti uppá að staðnar séu vaktir og á þeirri forsendu eru það ánægjuleg tíðindi að loðna sé farin að berast til bræðslu hér á Akranesi eftir allanga bið.

Formaður fór og hitti starfsmenn bræðslunnar í dag og voru þeir nokkuð sáttir, en telja hins vegar að þessi vertíð verði því miður frekar snubbótt sökum þess hversu lítill loðnukvótinn er í ár.

Þau skip sem hafa landað loðnu hér á Akranesi á þessari vertíð eru Lundey,Víkingur,Faxi og Finnur fríði frá Færeyjum.

Þó svo að mikið sé að gera hjá bræðsluköllunum þá er ekki minna að gera hjá starfsmönnum HB Granda, sem unnið hafa sleitulaust á vöktum við loðnufrystingu síðustu daga og að sögn starfsmanna hefur hrognatakan og frystingin gengið mjög vel og góð stemming er á meðal starfsmanna.   

Eins og undanfarin ár býður Verkalýðsfélag Akraness félagsmönnum sínum upp á aðstoð við gerð einfaldra skattframtala. 

Þessi þjónusta hefur alltaf mælst gríðarlega vel fyrir og venjulega kemst aðeins hluti þeirra að sem vilja. Af þeim sökum verða helmingi fleiri tímar í boði í framtalsaðstoð í ár en áður hafa verið.

Aðsóknin er síst minni nú en áður og eru þeir félagsmenn sem vilja nýta sér þessa þjónustu því hvattir til að panta tíma sem allra fyrst vilji þeir komast að.