Í dag undirritaði Verkalýðsfélag Akraness sérkjarasamning við Samtök atvinnulífsins um kaup og kjör í fiskimjölsverksmiðju HB Granda hf. á Akranesi og gildir samningurinn til 31. desember 2007.

Í þessum samningi er verið að færa ýmsa þætti úr eldri sérkjarasamningi t.d óþrifaálag og hluta af vaktarálagi inní dagvinnulaunin og við það tryggir það starfsmönnum mun betri kjör þegar ekki eru vaktir í verksmiðjunni.

Forsvarsmenn HB Granda hafa í hyggju að bræða allavega tímabundið beinaúrgang hér á Akranesi en sú starfsemi hefur farið fram í Reykjavík undafarin ár .  Verkalýðsfélag Akraness fagnar þessum áformum forsvarsmanna HB Granda því við þessa tilfærslu mun einhver ný störf skapast.  Síðan er spurnig með komandi loðnuvertíð ef vertíðin verður sæmileg þá mun hún geta skapað allt að 12 ný störf í verksmiðjunni.  En að sjálfsögðu veltur það á komandi loðnuvetíð hvort sú von rætist eða ekki.  Þessa stundina er útlitið ekki gott hvað varðar komandi loðnuvertíð. 

Sáralítil starfsemi hefur verið í síldarverksmiðjunni undanfarin misseri vegna samdráttar í uppsjávarafla.  Ekki er langt síðan öllum starfsmönnum bræðslunnar var sagt upp störfum og því er það eins og áður sagði mikið fagnaðarefni að HB Grandi áformi að hefja bræðslu beina að nýju hér á Akranesi. 

Rétt er að geta þess að fiskimjölsverksmiðjan hér á Akranesi er talin ein sú fullkomnasta á landinu.

Á föstudaginn var úskrifuðust 6 starfsmenn HB Granda sem sérhæfðir fiskvinnslumenn en námskeið stóð yfir síðustu vikuna í desember.  Námskeiðið veitir 3% launahækkun fyrir þá sem útskrifast sem sérhæfðir fiskvinnslumenn.

Formaður félagsins var einn af leiðbeinendum námskeiðsins.  Sá hann um að fara yfir réttindi og skyldur á vinnumarkaðnum og einnig kynnti hann fyrir þeim sem sátu námskeiðið hvaða þjónustu félagið er að veita sínum félagsmönnum.

Formaður félagsins hefur í dag verið að kynna sér hvort forsvarsmönnum Norðuráls sé yfir höfuð heimilt að taka fíkniefnapróf af öllum starfsmönnum fyrirtækisins eins og forsvarsmenn Norðuráls hafa í hyggju.  Formaðurinn hefur t.d. leitað eftir upplýsingum hjá Persónuvernd og lögmanni ASÍ um hvort fyrirtækinu sé heimilt að framkvæma slík lyfjapróf án þess að það liggi fyrir rökstuddur grunur um neyslu ólöglegra lyfja.

Lögmaður ASÍ dregur það í efa að fyrirtækinu sé stætt á að framkvæma slík lyfjapróf án þess að það liggi fyrir grunur um brot starfsmannanna á neyslu fíkniefna.

Einnig átti formaðurinn samtal við starfsmannastjóra Norðuráls þar sem þessar fyriráætlanir Norðuráls voru ræddar.  Ákveðið hefur verið að stéttarfélögin fundi með forsvarsmönnum Norðuráls um málið á næsta fimmtudag og mun lögmaður ASÍ sitja þann fund.

Forsvarsmenn Norðuráls kynntu þessar áætlanir um fíkniefnaprófið ekki fyrir Verkalýðsfélagi Akraness, en um 300 starfsmenn Norðuráls tilheyra Verkalýðsfélagi Akraness.  Á fundinum á næsta fimmtudag verður farið yfir málið í heild sinni.   Væntanlega munu stéttarfélögin sem eiga aðild að kjarasamningi Norðuráls óska eftir áliti frá Persónuverndum það hvort fyrirtækinu sé heimilt að framkvæma fíkniefnapróf á öllum starfsmönnum án þess að grunur um brot liggi fyrir. 

Í morgun fór starfsfólk Verkalýðsfélags Akraness á stúfana og gerði nýja verðkönnun í fjórum verslunum á Akranesi. Verslanirnar sem um ræðir eru Kaskó, Skagaver, Samkaup Strax (Grundaval) og Krónan. Verslun Einars Ólafssonar neitaði að taka þátt í könnuninni. Vert er að taka fram að hér er aðeins um beinan verðsamanburð að ræða, en ekki er lagt mat á gæði eða þjónustu söluaðila.

Þar sem nú nálgast áramót og því tilefni til að gera vel við sig og sína í mat og drykk var matarkarfa Verkalýðsfélagsins stækkuð frá því síðast og verð athugað á 45 vörutegundum. Þar sem þessar vörutegundir voru ekki til í öllum fjórum verslununum reyndist nauðsynlegt að fækka þeim niður í þær 36 vörutegundir sem fengust í öllum fjórum verslununum.

Niðurstöður þessarar könnunar eru þær að Kaskó var með ódýrustu matarkörfuna og kostaði hún þar kr. 14.547. Matarkarfan í Skagaveri kostaði kr. 15.167, í Krónunni kostaði hún kr. 15.912 og í Samkaup-Strax kostaði hún kr. 17.471.

