Formaður félagsins var í viðtali á Bylgjunni í þættinum Í bítið á fimmtudag var.  Til umræðu í viðtalinu var t.d komandi kjarasamningar og hvað Verkalýðsfélag Akraness telji að eigi að vera forgangskrafa í komandi kjarasamningum.

Formaður fór víða í þessu viðtali og koma m.a. fram hjá honum að það sé algert lykilatriði í næstu samningum að lagfæra lágmarkslaunin.  Krafan þarf að vera sú að lágmarkstaxtar verði hækkaðir upp að þeim markaðslaunum sem almennt er verið að greiða á íslenskum vinnumarkaði.

Það kom einnig fram hjá formanninum að það sé til skammar fyrir verkalýðshreyfinguna að bjóða uppá lágmarkslaun sem duga alls ekki fyrir lágmarksframfærslu.

Hér á heimasíðunni hefur áður verið fjallað um að nú sé komið að öðrum en íslensku verkafólki að viðhalda hér stöðugleika.

Nægir að nefna í því sambandi að lágmarkslaun verkafólks hafa  hækkað frá árinu 1997 til 2007 einungis um 105% á meðan þingfarakaupið hefur hækkað um 145% á sama tímabili, sem er 40% meiri hækkun.

Pétur Blöndal þingmaður sjálfstæðismanna og Atli Gíslason þingmaður Vinstri Græna voru í þessum sama þætti á fimmtudaginn var og Pétur Blöndal var m.a. spurður um þá kröfu að hækka lágmarkslaun úr 125.000 í 176.000 eins og formaður VLFA hefur lagt til.

Pétur Blöndal svaraði því til að búið væri að hækka lágmarkslaunin í tvígang og þær hækkanir hefðu verið hlutfallslega meiri en aðrir hópar hafi fengið.  Það er með ólíkindum að heyra þingmanninn tala með þessum hætti.  Sérstaklega í ljósi þeirra staðreynda að laun þingmanna hafa hækkað um 40% meira en lágmarkslaun verkafólks á síðustu 10 árum.

Ef verkafólk hefði fengið sömu prósentuhækkun og þingmenn á síðustu 10 árum þá væru lágmarkslaunin ekki 125.000 heldur 149.000 í dag.  Síðan er rétt að nefna óréttlætið sem fólgið er í lífeyrisréttindum þingmanna samanborið við verkafólk á hinum almenna vinnumarkaði og verður þeirri mismunun ekki með tárum tekið.

Pétur Blöndal nefndi einnig að ef lágmarkslaunin myndu fá umtalsverða hækkun í næstu samningum þá myndi það ganga upp allan launastigann og það gengi alls ekki að mati Péturs.  Pétri Blöndal finnst það allt í lagi að hann og aðrir þingmenn fái 40% meiri kauphækkanir en þeir sem vinna á lágmarkslaunum og virðist ekki gera athugasemdir við að laun seðlabankastjóra eigi að hækka um 200.000 þúsund á mánuði.

Það virðist vera að þingmaðurinn vilji alls ekki taka þátt í því með verkalýðshreyfingunni að eyða þessum skammarlegu lágmarkslaunum sem ekki duga fyrir lágmarksframfærslu og er það með ólíkindum, svo ekki sé fastar að orði kveðið. 

Hægt að hlusta á viðtalið við Pétur Blöndal og formann félagsins með því að smella  hér

Aðalsteinn Á. Baldursson og Vilhjálmur Birgisson formenn Verkalýðsfélags Húsavíkur og nágrennis og Verkalýðsfélags Akraness fengu sérstakt hrós í DV í gær fyrir störf þeirra í þágu verkafólks.

Þar segir m.a. þessir verkalýðsforkólfar sækja í gamla hefð og fara ekki sparlega með orðaforðann þegar kemur að kjarabaráttu fyrir umbjóðendur sína.

Formaður félagsins fór í vinnustaðaheimsókn til starfsmanna Spalar sem starfa í gjaldskýlinu við Hvalfjarðagöng.  En sérkjarasamningur starfsmanna rennur út nú um áramótin.

