Nú hefur farið fram úthlutun vegna sumarleigu orlofshúsa félagsins sumarið 2014. Bréf til allra þeirra sem sem sóttu um verða póstlögð í dag, og þar kemur fram hvort þeir hafi fengið úthlutað eða ekki. Þessi bréf eru einnig sýnileg inni á Félagavefnum og þar hefur einnig myndast bókun hjá þeim sem fengu úthlutað.

Þeir sem fengu úthlutað hafa frest til föstudagsins 2. maí að greiða leiguna og þann 6. maí verður þeim vikum sem eftir standa endurúthlutað. Gríðarlega mikil eftirspurn er eftir orlofshúsunum og því er mikilvægt að þeir sem fengu úthlutað gangi sem fyrst frá greiðslu ef þeir ætla sér að þiggja sína úthlutuðu viku. Eftir hádegi þann 6. maí verður svo hægt að bóka þær vikur sem eftir standa þegar endurúthlutun er lokið og þá gildir sú regla að fyrstur kemur, fyrstur fær.

Í dag rennur út frestur til að sækja um orlofshús eða -íbúð fyrir sumarið svo þeir sem eiga eftir að skila umsókn eru hvattir til að bíða ekki lengur.

Á mánudaginn fer úthlutun fram á þann hátt að allar umsóknir eru skráðar inn í tölvukerfi félagsins. Kerfið raðar umsóknum í röð eftir punktastöðu, þ.e. þeir umsækjendur sem flesta hafa punktana eru fremstir í röðinni og svo koll af kolli. Ef punktar tveggja eru jafnir raðast sá eldri framar í röðina. Kerfið vinnur sig síðan í gegnum umsóknirnar og úthlutar vikum eftir punktastöðu. Varðandi ávinnslu punkta, þá vinnur félagsmaður sér inn einn punkt fyrir hvern þann mánuð sem hann greiðir félagsgjald, en fái hann úthlutað dragast 24 eða 36 punktar frá punktastöðu hans. 

Í lok dags á mánudag verða bókanir sýnilegar á Félagavef hjá þeim sem fengu úthlutað, auk þess sem öllum umsækjendum verður sent bréf heim. Greiða þarf leigu fyrir 2. maí. Þeir sem ekki fá úthlutað í fyrri úthlutun lenda sjálfkrafa í endurúthlutun þar sem þeim vikum er úthlutað sem ekki voru greiddar á eindaga fyrri úthlutunar. Fyrir endurúthlutun er heimilt að breyta umsóknum og leggja inn nýjar. Endurúthlutun fer fram þann 6. maí. Eftir endurúthlutun verða lausar vikur auglýstar hér á heimasíðunni og hægt að bóka þær á skrifstofu félagsins eða á Félagavefnum. Gildir þá hin ágæta regla: Fyrstur kemur, fyrstur fær.

Hafir þú náð 25 ára aldri og starfað við einhverja iðn í 5 ár, þá getur raunfærnimat verið eitthvað fyrir þig og jafnvel stytt skólagöngu þína til muna. Næstkomandi mánudag kl. 17.30 verður haldinn kynningarfundur um raunfærnimat í húsakynnum Símenntunarmiðstöðvar Vesturlands á Akranesi. Fundurinn er öllum opinn og vonast er eftir þátttöku sem flestra.

Þriðjudaginn 1. apríl  undirritaði Starfsgreinasamband Íslands nýtt samkomulag við ríkið. Um er að ræða samkomulag um breytingar og framlengingu á kjarasamningi aðila og mun fyrri samningur framlengjast frá 1. mars 2014 til 30. apríl 2015.  Undir þennan samning heyra m.a. félagsmenn Verkalýðsfélags Akraness sem starfa á Sjúkrahúsi Akraness

Helstu atriði samkomulagsins eru þau að laun í launaflokki 1-10 hækka um 9.750 krónur en laun í launaflokki 11 og ofar hækka um 2,8%, þó að lágmarki um 8.000 krónur. Einnig var samið um tvær eingreiðslur – annars vegar 14.600 kr. í apríl 2014 og hins vegar 20.000 kr. eingreiðslu í febrúar 2015. Báðar eingreiðslurnar miðast við fullt starf. Þá má nefna að persónuuppbót (desemberuppbót) verður 73.600 kr. á árinu 2014 og orlofsuppbót verður 39.500 kr. 

