Ríkissáttasemjari hefur boðað til fundar þriðjudaginn 25. janúar vegna kjaradeilu stéttarfélaganna við Íslenska járnblendifélagið.  Samninganefnd stéttarfélaganna og trúnaðarmanna munu funda mánudaginn 24. janúar til að fara yfir þá atburði sem gerst hafa á síðustu samningafundum.  Ekki er annað hægt en að hafa verulegar áhyggjur af því hversu hægt viðræðurnar ganga, samningsaðilar hafa verið að funda meira og minna í rúma þrjá mánuði, án þess að klára þau fáu atriði sem eftir eru.  Samningsaðilar verða  að gera heiðarlega tilraun  þriðjudaginn 25. janúar til að klára þessa kjaradeilu.  Hvað áhrærir Verkalýðsfélag Akraness þá er farið að reyna verulega á þolinmæðina hversu erfiðlega gengur að leggja lokahönd á nýjan kjarasamning.

Samningsaðilum verður að takast að leysa þessa kjaradeilu farsællega og það sem allra fyrst.   

Aðalfundir deilda Verkalýðsfélags Akraness verða haldnir eftirfarandi daga:

Stóriðjudeild    -   Mánud. 24. jan. að Kirkjubraut 40, 3. hæð.

Iðnsveinadeild -   Þriðjud. 25. jan. að Sunnubraut 13.

Matvæladeild   -   Miðvikud. 26. jan. að Sunnubraut 13.

Opinber deild   -   Fimmtud. 27. jan. að Kirkjubraut 40, 3. hæð.

Almenn deild   -    Mánud. 31. jan. að Sunnubraut 13.

Allir fundirnir hefjast kl. 20:00.  Félagsmenn eru eindregið hvattir til að mæta.

Dagskrá aðalfundanna er eftirfarandi:

1.   Venjuleg aðalfundarstörf.

2.   Önnur mál.

Hún ætlar að verða erfið fæðingin að nýjum kjarasamningi við Íslenska járnblendifélagið.  Deiluaðilar hófu viðræður í dag kl. 15:00 og lauk fundinum kl. 20:15 án þess að samningsaðilar hafi nálgast hvorn annan.  Samningsaðilar eru enn með nokkur atriði sem gengur erfiðlega að ganga frá.  Reiknað er með að næsti fundur verði á fimmtudaginn, en það mun væntanlega skýrast betur á morgun. 

Fundað verður á morgun  með forsvarsmönnum Íslenska járnblendifélagsins vegna kjaradeilu stéttarfélaganna við Íj.  Ljóst er að samningsaðilar eru að nálgast endalínuna óðfluga.  Samt sem áður eru örfá atriði sem þarf að ganga frá áður en samningsaðilar skrifa undir nýjan kjarasamning.  Eins er það mjög mikilvægt fyrir formann félagsins að vita frá starfsmönnum Íj hversu langt hans umboð nær í þeim atriðum sem eftir eru.   Eftir því umboði mun formaður félagsins klárlega vinna eftir.

Bæjarstjórinn á Akranesi hefur boðað Verkalýðsfélag Akraness forsvarsmenn Norðuráls og Íslenska járnblendifélagsins til spjallfundar þriðjudaginn 18. janúar.  Tilefni fundarins er að kanna hvort ekki sé hægt að auka samstarf þessara aðila enn meira heldur en nú er.  Verkalýðsfélag Akraness er afar ánægt með hversu bæjaryfirvöld virðast vera vel meðvituð um nauðsyn þess tryggja að Grundartangasvæðið verði áfram besti valkostur varðandi ýmis konar iðnaðarstarfssemi.  Verkalýðsfélag Akraness telur að sveitarfélagið og stóriðjufyrirtækin eigi að hefja aukið samstarf á hinum ýmsu sviðum.

Samninganefnd Íslenska járnblendifélagsins mun funda mánudaginn 17. janúar.  Tilefni fundarins er fara yfir stöðuna.  Það liggur  fyrir að forsvarsmenn Íslenska járnblendifélagins munu leggja fram tilboð að nýjum kjarasamningi við stéttarfélögin á samningafundi sem, ríkissáttasemjari hefur nú þegar boðað til og verður þriðjudaginn 18. janúar kl. 15.00

Eftirfarandi frétt er tekin af vef Landsmenntar:

"Stjórn Landsmenntar samþykkti á stjórnarfundi 12. janúar sl. að sjóðurinn myndi f.o.m. 1. janúar 2005 styrkja frístunda-/tómstundanámskeið.

Eftirfarandi regla var samþykkt í þessu sambandi:

“Landsmennt veitir einstaklingsstyrki vegna frístunda-/tómstundanámskeiða og verður endurgreiðsla vegna þeirra 50% af kostnaði en aldrei hærri en kr. 12.000.- á ári og dregst jafnframt af heildarupphæð einstaklingsstyrks”

Hafa ber í huga þrátt fyrir þetta að í sumum tilvikum geta tómstundanámskeið talist starfstengd eins og t.d. þá eru ýmis handavinnunámskeið starfstengd fyrir þá félagsmenn sem starfa á Dvalarheimilum aldraðra og sinna þar leiðbeiningum í handavinnu. Í þeim tilvikum sem frístunda-/tómstundanámskeið geta talist starfstengd þá er styrkur afgreiddur skv. almennu reglunni þ.e. 75% af kostnaði þó aldrei hærra en kr. 35.000.-"

Skrifstofa Verkalýðsfélags Akraness sér um afgreiðslu styrkja úr Landsmennt til sinna félagsmanna.

Verkalýðsfélögin ásamt trúnaðarmönnum VLFA sem eiga aðild að kjarasamningi Íslenska járnblendifélagsins funduðu í dag.  Tilgangur fundarins var að fara yfir stöðuna í kjaradeilunni við Íj. Einnig til að stéttarfélögin og trúnaðarmenn samstilltu sig á loka sprettinum í þessum kjaraviðræðum.  Næsti fundur í hjá ríkissáttasemjara verður í byrjun næstu viku.

Formaður og lögmaður félagsins funduðu í dag með ríkissáttasemjara og síðan með framkvæmdastjóra og formanni Starfsgreinasambandsins vegna þeirra atburða sem áttu sér stað, þegar átti að gera tilraun til að leggja lokahönd á nýjan kjarasamning við Íslenska járnblendifélagið.  Ekki verður farið efnislega yfir  þá atburði á þessari stundu, en Verkalýðsfélagi Akraness var verulega misboðið sem þar gerðist.  Ræddu aðilar  þessa atburðarás sem átti sér stað í húsakynnum ríkissáttasemjara, og var formaður félagsins beðinn afsökunar á vissum mistökum sem áttu sér stað í þessu máli, og er það vel.  

Ekki var gengið frá nýjum kjarasamningi við forsvarsmenn Íj í dag eins og væntingar Verkalýðsfélags Akraness voru um.  Formaður félagsins mun funda með lögmanni félagsins í fyrramálið.  Tilefni fundarins er að fara yfir þá  undarlegu stöðu sem upp er komin í þessum kjaraviðræðum.  Ríkissáttasemjari hefur ekki ákveðið hvenær næsti fundur verður haldinn.