ið minnum á aðalfund sjómannadeildar Verkalýðsfélags Akraness sem verður í dag og hefst klukkan 14. Fundurinn verður haldinn í fundarsal félagsins að Sunnubraut 13.

Auk venjubundinnar aðalfundardagskrár munu áform ríkisstjórnarinnar um afnám sjómannaafsláttarins klárlega verða til umræðu enda er hér verið að höggva í starfskjör sjómanna sem hafa verið við lýði í hartnær 40 ár. Það er mat félagsins að það sé ekki hægt að láta þessi áform yfir sjómenn ganga átölulaust.

Stjórn Verkalýðsfélag Akraness og starfsmenn félagsins  senda félagsmönnum sínum og landsmönnum öllum bestu jólakveðjur með óskum um farsæld og frið á jólum, um áramót og á komandi ári. 

Í sjónvarpsfréttum á Ruv í gær kom fram að gagnagrunnur sem Jón Jósef Bjarnason, framkvæmdastjóri IT Ráðgjafar vinnur að muni sýna á myndrænan hátt krosstengsl einstaklinga í viðskiptalífinu. Höfundur grunnsins segir að forystumenn verkalýðshreyfingarinnar leggi stein í götu þeirrar viðleitni að bæta við upplýsingum um þá sem fara með fé í nafni samtaka launamanna.

Verkalýðsfélag Akraness vill að gefnu tilefni að það komi skýrt fram að VLFA varð að sjálfsögðu strax við beiðni frá Jóni Jósep um hverjir skipi stjórn félagsins enda á að ríkja algjört gagnsæi í starfsemi stéttarfélaga og lífeyrissjóða.  Formaður Verkalýðsfélags Akraness harmar það ef satt sé að aðilar innan verkalýðshreyfingarinnar hafi lagt stein í götu þeirrar viðleitni að bæta við upplýsingum um þá sem fara með fé í nafni samtaka launamanna. 

Formaður VLFA fagnar þeirri vinnu sem Jón Jósef vinnur nú að, einfaldlega vegna þess að fulltrúar stéttarfélaga bæði í stjórnum stéttarfélaga og lífeyrissjóða verða að vera hafnir yfir alla gagnrýni og þar verður að ríkja algjört gagnsæi. 

Óskiljanleg vinnubrögðHvað er eiginleg í gangi? Í rúm 10 ár hefur núverandi sagnaritari þegið greiðslur frá skattgreiðendum Akraneskaupstaðar, fjárhæð sem nemur 73.337.692.- m.v. uppreiknaða vísitölu, fyrir það eitt að rita sögu Akraneskaupstaðar.

Þessu til viðbótar var samþykkt nýverið í bæjarstjórn að greiða umtalsverða fjárhæð til að klára verkið þrátt fyrir að þegar sé búið að greiða 73 milljónir fyrir það. Þetta gerist á sama tíma og verið er að skerða laun skólaliða og starfsmanna íþróttamannvirkja um tugi þúsunda á mánuði, hvernig getur þetta átt sér stað?

Vinnubrögð af þessu tagi eru að mati formanns félagsins algjörlega óskiljanleg og á þeirri forsendu þarf bæjarstjórn Akraneskaupstaðar að útskýra fyrir skattgreiðendum hér á Akranesi í hverju þessi ritun er eiginlega fólgin. 

Um þessar mundir er verið að vinna að því að senda út dagbækur til félagsmanna Verkalýðsfélags Akraness en dagbækurnar eru jafnframt félagsskírteini þeirra. Í bókunum má finna ýmsar hagnýtar upplýsingar um starf félagsins. Félagsmenn ættu að vera búnir að fá dagbókina senda heim í byrjun nýs árs.

Stjórn Verkalýðsfélags Akraness ákvað á fundi sínum á þriðjudaginn var að heiðra Ásmund Una Guðmundsson fyrir hans störf í þágu félagsins.

Ásmundur Uni var fyrst kjörinn ritari verkamannadeildar félagsins árið 1965 og einnig var hann vararitari aðalstjórnar í fjölmörg ár. Heiðrunin mun eiga sér stað á hinum árlega jólatrúnaðarráðsfundi félagsins sem haldinn verður þann 29. desember næstkomandi.

Það var afar athyglisverð frétt á Stöð 2 í gær þar sem sagt var frá því að Útlendingastofnun hefði synjað tælenskri konu um búsetuleyfi á þeirri forsendu að 175 þúsund króna laun dygðu ekki til framfærslu. Umrædd kona starfar í einu af þvottahúsum ríkisspítalanna og er afar fróðlegt að sjá að Útlendingastofnun skuli vera búin að kveða upp úrskurð um að laun upp á 175 þúsund krónur dugi ekki fyrir framfærslu. Formaður Verkalýðsfélags Akraness er í raun og veru algjörlega sammála því að lágmarkslaun á hinum almenna vinnumarkaði dugi engan veginn fyrir lágmarksframfærslu.

