Samráðsnefnd Sjúkrahúss Akraness mun funda mánudaginn 13. des. kl. 09:00.  Til umræðu eru tvö mál þ.e. túlkun á kjarasamningi starfsmanna og einnig munu fulltrúar stéttarfélagsins og trúnaðarmanna afhenda forsvarsmönnum SHA yfirlýsingu og áskorun.  Mikil óánægja ríkir meðal starfsmanna vegna þeirrar ákvörðunar stjórnenda SHA að segja upp núverandi vinnufyrirkomulagi. Nýtt vinnufyrirkomulag mun taka gildi 1. jan. 2005.  Yfirlýsingin og áskorun starfsmanna SHA munu birtast hér á heimasíðunni eftir helgi í heild sinni. 

Ákveðið hefur verið að funda um gildissvið kjarasamnings Norðuráls þriðjudaginn 14. desember kl. 09.00.  Þeir sem munu sitja fundinn fyrir stéttarfélögin eru formaður Verkalýðsfélags Akraness, formaður Fit, aðaltrúnaðarmaður NA,  ásamt lögmanni stéttarfélaganna.  Hugmynd Verkalýðsfélags Akraness er nokkuð skýr hvað gildissviðið varðar þ.e. að kjarasamningur Norðuráls gildi sem lágmarkssamningur í öllum störfum sem unninn eru reglulega eða daglega á athafnasvæði Norðuráls.

Fundað var um bónusmál  starfsmanna Íslenska járnblendifélagsins í dag.  Kynnt var fyrir samninganefnd Íj, hvað þær tillögur forsvarsmanna Íj að nýjum bónus hefðu gefið á síðastliðnum tveimur árum ef hann hefði verið við lýði.  Ljóst má vera að þær forsendur sem forsvarsmenn  Ij  komu með um nýjan bónus ganga alls ekki upp.  Erum við í  samninganefnd Íj að skoða niðurstöður úr þessari úttekt sem kynnt var fyrir okkur í dag.   Samninganefnd stéttarfélaganna er sammála um að   leggja fram  tillögur að nýjum bónus á fundi sem haldinn verður hjá ríkissáttasemjara á mánudaginn 13. desember. 

Fundað verður á morgun um bónusmál starfsmanna Íslenska járnblendifélagsins, hefst fundurinn kl. 14:30.  Eins og fyrr sagði þá verða bónusmálin til umræðu.  Forsvarsmenn Íj hafa lagt fram tillögur að nýju bónuskerfi sem samninganefnd stéttarfélaganna hefur verið að skoða.  Samninganefndin óskaði eftir því að hugmyndir forsvarsmanna Íj yrðu keyrðar tvö ár aftur í tímann til að geta séð hvað hið nýja bónuskerfi væri hugsanlega að gefa starfsmönnum í aukinn bónus.  Á fundinum á morgun ætla forsvarsmenn Íj sýna hvað hið nýja bónuskerfi hefði verið að gefa starfsmönnum í bónus ef það hefði verið við lýði á síðastliðnum tveimur árum.

Þegar við verðum búnir að sjá hvernig bónusinn hefur komið út í þessari könnun sem forsvarsmenn Íj hafa gert fyrir okkur,  þá fyrst geta stéttarfélögin sagt hvort þau séu tilbúin til að semja um þetta nýja bónuskerfi.   Þeir þættir sem samningsaðilar eru sammála um að nota til vigtunar á nýju bónuskerfi er öryggis- og þrifabónus og nýtingarbónus.  Hið nýja bónuskerfi yrði því byggt upp á þessum tveimur stoðum.

