Stjórnir orlofs- og sjúkrasjóðs funduðu í gærkveldi.  Það liggur þónokkuð fyrir hjá orlofsstjórn þar sem töluverðar endurbætur eru framundan á orlofshúsum félagsins.

Ákveðið hefur verið að stækka svalir á þremur íbúðum sem félagið á að Furulundi 8 á Akureyri og hefjast þær framkvæmdir í haust.  Einnig var ákveðið að mála sumarhúsin í Húsafelli og í Svínadal og stefnt er að þeim framkvæmdum verði lokið fyrir sumarúthlutun 15. maí.

Þessu til viðbótar hefur verið ákveðið að skipta um eldúsinnréttingar í Hraunborgum og Svínadal og stefnt er að því að þeim framkvæmdum verði einnig lokið fyrir 15. maí.

Eins og áður sagði þá fundaði stjórn sjúkrasjóðs einnig í gærkveldi og liggur ljóst fyrir að félagið mun taka inn allavega þrjá nýja styrki á næsta aðalfundi, sem verður um miðjan apríl.

Það er alveg ljóst að gríðarleg umskipti hafa orðið á rekstri félagsins á þeim þremur árum sem ný stjórn tók við og sést það best á þeirri stórauknu þjónustu nú er verið að veita félagsmönnum. 

Markmið núverandi stjórnar hefur ávallt verið skýrt, það er að þjóna okkar félagsmönnum eins vel og kostur er.

Starfsgreinasamband Íslands hélt ráðstefnu um “kaupaukakerfi í fiskvinnslu” á Íslandi, kosti og galla launakerfisins og vinnuverndarsjónmarmið með tilliti til aukinnar tækni og hraða vinnslunnar. Ráðstefnan var notuð til að móta hugmyndir að kröfugerð fyrir næstu kjarasamninga.

Það var alveg ljóst að fiskvinnslufólk gerir miklar væntingar til næstu kjarasamninga enda telur það sig hafa borið skarðan hlut frá síðustu kjarasamningum.

Það virðist vera nokkuð víðtæk sátt hjá fiskvinnslufólki að færa hina ýmsu kaupaukagreiðslur fiskvinnslufólks inní launataxtanna.  Samkvæmt þeim upplýsingum sem VLFA hefur er meðaltalsbónus hjá fiskvinnslufólki í kringum 200 til 230 kr. á tímann. 

Einnig kom fram á ráðstefnunni að það verður að vera eitt af forgangskröfum í næstu samningum að verja markaðslaunakerfið.  Voru ráðstefnugestir sammála um það verði gert með því að færa launataxtana upp að markaðslaunum.

Nú er opið fyrir umsóknir um dvöl í orlofshúsum félagsins yfir páskana. Tekið verður á móti umsóknum til og með 9. mars 2007 á skrifstofu félagsins, Sunnubraut 13, sími 4309900.

Dregið verður úr umsóknum 12. mars og haft samband við þá sem fá úthlutað. Eins og með aðra vetrarleigu hefur páskaúthlutun ekki áhrif á punktastöðu félagsmanna.

Orlofshús til útleigu um páska 2007:

Bláskógar 12, Svínadal

Ásendi 10, Húsafelli

Húsasund 15, Hraunborgum

Hús nr.11, Ölfusborgum

Laufásvegur 31, Stykkishólmi

Furulundur 8a, Akureyri

Framtalsaðstoð félagsins hefst mánudaginn 5. mars nk. Takmarkaður fjöldi tíma er í boði svo félagsmenn eru beðnir að panta sem fyrst. Nauðsynlegt er að hafa öll gögn og veflykil meðferðis, starfsfólk skrifstofu getur aðstoðað við að útvega nýjan veflykil hafi hann glatast.

Hægt er að bóka tíma á skrifstofu félagsins, Sunnubraut 13, sími 4309900

Formaður félagsins hefur sent öllum formönnum stjórnmálaflokkanna bréf þar sem er óskað er eftir því að formennirnir beiti sér innan síns þingflokks fyrir því að þeir forvarnarstyrkir sem stéttarfélögin veita sínum félagsmönnum verði undanþegnir skatti.

Hér er afar brýnt mál á ferðinni þar sem forvarnarstyrkir stéttarfélaganna geta skipt gríðarlega miklu máli fyrir félagsmenn okkar.  Það er vitað að forvarnarstyrkir stéttarfélaganna hafa hjálpað okkar félagsmönnum til að sækja þá þjónustu sem boðið er upp á í heilbrigðiskerfinu varðandi forvarnir t.d krabbameinsskoðanir og áhættumat varðandi hjarta- og æðasjúkdóma.   

Það er einnig vitað að forvarnarstyrkir stéttarfélaganna hafa sparað ríkinu umtalsverðar upphæðir þar sem náðst hefur að greina alvarlega sjúkdóma á byrjunarstigi s.s krabbamein og hjarta- og kransæðarsjúkdóma.

