Þessir vösku sorphirðumenn gáfu sér smástund til að líta upp frá vinnu sinni og þiggja kaffibolla á kaffistofu félagsins áður en þeir drifu sig aftur út í frost og snjó að sinna sínu mikilvæga starfi.

Í morgun voru starfsmenn Íslenska Gámafélagsins önnum kafnir við að tæma ruslatunnur á Sunnubrautinni. Formaður greip tækifærið, kallaði í þá og bauð þeim kaffi og kleinur, enda er það mat formanns að starf sorphirðumanna sé eitt það erfiðasta líkamlega og á það kannski sérstaklega við þegar veðurskilyrði eru eins og við þekkjum hér á landi, mikið fannfergi og svæðið erfitt yfirferðar.

Þessi vinnuskilyrði endurspeglast svo sannarlega ekki í launakjörum þessara manna, enda eru grunnlaun sorphirðumanna hlægilega lág miðað við áðurnefnd vinnuskilyrði og erfiði. Það liggur fyrir að sorphirðumenn eru að ganga eða hlaupa 30 til 40 kílómetra á einum vinnudegi og því greinilegt þetta starf er gríðarlega annasamt og erfitt.

Grunnlaunin eru eins og áður sagði til skammar, en grunnlaun almenns sorphirðumanns eru 206.500 krónur sem svo sannarlega endurspegla ekki þær kröfur sem gerðar eru til þeirra og vinnuskilyrði þeirra, eins og áður var lýst. Þetta er eitt af því sem svo sannarlega þarf að lagfæra í komandi kjarasamningum, það eru kjör sorphirðumanna sem og annarra verkamanna á íslenskum vinnumarkaði.

Í gær var haldinn í húsakynnum Ríkissáttasemjara sjötti samningafundurinn í kjaradeilu stéttarfélaganna gagnvart Norðuráli, en deiluaðilar vísuðu deilunni til ríkissáttasemjara fyrir skemmstu. Þetta var annar fundurinn undir handleiðslu sáttasemjara og það er skemmst frá því að segja að himinn og haf er á milli deiluaðila.

Á þessari stundu er fátt sem bendir til þess að lausn finnist á deilunni á næstu vikum, enda hvellskýrt að algjör hugarfarsbreyting þarf að verða hjá forsvarsmönnum Norðuráls ef þessi deila á að leysast. Það liggur fyrir að starfsmenn og stéttarfélög munu sækja fram leiðréttingar á kjörum starfsmanna af fullum þunga, en nánast öllum kröfum stéttarfélaganna hefur verið hafnað. Það er í raun og veru nöturlegt til þess að vita að fyrirtæki eins og Norðurál, sem er eitt öflugasta fyrirtæki á íslenskum vinnumarkaði og hefur skilað hagnaði nánast hvert einasta ár frá því það hóf starfsemi, hefur búið við góð rekstrarskilyrði og er með einn lægsta launakostnaðinn miðað við heildarveltu á íslenskum vinnumarkaði, skuli ekki geta gert betur en raun ber vitni.

Það má segja að þetta gildi um allar stóriðjurnar á Íslandi sem hafa búið við góð rekstrarskilyrði og þó sérstaklega eftir hrun íslensku krónunnar, en þessum ávinningi hefur á engan hátt verið deilt með starfsmönnum. Formaður Verkalýðsfélags Akraness hefur ætíð talað um að íslenskum fyrirtækjum séu sköpuð góð rekstrarskilyrði sem eigi að leiða það að verkum að fyrirtæki geti gert betur gagnvart sínum starfsmönnum en ella. En því miður hefur þessu ekki verið til að dreifa, ef horft er í heildina yfir öll útflutningsfyrirtæki á Íslandi sem búa um þessar mundir við gríðarlega jákvæð skilyrði.

