Ársfundur Alþýðusambands Íslands hófst í morgun með ávarpi frá forseta ASÍ, Grétari Þorsteinssyni.  Einnig flutti Magnús Stefánsson félagsmálaráðherra ávarp.  Verkalýðsfélag Akraness hefur rétt á fjórum fulltrúum á ársfundinn og eru þeir Vilhjálmur Birgisson, Þórarinn Helgason, Tómas Rúnar Andrésson og Björgólfur Einarsson.

Megin þema þessa ársfundar er Ísland og hnattvæðingin.  Á fundinum verður farið yfir þau áhrif sem hnattvæðingin hefur haft á íslenskt samfélag.  Það er alveg ljóst að hnattvæðingin hefur bæði kosti og galla hér á landi.  

Íslenskir launþegar hafa svo sannarlega orðið varir við áhrif hnattvæðingarinnar hér á landi, en hún birtist okkur í stórauknu flæði erlends verkafólks frá hinum ýmsu ríkum.

Hnattvæðingin hefur gert það að verkum að aðgengi atvinnurekanda að ódýru erlendu vinnuafli hefur stóraukist.  Því miður hafa sumir atvinnurekendur og reyndar alltof margir nýtt sér bága stöðu þessa fólks.  Sagan sýnir okkur að það er verið að brjóta á erlendu verkfólki út um allt land, bæði hvað varðar laun sem og önnur starfkjör.  

Verkalýðshreyfingin verður í heild sinni að skera upp herör gegn þeim atvinnurekendum sem vísvitandi brjóta á réttindum erlends vinnuafls sem hingað kemur til starfa.  Verkalýðshreyfingin getur ekki horft uppá það að áratuga löng barátta fyrir bættum réttindum og kjörum íslenskra verkamanna, verði gjaldfelld með auknu aðgengi að ódýru erlendu vinnuafli.    

Formaður Verkalýðsfélags Akraness fagnar þeirri ákvörðun íslenskra stjórnvalda að heimila hvalveiðar í atvinnuskyni að nýju eftir 17 ára hlé.

Vísindamenn Hafrannsóknastofnunar hafa árlega mörg undanfarin ár lagt til veiðar á langreyði og hrefnu og gert tillögu um veiðikvóta fyrir þessi dýr.  Það er mat formanns félagsins að við Íslendingar getum á engan hátt sætt okkur við það að utanaðkomandi aðilar stjórni því hvernig við nýtum okkar eigin auðlindir.  Er þetta mat formannsins byggt á grundvelli þeirra staðreynda að vísindamenn Hafrannsóknarstofnunar telja stofnstærð bæði hrefnu sem og langreyðar þoli umtalsverðar veiðar.

Hin ýmsu náttúruverndarsamtök hafa náð að telja almenningi í trú um að hvalir séu í verulegri útrýmingarhættu en það er þvert á það sem vísindamenn Hafrannsóknastofnunar hafa sagt.  Við Íslendingar getum ekki á nokkurn hátt látið kúga okkur til þess að nýta ekki þær auðlindir sem við eigum á forsendum sem eru klárlega rangar og ekki byggðar á nokkrum vísindalegum rökum.

Formaður félagsins spyr sig líka hvað ef náttúrusinnar myndu fara að halda því ranglega fram að aðrir nytjastofnar okkar Íslendinga væru í útrýmingarhættu t.d þoskurinn, ýsan, síldin og jafnvel loðnan. Ættum við Íslendingar að láta undan náttúruverndarsinnum og hætta veiðum á ofangreindum fiskistofnum.  Nei, það er mat formanns félagsins að hér sé um þjóðarhagsmuni okkar Íslendinga að ræða. Það verður að vera ákvörðun okkar hvernig við nýtum okkar auðlindir en að sjálfsögðu á sú ákvörðun að vera byggð á vísindalegum rökum.

Það er afar mikilvægt að ríkisstjórn Íslands fari í þá vinnu af fullum krafti að upplýsa umheiminn um að hér eru ekki hafnar veiðar á dýrum sem eru í útrýmingarhættu, heldur veiðar sem byggðar eru á faglegu mati færustu vísindamanna á þessu sviði.