Formaður félagsins fór í hefðbundna vinnustaðaheimsókn til starfsmanna Íslenska járnblendifélagsins í morgun, en yfir 100 félagsmenn Verkalýðsfélags Akraness starfa hjá Íj í dag og hefur þeim fjölgað töluvert á liðnum misserum.

Starfsmenn Íj hafa undanfarna mánuði verið að vinna að undirbúningi nýrrar framleiðslu sem nefnist FSM en sú framleiðsla mun gera rekstur fyrirtækisins mun stöðugri en hann hefur verið undanfarin ár.

Formaður fór víða um verksmiðjuna og tók starfsmenn tali fram kom í máli starfsmanna að mjög mikilvægt sé að hefja þessa nýju vinnslu á FSM sem mun væntanlega tryggja rekstur fyrirtækisins mun betur til lengri tíma litið bæði starfsmönnum og eigendum til hagsbóta.

Kjarasamningur starfsmanna rennur út 30. nóvember nk. og bera starfsmenn miklar væntingar til þess samnings einfaldlega vegna þess að starfsmenn Íj hafa ekki notið þess mikla launaskriðs sem verið hefur á hinum almenna vinnumarkaði á síðustu árum.  Undirbúningur fyrir komandi kjarasamning hjá Íslenska járnblendifélaginu mun hefjast stax eftir sumarleyfi og er stefnt að því að kröfugerðin liggi fyrir í september eða október.

Verkalýðsfélag Akraness býður félagsmönnum sínum á tónleika með Bubba Morthens. Tónleikarnir verða haldnir í Bíóhöllinni föstudaginn 30. maí kl. 20:00. Húsið opnar kl. 19:30

Hver félagsmaður fær afhentan einn miða á skrifstofu félagsins frá og með föstudeginum 16. maí á meðan þeir endast.

Athugið að takmarkað magn miða verður í boði og því gildir reglan: fyrstur kemur, fyrstur fær.

Bæjarstjórn Akraness samþykkti á fundi sínum í gær að greiða starfsmönnum Akraneskaupstaðar eingreiðslu að fjárhæð 60.000.- miðað við fullt starf og hlutfallslega miðað við starfshlutfall eins og launagreiðslur voru m.v. 1. maí 2008.  Bæjarstjórn stefnir að því að greiða starfsmönnum áðurnefndar eingreiðslur föstudaginn 16. maí nk.

Með þessari ákvörðun hefur bæjarstjórn vikið frá fyrri áætlan sinni að tengja eingreiðslunnar við komandi kjarasamninga.  Ef eingreiðslan hefði verið tengd komandi kjarasamningum þá hefði stórhluti starfsmanna ekki fengið sína greiðslu fyrr en í desember.

Formaður Verklýðsfélags Akraness var búinn að benda á það hér á heimasíðu félagsins að ef bæjarráð ætlaði að tengja eingreiðslunnar við komandi kjarasamninga þá myndi slík ákvörðun valda umtalsverðri úlfúð og óánægju hjá starfsmönnum bæjarins.

Á þeirri forsendu fagnar formaður félagsins þessari ákvörðun bæjarstjórnar að hverfa frá fyrri ákvörðun sinni um að tengja áðurnefndar eingreiðslur komandi kjarasamningum.  Vissulega hefði formaður viljað sá þessa eingreiðslu hærri eða alla vega með sambærilegum hætti og var að gerast hjá sveitarfélögunum á höfuðborgarsvæðinu og á Reykjanesi.  Samt er full ástæða til að fagna því að vikið var frá því að tengja þessa greiðslu við komandi kjarasamninga.

Mikið hefur gengið á í bústað félagsins í Svarfhólsskógi, Svínadal undanfarið. Þar hafa staðið yfir framkvæmdir sem nú sér fyrir endann á.

Það er óhætt að segja að bústaðurinn hafi fengið algera andlitslyftingu því skipt var um mestallt gólfið og gólfefni ásamt því að eldhúsinnrétting og tæki voru endurnýjuð. Tækifærið var notað og skipulagi eldhússins breytt til hins betra með því að opna það og við þá breytingu er mun rýmra um dvalargesti.