Undirbúningur að kröfugerð fyrir komandi sérkjarasamning starfsmanna  mun væntanlega hefjast von bráðar.

Það er alveg óhætt að segja að það geti verið afar krefjandi að vera starfsmaður í gjaldskýli Spalar við Hvalfjarðagöng, enda hefur umferð um göngin stóraukist ár frá ári.  Sem dæmi er það alþekkt að starfsmenn skýlisins ná vart að standa upp alla vaktina  þegar umferðin er hvað mest að sumarlagi.

Starfsmenn gjaldskýlisins sjá ekki eingöngu um að innheimta veggjald af vegfarendum heldur gegna þeir afar stóru hlutverki hvað varðar að tryggja öryggi þeirra vegfarenda sem um göngin aka.

Fyrstu viðbrögð starfsmanna í gjaldskýlinu geta skipt sköpum þegar slys eða önnur óhöpp verða í göngunum, það hefur reynslan sýnt oftar en einu sinni á þeim 9 árum sem göngin hafa verið starfrækt.

Sem dæmi þá má nefna að það getur verið gríðarlega mikilvægt að starfsmenn gjaldskýlisins séu snöggir að loka göngunum þegar slys verður, til að forða en frekari slysum.

Það er einnig óhætt að fullyrða að í gjaldskýli Spalar við Hvalfjarðagöng starfar úrvals fólk sem hefur ávalt hagsmuni og öryggi vegfarenda að leiðarljósi. Því miður kemur það þó fyrir að starfsmenn fá að heyra ljót fúkyrði frá reiðum vegfarendum sem láta gjaldtökuna bita á starfsmönnum.  Slík framkoma er til vansa, enda eru starfsmenn gjaldskýlisins eingöngu að sinna sínu starfi.

Vinnsla hófst aftur í morgun eftir sumarhlé í frystihúsi HB Granda.  Eins og undanfarin ár var frystihúsinu lokað frá 2. júlí til 23. júlí.

Formaður fór í morgun og tók púlsinn á nokkrum starfsmönnum sem voru að hefja störf eftir sumarleyfi.  Fram kom í máli starfsmanna að vinnslan væri ekki komin á fulla ferð enda væru þó nokkrir starfsmenn ennþá í sumarfríi og ugglaust yrði frekar rólegt fram yfir verslunarmannahelgi.

Í dag fara um 15 tonn í gegnum frystihúsið en þegar vinnslan verður komin á fullt skrið þá fara rúm 20 tonn á góðum degi.

Þorskur hefur verið uppstaðan í vinnslunni hér á Akranesi á undanförnum árum og því mun niðurskurður á aflaheimildum uppá 30%  væntanlega koma nokkuð hart niður á vinnslunni hér á Akranesi.

Samkvæmt upplýsingum sem formaður hefur aflað sér þá hafa forsvarsmenn HB Granda ekki ákveðið hvernig niðurskurði uppá 30% verður mætt.  En eðlilega mun allstaðar koma til einhvers samdráttar og sér í lagi þar sem vinnsla byggist að stórum hluta á þorski.

Nú er bara að vona að þessi niðurskurður komi eins mildilega niður á sjómönnum og fiskvinnslufólki og kostur er, þótt vissulega megi gera ráð fyrir umtalsverðum tekjumissi sökum þessa aflasamdráttar.

Tvö kolmunnaskip lönduðu hér á Akranesi í gær.  Þetta voru skipin Áskell frá Grenivík sem landaði um 700 tonnum og Lundey NS sem var með fullfermi eða nálagt 1.500 tonnum.

Formaður fór og hitti starfsmenn síldarbræðslunnar í morgun og voru þeir bara nokkuð kátir og töldu að búið yrði að bræða þennan afla á sunnudaginn kemur.  Þessi afli veiddist fyrir vestan land og því var styst að landa kolmunnanum hér á Akranesi.  Síðast var brætt í byrjun maí hér á Akranesi og því var þessi kolmunnaafli kærkominn fyrir starfsmenn bræðslunnar en stór hluti af tekjum starfsmanna koma þegar vaktir eru staðnar í verksmiðjunni.

