Eitt af erfiðustu verkefnunum sem forystumaður í stéttarfélagi þarf takast á við er þegar félagsmenn mínir koma til mín eftir að hafa verið sagt upp störfum og misst lífsviðurværi sitt.

Oft eru svona mál afar tilfinningaþrungin enda grípur fólk sem verður fyrir því að vera sagt upp mikið vonleysi og hræðsla við að missa lífsviðurværi sinnar fjölskyldu.

Ábyrgð atvinnurekanda þegar kemur að uppsögnum er mikil þótt vissulega komi svo sannarlega upp atvik eða ástæður þar sem nauðsynlegt er að segja fólki upp. Ástæður eins og samdráttur, erfiðleikar í rekstri, skipulagsbreytingar eða jafnvel að viðkomandi aðili hefur gerast brotlegur í starfi. Allt eru þetta atvik sem lítið er hægt að segja við ef rétt er að uppsögninni staðið og forsendur fyrir uppsögn eru byggðar á faglegum og réttum forsendum.

Ástæða þess að formaður skrifar þennan pistil er að á laugardagsmorgunn er að hann fékk hringingu frá félagsmanni sínum sem tjáði formanninum að honum hefði verið sagt upp störfum hjá Norðuráli. Þessi umræddi starfsmaður hafði unnið í 17 ár hjá Norðuráli og á þessum 17 árum hafði hann hvorki fengið munnlega né skriflega áminningu að eigin sögn. Þessu til viðbótar var hann sjö barna faðir og var því eðlilega að framfleyta afar þungu heimili fjárhagslega.

Umræddur starfsmaður tjáði formanninum að hann hefði verið kallaður á fund með framkvæmdastjóra steypuskálans og mannauðsstjóra þar sem honum var tjáð að honum væri sagt upp störfum og bæri að yfirgefa vinnustaðinn.

En hver var ástæðan sem þessum sjö barna föður með 17 ára starfsreynslu var gefin fyrir uppsögninni? Jú ástæðan var að hann var væri að tala illa um fyrirtækið og hafi mætt á fjölskylduskemmtun sem Norðurál hélt án þess að skrá sig! Umræddur starfsmaður mótmælti harðlega á umræddum fundi að hann væri að tala illa um fyrirtækið en það hafði ekki áhrif á uppsögnina sem framkvæmdastjóri steypuskála hafði skellt í andlitið á mínum félagsmanni.

Við þessa frásögn félagsmanns míns fann formaður VLFA til mikillar reiði fyrir hans hönd en jafnframt fann formaðurinn gríðarlega til með honum að verða fyrir þessari uppsögn enda maður með 17 ára starfsreynslu, aldrei fengið áminningu og þessu til viðbótar að framfleyta stórri fjölskyldu.

Eins og alltaf þegar formaður VLFA fær svona uppsagnir inn á borð til sín sem byggðar eru á svona stórundarlegum forsendum sem að mati formanns standast ekki eina einustu skoðun leita hann upplýsinga til að sannreyna hvort frásögn félagsmannsins séu rétt. Formaður hafði því samband við samstarfsfélaga hans víða í Norðuráli til að kanna allar hliðar málsins og eyddi formaður VLFA laugardagsmorgni í að komast til botns í þessari undarlegu uppsögn.

Það er skemmst frá því að segja að allir sem formaðurinn talaði við sem hafa starfað með umræddum félagsmanni hjá Norðuráli gáfu honum afar góð meðmæli og vísuðu því algerlega á bug að félagsmaður VLFA hafi ástundað að tala illa um fyrirtækið.

Það vill nú þannig til að þessi umræddi félagsmaður hefur oft komið á skrifstofu formanns til að ræða um hinn ýmsu kjaramál og réttindi og í öll þau skipti sem hann hefur komið til viðræðna við hann hefur hann aldrei verið að kasta rýrð á fyrirtækið.

Það kom einnig fram hjá samstarfsmönnum að félagsmaðurinn hafi ætíð unnið verk sín af samviskusemi og dugnaði og það kom líka fram hjá starfsmönnum að vaktin sem hann var á sé í áfalli eftir þessa óskiljanlegu uppsögn. Ekki bara það heldur fékk formaðurinn að heyra að mórallinn í steypuskálanum öllum væri við frostmark eftir þessa uppsögn því fólki fannst hún ósanngjörn og algerlega byggð á röngum forsendum. Rétt er að geta þess að félagsmaður VLFA hefur vegna þess að hann er að reka þungt heimili þurft að taka mikið af aukavöktum til að framfleyta sér og sinni fjölskyldu og hefur því unnið með öllum vakthópum í steypuskálanum.