Það er ágætt að vera búin að fá þessa staðfestingu frá Útlendingastofnun um að lágmarkslaun á Íslandi í dag dugi ekki til að fólk geti framfleytt sér. Þetta mun klárlega verða notað í komandi kjaraviðræðum, bæði við ríki, sveitarfélög og á hinum almenna vinnumarkaði sem rök fyrir því að hækka beri lágmarkslaun umtalsvert þegar kjarasamningar verða lausir á næsta ári.

Formaður félagsins hefur margoft fjallað um þessi skammarlega lágu lágmarkslaun og gerði það meðal annars á ársfundi Alþýðusambands Íslands sem haldinn var dagana 22.-23. október síðastliðinn en í ræðu sem hann hélt sagði hann að það væri íslensku samfélagi og einnig verkalýðshreyfingunni til skammar að vera með lágmarkstaxta sem dygðu ekki fyrir framfærslu fólks. Skorar formaður á fólk að hlusta á umrædda ræðu en hlutinn sem snýr að lágmarkslaununum er í öðrum hluta þegar 8 mínútur eru búnar af ræðunni.

Verkalýðsfélag Akraness leysti ágreining við útgerðarfyrirtæki í gær en deilan stóð um hvort skipverjar á uppsjávarskipi ættu rétt á kauptryggingu í 20 daga stoppi. Útgerðin neitaði að greiða áðurnefndum skipverjum tryggingu á umræddu tímabili á þeirri forsendu að skipverjar hefðu ekki skilað vinnu um borð í skipinu.

Útgerðin vísaði málinu til lögmanns Landssambands íslenskra útvegsmanna sem átti að gæta hags útgerðarinnar í þessu máli. Verkalýðsfélag Akraness mótmælti harðlega þessari ákvörðun og færði rök fyrir sínu máli og í kjölfarið á þeirri ábendingu félagsins varð niðurstaðan sú að útgerðin og LÍÚ féllust á að skipverjarnir ættu rétt á kauptryggingunni. Nú hafa skipverjarnir fengið kauptrygginguna greidda og nemur heildarupphæðin tæplega einni og hálfri milljón króna.

Eins og flestir muna var gengið frá kjarasamningi á hinum almenna vinnumarkaði 17. febrúar 2008. Í þeim samningi var kveðið á um að launahækkanir skyldu verða með eftirfarandi hætti: 1. mars 2009 áttu þeir sem voru að vinna eftir töxtum að hækka um 13.500 kr. og þeir sem voru ekki að vinna eftir taxtakerfi áttu að fá 3,5% launahækkun. 1. janúar 2010 áttu laun síðan að hækka um 2,5%.

Eins og flesta rekur minni til þá gengu samninganefnd ASÍ og Samtök atvinnulífsins frá samkomulagi í tvígang, fyrst 25. febrúar og síðar 25. júní um frestun á þeim launahækkunum sem áttu að taka gildi samkvæmt samningnum 17. febrúar 2008. Fyrst var taxtahækkunum upp á 13.500 kr. frestað til 1. júlí og einnig 3,5% hækkun þeirra sem ekki voru að vinna á launatöxtum. 25. júní var gengið frá öðru samkomulagi og þá var ákveðið að þeir sem væru að vinna eftir töxtum fengju einungis 6.750 kr. launahækkun og aftur 6.750 kr. 1. nóvember síðastliðinn og þeir sem ekki væru að vinna eftir launatöxtum fengju 3,5% 1. nóvember. Hækkunin upp á 2,5% sem ætti að taka gildi núna 1. janúar næstkomandi var frestað til 1. júní 2010.

Þessu mótmælti Verkalýðsfélag Akraness harðlega á sínum tíma, fyrst á formannafundi ASÍ sem haldinn var 16. febrúar og rök Verkalýðsfélags Akraness voru einfaldlega þau að klárlega væru til fyrirtæki sem gætu staðið við þann hófstillta samning sem gerður var 17. febrúar 2008. Nefndi formaður í því samhengi sérstaklega öll fyrirtæki sem að starfa í útflutningi, þar á meðal fiskvinnslufyrirtækin. Einnig nefndi formaður olíufyrirtækin sem hafa viðstöðulaust varpað sínum vanda út í verðlagið. 

Verkalýðsfélag Akraness lá undir hörðum ámælum fyrir að mótmæla því að fresta áður umsömdum launahækkunum. Sú gagnrýni kom bæði frá forystu ASÍ og einnig frá Samtökum Atvinnulífsins og nægir að nefna í því samhengi viðtal við Vilhjálm Egilsson, framkvæmdastjóra SA, sjá hér.

