Bæjarráð Akraneskaupstaðar ákvað á fundi sínum 30. mars sl. að nýta sér ekki lengur heimild til að draga persónuálag starfsmanna bæjarins frá þeim eingreiðslum sem Launanefnd sveitarfélaga samþykkti að greiddar yrðu frá 28. janúar 2006.  Umræddar persónuálögur hafa allir þeir starfsmenn sem voru í starfi hjá Akraneskaupstað fyrir undirritun síðasta kjarasamnings.

Það er alveg ljóst að þessi ákvörðun bæjarráðs hefur mjög jákvæð áhrif á launakjör þeirra starfsmanna sem eiga hlut að máli.

Bæjarráð samþykkti einnig að þessi ákvörðun skildi verða afturvirk eða nánar tiltekið frá 28. janúar 2006.   Það mun þýða að Akraneskaupstaður mun endurgreiða í heildina tæplega fimm milljónir króna til starfsmanna Akraneskaupstaðar.  Hefur formaður heimildir fyrir því að einstaka starfsmenn muni fá endurgreiðslu sem numið getur tugum þúsunda. 

Formaður Verkalýðsfélags Akraness getur ekki annað fagnað þessari ákvörðun bæjarráðs.  Einfaldlega vegna þess að það er ætíð ánægjulegt þegar kjarabætur koma óvænt til launþega og það á miðju samningstímabili.  

Það er sérstaklega ánægjulegt að þessi ákvörðun mun hafa mjög jákvæð áhrif á þá starfsmenn bæjarins sem eru með hvað lægstu launin. 

Rétt er að minna á að bæjarráð samþykkti ekki alls fyrir löngu að greiða þeim sem taka laun eftir launaflokkum 115, 116 og 117 eingreiðslur frá 5000 kr á mánuði uppí 6000 kr. og eru þær eingreiðslur umfram samþykktir Launanefndar sveitafélaga frá 28. janúar 2006.

Það ber að fagna þeirri stefnu sem bæjarstjórn Akraneskaupstaðar hefur tekið hvað varðar hækkanir til þeirra sem lægstu hafa tekjurnar, þó vissulega megi alltaf gera enn betur í þeim efnum. 

Í morgun hélt Michael Tanchuk forstjóri Norðuráls ásamt Rakel Heiðmarsdóttur starfsmannastjóra fyrirtækisins kynningu á hinum ýmsu málefnum er lúta að starfsemi fyrirtækisins fyrir formönnum þeirra stéttarfélaga sem eiga aðild að kjarasamningi Norðuráls.

Fram kom í máli Michael Tanchuk forstjóra að hann leggur gríðarlega mikla áherslu á öryggismál fyrirtækisins með hagsmuni starfsmanna að leiðarljósi.  Kynnti hann fyrir formönnum félaganna hinar ýmsu leiðir og hugmyndir í því að bæta öryggismál fyrirtækisins og sagði að öryggismál starfsmanna Norðuráls væru forgangsmál hjá sér.

Formaður félagsins fagnar þessum áformum hjá forstjóra Norðuráls og telur að hægt sé að bæta öryggismál starfsmanna töluvert.  Það er afar mikilvægt að allir leggist á eitt um bæta öryggismál fyrirtækisins þar sem slysatíðni á síðasta ári var því miður alltof há. Reyndar er eitt slys einu of mikið.  Það fór hins vegar ekki á milli mála að það er einlægur vilji forstjórans að bæta öryggismál fyrirtækisins með það að markmiði að útrýma slysum í verksmiðjunni.

Einnig var rætt um fyrirhuguð fíkniefnapróf sem til stendur að taka á starfsmönnum fyrirtækisins.  Afstaða félagsins til þess máls er hvellskýr. Ef lögfræðideild ASÍ og Persónuvernd skrifa uppá að slík fíkniefnapróf stangist ekki á við lög og reglugerðir þá sér félagið enga meinbugi á slíkri lyfjaskimun. 

Í byrjun mars 2007 framkvæmdi Capacent Gallup könnun fyrir SGS um viðhorf félagsmanna til starfsemi aðildarfélaga SGS og hvaða áherslur félagsmenn vilja sjá í starfi þeirra. Endanlegt úrtak var 1229 félagsmenn landsbyggðarfélaga SGS víðs vegar um landið. Fjöldi svarenda var 721 og var svarhlutfall 58,7%. 