Þótt samúð formanns liggi algerlega hjá umræddum félagsmanni sem varð fyrir þessari óskiljanlegu uppsögn af hálfu framkvæmdastjóra steypuskálans þá finnur hann líka til með samstarfsfólki hans sem finnur eðlilega fyrir depurð og ótta eftir svona uppsögn.

Að öllu þessu sögðu er þessi uppsögn óskiljanleg, ósanngjörn og fyrir neðan allar hellur enda með ólíkindum að byggja uppsögn á einhverju sem ekki er sannleikanum samkvæmt og það eftir að viðkomandi hefur starfað við og þjónustað fyrirtækið í 17 ár.

Það er ábyrgðarhlutur að vera atvinnurekandi og það þarf að koma fram við starfsmenn ef sanngirni og virðingu þegar svona veigamiklar ákvarðanir eru teknar, enda eru atvinnurekendur að véla með lífsafkomu sinna starfsmanna. Munum að mannauður er hjarta hvers fyrirtækis og uppsagnir sem byggjast á röngum forsendum bera merki þess að verið sé að reka óttastjórnun og eigi að vera öðrum „víti til varnaðar.“

Svoleiðis mannauðsstefna getur aldrei endað með öðru en skipsbroti enda lifir ekkert fyrirtæki af ef ekki er fyrir dugnað og kraft þeirra sem starfa á gólfinu ef svo má að orði komast. Það er fólkið sem skapar hagnað fyrirtækja.

Formaður VLFA reyndi að fá þessari ákvörðun hnekkt en því miður tókst það ekki og því sá hann sig knúinn til að skrifa um þetta mál enda er hlutverk stéttarfélaga að verja atvinnuöryggi og lífsafkomu sinna félagsmanna með kjafti og klóm og það reynum við í Verkalýðsfélagi Akraness ætíð að gera.

Formanni VLFA er gjörsamlega misboðið hvað þessa uppsögn varðar og þetta er alls ekki fyrsta uppsögn í Norðuráli sem formanninum verður misboðið yfir!

Boðað er til kvennaverkfalls þann 24. október næstkomandi undir yfirskriftinni Kallarðu þetta jafnrétti?  Verkalýðsfélag Akraness skorar á félagsfólk að leggja sitt af mörkum í baráttunni fyrir jafnrétti á þessum degi. VLFA skorar einnig á fyrirtæki að sýna samstöðu í verki svo konur og kvár geti lagt niður störf þennan dag, án skerðingar á launum.

Samtök launafólks ásamt fjölmörgum öðrum baráttusamtökum kvenna og hinsegin fólks standa að þessum degi í ár. Konur og kvár sem það geta eru hvött til að mæta ekki til vinnu þennan dag og sinna jafnframt ekki þeim störfum og ábyrgð sem felst í annarri og þriðju vaktinni.

Kvennafrídagurinn 24. október var fyrst haldinn árið 1975 þegar um 90% kvenna á Íslandi lögðu niður störf til að sýna fram á mikilvægi vinnuframlags þeirra fyrir samfélagið. Margt hefur áunnist frá þessum tíma en markmiðinu er ekki náð, konur og karlar standa enn ekki jafnfætis á vinnumarkaði. Krafa þessa baráttudags í ár er að störf kvenna verði metin að verðleikum og að kynbundnu ofbeldi verði útrýmt.

VLFA hvetur konur og kvár sem það geta til að taka fullan þátt í þessum mikilvæga degi. Útifundir verða haldnir víða um land í tilefni dagsins, í Reykjavík verður haldinn fundur á Arnarhóli og hefst hann kl. 14:00. VLFA hvetur einnig fyrirtæki til þess að stuðla að því að konur og kvár geti tekið þátt í deginum eins og til hans er boðað.

Verkalýðsfélag Akraness vill koma því skýrt á framfæri að Kvennaverkfallið er þó ekki verkfall eins og vinnulöggjöfin kveður á um. Launafólk tekur þátt á eigin forsendum og hvetur félagskonur VLFA til að fá heimild hjá sínum yfirmanni til að taka þátt og berjast fyrir jafnrétti.

Dagana 2. og 3. október stendur yfir trúnaðarmannanámskeið á vegum Verkalýðsfélags Akraness og fer það fram í húsnæði Símenntunar Vesturlands á Smiðjuvöllum. Námskeiðið sitja 8 trúnaðarmenn félagsins en námskeið sem þessi skiptast í mismunandi hluta og því misjafnt hversu marga hluta hver trúnaðarmaður hefur tekið.

Í kjarasamningum er kveðið á um að trúnaðarmönnum skuli gefinn kostur á að sækja námskeið sem miða að því að gera þá hæfari í starfi og er það Félagsmálaskóli Alþýðu sem stendur fyrir fræðslustarfseminnni í samstarfi við stéttarfélögin. Trúnaðarmannanámskeiðin eru kennd samkvæmt námsskrá frá Fræðslumiðstöð atvinnulífsins og þá oftast haldin á svæði þess félags sem býður upp á námskeiðin hverju sinni.