Það er mat formanns félagsins að það sé með öllu óeðlilegt að forvarnarstyrkir stéttarfélaganna skulu vera skattskyldir eins og raunin er.  Sérstaklega í ljósi þess að forvarnarstyrkir stéttarfélaganna gerir þeim sem eru með lægstu tekjurnar auðveldar með að sækja þá þjónustu er lýtur að forvörnum.  

Einnig má ekki gleyma því að forvarnarstyrkir stéttarfélaganna stuðla að bættri heilsu okkar félagsmanna, öllu samfélaginu til heilla. 

Matvælasvið Starfsgreinasambands Íslands hefur ákveðið að hefja undirbúning að mótun kröfugerðar vegna komandi kjaraviðræðna við Samtök atvinnulífsins. Boðað hefur verið til ráðstefnu á fimmtudag og föstudag í þessari viku á Hótel KEA á Akureyri um málefni fiskvinnslufólks. Ráðstefnan hefst kl. 13:00 á fimmtudag og lýkur um hádegið á föstudeginum.  Núverandi kjarasamningar eru lausir um næstu áramót.

Formaður félagsins hefur ávallt sagt að það verði að vera alger forgangskrafa í næstu kjarasamningum að hækka launataxta Starfsgreinasambandsins upp að þeim markaðslaunum sem verið er að greiða á íslenskum vinnumarkaði.  Einvörðungu vegna þess að atvinnurekendur eru í auknum mæli farnir að sækjast eftir ódýru vinnuafli frá Austur -Evrópu.  Það er alvitað að stór hluti þeirra erlendu starfsmanna sem hingað koma til starfa eru settir á berstrípuð lágmarkslaun sem gerir ekkert annað en að gjaldfella það markaðslaunakerfi sem nú er við lýði.   

Samkvæmt könnun sem SGS lét gera í september í fyrra kom fram að meðaldagvinnulaun voru hjá konum 164 þús. og hjá körlum 174 þúsund á mánuði.  Hins vegar eru lágmarkslaun fyrir fulla dagvinnu einungis 125 þúsund sem vart dugar til lágmarksframfærlsu.  Þetta þýðir að lágmarkstaxtar SGS þurfa að hækka um allt að 40% til að komast upp að markaðslaununum.  Það er vitað að Samiðn fór þessa leið í síðustu samningum það er að segja að taxtar iðnaðarmanna voru færðir nær markaðlaunum. 

Núna verður það að vera eins og áður sagði forgangskrafa að hækka lágmarkstaxtana upp að markaðslaunum og til að það takist þarf að nást breið samstaða innan Starfsgreinsambandsins og trúir formaður VLFA ekki öðru en að sú samstaða náist, annað væri í ótrúlegt.

Eins og margoft hefur komið fram hér á heimasíðunni þá sameinuðust Starfsmannafélag Akraneskaupstaðar (STAK) og Starfsmannafélag Reykjavíkurborgar um áramótin. Mikil krafa hefur verið frá einstaka aðilum í bæjarstjórn og fyrrverandi stjórn STAK um að launakjör starfsmanna bæjarins skuli strax taka eftir kjarasamningi Starfsmannafélags Reykjavíkurborgar.

  Formaður félagsins hefur ítrekað bent á að ef kjarasamningur Reykjavíkurborgar myndi gilda strax þá hefði það í för með sér lækkun á nokkrum störfum og nægir þar að nefna ræstingu og störf í þvottahúsi og myndu þessi störf lækka sem nemur rétt um 10.000 kr. á mánuði. Störf í býtibúri myndu lækka um 8.000 kr.  og verkamenn í bæjarvinnu myndu lækka um rúmar 5.000 kr. Einnig hefur formaður félagsins bent á að störf hjá stjórnendum, millistjórnendum og forstöðumönnum myndu hækka um tugi þúsunda á mánuði.

 Einstaka aðilar í minnihluta bæjarstjórnar hafa haldið því fram að samanburður sem formaður VLFA hefur gert sé ekki á rökum reistur, og því hefur verið haldið fram án þess að skýra það nánar.

Núna hefur hins vegar meirihluti bæjarstjórnar sent frá sér eftirfarandi bókun og er sú bókun í algjöru samræmi við það sem formaður félagsins hefur ætíð haldið fram, það er að lægstu störfin standa í stað eða lækka á meðan tekjuhæstu störfin hækka um tugi þúsunda. Hluti áðurnefndrar bókunar hljóðar svo:

" Nú liggja hins vegar fyrir upplýsingar sem sýna áhrif sameiningar þessara tveggja stéttarfélaga á laun starfsmanna Akraneskaupstaðar verði sú að hæst launuðu starfsmenn kaupstaðarins hækka um rúmlega þrjátíu þúsund meðan lægst launuðu starfsmenn kaupstaðarins standa í stað eða jafnvel lækka í launum. Núverandi meirihluti er ekki tilbúinn að stuðla að auknum launamun."

  Það er gríðarlegur ábyrgðarhluti hjá þeim sem krefjast þess að laun taki strax eftir kjarasamningi Reykjavíkurborgar þegar þessar bláköldu staðreyndir liggja fyrir. Það getur ekki verið vilji minnihluta bæjarstjórnar að störf sem hafa hvað lægstu tekjurnar lækki enn frekar á meðan tekjuhæstu störfin fá umtalsverða hækkun. Eitt er víst að þetta samræmist ekki jafnaðarstefnu í launamálum. 

