Eins og undanfarin ár stóð Verkalýðsfélag Akraness fyrir nokkrum viðburðum í tilefni Sjómannadagsins um helgina. Eins og fram hefur komið hér á heimasíðunni hófust þeir viðburðir strax á föstudeginum þegar starfsmenn VLFA heimsóttu alla leikskóla bæjarins og gáfu uppundir 500 börnum harðfisk í tilefni dagsins.

Á Sjómannadaginn sjálfan tók félagið þátt í minningarathöfn í kirkjugarðinum þar sem blómsveigur var lagður á minnisvarða týndra sjómanna og var það formaður sjómannadeildar félagsins, Kristófer Jónsson, sem lagði blómsveiginn að minnisvarðanum. Að aflokinni minningarstundinni í kirkjugarðinum var haldin hátíðarguðsþjónusta í Akraneskirkju þar sem sjómaður var heiðraður fyrir vel unnin störf.

Í ár var það Kristófer Bjarnason, mikill aflaskipstjóri meðal annars á skipum Haraldar Böðvarssonar og co. sem heiðraður var. Það ánægjulega í þessu er að formaður sjómannadeildar, Kristófer Jónsson, er barnabarn Kristófers Bjarnasonar og því var það afar ánægjulegt að sjá þegar nafni þess sem heiðrunina fékk hengdi æðsta merki Sjómannadagsins á afa sinn.

Að lokinni guðsþjónustunni gengu kirkjugestir á Akratorg þar sem blómsveigur var lagður að sjómannastyttunni eins og gert hefur verið um áratuga skeið. Að þessu loknu hófst fjölskyldudagskrá við Akraneshöfn þar sem boðið var upp á hin ýmsu leiktæki og meðal annars kom landhelgisgæslan á þyrlunni og sýndi björgun úr sjó. Að þessari dagskrá stóðu Akraneskaupstaður og Verkalýðsfélag Akraness en yfirumsjón með dagskránni höfðu félagar úr björgunarsveitinni á Akranesi. Myndir frá deginum má sjá hér.  

Rétt í þessu lauk formaður félagsins við að heimsækja alla leikskólana á Akranesi sem eru Akrasel, Garðasel, Teigasel og Vallarsel. Tilefni heimsóknanna var Sjómannadagurinn sem er næstkomandi sunnudag en það er hefð hjá Verkalýðsfélagi Akraness að heimsækja öll leikskólabörn og gefa þeim harðfisk í tilefni dagsins.

Stjórn félagsins er það mikill heiður að geta glatt leikskólabörn á Akranesi með þessum hætti og minnt þau á mikilvægi sjómannsstarfsins. Það skein mikil gleði úr hverju andliti og kunnu börnin svo sannarlega að þakka fyrir sig því sum þeirra tóku lagið fyrir formanninn sem honum leiddist svo sannarlega ekki. Myndir frá deginum má sjá hér.

Formaður félagsins var nú í hádeginu viðstaddur þegar þau stórtíðindi gerðust að undirrituð var viljayfirlýsing á milli bandaríska sólarkísilfyrirtækisins Silicor materials og Faxaflóahafna um að fá úthlutað lóð undir verksmiðjuhús fyrirtækisins á Grundartanga.

Þetta eru gríðarlega jákvæð tíðindi fyrir atvinnulífið hér á Akranesi og í Hvalfjarðarsveit enda er hér um að ræða fyrirtæki sem mun veita allt að 420 manns atvinnu og þar af uppundir 150 sérmenntuð störf. Þessi verksmiðja flokkast sem umhverfisvæn enda er sáralítil ef nokkur mengun af þessari starfsemi. Með öðrum orðum hér er um græna og vistvæna stóriðju að ræða. Það er morgunljóst að þetta mun hafa gríðarlega jákvæð áhrif á samfélagið hér í kring enda skiptir höfuðmáli fyrir íslenskt samfélag að til verði vel launuð gjaldeyrisskapandi störf. Með gjaldeyrisskapandi störfum náum við að halda úti því velferðarsamfélagi sem við viljum búa í.

Stefnt er að því ef engin ljón verða í veginum að framkvæmdir við byggingu verksmiðjunnar hefjist strax í október á þessu ári og verði lokið um mitt ár 2016. Síðari áfangi verði síðan tilbúinn síðari hluta árs 2017. Ef allar áætlanir um uppbyggingu ganga eftir mun framleiðsla vera komin í fullan gang um mitt ár 2017. Hér er um fjárfestingu að ræða við byggingu verksmiðjunnar og tækjakaup sem nemur allt að 80 milljörðum íslenskra króna.

