Samningaviðræðum Starfsgreinasambandsins og Flóabandalagsins við Samtök atvinnulífsins var vísað til Ríkissáttasemjara kl. 15:15 í dag 18. febrúar 2003. Með þessu vilja félögin leggja áherslu á að viðræðum fari að ljúka, en þær hafa staðið yfir frá 18. nóvember 2003.

Í dag eru því liðnir þrír mánuðir síðan kröfugerðin var kynnt atvinnurekendum. Kjarasamningar voru lausir um síðustu áramót og er Viðræðunefnd Starfsgreinasambandsins orðin mjög óþolinmóð enda hefur nefndin haft það á tilfiningunni að SA hafi ekki sinnt viðræðum af fullum þunga. Kjarasamningar hafa nú verið lausir í 49 daga. Eins og fram hefur komið í fjölmiðlum undanfarið hefur náðst samkomulag um ýms sérmál, hins vegar hefur ekki náðst samkomulag um nýja launatöflu, launahækkanir á samningstímanum og hækkanir á framlögum í lífeyrissjóði starfsmanna. 

Varðandi kjarasamning Starfsgreinasambands Íslands við Samninganefnd ríkisins vegna starfsmanna hjá ríkinu þá verður fundum fram haldið á morgun.

Síðustu vikurnar hafa fulltrúar aðildarfélaga Starfsgreinasambands Íslands unnið stíft að undirbúningi og gerð kjarasamninga við Samtök atvinnulífsins. Unnið hefur verið í sérmálum einstakra hópa, s.s. fiskvinnslufólks, iðnverkafólks, bensínafgreiðslumanna, bílstjóra og starfsmanna á hótelum og veitingahúsum. Samhliða þessari vinnu hófust undirbúningsviðræður vegna gerðar nýrrar launatöflu. 

Í gær svöruðu fulltrúar Samtaka atvinnulífsins hugmyndum stéttarfélaganna (SGS) um nýja launatöflu. Svar þeirra gefur því miður ekki tilefni til neinnar bjartsýni og segja má að kröfum stéttarfélaganna hafi verið sýnd lítil virðing.
Vegna þessarar nýju stöðu kjarasamninganna ákvað Starfsgreinasamband Íslands að boða til formannafundar á morgun (aðalsamninganefnd SGS), þar sem teknar verða ákvarðanir um framhald kjaraviðræðnanna við SA.

Frá áramótum fellur niður framlag ríkisins til séreingarsparnaðar (lífeyrissparnaðar). Framlag ríkisins var 10% af framlagi starfsmanns, þ.e. 0,2-0,4%. Launagreiðendur greiddu þetta framlag fyrir ríkið og fengu endurgreiðslu í desember ár hver. 
Rétt er að hafa í huga að mótframlag launagreiðenda samkvæmt kjarasamningi breyttist ekki og verður áfram 1% fyrir þá starfsmenn sem ekki eru með samning um séreignarsparnað og 2% fyrri þá sem eru með samning um séreignarsparnað

Eftirfarandi námskeið ætluð sjómönnum eru styrkt af Sjómennt um allt að 75% af námskeiðsgjaldi.  Hafið samband við Sjómennt í síma 562-6480 eða www.sjomennt.is ef áhugi er fyrir hendi.

1.  Baader fiskvinnsluvélar 2ja daga námskeið kennt eftir pöntun víða um land.

2.  Meðferð og frágangur afla um borð í veiðiskipi kennt eftir pöntun víða um land.

3.  Stjórnun vinnuvéla um borð, kranar og vindur kennt eftir pöntun víða um land.

4.  Tölvunámskeið 8-12 vikna námskeið, næst 15. feb (hægt að byrja seinna).  Frábært námskeið sem hefur skilað góðum árangri, sérstaklega sniðið aðstæðum sjómanna og eingöngu kennt í fjarkennslu.

5.  Vélagæslunámskeið kennt næsta haust.

6.  Hásetafræðsla.  Námskeið fyrir aðstoðarmenn í brú áætlað í febrúar.

Formaður félagsins var á fundi í viðræðunefnd vegna ríkissamninganna.  Viðræðunefndin hitti samninganefnd ríkissins þar sem farið var yfir stöðu mála og var ákveðið á þeim fundi að hittast föstudaginn 6. febrúar og þar mun viðræðunefnd starfsgreinasambandsins leggja fram sína kröfugerð er lítur að jöfnun lífeyrisréttinda og má búast við að hart verði tekist á um það mál. 

Það voru 29 umsækjendur um starfið á skrifstofu okkar hjá VLFA.  Margar góðar umsóknir bárust og úr þeim fjölda var valin Hugrún Olga Guðjónsdóttir.  Hún mun kappkosta við að þjónusta félagsmenn af bestu getu. 

Hugrún vann áður hjá Skattstjóra Vesturlandsumdæmis en hefur nú ákveðið að söðla um og prófa sig á nýjum vettvangi.  Höfum við miklar væntingar um störf hennar hjá félaginu.

Nú hafa allar deildir lokið aðalfundum sínum.  Því er orðið fullskipað í stjórn og trúnaðarráð og munum við setja nafnalistana inn á síðuna von bráðar.  Fundur er fyrirhugaður innan mánaðar.

Aðalfundur opinberu deildar var haldinn fimmtudaginn 22. janúar.  Til fundarins mætti Snær Karlsson frá SGS og kynnti stöðuna í samningamálum.  Var hann hóflega bjartsýnn á góðan árangur úr viðræðunum. 

Góð samstaða var á fundinum um að halda þeim sérkjörum til streitu sem áunnast hafa.  Þegar endanleg launatafla frá samninganefnd ríkisins liggur fyrir og menn geta séð hvað í boði er, þá munu starfsmenn skrifstofunnar leggja vinnu í það að bera samningana saman til að sjá hverjar raunverulegar kjarabætur verða.  Þegar það liggur fyrir er fyrirhugað að boða til fundar og kynna niðurstöðuna.  Þá þurfa starfsmenn sem vinna eftir þessum samningum að taka afstöðu hvað gera skuli. 

Formaður félagsins og tveir starfsmenn Sjúkrahúss Akraness funduðu með samninganefnd ríkisins sl. miðvikudag og lögðu fram þær sérkröfur sem eru í kjarasamningi sjúkrahússins og þeim skilaboðum komið á framfæri að öll þau sérmál sem áunnist hafa á undanförnum árum verði tekin með þegar aðalkjarasamningur verður gerður.

Stjórn Verkalýðsfélags Akraness fagnar því að Grandi og HB fjölskyldan skuli hafa komist að samkomulagi um kaup á eign Brims í Haraldi Böðvarssyni, og vonar að þeirri miklu óvissu sem ríkt hefur um störf sjómanna og fiskvinnslufólks á Akranesi hafi þar með endanlega verið eytt.

Stjórn Verkalýðsfélags Akraness skorar jafnframt á núverandi eigendur, að sjá til þess að sú rekstrareining sem hefur verið starfrækt hér á Akranesi frá árinu 1906, verði áfram tryggð um ókomna framtíð.

Stjórn Verkalýðsfélags Akraness