Eins og áður sagði er það morgunljóst að hvergi verður hvikað frá í þessari baráttu. Það mun engu breyta þótt það taki tíma, því samstaða og einurð starfsmanna í baráttunni fyrir bættum kjörum er alger, og það skiptir stéttarfélögin gríðarlega miklu máli að finna þann mikla baráttuanda sem ríkir meðal starfsmanna. Næsti fundur hefur verið boðaður næsta þriðjudag, og það liggur algerlega fyrir að ef ekki verður hugarfars- og stefnubreyting af hálfu forsvarsmanna Norðuráls þá verður viðræðum við fyrirtækið slitið, enda er ekkert í tilboði Norðurálsmanna sem gefur tilefni til frekari viðræðna. Á miðvikudag eða fimmtudag í næstu viku mun Verkalýðsfélag Akraness boða til fundar í Bíóhöllinni Akranesi þar sem starfsmönnum verður gerð grein fyrir gangi viðræðna með ítarlegum hætti, og til hvaða ráðstafana verður hægt að grípa. En samkvæmt kjarasamningnum opnast verkfallsréttur ekki fyrr en eftir þrjá mánuði og síðan líða nokkrir mánuðir þar til hann fer að virka samkvæmt kjarasamningi. En það er ljóst, eins og áður sagði, að ekki kemur annað til greina en að kjör starfsmanna Norðuráls verði bætt svo um munar í komandi kjarasamningum, bæði vegna frábærrar afkomu fyrirtækisins í gegnum árin, og ekki síður vegna þeirra kjarasamninga sem gerðir hafa verið að undanförnu, kjarasamninga sem í sumum tilfellum eru að gefa starfsmönnum langt yfir 30%.

Félagsskírteini ársins 2015 eru nú farin í póst til félagsmanna Verkalýðsfélags Akraness og ættu því að berast þeim á næstu dögum. Með skírteinunum fylgja yfirlit um greidd félagsgjöld árið 2014. Dagbók félagsins er einnig á leið úr prentun og hægt verður að nálgast eintak af henni á skrifstofu félagsins í næstu viku.

Félagsskírteinin eru staðfesting á félagsaðild en veita jafnframt sérkjör og afslætti hjá ýmsum fyrirtækjum. Þau fyrirtæki eru meðal annars Apótek Vesturlands (10% af öðru en lyfjum), Model (5-10%), Omnis (5-15%), Ozone (10%), Rafþjónusta Sigurdórs (5-10%), Dekur snyrtistofa (10%), Bifreiðaverkstæðið Brautin (7%), Trésmiðjan Akur (7%), VÍS (5%) og Ökukennsla Sigga Trukks (10%). Auk þess býðst félagsmönnum sem fyrr afsláttur hjá N1, Olís og Orkunni. Félagsskírteinið er í greiðslukortastærð eins og undanfarin ár. Er það von Verkalýðsfélags Akraness að þau sérkjör og afslættir sem skírteinið veitir haldi áfram að létta undir með félagsmönnum.

Nánari upplýsingar um sérkjörin má finna hér.

Rétt í þessu lauk samningafundi hjá ríkissáttasemjara vegna kjarasamnings starfsmanna Norðuráls. Eins og fram hefur komið hér á heimasíðunni vísuðu stéttarfélögin sem eiga aðild að samningnum deilunni til ríkissáttasemjara í ljósi þess að himinn og haf eru á milli samningsaðila.

Það er skemmst frá því að segja að ákkurat ekkert kom út úr þessum fundi og verður að segjast alveg eins og er að framhaldið er síður en svo bjart hvað varðar lausn á þessari deilu. Eins og áður sagði ber gríðarlega mikið í milli samningsaðila en starfsmenn hafa eðlilega miklar væntingar til þessa kjarasamnings. Fyrirtækinu hefur ætíð gengið gríðarlega vel, skilað umtalsverðum hagnaði í gegnum árin og hlutfall launakostnaðar af heildarveltu með því lægsta sem gerist hér á landi.

Næsti fundur verður ekki fyrr en eftir viku en trúnaðarráð starfsmanna óskaði eftir því við stéttarfélögin að þau myndu kanna hvort og þá hvenær hægt sé fyrir starfsmenn að láta kjósa um yfirvinnubann. Að sjálfsögðu ætla stéttarfélögin að fara strax í þessa vinnu því eins og áður sagði ber það mikið í milli að því miður eru ekki miklar líkur á að deiluaðilar nái saman án einhverra átaka.   

Hinn árlegi jólafundur stjórnar- og trúnaðarráðs Verkalýðsfélags Akraness verður haldinn á morgun þar sem farið verður yfir liðið ár og þau hörkuátök sem framundan eru hvað kjarasamningsgerð varðar enda eru margir helstu kjarasamningar félagsins lausir eða að losna um þessar mundir. Fundurinn verður haldinn á Gamla Kaupfélaginu og eins og ætíð er góð mæting enda skiptir miklu máli fyrir alla aðila að fylgjast vel með því sem framundan er því gríðarlega mikilvægt er að menn séu vel upplýstir um þau atriði er lúta að komandi kjarasamningum og þeim átökum sem hugsanlega kunna að fylgja.