Á þessu sést að hér er um alvöru verkefni að ræða og þetta mun skipta íslenskt verkafólk gríðarlega miklu máli enda liggur fyrir að störf í stóriðjum hafa sem betur fer verið betur launuð heldur en almenn verkamannastörf á hinum almenna vinnumarkaði. Þetta mun ugglaust líka leiða til þess að þegar svona stór vinnustaður kemur inn á atvinnusvæðið okkar þá mun myndast samkeppni um gott vinnuafl og til að vera samkeppnishæf þurfa fyrirtæki að greiða viðunandi laun.

Formaður félagsins fagnar þessum tímamótum innilega enda er þetta merki og vísbending um enn bjartari tíma fyrir okkur Akurnesinga og íbúa Hvalfjarðarsveitar því það skiptir höfuðmáli fyrir öll sveitarfélög að hafa styrkar og sterkar stoðir þegar kemur að atvinnutækifærum. Það er ekkert sem bendir til annars en að þetta fyrirtæki uppfylli öll þau skilyrði.

Formaður félagsins getur einnig ekki annað en hrósað Gísla Gíslasyni, hafnarstjóra Faxaflóahafna, fyrir hans þátttöku í þessu máli enda hefur hann lagt sig allan fram við að láta þetta verkefni verða að veruleika á Grundartanga. Það var ekkert sjálfgefið að Grundartangi yrði fyrir valinu, þess vegna skiptir máli að menn vinni ötullega að því að fá góð, öflug og vistvæn fyrirtæki á Grundartanga og allt bendir til þess að hafnarstjóranum hafi tekist vel til í þeim efnum núna. Hér má sjá myndir frá því að viljayfirlýsingin var undirrituð í dag.

Næstkomandi sunnudag verður Sjómannadagurinn haldinn hátíðlegur um allt land. Eins og undanfarin ár verður boðið upp á hefðbundna hátíðardagskrá sem kostuð er af Verkalýðsfélagi Akraness, en því til viðbótar mun Björgunarfélag Akraness sjá um fjölskylduskemmtun sem er í boði Akraneskaupstaðar og Verkalýðsfélags Akraness. Eru sjómenn, fjölskyldur þeirra og bæjarbúar allir hvattir til að taka þátt í hátíðarhöldunum og njóta dagskrárinnar sem verður á þessa leið:

-Kl 10:00 - Athöfn við minnisvarða um drukknaða og týnda sjómenn í kirkjugarðinum að Görðum.

-Kl. 11:00 - Hátíðarguðsþjónusta í Akraneskirkju þar sem sjómaður verður heiðraður fyrir ævistarf sitt.

-Kl. 13:00 til 16:00 - Akranesviti verður opinn gestum. Vert að vekja athygli á því að Sigurbjörg Þrastardóttir, bæjarlistamaður Akraness, opnar sýningu í Akranesvita laugardaginn 31. maí sem opin verður að hluta til sumarlangt. Sigurbjörg sýnir  ljóð um hafið og fleira í vitanum.

Þessa dagana stendur yfir fiskvinnslunámskeið hjá þeim starfsmönnum HB Granda sem áttu eftir að taka námskeiðið en þessi námskeið veita starfsmönnum tveggja flokka launahækkun. Í morgun hélt formaður erindi á þessu námskeiði þar sem hann fór yfir réttindi og skyldur á íslenskum vinnumarkaði og öll þau réttindi og þjónustu sem Verkalýðsfélag Akraness veitir sínum félagsmönnum. Uppundir 20 manns sátu á þessu námskeiði og á morgun mun formaður einnig vera með sambærilega kynningu. Í heildina eru þetta á milli 40 og 50 manns sem nú sitja fiskvinnslunámskeið á vegum HB Granda.

Það er einn liður í starfsemi félagsins að halda kynningar af þessu tagi. Sem dæmi þá hélt formaður sambærilega kynningu fyrir nemendur í Fjölbrautaskóla Vesturlands í byrjun maí þar sem hann fór yfir starfsemi félagsins og hin ýmsu réttindi sem starfsmenn eiga á hinum íslenska vinnumarkaði.

Það er gríðarlega mikilvægt að launafólk sé meðvitað um öll þau réttindi og reyndar skyldur sem gilda á íslenskum vinnumarkaði og kynni sér ávalt vel öll þau réttindi sem þeim standa til boða hjá sínu stéttarfélagi.  

Enn er hægt að fá leigða viku í orlofshúsi í sumar, en þegar þetta er skrifað er um 26 lausar vikur að ræða. Mest eru þetta vikur í byrjun sumars og í lok ágúst, ekkert er laust í júlímánuði. Lista yfir lausar vikur er að finna hér og geta áhugasamir bókað á Félagavefnum, eða haft samband við skrifstofu félagsins.

Uppfært 15. maí kl. 14:00 - Enn eru 19 vikur lausar, nýjan listi yfir lausar vikur er að finna hér.