Það er óhætt að segja að útkoma Verkalýðsfélags Akraness hafi verið glæsileg í þessari könnun Capacent Gallup.  Ein spurningin í könnuninni hljóðaði eftirfarandi:  

Á heildina litið finnst þér stéttarfélagið standa sig vel eða illa?  Svarmöguleikarnir voru Mjög vel, Frekar vel, Hvorki né, Frekar illa, Mjög illa

Einungis eitt stéttarfélag innan Starfsgreinasambands Íslands kom betur út úr þessari spurningu heldur en Verkalýðsfélag Akraness. Skipting á milli svarmöguleikanna hjá Verkalýðsfélagi Akraness var eftirfarandi:

Á þessu sést að 85,7% félagsmanna sem tóku þátt í könnuninni eru ánægðir með starfsemi Verkalýðsfélags Akraness.  Eins og áður sagði er það næstbesti árangurinn innan SGS en 20 stéttarfélög innan SGS tóku þátt í könnuninni. 

Hægt er að skoða samantekt þeirra sem eru ánægðir með starfsemi félaganna hjá öllum félögum innan SGS með því að smella á meira.

Eins og sést á þessu er niðurstaðan afar hagstæð fyrir Verkalýðsfélag Akraness og sýnir að stjórn félagsins er á réttri leið. Þessi árangur hefði ekki náðst nema með samstilltri stjórn og góðum starfsmönnum og er mikil hvatning um að gera ennþá betur.

Formaður félagsins fór á vinnustaðafund hjá HB-Granda.  Stjórn félagsins leggur mikla áherslu á að vera í eins góðu sambandi við sína félagsmenn og mögulegt er og var þessi heimsókn einn liður í því.  Formaður átti gott spjall við starfsmenn og trúnaðarmenn vinnustaðarins. 

Forsvarsmenn HB Granda hafa í hyggju að breyta fyrirkomulagi á greiðslu orlofslaunua starfsmanna og eru ekki allir starfsmenn á eitt sáttir við þá breytingu.  Formaður fór yfir þetta mál með starfsmönnum og vinnur nú að lausn á því máli í fullri sátt við starfsmenn og einnig í mjög góðu samráði við starfsmannastjóra HB Granda. 

Allt bendir til þess að farsæl lausn náist í þessu máli enda fullur vilji hjá forsvarsmönnum HB Granda að leysa málið í góðu samráði við trúnaðarmenn og Verkalýðsfélagið.  Formaður hefur lagt fram tillögur til lausnar á málinu og eru eins áður sagði yfirgnæfandi líkur á málinu verði landað báðum aðilum til góðs.

Eins og áður sagði leggur félagið mikla áherslu á að vera í góðu sambandi við sína félagsmenn og hefur formaður þá reglu að heimsækja sem flest af stóru fyrirtækjunum í það minnsta einu sinni í mánuði.  Formaður félagsins hvetur starfsmenn fyrirtækja til að hafa samband við skrifstofu félagsins, óski þeir eftir að formaður komi í vinnustaðaheimsókn.   

Formaður félagsins hefur að undanförnu verið að skoða hversu mörg þorskígildistonn tengd smábátaútgerð hafa verið seld héðan úr byggðarlaginu á undanförnum árum.  Í þeirri skoðun, sem byggð er á gögnum frá Fiskistofu, hefur komið í ljós að um 1000 þorskígildistonn hafa horfið frá Akranesi á síðustu fjórum árum.

Sé hins vegar horft tíu ár aftur í tímann er ekki óvarlegt að segja að um 1500 þorskígildistonn hafi horfið héðan af Akranesi.  Formaður veltir því fyrir sér hvort smábátaútgerð sé yfir höfuð að leggjast af hér á Akranesi og er það alls ekki að ástæðalausu þegar þessar bláköldu staðreyndir liggja fyrir.

Það er alveg ljóst að æði mörg vel launuð störf hafa hafa tapast hér á Akranesi vegna þeirrar þróunar sem orðið hefur á smábátaútgerð á liðnum árum og það bæði til lands og sjós.