Þetta er búið að vera viðburðaríkt ár sem verður gert grein fyrir. Meðal annars hvatti Verkalýðsfélag Akraness allt verkafólk til að fella kjarasamningana sem voru gerðir 21. desember 2013 og er formaður ekki í neinum vafa um að hækkun orlofs- og desemberuppbóta um 32.300 kr. má þakka staðfestu Verkalýðsfélags Akraness og nokkurra annarra félaga. Það er ljóst að þessi ávinningur hefði ekki komið til ef þessi félög hefðu ekki staðið í lappirnar. Vissulega vildu menn svo sannarlega sjá meiri launahækkanir til handa íslensku verkafólki í síðustu samningum en því miður tókst það ekki. En rétt er að benda á að þessi hækkun orlofs- og desemberuppbótar er ígildi um 1,3 milljarða kostnaðarauka fyrir atvinnulífið ef bara er horft á þá 100.000 félagsmenn sem tilheyra ASÍ.

Það er alveg ljóst að komandi kjarasamningar munu reyna mikið á íslenska verkalýðshreyfingu því það er ekki hægt að láta það átölulaust að verkafólk sé með grunnlaun frá 201.000 kr. upp í 229.000 kr. Þetta eru laun sem eru langt undir öllum framfærsluviðmiðum sem hið opinbera hefur gefið út og morgunljóst að þessa launataxta þarf að hækka allverulega. Formaður félagsins tekur undir með fyrrverandi forstljóra N1 sem sagði í útvarpsviðtali ekki alls fyrir löngu að fyrirtæki sem ekki geta greitt dagvinnulaun sem nema um 300.000 kr. eiga vart tilverurétt á íslenskum vinnumarkaði. Eins og allir vita þá gengur fyrirtækjum í útflutningsgreinum mjög vel. Hagnaður sjávarútvegsfyrirtækja nemur þetta í kringum 40-60 milljörðum á ári, arðgreiðslur flæða úr greininni til eigenda án þess að það skili sér til þeirra sem skapa hagnaðinn sem er fiskvinnslufólkið. Hagnaður Norðuráls var mjög góður á síðastliðnu ári og er ljóst að í þeim kjaraviðræðum sem nú eru hafnar við Norðurál verður svo sannarlega látið sverfa til stáls þegar kemur að því að starfsmenn fái ríkari hlutdeild í góðri afkomu fyrirtækisins heldur en verið hefur.

Verkaýðsfélag Akraness er klárt í átök í komandi kjarasamningum og mun stjórn og trúnaðarráð meðal annars fara yfir alla þessa þætti á fundinum á morgun.

Frá AkraneshöfnAðalfundur sjómannadeildar Verkalýðsfélags Akraness verður haldinn á morgun í fundarsal félagsins að Sunnubraut 13 og hefst hann kl. 14.

Dagskrá fundarins er með eftirfarandi hætti:

1. Venjubundin aðalfundarstörf.

2. Önnur mál.

Að sjálfsögðu er um margt að ræða þegar kemur að kjaramálum sjómanna og nægir að nefna að sjómenn eru nú búnir að vera án kjarasamnings í hartnær 4 ár sem verður að teljast með hreinustu ólíkindum. Það sem brennur helst á sjómönnum fyrir utan það að ná fram kjarasamningi er verðmyndun á sjávarafurðum en hún hefur verið á algjörum villigötum í gegnum árin enda gengur það ekki upp að útgerðaraðilar komi að verðmyndun eins og nú er í gegnum Verðlagsstofu skiptaverðs. Þetta er eitt af brýnustu verkefnunum að leysa enda liggur fyrir að fiskverð er 30-60% lægra samkvæmt Verðlagsstofuverði sé miðað við fiskverð á mörkuðum. Eins og áður sagði er þetta eitt af stóru málunum sem þarf að taka á.

Sjómenn eru hvattir til að mæta og fara yfir stöðuna eins og hún er í dag.  