Uppfært 19. maí kl. 08:00 - Nýjan lista yfir lausar vikur er að finna hér.

Félagsskírteini VLFA veitir félagsmönnum þess ýmis sérkjör og afslætti eins og sjá má hér á heimasíðunni. Meðal þeira sérkjara sem félagsmönnum bjóðast eru kaup á  ársmiðum sem gilda á alla heimaleiki Skagamanna í fyrstu deildinni í sumar. Hægt er að velja um þrennskonar ársmiða - Brons, Silfur og Gull. Ársmiðarnir gilda allir á alla heimaleiki en misjafnt er hvað er innifalið þess utan. Innifalinn í öllum ársmiðunum er stuðningsmannafundur með þjálfara liðsins, leikmönnum og stjórn. Þegar komið er yfir í Silfurmiðann bætist til dæmis við kaffi og meðlæti í öllum hálfleikjum en með Gullmiðanum fylgir einnig aðgangur að VIP fundum fyrir leiki þar sem þjálfari liðsins fer yfir leikinn og tölfræðina og núverandi og fyrrverandi leikmenn mæta á svæðið.

Félagsmenn VLFA geta fengið afslátt af ársmiðunum gegn framvísun félagsskírteinis og eru miðarnir til sölu á skrifstofu KFÍA sem og í gegnum netfangið This email address is being protected from spambots. You need JavaScript enabled to view it. og í síma 4331109.

Afsláttur fyrir félagsmenn er sem hér segir:

VLFA hvetur félagsmenn sína til að mæta á völlinn í sumar og styðja við bakið á Skagamönnum.

Á morgun miðvikudag verður haldinn kynningarfundur vegna raunfærnimats í skipsstjórn, en raunfærnimat getur hentað þeim sem starfað hafa á sjó í 5 ár eða lengur og hafa áhuga á að öðlast stýrimanns- og skipstjórnarréttindi.

Raunfærnimat í skipsstjórn miðar að því að meta þá færni sem viðkomandi býr yfir inn í skólakerfið óháð því hvernig hennar hefur verið aflað. Metið er upp í skipstjórn á B stigi (45 m. skip). Þátttakendur fara í kjölfarið í skóla og ljúka því námi sem eftir stendur.

Fundurinn verður haldinn víða um land, meðal annars á Bókasafni Akraness. Fundurinn hefst klukkan 19:00 og eru áhugasamir hvattir til að skoða málið.

Þeir sem fengu úthlutað orlofshúsi í úthlutuninni 14. apríl eiga að greiða leiguna í síðasta lagi í dag 2. maí og eru því hvattir til að drífa í því sem fyrst. Eins og kemur fram í úthlutunarbréfi sem allir fengu sent og er einnig að finna inni á Félagavefnum,, er hægt að millifæra leiguna inn á bankareikning 0186-05-570355 kt. 6802696889, eða greiða með greiðslukorti inni á Félagavefnum og þar með tryggja sér úthlutaða viku.

Eftir helgi verða ógreiddar bókanir losaðar og á hádegi þann 6. maí verður þeim úthlutað aftur til þeirra sem ekkert fengu í fyrri úthlutun. Það er því mikilvægt að greiða leiguna tímanlega, annars verður vikunni úthlutað til annars félagsmanns.

Vel yfir 200 manns tóku þátt í hátíðarhöldum vegna 1. maí á Akranesi í gær og var mikil stemning meðal þátttakenda. Hátíðardagskráin hófst kl. 14:00 með kröfugöngu sem var óvenjulega mannmörg í ár, en veður var milt og gott og göngufólki afar hagstætt. Margir voru með skilti og kröfuspjöld í göngunni og Skólahljómsveit Akraness annaðist undirleik af miklum myndarskap.

Að göngu lokinni safnaðist fólk saman á Kirkjubraut 40, þar sem hátíðar- og baráttufundur var settur. Vilhjálmur Birgisson, fundarstjóri, ávarpaði fundinn og sá um að kynna dagskrárliði. Hátíðarræðuna flutti verkamaðurinn Stefán Skafti Steinólfsson og kom hann víða við í máli sínu og var góður rómur gerður að ræðu hans sem má finna með því að smella hér. Grundartangakórinn söng nokkur lög sem féllu í góðan jarðveg, auk þess sem kórinn sá um glæsilegt kaffihlaðborð sem fundargestum var boðið upp á að dagskrá lokinni. Einnig má minnast á það að stéttarfélögin á Akranesi buðu upp á bíósýningu fyrir börnin í Bíóhöllinni kl. 15.

Myndir frá hátíðarhöldunum eru komnar inn á Facebook-síðu félagsins og einnig má sjá myndirnar með því að smella hér.