Formaður Verkalýðsfélags Akraness fagnar þeirri ákvörðun íslenskra stjórnvalda að heimila hvalveiðar í atvinnuskyni að nýju eftir 17 ára hlé.

Vísindamenn Hafrannsóknastofnunar hafa árlega mörg undanfarin ár lagt til veiðar á langreyði og hrefnu og gert tillögu um veiðikvóta fyrir þessi dýr.  Það er mat formanns félagsins að við Íslendingar getum á engan hátt sætt okkur við það að utanaðkomandi aðilar stjórni því hvernig við nýtum okkar eigin auðlindir.  Er þetta mat formannsins byggt á grundvelli þeirra staðreynda að vísindamenn Hafrannsóknarstofnunar telja stofnstærð bæði hrefnu sem og langreyðar þoli umtalsverðar veiðar.

Hin ýmsu náttúruverndarsamtök hafa náð að telja almenningi í trú um að hvalir séu í verulegri útrýmingarhættu en það er þvert á það sem vísindamenn Hafrannsóknastofnunar hafa sagt.  Við Íslendingar getum ekki á nokkurn hátt látið kúga okkur til þess að nýta ekki þær auðlindir sem við eigum á forsendum sem eru klárlega rangar og ekki byggðar á nokkrum vísindalegum rökum.

Formaður félagsins spyr sig líka hvað ef náttúrusinnar myndu fara að halda því ranglega fram að aðrir nytjastofnar okkar Íslendinga væru í útrýmingarhættu t.d þoskurinn, ýsan, síldin og jafnvel loðnan. Ættum við Íslendingar að láta undan náttúruverndarsinnum og hætta veiðum á ofangreindum fiskistofnum.  Nei, það er mat formanns félagsins að hér sé um þjóðarhagsmuni okkar Íslendinga að ræða. Það verður að vera ákvörðun okkar hvernig við nýtum okkar auðlindir en að sjálfsögðu á sú ákvörðun að vera byggð á vísindalegum rökum.

Það er afar mikilvægt að ríkisstjórn Íslands fari í þá vinnu af fullum krafti að upplýsa umheiminn um að hér eru ekki hafnar veiðar á dýrum sem eru í útrýmingarhættu, heldur veiðar sem byggðar eru á faglegu mati færustu vísindamanna á þessu sviði.  

Trúnaðarmannanámskeiðið sem Verkalýðsfélag Akraness hefur staðið fyrir lýkur í dag.  Eins og fram hefur komið hér á heimasíðunni þá hófst námskeið á mánudaginn var og er liður í gera trúnaðarmenn vel hæfa til að gegna sínu starfi.

Í gær kom lögfræðingur ASÍ, Ingvar Sverrisson, og var með erindi um vinnurétt og fór yfir nýlega dóma sem tengjast vinnurétti.  Formaður félagsins var með erindi á miðvikudaginn um þá kjarasamninga sem tilheyra Verkalýðsfélagi Akraness og þá þjónustu sem er í boði hjá félaginu.

Það er alveg óhætt að segja að sá hópur sem sækir þetta námskeið sé afar áhugasamur og vonandi mun námskeið þetta nýtast þeim að takast á við þau verkefni sem fylgir því að vera trúnaðarmaður.