Á Akranesi var gríðarlega öflug smábátaútgerð fyrir örfáum árum og reiknast formanni félagsins til að nálægt tuttugu smábátar hafi hætt starfsemi á síðustu tíu árum eða svo.

Það liggur fyrir að margir sjómenn og beitningarmenn sem eru félagsmenn í sjómannadeild Verkalýðsfélags Akraness sitja eftir með sárt ennið þegar útgerðamaður tekur þá ákvörðun um að selja sínar aflaheimildir og hætta allri starfsemi.  Á þessu sést að atvinnuöryggi þeirra sem stunda sjómennsku á smábátum er vægast sagt afar ótryggt.

Það er löngu orðið ljóst að það fiskveiðistjórnunarkerfi sem hér er við lýði á stóran þátt í þessari slæmu þróun sem orðið hefur á liðnum árum og þá sérstaklega framsalsþátturinn.  Er það eðlilegt að útgerðamaður geti gengið út úr greininni með tugi ef ekki hundruðir milljóna króna á meðan sjómaðurinn sem jafnvel hefur verið starfandi hjá viðkomandi útgerðamanni í tugi ára er réttindalaus og í raun allslaus? Auðlindir hafsins eru jú eign þjóðarinnar, ekki satt?

Þessu til viðbótar er nýliðun í greininni nánast útilokuð sökum hversu hátt verð er á aflaheimildum. Sem dæmi má nefna að kílóverðið á þorski í aflamarkskerfinu er að nálgast 3000 kr. Það er því greinilegt að ekki verður mikið um nýliðun í greininni á meðan slík verð eru fyrir aflaheimildir á þorski.

Það er algjört grundvallaratriði að sátt náist í sjávarútvegsstefnu okkar Íslendinga í komandi kosningum og atvinnuöryggi sjómanna verði tryggt með einhverjum hætti.  Það verður að tryggja að smábátaútgerð verði áfram starfrækt hér af fullum krafti því hér er um afar atvinnuskapandi útgerðarmynstur að ræða. Þessu til viðbótar er vert að benda á að hráefnið sem smábátar koma með að landi er fyrsta flokks og einnig er útgerðamynstur smábáta afar vistvænt.

Það er algjörlega óviðunandi að sjómenn þessa lands og reyndar heilu byggðarlögin búi við slíkt atvinnuóöryggi öllu lengur.

Eins og fram kom hér á heimasíðunni fyrir stuttu þá hefur formaður félagsins lagt fram tillögur um breytingar á bónuskerfi starfsmanna Íslenska járnblendifélagsins.

Vissir þættir í bónuskerfinu hafa ekki verið að virka sem skyldi.  Nú hefur verið ákveðið að funda aftur um bónusmálin 3. apríl og mun þá koma í ljós hvort forsvarsmenn Íj gangi að þeim tillögum sem félagið hefur lagt fram.

Þegar kjarasamningur var gerður 2005 var reiknað með að bónusinn myndi vera að jafnaði 5,6% en því miður var meðaltalsbónusinn einungis 3,68% í fyrra.  Eins og áður sagði þá eru það aðallega tveir þættir í bónusnum sem ekki hafa virkað enda eru t.d. mælikvarðar í einum þætti bónussins kolrangir.

Í gær fóru formaður félagsins og öryggisfulltrúi Norðuráls yfir atburðarásina í því hræðilega slysi sem átti sér stað á laugardaginn var þegar starfsmaður Norðuráls varð fyrir stórum lyftara og missti við það annan fótinn.

Það er afar ánægjulegt að heyra að þeir starfsmenn sem fyrstir komu að slysinu virðast hafa brugðist hárrétt við hvað varðar fyrstu hjálp en rétt er að minna á að aðstæður á slysstað voru skelfilegar, hávaðarok og mikil úrkoma. 

Það er einnig jákvætt hvernig forsvarsmenn Noðuráls brugðust við hvað varðar áfallahjálp handa starfsmönnum.  Áfallasérfræðingur Rauða kross Íslands kom strax á svæðið og fundaði með öllum starfsmönnum kerskála ásamt viðhaldsmönnum í skautsmiðju og kranaverkstæðis. Eftir það talaði hann einslega við þá starfsmenn sem þess óskuðu.