Opnunartími skrifstofu Verkalýðsfélags Akraness yfir jól og áramót verður með eftirfarandi hætti:

23. desember Þorláksmessa - Opið kl. 8:00-12:00

24. desember Aðfangadagur - Lokað

25. desember Jóladagur - Lokað

26. desember Annar í jólum - Lokað

29. desember - Opið 8:00-16:00

30. desember - Opið 8:00-16:00

31. desember Gamlársdagur - Lokað

1. janúar Nýársdagur - Lokað

2. janúar - Lokað vegna starfsdags

Þeir félagsmenn sem eiga bókaða bústaði þurfa að sækja samninga og annað á ofangreindum opnunartíma. Þeir sem eiga bókaðan bústað yfir jólin þurfa því að koma í síðasta lagi fyrir hádegi 23. desember og þeir sem eiga bókað um áramót í síðasta lagi fyrir kl. 16 þriðjudaginn 30. desember.

Styrkir verða greiddir út þann 30. desember og þurfa gögn í tengslum við þá að hafa borist fyrir kl. 16 mánudaginn 29. desember.

Rétt í þessu var að ljúka samningafundi með forsvarsmönnum Norðuráls vegna kjarasamnings starfsmanna en eldri samningur rennur út nú um áramótin. Fyrir nokkrum vikum lagði samninganefnd stéttarfélaganna fram ítarlega og vel rökstudda kröfugerð sem byggðist á því að laun starfsmanna Norðuráls myndu verða lagfærð allverulega. Ein af grunnkröfunum var einnig sú að tekið yrði upp nýtt fjölskylduvænt vaktakerfi með sambærilegum hætti og gerist hjá Elkem Ísland. Með öðrum orðum að horfið yrði frá 12 tíma vöktum og farið yfir í 8 tíma vaktakerfi. En eins og fram hefur komið hér á heimasíðunni var það ríkur meirihluti vaktavinnufólks sem vildi taka upp slíkt kerfi. 

Því verður að segja að það er þyngra en tárum taki að hafa tekið við því tilboði sem barst frá forsvarsmönnum Norðuráls í dag. Í fyrsta lagi var 8 tíma vaktakerfi algjörlega hafnað og í öðru lagi hljóðaði tilboðið einungis upp á skitin 2,5% ásamt hugmynd að eingreiðslu til handa starfsmönnum. Það þarf svosem ekki að fara neitt ítarlega yfir þetta tilboð ef tilboð skyldi kalla. Þetta eru gríðarleg vonbrigði og það er morgunljóst að það ber himinn og haf á milli samningsaðila. Formaður fór yfir það með forsvarsmönnum fyrirtækisins að það væri hans mat og reyndar annarra í samninganefndinni að menn væru að leika sér að eldinum með því að leggja svona tilboð fram. Því það er alveg hvellskýrt að þetta tilboð mun valda mikilli úlfúð og gremju á meðal starfsmanna.

Á grundvelli þessa mikla ágreinings var samninganefnd stéttarfélaganna algjörlega einróma í því að þetta tilboð væri alls ekki grundvöllur til frekari viðræðna. Á þeirri forsendu var forsvarsmönnum fyrirtækisins gerð grein fyrir því að viðræður á þessum grunni væru tilgangslausar og samþykkti samninganefndin að deilunni skyldi vísað til ríkissáttasemjara vegna þess hversu gríðarlega langt er á milli deiluaðila.

Það liggur algjörlega fyrir að væntingar starfsmanna Norðuráls vegna komandi kjarasamnings eru miklar. Fyrirtækinu hefur gengið mjög vel í gegnum árin og hefur ætíð skilað góðri afkomu til sinna eigenda. Nú er komið að því að starfsmenn vilji fá hlutdeild í þessari góðu afkomu enda hafa allflest útflutningsfyrirtæki notið þess þegar krónan féll allverulega í kjölfar hrunsins.

Það er einnig skoðun formanns Verkalýðsfélags Akraness að það eigi að skapa íslenskum fyrirtækjum góð rekstarskilyrði til að laða hér að öflug og stór fyrirtæki og þessum góðu rekstarskilyrðum á síðan að skila til þeirra sem starfa hjá þessum fyrirtækjum. Því er það óþolandi þegar fyrirtækjum eru sköpuð góð rekstarskilyrði af hálfu hins opinbera að það skuli ekki skila sér í betri launakjörum til handa þeim sem starfa í þeim greinum. Við vitum til dæmis að álfyrirtæki hafa fengið í gegnum tíðina jákvæða orkusamninga þó vissulega séu blikur á lofti með framhald á því en í ljósi þessara jákvæðu samninga þarf það að skila sér til starfsmanna í auknum launahækkunum enda skila launahækkanir starsfmanna sér beint til sveitarfélaga og ríkis í formi aukinna skattgreiðslna starfsmanna.