Verkalýðsfélag Akraness og Svæðisvinnumiðlun Vesturlands hafa hug á að hefja samstarf er lýtur að námskeiðshaldi fyrir atvinnulausa og félagsmenn VLFA.  Verkalýðsfélag Akraness stendur fyrir fiskvinnslunámskeiði í janúar og hefur nú þegar boðið Svæðisvinnumiðlun Vesturlands að kanna hvort einhverjir sem nú eru atvinnulausir hafi áhuga að fara á slíkt námskeið.  Það liggur fyrir að um 25 starfsmenn HB Granda og um 17 starfsmenn hjá Laugafiski ætla að fara á fiskvinnslunámskeiðið í janúar.

Fundað var um nýtt bónuskerfi fyrir starfsmenn Íslenska járnblendifélagsins í dag.  Forsvarsmenn Íj kynntu fyrir formönnum félaganna og trúnaðarmönnum Íj hugmyndir sínar að nýju bónuskerfi.  Eru hugmyndir forsvarsmanna Íj að nýju bónuskerfi nú  til skoðunar hjá samninganefnd Íj.  Hvað varðar önnur kjaraatriði, þá er það orðið nokkuð ljóst að mikið ber á milli deiluaðila í þeim efnum.

Fundur var haldinn í kvöld með starfsmönnum sem starfa í ræstingu og býtibúri á Sjúkrahúsi Akraness.  Til umræðu á fundinum var sú ákvörðun stjórnenda SHA að segja upp núverandi vinnufyrirkomulagi sem starfsmenn telja að leiði af sér aukið vinnuálag sem og skerðingu á launakjörum einstakra starfsmanna.  Afar þungt hljóð var í starfsmönnum vegna þessara ákvörðunar forsvarsmanna SHA. 

Formaður félagsins ásamt trúnaðarmönnum SHA munu funda með starfsmönnum sem starfa í ræstingu og býtibúri, vegna ákvörðunar stjórnenda SHA að segja núverandi vinnufyrirkomulagi upp en mikil óánægja ríkir meðal starfsmanna með þá ákvörðun.  Það liggur orðið nokkuð ljóst fyrir að laun einhverra munu skerðast þegar farið verður að vinna eftir nýja fyrirkomulaginu.  Breytingin tekur gildi 1. janúar 2005. 

Verkalýðsfélag Akraness skilur gremju starfsmanna mjög vel.  Það er óþolandi með öllu að þegar nýbúið er að undirrita nýjan kjarasamning  við starfsmenn þá er farið í breytingar á vinnufyrirkomulagi sem hefur í för með sér töluverða skerðingu á launum starfsmanna.  Eins er það orðið óþolandi að þegar kemur að hagræðingu hjá fyrirtækjum þá er ræsting eða starfsmenn í mötuneytum það fyrsta sem menn virðast sjá möguleika í að hagræða í.  Þessa hluti verður verkalýðshreyfingin í heild sinni að taka föstum tökum.

Samningafundur verður haldinn  mánudaginn 6. desember kl. 14:00.  Til umræðu verður aðeins eitt mál þ.e bónusmál starfsmanna.  Samningsaðilar eru að verða búnir að komast að samkomulagi hvaða atriði skulu notuð til viðmiðunar á nýjum bónus.   

Fundað var um nýjan kjarasamning við Norðurál í morgun.  Ákveðið var að samningsaðilar myndu fara í þá vinnu að klára þau kröfuatriði  sem ekki hafa neinn kostnaðarauka í för með sér fyrir fyrirtækið.  Ætla samningsaðilar að ljúka þeirri vinnu í desember.  Í janúar ætla samningsaðilar að fara í launaliðina og önnur kjaraatriði.  Verkalýðsfélagi Akraness og allri samningsnefndinni hefur borist áskorun frá vaktavinnumönnum, þar sem skorað er á samninganefndina að tryggja að fimmti vakthópurinn komi inn og að laun og önnur kjaraatriði verði jöfnuð við ÍSAL. 

Eins var ákveðið á fundinum að formaður VLFA og formaður FIT myndu fara í þá vinnu ásamt lögmönnum félaganna og fyrirtækisins að finna lausn á gildissviði samningsins.