Einnig funduðu Mike forstjóri og Trausti Gylfason öryggisfulltrúi með starfsmönnum steypuskála.

Þessu til viðbótar var ræst út sálrænt áfallateymi Sjúkrahúss Akraness og gátu þeir starfsmenn sem vildu fengið þjónustu frá umræddu áfallateymi.

Rétt í þessu var að ljúka fundi með forsvarsmönnum Starfsgreinasambands Íslands með hluta af stjórn félagsins. Forsvarsmenn SGS voru að hefja fundarherferð til aðildarfélaga SGS og var þetta fyrsta heimsókn þeirra í þeirri herferð.

Þetta var afar ánægjulegur og gagnlegur fundur og mikið var rætt um komandi kjarasamninga. Afstaða Verkalýðsfélags Akraness til komandi kjarasamninga er hvellskýr, það er að verja það markaðslaunakerfi sem nú er í gildi á íslenskum vinnumarkaði og færa lágmarkstaxta SGS upp að markaðslaunum. Til þess að það náist þurfa lágmarkslaun að hækka um allt að 43%.

Einnig var mikið rætt um þær hugmyndir að stofna nýjan áfallatryggingasjóð og um breytingar á veikinda- og slysarétti en fram kom í máli formanns félagsins að hann telji að fara verði afar varlega í þessum breytingum.

Í hádeginu mun stjórn félagsins funda með formanni, varaformanni og framkvæmdastjóra Starfsgreinasambandsins. 

Dagskrá fundarins er í megin atriðum þessi:

• Kristján Gunnarsson, formaður SGS fer yfir helstu viðfagsefni SGS og ASÍ eins og þau blasa við SGS.
• Þjónustukönnun SGS, helstu niðurstöður könnunarinnar og samanburður heildarinnar við viðkomandi félag.
• Kjarakönnun SGS, lykilniðurstöður. Hvernig getum við tengt þær við komandi kjarasamninga.
• Breytingar á veikindarétti, nýjar hugmyndir í tengslum við skýrslu nefndar um endurskoðun örorkumats og eflingu starfsendurhæfingar.
• Önnur mál.

Alvarlegt vinnuslys varð í álveri Norðuráls á Grundartanga rétt fyrir klukkan þrjú í dag. Slysið varð fyrir utan einn af kerskálum álversins þegar stórum lyftara var ekið á starfsmann sem var á gangi.

Stjórn VLFA leggur mikla áherslu á að öryggismál starfsmanna séu í góðu lagi og á þeirri forsendu fór formaður félagsins á slysstað í dag til að kynna sér hvað hafi valdið þessu hörmulega slysi. Lögreglan og vinnueftirlitið voru að störfum þegar formann bar að garði og er afar erfitt að segja á þessari stundu hvað hafi valdið þessu slysi.

Formaður hitti öryggistrúnaðarmann Norðuráls í dag en fram kom hjá honum að aðkoman að slysinu hafi verið afar ljót og aðstæður á slysstað hafi verið afar erfiðar.  Slysið varð utandyra og þegar það gerist var veður afar slæmt, hávaðarok og mikil úrkoma.  Það var alveg ljóst að starfsmönnum var verulega mikið brugðið við þetta hræðilega slys í dag.

Samkvæmt þeim upplýsingum sem formaður hefur fengið þá eru umtalsverðar líkur á að starfsmaðurinn missi annan fótinn í þessu hræðilega slysi. 

Stjórn félagsins sendir þeim starfsmanni sem lendi í umræddu slysi ósk um eins skjótan bata og hægt er og ekki síður þeim er varð fyrir því óláni að aka á starfsmanninn.  Einnig er mikilvægt að hlúa að þeim starfsmönnum sem komu fyrstir á slysstaðinn og veita þeim áfallahjálp.  Sem dæmi má nefna er áfallateymi starfrækt hjá Íslenska járnblendifélaginu og er það ræst út þegar alvarleg slys verða hjá Íslenska járnblendinu.   Formanni er ekki kunnugt um hvort slíkt teymi sé starfrækt hjá Norðuráli.