Við forystumenn Norðuráls vill formaður segja: Þið tókuð mikla áhættu með þessu tilboði ykkar og eins og kom fram á fundinum í dag var beðið eftir að einhver myndi spretta fram og segja "þetta er falin myndavél, djók!" Því miður er margt sem bendir til að þetta sé ekki djók en það liggur alveg fyrir að samstaða og einhugur er ríkjandi í samninganefndinni og ekki spillir fyrir að starfsmenn Norðuráls standa þétt á bakvið samninganefndina því það liggur fyrir að menn ætla að landa góðum samningi til handa starfsmönnum Norðuráls og það verður gert með góðu eða illu.  

Verkalýðsfélag Akraness hefur í ár eins og undanfarin ár útdeilt styrkjum úr styrktarsjóði félagsins. Þessi styrktarsjóður er þannig til kominn að Landsbankinn greiðir VLFA 800.000 kr. á ári vegna viðskipta og félagið lætur þá upphæð síðan renna til hinna ýmsu góðgerðarmála.

Hinsvegar hefur félagið á þessu ári útdeilt hærri upphæð en þessum 800.000 kr. og er það gert í ljósi þess að félagið átti 90 ára afmæli 14. október síðastliðinn.

Þau verkefni sem Verkalýðsfélag Akraness styrkti á því ári sem nú er senn á enda eru eftirfarandi:

Kaup á sneiðmyndatæki á Heilbrigðisstofnun Vesturlands (2,3 milljónir)

Mæðrastyrksnefnd

Akraneskirkja

Körfuknattleiksfélag Akraness

Bjargir - forvarnir og fræðsla

Hollvinasamtök Heilbrigðisstofnunar Vesturlands

Samtals voru þeir styrkir sem félagið veitti að upphæð 3.120.000 kr.

Verkalýðsfélagi Akraness finnst gott og gagnlegt að geta stutt hin ýmsu góðgerðarmál enda skiptir það gríðarlega miklu máli fyrir samfélagið í heild sinni að félagasamtök létti undir til dæmis hjá þeim sem minna mega sín í íslensku samfélagi.

Varðandi sneiðmyndatækið þá er hér um heilsufarslegt öryggi að ræða fyrir félagsmenn Verkalýðsfélags Akraness að ræða enda skiptir máli fyrir félagsmenn að til staðar sé öflug heilbrigðisþjónusta með góðum tækjakosti því það illkynja sjúkdómar séu greindir snemma getur oft skilið á milli lífs og dauða.  

Verkalýðsfélag Akraness hefur nú fest kaup á bústað sem staðsettur er að Birkihlíð 6 í Húsafelli. Bústaðurinn er einstaklega vel skipulagður en hann var byggður árið 2008 og hefur verið í einkaeigu síðan þá. Hann er 82 fermetrar að stærð og í honum eru þrjú svefnherbergi, þar af tvö með góðum tvíbreiðum rúmum og það þriðja með rúmi sem er ein og hálf breidd. Auk þess fylgir bílskúr bústaðnum og til stendur að setja þar upp gestahús og fjölga með því gistirýmum. Með því móti gætu 2-3 fjölskyldur auðveldlega farið saman í þennan rúmgóða bústað. Umhverfi bústaðarins er mjög gróið og er því hægt að slaka á í ró og næði en um leið hafa aðgang að öllu því sem sumarhúsabyggðin í Húsafelli hefur upp á að bjóða. Á þessu svæði standa nú yfir miklar framkvæmdir og er byggðin að taka breytingum meðfram þeim og með tilkomu hótelsins sem nú er í byggingu má segja að Húsafell sé að verða sumarleyfisparadís.
Eftirspurn félagsmanna eftir orlofshúsum er alltaf mikil og eru yfirleitt allir bústaðir félagsins bókaðir um helgar yfir vetrartímann en yfir sumartímann er eftirspurnin enn meiri og komast alltaf færri að en vilja. Var því orðið tímabært að fjölga þeim orlofshúsum sem standa félagsmönnum til boða. 
Nú þegar er búið að opna fyrir bókanir og geta félagsmenn athugað hvaða tímabil eru laus með því að fara inn á félagavefinn eða hafa samband við skrifstofu félagsins í síma 4309900. 

Hér má sjá myndir af nýja bústaðnum