Það er mikilvægt að þeir sem starfa sem trúnaðarmenn fái tækifæri til að bæta við þekkingu sína og verða þannig öflugri í sínu hlutverki. Meðal þess sem farið er yfir í mismunandi hlutum trúnaðarmannanámskeiða er hlutverk stéttarfélaga og sambanda á vinnumarkaði, innihald og uppbygging kjarasamninga, lestur launaseðla og góð samskipti á vinnustað. Það er hverju stéttarfélagi mikilvægt að eiga öflugan hóp trúnaðarmanna sem eru mikilvæg tenging inn á vinnustaðina til félagsmanna.

Á stjórnarfundi Verkalýðsfélags Akraness í gær voru fimm stjórnarmeðlimir kvaddir eftir langt og farsælt starf. Þetta eru þau Alma María Jóhannsdóttir, Elí Halldórsson, Jóna Ágústa Adolfsdóttir, Sigríður Sigurðardóttir og Sigurður Guðjónsson. Þau hafa öll starfað í núverandi stjórn frá því hún tók við árið 2003 og hafa því tekið þátt í að byggja upp félagið í öllum þeim áskorunum sem upp hafa komið á þeim tíma. Formaður félagsins þakkaði þeim fyrir gott samstarf og tók fram hversu mikilvægt það er að hafa fólk í stjórninni sem er tilbúið að leggja sig fram í baráttunni og gefa af sér í starfinu. Jafnframt þökkuðu fráfarandi stjórnarmeðlimir fyrir samstarfið og óskuðu nýjum meðlimum alls hins besta í sínu starfi. Á meðfylgjandi mynd má sjá Sigríði Sigurðardóttur (Systu), Elí Halldórsson, Sigurð Guðjónsson, Jónu Á. Adolfsdóttur og Vilhjálm Birgisson.

Atkvæðagreiðslu um nýjan kjarasamning Starfsgreinasambands Íslands og Sambands íslenskra sveitarfélaga er lokið. Niðurstöður liggja nú fyrir og var samningurinn samþykktur með rúmlega 78% þeirra sem greiddu atkvæði.

Atkvæðagreiðslan var rafræn og sameiginleg hjá 18 aðildarfélögum Starfsgreinasambandsins. Stóð hún yfir frá 14. til 26. september. Á kjörskrá voru 5.950 manns og var kjörsókn 14,62%. Já sögðu 684 eða 78,62%. Nei sögðu 144 eða 16,55%. 4,83% tóku ekki afstöðu.

Samningurinn gildir frá 1. október 2023 til 31. mars 2024 og tekur til allra félagsmanna aðildarfélaga SGS sem starfa hjá sveitarfélögum. Kjarasamninginn má nálgast hér.  

Eftirtalin félög eiga aðild að samningnum: AFL Starfsgreinafélag, Aldan stéttarfélag, Báran stéttarfélag, Drífandi stéttarfélag, Eining-Iðja, Framsýn stéttarfélag, Stéttarfélag Vesturlands, Stéttarfélagið Samstaða, Verkalýðsfélag Akraness, Verkalýðsfélag Grindavíkur, Verkalýðsfélagið Hlíf, Verkalýðsfélag Snæfellinga, Verkalýðsfélag Suðurlands, Verkalýðsfélag Vestfirðinga, Verkalýðs- og sjómannafélag Bolungarvíkur, Verkalýðs- og sjómannafélag Keflavíkur, Verkalýðs- og sjómannafélag Sandgerðis og Verkalýðsfélag Þórshafnar.

Símenntun á Vesturlandi kynnir tveggja daga kjötiðnaðarnámskeið 30. sept - 1. okt. 2023

Nánari upplýsingar www.simenntun.is 

Verkalýðsfélag Akraness heldur opinn kynningarfund um framlengdan kjarasamning Starfsgreinasambands Íslands við Samband íslenskra sveitafélaga í golfskálanum á Akranesi mánudaginn 18. september og hefst kynningin kl 17:00

Þeir félagsmenn sem tilheyra undir viðkomandi kjarasamning starfa hjá Akraneskaupsstað, Hvalfjarðasveit og Hjúkrunar- og dvalarheimilinu Höfða.

Félagsmenn sem starfa samkvæmt þessum samningi eru eindregið hvattir til að mætta.

Rafræn atkvæðagreiðsla um nýjan kjarasamning SGS og Sambands íslenskra sveitarfélaga hefst í dag 14. september kl. 12. Atkvæðagreiðslan er sameiginleg hjá þeim 18 aðildarfélögum sem eru aðilar að samningnum og lýkur henni þann 26. september kl. 9:00.