Allir muna eftir arðgreiðslum HB Granda en fyrirtækið skilaði góðri afkomu á árinu 2008 og tilkynnti í framhaldinu að það hyggðist greiða arðgreiðslur til hluthafa. Þessu fagnaði Verkalýðsfélag Akraness á sínum tíma en gerði skýlausa kröfu á hendur fyrirtækinu að það myndi greiða starfsmönnum sínum þær hækkanir sem áttu að taka gildi 1. mars á þeim forsendum að fyrirtækið var að skila góðri afkomu. Við þessari beiðni varð fyrirtækið og allir starfsmenn HB Granda fengu þær hækkanir sem áttu að taka gildi 1. mars 2009 og í kjölfarið fylgdi fjöldi annarra fiskvinnslufyrirtækja á eftir þrátt fyrir að samninganefnd ASÍ hafi verið búin að semja þessar launahækkanir frá sér.

Verkalýðsfélag Akraness skoraði einnig í dagblöðum á öll vel stæð fyrirtæki að standa við gerða samninga á sínum tíma. Sjá hér.  

Núna eru fiskvinnslufyrirtækin vítt og breitt um landið að greiða starfsmönnum bónusa vegna góðrar afkomu og á þeirri forsendu verður afar fróðlegt að fylgjast með því hvort fiskvinnslufyrirtæki sem og önnur vel stæð fyrirtæki komi ekki örugglega með þá hækkun sem á að taka gildi 1. janúar 2010 ef farið væri eftir þeim kjarasamningi sem gerður var 17. febrúar 2008. Verkalýðsfélag Akraness ber þá von í brjósti sér að fyrirtæki skýli sér ekki á bak við það ömurlega samkomulag sem samninganefnd ASÍ og SA gengu frá 25. júní síðastliðinn og bíði ekki með hækkanirnar til 1. júní 2010 eins og samkomulagið kveður á um. Formaður spyr sig hví í ósköpunum eigi að gefa vel stæðum fyrirtækjum afslátt á þeim samningi sem gerður var 17. febrúar 2008 enda eru engar forsendur fyrir slíku.

Verkalýðsfélag Akraness hefur ætíð sagt að það er samninganefnd Alþýðusambands Íslands og verkalýðshreyfingunni í heild sinni til skammar að hafa gefið vel stæðum fyrirtækjum afslátt á þeim kjarasamningi sem gerður var á árinu 2008 en með þeim afslætti hefur verið haft af verkafólki vel á annað hundrað þúsund krónur á umræddu tímabili.

Verkalýðsfélag Akraness skorar á öll fyrirtæki sem eru starfandi í útflutningi og einnig þau fyrirtæki sem hafa fjárhagslega burði til að koma með þær hækkanir sem eiga að taka gildi 1. janúar 2010 eða sem nemur 2,5% launahækkun. Formaður Verkalýðsfélags Akraness gagnrýndi frestun kjarasamninga harðlega í ræðu sinni á ársfundi Alþýðusambands Íslands og skorar hann á fólk að hlusta á þá ræðu og þau rök sem Verkalýðsfélag Akraness hafði í þessu máli. Ræðurnar þar sem fjallað er um frestun á kjarasamningum eru í fyrsta, öðrum og sjötta hluta.

Hægt er að hlusta á ræðurnar hér.

Eins og fram hefur komið hér á heimasíðunni er búið að fresta viðræðum um nýjan kjarasamning starfsmanna Norðuráls þar til dómur fellur í máli er lítur að stefnu Félags vélstjóra og málmtæknimanna, VM, en þeir gera kröfu um að eiga aðild að kjarasamningi Norðuráls. Formaður hefur áður gert grein fyrir sinni afstöðu í því máli og hægt er að lesa hér á heimasíðunni hver hún er.  En rétt er að ítreka það að VLFA harmar þessi vinnubrögð forsvarsmanna VM.

Formaður hefur að undanförnu fundað með starfsmönnum Norðuráls og á föstudaginn fundaði hann með dagvinnufólkinu og gerði þeim grein fyrir þeirri stöðu sem upp er komin og hvernig viðræðurnar hafa gengið fyrir sig. Í kvöld mun formaður síðan ljúka við að funda með restinni af starfsmönnum og það eru B og C vaktirnar sem hann mun hitta í kvöld. Það er töluvert mál að ná öllum starfsmönnum saman á svona fjölmennum vinnustað eins og Norðurál er og á þeirri forsendu getur það tekið nokkra daga að hitta alla starfsmennina.

Fundirnir hafa gengið mjög vel þar sem formaður hefur gert grein fyrir stöðu mála bæði hvað varðar þetta alvarlega mál er viðkemur stefnu VM manna og einnig hvernig viðræðurnar hafa gengið fram að þessu. Formaður hefur greint frá því á fundunum að Verkalýðsfélag Akraness muni ekki hvika frá þeirri kröfu í þessum viðræðum að launakjör starfsmanna Norðuráls verði með sambærilegum hætti og gerist í sambærilegum iðnaði. Frá þessari kröfu mun félagið ekki víkja enda eru engar forsendur fyrir slíku nú og hefur rekstur Norðuráls til að mynda gengið mjög vel á undanförnum árum og rétt er að benda á að álverðið í dag eru rúmir 2.200 dollarar pr. tonn.