Hægt er að skoða könnunina í heild sinni hér.

Aðalfundur sjómannadeildar var haldinn í gærkvöldi. Meðal fundarefnis voru venjuleg aðalfundarstörf og önnur mál. Kosið var í stjórn deildarinnar og eftirtaldir hlutu kosningu:

Jóhann Örn Matthíasson, ritari

Már Vilbergsson, vararitari

Elías Ólafsson, meðstjórnandi

Sveinbjörn Rögnvaldsson, varameðstjórnandi

Úr stjórn gekk Gísli Jón Bjarnason þar sem hann hefur hætt sjómennsku og vill Verkalýðsfélag Akraness þakka honum fyrir góð störf á liðnum árum. Á fundinum var einnig rætt um hin ýmsu réttindamál sjómanna og Jóhann Örn Matthíasson gerði grein fyrir helstu málum sem rædd voru á Sjómannaþingi sem haldið var í Reykjavík fyrr í vetur. Einnig gerði formaður félagsins fundarmönnum grein fyrir starfsemi félagsins á síðasta ári og kom fram í máli formanns að afkoma félagsins hefur verið afar góð og hefur félagið tekið algerum stakkaskiptum frá því ný stjórn tók við fyrir þremur árum.

Jólatrúnaðarráðsfundur var haldinn í gær og hófst fundurinn kl. 18.00.  Formaður félagsins fór yfir það helsta sem gerst hefur í starfsemi félagsins á árinu sem nú er að líða.

Fram kom í máli formanns að árið hefur verið Verkalýðsfélagi Akraness afar hagstætt, t.d. hefur verið gríðarleg fjölgun í félaginu á liðnu ári.  Einnig kom fram hjá formanni að mjög erilsamt hefur verið hjá starfsmönnum félagsins á þessu ári og greinilegt að félagsmenn nýta sér þjónustu félagsins í auknu mæli, sem er afar jákvætt.  

Aðalfundur sjómannadeildar verður haldinn í kvöld og hefst fundurinn kl. 20:00.

Á dagskrá fundarins eru venjuleg aðalfundarstörf sem og önnur mál.  Fundurinn er haldinn í fundarsal félagsins að Sunnubraut 13.

Sjómenn eru eindregið hvattir til að mæta.

Stjórn og starfsfólk Verkalýðsfélags Akraness sendir félagsmönnum sínum og landsmönnum öllum bestu óskir um gleðilega jólahátíð og farsæld á komandi ári.

Í dag var gerð ný könnun á vegum félagsins og var athugað verð á 50 vörutegundum úr flestum vöruflokkum í fjórum verslunum á Akranesi. Verslanirnar sem um ræðir eru Kaskó, Skagaver, Samkaup Strax (Grundaval) og Krónan. Verslun Einars Ólafssonar neitaði að taka þátt í þeirri könnun sem hér er birt. Vert er að taka fram að hér er aðeins um beinan verðsamanburð að ræða, en ekki er lagt mat á gæði eða þjónustu söluaðila.

Til að hægt væri að taka mark á verðsamanburði milli þessara verslana reyndist nauðsynlegt að fækka vörutegundum um þær sem ekki fengust í öllum verslunum og því voru að lokum 28 vörutegundir í matarkörfu Verkalýðsfélagsins.

Niðurstöður könnunarinnar eru þær að ódýrust var matarkarfan í Kaskó en þar kostaði hún kr. 10.505. Í Skagaver kostaði karfan 11.653, í Krónunni kostaði hún kr. 12.163 og í Samkaup-Strax kostaði hún kr 13.591. Karfan kostaði því að meðaltali kr. 11.978. 

Verðlagseftirlit Verkalýðsfélags Akraness mun á næstu dögum og vikum gera reglulegar verðkannanir í þessu verslunum til að fylgjast með verðlagsþróun félagsmönnum sínum sem og öðrum neytendum hér á Akranesi til hagsbóta.

Hægt er að skoða könnunina í heild sinni með því að smella hér.

Þann 1. mars nk. verða gerðar breytingar á opinberum álögum á matvöru þegar matarskatturinn svokallaði verður lækkaður úr 14% niður í 7%. Mikilvægt er að þessar aðgerðir stjórnvalda skili sér til heimila í landinu í formi lægra vöruverðs í verslunum.

Til að fylgjast með því að hvaða leyti þessi lækkun skilar sér í vasa neytenda hefur verðlagseftirlit ASÍ, í samráði við aðildarfélög sín, hrundið af stað viðamiklum verðmælingum um allt land. Þessar mælingar verða framkvæmdar reglulega fram á mitt næsta ár. Tilgangurinn er fyrst og fremst að fylgjast með þeim breytingum sem verða á vöruverði innan hverrar verslunar á næstu mánuðum en síður að bera saman verð á milli einstakra aðila.

Starfsmaður á vegum Verkalýðsfélags Akraness fór í síðustu viku í allar verslanir á Akranesi í þessum tilgangi og var vel tekið á öllum stöðum. Þegar gagnasöfnun er lokið verða niðurstöður mælinganna birtar á heimasíðu félagsins um leið og þær liggja fyrir.

Áætlað er að umrætt lækkun á virðisaukaskatti eigi að geta skilað neytendum um 6-7 milljörðum á ári. Því er afar mikilvægt að halda úti öflugu eftirliti þannig að umrædd virðisaukalækkun skili sér í vasa neytenda en ekki til verslunareigenda.