Hægt er að skoða fleiri myndir úr Svínadal hér.

Opið og bjart eldhús, uppþvottavélin rétt ókomin í hús  Stofusófinn

Forsvarsmenn HB Granda hafa endurráðið tvo af þeim fjórum starfsmönnum sem sagt var upp ekki alls fyrir löngu í Síldar- og fiskimjölsverksmiðjunni á Akranesi. Þessu fagnar formaður félagsins þó vissulega hefði hann kosið að sjá endurráðningu allra starfsmannanna.

Það var skoðun formanns félagsins að forsvarsmenn HB Granda hafi ekki staðið rétt að áðurnefndum uppsögnum enda var  hér um lykilstarfsmenn í verksmiðjunni að ræða sem búa yfir áratugalangri reynslu í rekstri verksmiðjunnar.

Það er eins og áður sagði fagnaðarefni að nú sé búið að endurráða tvo af þeim fjórum sem gefur okkur tilefni til bjartsýni á að rekstur verksmiðjunnar muni haldast lítið breyttur til lengri tíma litið. 

Eftir þessar endurráðningar eru fjórir starfsmenn starfandi í bræðslunni og í gær var gengið frá ráðningu á nýjum verksmiðjustjóra en það er Guðmundur Hannesson en hann hefur verið vaktformaður í verksmiðjunni til fjölda ára.

Bæjarstjórn Akraness samþykkti á fundi sínum síðasta þriðjudag að skoða möguleika á að standa fyrir ráðstefnu á haustdögum um atvinnumál sjávarútvegsfyrirtækja og fyrirkomulag kvótamála í samvinnu við Samband sveitarfélaga.  Það var afar ánægjulegt að sjá að tillagan var samþykkt samhljóða í bæjarstjórn.

Það var Guðmundur Páll Jónsson bæjarfulltrúi sem lagði tillöguna fram.  Í máli Guðmundar Páls kom fram að liðinn vetur sé búinn að vera okkur Akurnesingum sérstaklega erfiður varðandi þróun í fiskvinnslu- og útgerðamálum.  Hann sagði einnig að almenning hér á Akranesi setti algjörlega hljóðan yfir þeirri þróun sem átt hefur sér stað í fiskvinnslumálum og átti hann við þann mikla samdrátt og uppsagnir sem átt hafa sér stað hjá HB Granda.

Í máli bæjarfulltrúans kom fram að ráðstefnuna verði að halda í samvinnu eða á vettvangi Sambands íslenskra sveitarfélaga.  Á þessari ráðstefnu vill bæjarfulltrúinn að farið verði yfir leikreglur sem gilda í íslenskum sjávarútvegi og í stjórnun fiskveiðistjórnunarkerfisins með tilliti til þess sem byggðirnar og samfélögin hafa þurft að mæta. 

Guðmundur Páll vill einnig að menn spyrji á þessari ráðstefnu hvort þær leikreglur sem gilda í íslenskum sjávarútvegi í dag séu barns síns tíma.  Hann vill einnig að menn spyrji sig þeirrar spurningar hvort leikreglunar þurfi ekki að vera með öðrum hætti en þær eru í dag.  Hann vill að sveitarstjórnarstigið skoði á þessari ráðstefnu leikreglur fiskveiðistjórnunarkerfisins á hlutlausan og yfirvegaðan hátt með hagsmuni almennings sem í byggðunum býr og hafa búið að leiðarljósi.

Formaður félagsins fagnar því að bæjarstjórn Akraneskaupstaðar hafi tekið frumkvæðið í því að halda slíka ráðstefnu því það er með öllu óþolandi hvernig það fiskveiðistjórnunarkerfi sem nú er við lýði hefur leikið þetta samfélag hér á Akranesi sem og aðrar byggðir þessa lands. 

Það er full ástæða til að kalla eftir nýjum leikreglum í íslenskum sjávarútvegi í ljósi þess að fjölda byggðarlaga hefur nánast blætt út vegna þess kerfis sem hér hefur verið í hart nær 24 ár.