 Hægt er að skoða bókun bæjarráðs hér

Stjórn félagsins heimsótti Norðurál í dag og er óhætt að segja að forsvarsmenn Norðuráls hafi tekið vel á móti stjórn félagsins.  Það voru þau Óskar Jónsson framkvæmdastjóri tæknisviðs, Trausti Gylfason öryggisfulltrúi og Rakel Heiðmarsdóttir starfsmannastjóri sem tóku á móti stjórn félagsins.

Óskar Jónsson byrjaði að því að fara yfir hina ýmsu þætti sem tengjast framleiðslunni og ekki síst þá sem lúta að mengunarþáttum verksmiðjunnar.  Fram kom hjá Óskari að mengunarstuðlar eru vel innan þeirra marka sem starfsleyfi verksmiðjunnar byggir á. 

Rakel starfsmannastjóri gerði stuttlega grein fyrir því er lýtur að starfsmannamálum fyrirtækisins og þeirri miklu fjölgun sem orðið hefur á starfsmönnum frá því hún hóf störf,  fyrir rúmu ári voru rúmlega 200 starfsmenn en í dag eru þeir komnir yfir 400.

Formaður félagsins sagði að Norðurál hefði gríðarlega jákvæða þýðingu fyrir Verkalýðsfélag Akraness og allt samfélagið á Akranesi og nærsveitir.  Hins vegar sagði formaðurinn einnig að það væri hlutverk félagsins að gæta að velferð og hagsmunum okkar félagsmanna og væri hvergi hvikað í þeirri baráttu.  Formaður félagsins sagði einnig í þessari heimsókn að hann ætti afar erfitt með að sætta sig við þann launamun sem er á milli sambærilegra verksmiðja og það væri eitthvað sem yrði að laga og það sem allra fyrst. 

Að lokum fóru Óskar Jónsson framkvæmdastjóri tæknisviðs og Trausti Gylfason með stjórn félagsins í skoðunarferð um verksmiðjuna og voru stjórnarmenn VLFA mun fróðari um álrekstur eftir þessa skoðunarferð.

Í gær var Efnalaugin Lísa tekin til gjaldþrotaskipta og í morgun átti formaður félagsins fund með skiptastjóra, Jóni Hauki Haukssyni. Aðalmálið hjá VLFA er að tryggja að réttindi þeirra starfsmanna sem starfa hjá umræddu fyrirtæki verði tryggð. Samkvæmt þeim upplýsingum sem formaður hefur er ekki mikið um vangreidd laun. Formaður fór einnig á vinnustaðinn og fundaði með starfsmönnum, en hjá fyrirtækinu starfa 4 félagsmenn. Gerði formaður þeim grein fyrir því að VLFA myndi gæta þeirra hagsmuna í hvívetna. Ljóst var að starfsmenn voru verulega uggandi um framtíð sína.

Verkalýðsfélag Akraness telur nokkuð mikilvægt að reynt verði að finna lausn á rekstri þessa fyrirtækis þannig að við missum ekki störfin í burtu úr sveitarfélaginu. Þetta mun skýrast fljótlega.

Stjórn Verkalýðsfélags Akraness mun fara í heimsókn til Norðuráls á morgun.  Tilgangur heimsóknarinnar er að skoða verksmiðjuna nú þegar stækkun á verksmiðjunni er á lokastigi.  

Þessi heimsókn stjórnar félagsins er einn liður í því að vera í nánu sambandi við sína félagsmenn og kynna fyrir starfsmönnum hvaða þjónustu félagið býður sínum félagsmönnum upp á.  Hjá Norðuráli starfa nú um 420 manns og hefur fjölgað gríðarlega að undanförnu.  Af þessum 420 starfsmönnum eru 300 félagsmenn Verkalýðsfélags Akraness eða sem nemur rúmum 71% af öllum starfsmönnum Norðuráls.

Langflestir félagsmenn VLFA starfa hjá Norðuráli en lengi vel trónaði HB-Grandi á þeim toppi en starfsmönnum hefur fækkað hjá HB Granda töluvert vegna samdráttar á liðnum misserum.

Það er alveg ljóst að Norðurál hefur haft gríðarlega jákvæð áhrif á samfélagið hér á Akranesi hvað varðar atvinnuöryggi.  Hins vegar er eitt sem Verkalýðfélag Akraness er ekki sátt við sem tengist Norðuráli og það er að laun í sambærilegum verksmiðjum hér á landi er hærri heldur en hjá Norðuráli.  Þetta er atriði sem félagið á afar erfitt með að sætta sig við.   Vissulega náðist að minka þennan mun á milli verksmiðja í síðustu samningum en alls ekki að fullu.  Það verður að vera skýlaus krafa á næstu misserum að laun starfsmanna Norðuráls verði með sama hætti og sambærilegar verksmiðjur greiða sínum starfsmönnum.