Formaður félagsins fór í morgun og kynnti nýgerðan kjarasamning fyrir starfsmönnum Fangs, en það eru starfsmenn sem starfa í mötuneyti og við ræstingar hjá Íslenska járnblendifélaginu.

Fyrir gerð nýs kjarasamnings voru grunnlaun starfsmanna eftir 5 ára starf 166.748 kr. en verða eftir nýgerðan samning komin uppí 184.748 kr. sem er hækkun uppá 10.8%

Föst laun þ.e.a.s. vaktarálag, ferðapeningar og bónus hjá starfsmanni eftir 5 ára starf var fyrir nýgerðan kjarasamning 223.929 kr. en verða eftir samning 248.908 kr. sem er hækkun uppá 24.978 kr. á mánuði eða sem nemur 11% hækkun.  Þetta er hækkun sem gildir fyrsta ár samningsins.

Starfsmenn voru almennt mjög ánægðir með samninginn og telja þetta jákvætt skref í að bæta kjör þeirra sem eru með hvað lægstu launin. 

Stjórn og trúnaðarráð fundaði í gærkvöldi og var þar farið yfir nýgerðan kjarasamning. Voru fundarmenn almennt sáttir við samninginn og þá sérstaklega þann þátt sem lýtur að hækkun lægstu launa. Samt sem áður hefðu stjórnarmenn viljað sjá meiri hækkanir.

Ákveðið var á fundinum að fyrirkomulag kosninga um samninginn verði með þeim hætti að opinn kjörfundur verður þar sem hægt verður að kjósa um samninginn á skrifstofu félagsins.

Formaður mun kynna samninginn hjá lifrarbræðslunni Jóni Þorsteinssyni á mánudaginn og mun starfsmönnum gefast kostur á að kjósa um samninginn að lokinni kynningu. Einnig verður kynning á þriðjudaginn í fyrirtækinu Smellinn en þó nokkur fjöldi starfsmanna þar er af erlendu bergi brotinn og verður pólskur túlkur því með í þeirri kynningu.

Síðan verður opinn félagsfundur á þriðjudagskvöld kl. 20:00 í sal HB Granda og þar mun félagsmönnum einnig gefast kostur á að kjósa um samninginn.

Hægt verður að kjósa um samninginn á skrifstofu félagsins frá 29. febrúar til 7 mars en þá verður kjörfundi lokið.

Stjórn félagsins vill minna félagsmenn sem taka laun eftir kjarasamningi Samtaka atvinnulífsins við Starfsgreinasamband Íslands á kynningarfundinn annað kvöld kl. 20:00 í sal HB Granda.

Félagsmönnum mun gefast kostur á að kjósa um samninginn að lokinni kynningu á honum.

Í morgun kynnti formaður samninginn fyrir starfsmönnum lifrarbræðslu Jóns Þorsteinssonar og á morgun er fyrirhugaður kynningarfundur með starfsmönnum Smellinn. Á miðvikudaginn verður síðan kynningarfundur með starfsmönnum Norðanfisks.

Á þeim kynningum sem formaður hefur haldið hefur komið fram nokkur ánægja með nýgerðan samning þótt vissulega séu alltaf atriði sem betur hefðu mátt fara í nýjum samningi að mati fundarmanna. En heilt yfir virðast félagsmenn vera nokkuð ánægðir með nýgerðan samning.

Formaður félagsins hélt kynningarfund um nýgerðan kjarasamning með starfsmönnum Smellinns.  Um 100 manns starfa hjá Smellinn og voru nánast allir starfsmenn mættir á kynningarfundinn sem stóð í vel á annan tíma.

Töluvert stór hluti starfsmanna Smellins eru af erlendu bergi brotnir. Langstærsti hlutinn kemur frá Póllandi einnig eru nokkrir frá Litháen.  Á fundinum í morgun var pólskur túlkur með í för og var það alveg bráðnauðsynlegt til að koma sem mestum upplýsingum um innhald samningsins til skila til starfsmanna.  Einnig dreifði formaður kynningarefni um helstu atriði samninsins á pólsku, litháísku og ensku. 