Hægt er að hlusta á tillögu og ræðu Guðmundar Páls Jónssonar með því að smella hér.  Ræðan hans er þegar 1.09 er liðin á fundinn.

Eins og áður hefur komið fram hér á heimasíðunni þá ætlar Verkalýðsfélag Akraness að bjóða félagsmönnum sínum á tónleika með Bubba Morthens í Bíóhöllinni föstudaginn 30. maí kl. 20:00.

Fjölmargir félagsmenn Verkalýðafélags Akraness hafa komið við á skrifstofu félagsins síðan á föstudaginn til þess að krækja sér í miða á tónleikana.

Enn eru þó til miðar svo þeir félagsmenn sem ætla að nýta sér þetta boð eru eindregið hvattir til þess að sækja miðann sinn á skrifstofu félagsins.

Nú er endurúthlutun orlofshúsa lokið og var eindaginn á föstudaginn sl. Búið er að losa þær vikur sem ekki voru greiddar á eindaga og er nú hægt að skoða lista yfir lausar vikur hér. Þessi listi verður uppfærður eftir þörfum.

Þeim sem hafa áhuga á að bóka viku af listanum er bent á að snúa sér til skrifstofu félagsins, Sunnubraut 13, eða í síma 4309900.

Aðalsamninganefnd Starfsgreinasambands Íslands kom saman til fundar í húsakynnum ríkissáttasemjara á mánudaginn var vegna kjarasamnings við ríkið en sá samningur rann út 31. mars sl.

Það hafa verið nokkuð stífar viðræður við samninganefnd ríkisins að undanförnu og vonast menn til að það fari að sjá fyrir endann á þessum kjaraviðræðum.  Það er mat formanns félagsins að það sé mjög mikilvægt að ganga frá samningi á næstu dögum og er formaður reyndar nokkuð bjartsýnn á að það takist.

Það liggur fyrir að starfsmenn sem starfa hjá ríkinu eru orðnir mjög óþolinmóðir vegna þess hversu langt er síðan kjarasamningurinn rann út og á þeirri forsendu er eins og áður sagði mjög mikilvægt að gengið verði frá viðunandi kjarasamningi á næstu dögum.

Það er ljóst að samningurinn við ríkið þarf að vera innihaldsríkari en kjarasamningurinn sem gerður var á hinum almenna vinnumarkaði einfaldlega vegna þess að allt aðrar forsendur eru nú í íslensku efnahagslífi en þegar gengið var frá kjarasamningi á hinum almenna vinnumarkaði 17 febrúar sl.

Eins og fram hefur komið hér á heimasíðunni þá var öllum nema 20 starfsmönnum landvinnslu HB Granda á Akranesi sagt upp störfum í vetur og áttu uppsagnirnar að taka gildi um næstu mánaðarmót. Nú hafa hins vegar forsvarsmenn fyrirtækisins boðið öllum þeim sem vilja tímabundna ráðningu í 5 til 6 vikur til viðbótar og verða það að teljast mjög gleðileg tíðindi.

Sumarlokun mun hefjast hjá fyrirtækinu 11. júlí og standa til 18. ágúst en á meðan á sumarlokuninni stendur mun fara fram undirbúningur nýrrar framleiðslu þar sem sett verður upp nýr lausfrystibúnaður sem notaður verður til lausfrystingar á ufsa- og þorskflökum.

Áætlað er að um 20 manns muni starfa við þessa nýju framleiðslu fyrirtækisins en getgátur eru um að sá fjöldi sé jafnvel of lítill og á þeirri forsendu eygir formaður von til þess að hugsanlega muni fleiri fá fastráðningu þegar framleiðslan mun hefjast.

En eins og áður sagði er það mikið gleðiefni að starfsmönnum skuli hafa verið boðin tímabundin ráðning, sérstaklega í ljósi þess að atvinnumöguleikar fyrir kvenfólk þessa stundina eru ekki ýkja miklir hér á Akranesi.