Kosið verður um samkomulagið í póstatkvæðagreiðslu og verða kjörgögn send heim til þeirra félagsmanna sem vinna eftir þessum samningi nú í vikunni. Atkvæðaseðill þarf að hafa borist kjörstjórn Starfsgreinasambands Íslands (í Reykjavík) fyrir kl. 12:00 þann 23. apríl næstkomandi. Póststimpill gildir ekki. Hægt er að lesa kynningarbækling um helstu atriði samkomulagsins á íslensku, ensku og pólsku með því að smella hér.

Félagsmenn eru hvattir til að nýta kosningarétt sinn og láta skoðun sína í ljós með því að koma atkvæðaseðli tímanlega í póst.

Búið er að setja nýjan kjarasamning vegna starfsmanna Elkem, og kauptaxta sem gilda frá 01.01.2014 inn á heimasíðuna, undir liðnum Kjaramál - Kjarasamningar og kauptaxtar. Heildarkjarasamningur hefur ekki verið prentaður, og þarf því að skoða nýgerðan samning með hliðsjón af heildarkjarasamningi frá árinu 2005 og þeim breytingum sem gerðar voru á honum 2008 og 2011.

Einnig hefur ný kaupskrá verið sett inn fyrir sjómenn, en kaupliðir þeirra hækkuðu um 2,8% frá og með 1. mars 2014. Eins og alvitað er, er kjarasamningur sjómanna ennþá laus, en þrátt fyrir það hafa SSÍ og LÍÚ síðustu ár samið um að hækka kauptryggingu og aðra kaupliði sjómanna í takt við það sem um semst á hinum almenna vinnumarkaði.

Nú er opið fyrir umsóknir um dvöl í orlofshúsum félagsins Sumarið 2014. Umsóknareyðublöð og bæklingar fóru í póst í dag og ættu því að berast félagsmönnum í vikunni, en einnig er hægt að leggja inn umsókn á Félagavefnum og eru félagsmenn eindregið hvattir til að nýta sér þann möguleika. Athugið að þegar sótt er um á Félagavefnum er farið í liðinn Orlofshús og þar í Umsókn (en ekki liðinn Laus orlofshús, sá liður er aðeins notaður til að bóka orlofshús á vetrartíma og til að bóka þær vikur sem ganga af eftir að báðum úthlutunum er lokið).

Í sumar verður sem fyrr boðið upp á dvöl í orlofshúsum félagsins í Húsafelli, Efstaási-Svínadal, Bláskógum-Svínadal, Hraunborgum, Ölfusborgum, í þremur íbúðum á Akureyri og í Kjós. Að auki hefur félagið tekið á leigu íbúðir í Stykkishólmi og Vestmannaeyjum. Upplýsingar um þá orlofskosti koma hingað inn á heimasíðuna (vinstra megin, undir Orlofssjóður) á morgun.

Úthlutun fer þannig fram að allar umsóknir eru skráðar inn í tölvukerfi félagsins. Kerfið raðar öllum umsóknum í röð eftir punktastöðu, þ.e. þeir umsækjendur sem flesta hafa punktana eru fremstir í röðinni og svo koll af kolli. Ef punktar tveggja eru jafnir fær sá úthlutað sem fyrr sótti um. Kerfið vinnur sig síðan í gegnum umsóknirnar og úthlutar vikum eftir punktastöðu. Þeir sem ekki fá úthlutað í fyrri úthlutun lenda sjálfkrafa í endurúthlutun þar sem þeim vikum er úthlutað sem ekki voru greiddar á eindaga fyrri úthlutunar. Leyfilegt er að breyta umsóknum og leggja inn nýjar fyrir endurúthlutun.

Helstu dagssetningar:

11. apríl - Frestur til að skila inn umsóknum um orlofshús

14. apríl - Fyrri úthlutun fer fram, allir umsækjendur fá svarbréf í pósti (einnig er hægt að sjá strax hvort bókun hafi myndast inni á félagavefnum)

02. maí  - Eindagi fyrri úthlutunar, þeim vikum sem ekki eru greiddar á eindaga er úthlutað aftur

06. maí  - Endurúthlutun fer fram, þeir sem fá úthlutað fá það staðfest með bréfi

06. maí - Kl. 12:00 - Fyrstir koma, fyrstir fá! Þeir sem fyrstir koma geta bókað lausar vikur (athugið að eftir eindaga endurúthlutunar getur lausum vikum fjölgað)

13. maí  - Eindagi endurúthlutunar 

Í dag var fundað hjá Ríkissáttasemjara vegna kjarasamnings Klafa á Grundartanga, en þeir sjá um út- og uppskipanir á Grundartangasvæðinu fyrir Elkem Ísland og Norðurál. En eins og fram hefur komið hér í fréttum var gengið frá samningi við starfsmenn Elkem Ísland og er launakrafa starfsmanna Klafa byggð að langstærstum hluta á því sem um samdist í þeim samningi.