Á fundinum fór formaður yfir helstu atriði samningsins og vöknuðu fjölmargar spurningar hjá starfsmönnum sem formaður svaraði eftir bestu getu.  Töluvert stór hluti starfsmanna er að vinna eftir launatöxtum og mun taxtahækkun samningsins snerta mjög marga starfsmenn fyrirtækisins. 

Aðstoð við gerð einfaldra skattframtala hefst þriðjudaginn 4. mars nk.

Takmarkaður fjöldi tíma er í boði svo félagsmenn eru beðnir að panta sem fyrst.

Rétt er að minna félagsmenn á að gríðarlegur fjöldi félagsmanna nýtti sér þessa þjónustu félagsins í fyrra og því afar brýnt að panta tíma sem allra fyrst, eins og áður sagði.

Nauðsynlegt er að hafa öll gögn og veflykil meðferðis, starfsfólk skrifstofu getur aðstoðað við að útvega nýjan veflykil hafi hann glatast.

Hægt er að bóka tíma á skrifstofu félagsins, Sunnubraut 13, sími 4309900

Faxi RE 9 kom með fyrstu loðnuna til löndunar hér á Akranesi í morgun og er skipið með nánast fullfermi sem er um 1.400 tonn.

Undirbúningur til að hefja löndun stendur nú yfir, en reiknað er með að hrognataka geti hafist seint í kvöld og verður unnið sleitulaust á vöktum á meðan hrognatakan á sér stað.

Það er alveg ljóst að hér getur verið um töluvert uppgrip fyrir starfsmenn að ræða á meðan á hrognatökunni stendur.

Formaður kíkti einnig á starfsmenn síldarbræslunar rétt áðan og voru þeir að leggja lokahönd á allan undirbúning til að geta tekið á móti loðnu til bræðslu. 

Kynningarfundir á nýgerðum kjarasamningi hafa nú staðið yfir á fullu alla þessa viku.

Þau fyrirtæki sem formaður hefur kynnt samning í eru t.d. Fang, Norðanfiskur, HB Grandi, Smellinn, Jón Þorsteinsson og einnig hefur verið almennur félagsfundur þar samningurinn var kynntur ítarlega.

Stjórn félagsins vill hvetja alla þá sem vinna eftir nýgerðum samningum að kynna sér þá vel og vandlega og nýta sér kosningarétt sinn. Hægt verður að kjósa um samninginn á skrifstofu félagsins, Sunnubraut 13, til kl 16:00 föstudaginn 7. mars.

Formaður sendi í dag bréf og kynningarefni til þeirra sem taka laun eftir kjarasamningi Samiðnar við SA, þ.e.a.s. þeirra sem tilheyra iðsveinadeild félagsins. Í bréfinu hvetur formaður iðnaðarmenn til að kynna sér samninginn vel og vandlega og kjósa um nýgerðan samning.

Kynningarfundur um kjarasamning Samiðnar við SA verður haldinn í fundarsal félagsins að Sunnubraut 13 mánudaginn 3. mars kl. 19:00 og eru félagsmenn í iðnsveinadeild hvattir til að mæta á fundinn. Hægt verður að kjósa um samninginn að loknum fundi.

Geir H. Haarde, forsætisráðherra, kom inn á komandi kjarsamninga á hinum almenna vinnumarkaði í áramótaávarpinu sínu til þjóðarinnar á gamlásdag. 

Þar sagði forsætisráðherrann m.a.

"Framundan eru kjarasamningar á almennum vinnumarkaði og þar með mikilvægar ákvarðanir í efnahagsmálum Íslendinga. Reynsla undanfarinna ára vekur sannarlega vonir um framhald farsællar stefnu. Í forystusveit launamanna og vinnuveitenda er ábyrgt fólk sem hefur lært það af reynslunni að hóflegir kjarasamningar sem byggja á traustu atvinnulífi og stöðugleika í efnahagsmálum leiða til mestra kjarabóta".

það fór ekki á milli mála að forsætisráðherra er að kalla eftir þjóðarsátt í komandi kjarasamningum og biður verkafólk um að gerðir verða hóflegir kjarasamningar í komandi samningum.

Starfsgreinasamband Íslands hefur lagt fram sýna kröfugerð til Samtaka atvinnulífsins og í þeirri kröfugerð er gert ráð fyrir að lágmarkslaun hækki úr 125.000 1. janúar 2008 í 150.000 síðan er gerð krafa um að lágmarkslaunin verði orðin 165.000 1. janúar 2009. 