Félagið hvetur alla þá sem starfa eftir þessum samningi til að samþykkja hann enda um stuttan samning að ræða sem þó felur í sér ýmsar jákvæðar breytingar. Hér má skoða glærur um samninginn og jafnframt er kynningarefni aðgengilegt inni á heimasíðu Starfsgreinasambandsins.

Í gær undirrituðu 18 aðildarfélög Starfsgreinasambands Íslands kjarasamning við Samband íslenskra sveitarfélaga en Verkalýðsfélag Akraness er aðili að þessum samningi og gildir hann fyrir starfsmenn Akraneskaupstaðar, Hvalfjarðarsveitar og hjúkrunar- og dvalarheimilisins Höfða.

Það má segja að þetta sé framlenging á síðasta kjarasamningi enda gildir þessi samningur einungis til 31. mars 2024.

Það sem er nýtt í þessum samningi lýtur að svokölluðum sérstökum greiðslum lægstu launa en hér er verið að samræma samninga sem gerðir hafa verið að undanförnu við Samband íslenskra sveitarfélaga. Þetta gildir þannig að frá launaflokki 117 til launaflokks 130 koma inn sérstakar greiðslur á hvern launaflokk en eðli málsins samkvæmt er hæsta greiðslan á launaflokk 117 eða 19.500 kr. og lægsta greiðslan á launaflokk 130 eða 2.600 kr.

Einnig er rétt að geta þess að þessar sérstöku greiðslur lægstu launa gilda afturvirkt frá 1. apríl og sem dæmi þá munu launaflokkar frá 117-124 fá sérstaka greiðslu sem nemur 19.500 kr. og mun hún gilda afturvirkt eins og áður sagði. Það þýðir að afturvirknin getur numið 136.500 kr. ef þetta kemur til greiðslu 1. nóvember.

Einnig eru viðbótarlaun á einstök starfsheiti og er þar sérstaklega verið að horfa á starfsheiti í leikskólum og heimaþjónustu. Rétt er að geta þess að þessi viðbótarlaun gilda frá 1. október og nemur hækkunin til dæmis hjá starfsmanni/leiðbeinanda í leikskóla 39.270 kr. en til að eiga rétt á þessari greiðslu er getið um að starfsfólk matist með börnum á leikskóla. Persónuálag verður samkvæmt grein 10.2.1., starfsþróunarnámskeið, gr. 10.2.3. menntun á framhaldsskólastigi og gr. 10.2.4 meistarabréf. Þau geta að hámarki orðið 6%. Hinsvegar er persónuálag vegna símenntunar og starfsreynslu óbreytt.

Í þessum samningi er einnig fest í sessi breyting á greiðslum vegna vaktarálags þar sem til dæmis vaktarálag vegna stórhátíðardaga fer upp í 120% en á aðfangadag og gamlársdag kl. 16-24 og jóladag og nýársdag kl. 00:00-8:00 verður 165% álag.  

Desemberuppbót verður þann 1. desember 2023 131.000 kr. en var árið 2022 124.750 kr.

Sameiginleg atkvæðagreiðsla hjá öllum 18 aðildarfélögum SGS verður rafræn í gegnum Advania og hefst í dag 14. september kl. 12 og lýkur 26. september kl. 9 en tengill inn á kosninguna mun birtast hér á forsíðu heimasíðunnar.

Dagana 6. og 7. september stóð Starfsgreinasamband Íslands fyrir fræðsludögum fyrir starfsfólk aðildarfélaga þess og fóru þeir fram á Hótel Keflavík. Starfsmenn skrifstofu Verkalýðsfélags Akraness tóku þátt í fræðsludögunum að þessu sinni ásamt rúmlega 30 öðrum þátttakendum og var aðstaðan öll til fyrirmyndar. 

Dagskráin var bæði fræðandi og áhugaverð en ekki er síður mikilvægt að hitta aðra sem sinna sömu störfum og geta þannig myndað tengsl sem nýtast vel í þeim fjölbreyttu verkefnum sem starfsfólk stéttarfélaga fæst við. Auk fræðsluerinda fór fram öflugt hópastarf þar sem hin ýmsu mál sem brunnu á þátttakendum voru rædd. Innan Starfsgreinasambandsins eru 18 aðildarfélög víðsvegar um landið og með fræðsludögum sem þessum gefst tækifæri til að styrkja heildina og stuðla að góðri samstöðu.

Að fræðsludögunum loknum mættu formenn aðildarfélaganna á útvíkkaðan formannafund sem fram fór 7. og 8. september. Sá fundur heppnaðist jafnframt mjög vel og eins og hjá starfsfólkinu var þar mikil samstaða sem er mikilvægasta afl verkalýðshreyfingarinnar í þeim flóknu verkefnum sem framundan eru.