Þetta var góður og árangursríkur fundur og unnið er nú að því að útfæra þær launabreytingar sem munu taka gildi í kjarasamningi starfsmanna Klafa, og gefa samningsaðilar sér viku til að útfæra það. En skilningur beggja aðila er á að launabreytingar starfsmanna Klafa verði algerlega í takti við það sem um samdist fyrir starfsmenn Elkem Ísland á Grundartanga. Reiknar formaður með því að hægt verði að ganga frá nýjum kjarasamningi í byrjun næstu viku ef ekkert óvænt kemur upp á.

Rétt í þessu lauk talningu atkvæða í kosningu um kjarasamning Elkem Ísland á Grundartanga við Samtök Atvinnulífsins sem Verkalýðsfélag Akraness gekk frá síðastliðinn föstudag. Á kjörskrá voru 134. Alls greiddu 111 manns atkvæði sem gerir 82,8% kjörsókn. Já sögðu 77, eða 70% starfsmanna. Nei sögðu 33 eða 29% starfsmanna. Einn seðill var auður, eða 1%. Samningurinn telst því samþykktur með 70% atkvæða.

Formaður félagsins er afar ánægður með þessa niðurstöðu, enda er að hans mati hér um mjög góðan samning að ræða, samning sem er að gefa starfsmönnum launahækkun frá rúmum 30.000 krónum upp í tæpar 36.000 krónur í heildarhækkun á mánuði. Það er morgunljóst að þetta er umtalsvert betri samningur en samræmda launastefnan á hinum almenna vinnumarkaði kvað á um.

Formaður vill þakka trúnaðarmönnum kærlega fyrir frábærlega vel unnin störf í þessari gríðarlega erfiðu kjaradeilu, og ekki síður starfsmönnum fyrir frábæra samstöðu og einhug, en eins og fram hefur komið hér á heimasíðunni þá hefði verkfall skollið á síðastliðinn þriðjudag, ef ekki hefði tekist að ganga frá nýjum kjarasamningi.

Rétt í þessu undirritaði Verkalýðsfélag Akraness nýjan kjarasamning við forsvarsmenn Elkem Ísland og Samtök atvinnulífsins, en eins og fram hefur komið átti verkfall að skella á í verksmiðjunni næsta þriðjudag tækist ekki að semja fyrir þann tíma.

Formaður félagsins skal fúslega viðurkenna að það var afar ánægjulegt og mikilvægt að ná að klára undirritun á nýjum kjarasamningi áður en til verkfalls kæmi, enda er það morgunljóst að í verkfallsátökum stendur sjaldan einhver upp sem sigurvegari.

Þessi nýi kjarasamningur fyrir starfsmenn Elkem Ísland á Grundartanga gildir frá 1. janúar 2014 og gildir í þrjú ár. Við lausn á þessari deilu var reynt að finna leið sem gæti skilað báðum aðilum ávinningi, þ.e.a.s. bæði fyrirtækinu og starfsmönnum.  Eftir mikla yfirlegu og vinnu komust menn að niðurstöðu um lausn sem byggist á því að taka upp nýja bónusa til handa starfsmönnum, sem mun klárlega einnig nýtast fyrirtækinu ef vel tekst til.

Formaður félagsins er mjög sáttur með þennan samning, enda er hann að skila starfsmönnum góðum ávinningi og mun formaður fara ítarlega yfir innihald samningsins með starfsmönnum á tveimur kynningarfundum sem haldnir verða þriðjudaginn 25. mars á Gamla Kaupfélaginu kl. 13:00 og 19:00. Hægt verður að kjósa um samninginn að kynningum afloknum. Starfsmenn geta haft samband við formann félagsins til að fá nánari upplýsingar um innihald samningsins og er síminn hjá formanni 8651294. Formaður ítrekar það að hann er afar ánægður með að farsæl lausn hafi náðst þar sem hagsmunir starfsmanna og fyrirtækisins voru hafðir að leiðarljósi við að leysa þessa mjög svo erfiða kjaradeilu.