Það er mat formanns félagsins að þessi krafa sé hófstillt, kannski of hófstillt.  Samt sem áður eru Samtök atvinnulífsins nú þegar búin að hafna því að lágmarkslaunin hækki í 165.000 kr.  Stjórn og trúnaðarráð Verkalýðsfélags Akraness hefur sagt að grunnforsenda þess hægt verði að ganga frá kjarasamningum sé að lágmarkslaunin hækki úr 125.000 í 165.000 á samningstímanum sem yrði til tveggja ára.

Forsætisráðherra talar um að gerðir verði hóflegir kjarasamningar til að viðhalda stöðugleika í íslensku samfélagi. Það skýtur skökku við að í fréttum fyrir örfáum dögum síðan kom fram að laun æðstu stjórnenda ríkisins hefðu hækkað um 18% á síðustu tveimur árum, en almennir starfsmenn hins opinbera hækkuðu einungis um 7-9%. Því spyr formaður sig, gilda hóflegir kjarasamningar einungis fyrir ófaglærða hjá hinu opinbera og á hinum almenna vinnumarkaði?

Þessu til viðbótar hafa laun seðlabankastjóra hækkað um 200.000 kr. á mánuði eins og fram hefur komið hér á heimasíðunni áður. Þess vegna er það óþolandi með öllu að í hvert sinn sem kemur að kjarasamningum hjá verkafólki á hinum almenna vinnumarkaði þá skuli úr öllum áttum heyrast varnaðarorð sem lúta að hóflega gerðum kjarasamningum.

Einnig er rétt að minna á það að ríki og sveitarfélög hafa á undanförnum dögum og mánuðum verið með sértækar aðgerðir vegna launamála starfsmanna sinna og nægir að nefna að dómsmálaráðherra hækkaði laun lögreglumanna um 30.000 kr. ekki alls fyrir löngu, sveitarfélögin á höfuðborgarsvæðinu hafa einnig verið með sértækar aðgerðir handa sínum starfsmönnum og sem dæmi þá hækkuðu laun grunnskólakennara í Kópavogi um 18.000 kr. Allar þessar launahækkanir og sértæku aðgerðir koma þrátt fyrir að kjarasamningar þessara hópa séu ekki lausir. Vissulega ber að fagna þessum sértæku aðgerðum en að sama skapi er það eins og áður sagði óþolandi að þegar kemur að kjarasamningum hjá almennu verkafólki þá skuli heyrast varnaðarorð úr öllum áttum um að nú skuli stigið varlega til jarðar ella sé stöðugleika í íslensku samfélagi ógnað.

Aðalfundur sjómannadeildar var haldinn 29. desember sl.  Fundurinn var mjög góður og fór formaður sjómannadeildar yfir helstu málefni er lúta að deildinni.

Formaður fór yfir nýjan kjarasamning sem gerður var við landsamband smábátamanna.  Fram kom í máli fundarmanna að þeir fögnuðu nýjum kjarasamningi en eins og áður hefur komið fram hafa smábátasjómenn ekki haft kjarasamning áður.  Í þessum samningi er verið að tryggja smábátasjómönnum hin ýmsu réttindi sem þeir ekki hafa haft áður. 

Á fundinum var einnig kosið í stjórn deildarinnar og voru tveir nýir sjómenn kosnir í stjórn það voru þeir Ólafur Kristjánsson skipverji á skutttogaranum Sturlaugi H Böðvarssyni og Pétur Lárusson skipverji á smábátnum Keili.

Stjórn deildarinnar skipa þá eftirtaldir aðilar:

Jóhann Örn Matthíasson

Svavar S Guðmundsson

Sveinbjörn Rögnvaldsson

Elías Ólafsson

Ólafur Kristjánsson

Pétur Lárusson

Laun félagsmanna Verkalýðsfélags Akraness sem vinna eftir eftirfarandi kjarasamningum hækkuðu um eftirfarnandi prósentur um síðustu áramót.

Kjarasamningar verkafólks og iðnaðarmanna á hinum almenna vinnumarkaði voru lausir nú um áramótin og standa viðræður um endurnýjun þeirra kjarasamninga nú að fullu yfir.