Stjórn Elkem í Noregi ákvað á fundi sínum rétt í þessu að flytja starfsemi einnar verksmiðju fyrirtækisins í Noregi til Íslenska járnblendifélagsins á Grundartanga sem einnig er í eigu Elkem.

Ingimundur Birnir forstjóri Íslenska járnblendifélagsins segir að við þessa breytingu skapist um fjörtíu ný störf á Grundartanga og nauðsynlegt verði að fjárfesta fyrir um þrjá milljarða og áætlað er að velta fyrirtækisins aukist um 3,5 milljarða króna án þess að orkuþörf verksmiðjunnar aukist.

Formaður Verkalýðsfélags Akraness fagnar þessari ákvörðun Elkem vegna þess að vinnsla á FSM mun tryggja Íslenska járnblendifélaginu mun stöðugri rekstrur heldur verið hefur að mati þeirra sem til þekkja.  En rekstur ÍJ hefur ætíð verið nokkuð sveiflukennur.  Einnig er það afar ánægjulegt að við þessa stækkun mun störfum fjölga um allt að 40 manns.

Formannafundur Starfsgreinasambands Íslands var haldinn á Ísafirði föstudaginn 6. september. Þar kom meðal annars fram að fiskvinnslufólki á Íslandi hefur fækkað um 500 á milli ára.

Helsta skýringin á þessari fækkun er væntanlega lokun loðnuverksmiðja og einnig rækjuverksmiðja víða um land á síðustu misserum.  Félagsmönnum innan Verkalýðsfélags Akraness sem starfa í fiskvinnslu hefur verið að fækka töluvert á liðnum misserum.  Nægir þar að nefna að einungis einn starfsmaður er eftir í Síldar- og fiskimjölsverksmiðju HB-Granda, en þar störfuðu 25 manns þegar mest var. 

 Það er alveg óhætt að segja að formanni félagsins hafi verið verulega brugðið þegar hann heyrði þessar tölur en þess má geta að fiskvinnslufólk á Íslandi er á bilinu 5-6 þúsund.

Haldi þessi þróun áfram eru ekki mörg ár í það að fiskvinnsla leggist af á Íslandi.  Formaður Verkalýðsfélags Akraness telur þetta mikið áhyggjuefni og vonast til þess að menn efli fiskvinnsluna í landinu til að sporna við þessari þróun.