Ingunn AK hélt til kolmunnaveiða í gær eftir að hafa verið í vélaviðgerð í um tvær vikur að sögn starfsmanna bræðslunnar og því verða í það minnsta þrjú kolmunnaskip á miðunum vestur af landi.

Eins og fram hefur komið í fréttum þá hafa um 20 umhverfisverndarsinnar frá aðgerðarsamtökunum Saving Iceland hlekkjað sig saman og lokað veginum sem liggur upp að álveri Norðuráls á Grundartanga.

Formaður félagsins var staddur á Grundartangasvæðinu í dag og sá hvar umhverfisverndarsinnar höfðu hlekkjað sig saman og með því náð að loka veginum sem liggur upp að álverinu.  Hins vegar var lögreglan búin að opna hjáleið í gegnum vinnusvæði Íslenska járnblendifélagsins þannig að starfsmenn Norðuráls náðu bæði að komast til vinnu og eins frá vinnu.

Sigurður Harðarson, einn mótmælendanna, sagði, í samtali við mbl.is, mótmælin vera friðsöm og að verið væri að vekja athygli á náttúruspjöllum og þeirri mengun sem komi frá verksmiðju Íslenska járnblendifélagsins og álverinu.

Formaður spyr sig: hvernig geta það verið friðsamleg mótmæli að loka vegi með því hlekkja sig saman með það eitt að markmiði að starfsmenn Norðuráls komist ekki til og frá vinnu.  Það liggur fyrir að starfsmenn Norðuráls vinna langan og strangan vinnudag þannig að ef ekki hefði verið hægt að opna áðurnefnda hjáleið þá hefði öryggi starfsmanna hugsanlega verið ógnað.  Slík mótmæli eru með öllu ólíðandi og ber yfirvöldum að taka hart á slíkum mótmælum.

Formaður veltir öðru atriði fyrir sér: hvað með löggæslu í Borgarfirði á meðan slík ólögleg mótmæli eiga sér stað?  Formaður VLFA gat ekki séð annað en að töluverður hluti lögreglumanna frá Borgarnesi hafi verið á vettvangi í dag, eðlilega.  Hvað ef alvarlegt slys hefði orðið t.d. uppá Holtavörðuheiði og stór hluti lögreglunnar í Borgarnesi að sinna ólöglegum mótmælaaðgerðum.  Það eru ekki nema nokkrir dagar síðan mjög alvarlegt banaslys varð hér í nágrenninu og í því slysi þurfti að sameina löggæslu frá Akranesi og Borgarnesi.

Á þeirri forsendu er algerlega ólíðandi að ólögleg mótmæli af þessu tagi ógni öryggi íslenskra þegna vegna þess að lögreglan sé upptekin af því að kljást við umhverfissinna af þessu tagi. 

Það eru grundvallar mannréttindi að mega mótmæla, um það er ekki deilt. Hins vegar verða allir mótmælendur að fara eftir þeim lögum og reglum sem gilda hér á landi og mega ekki undir neinum kringumstæðum ógna öryggi annarra.  Þess vegna ber yfirvöldum að taka hart á þeim mótmælendum sem ekki virða lög og reglur hér á landi. 

Það er óhætt að segja að töluvert annríki verði í starfsemi félagsins þegar líður á haustið en um áramótin eru þónokkrir kjarasamningar lausir.

Þeir kjarasamningar sem verða lausir nú um áramótin eru t.d. kjarasamningurinn á hinum almenna vinnumarkaði, sérkjarasamningur starfsmanna sem starfa í gjaldskýlinu við Hvalfjarðagöng og einnig sérkjarasamningur starfsmanna síldarbræðslu HB Granda hér á Akranesi.

það er alveg ljóst að þónokkur eftirvænting er hjá verkafólki á hinum almenna vinnumarkaði vegna komandi kjarasamninga.  Eftirvæntingin hjá verkafólki byggist á því að laun þeirra sem lægstu hafa tekjurnar verði í eitt skipti fyrir öll leiðrétt í næstu samningum.

Við í verkalýðshreyfingunni verðum að standa þétt saman í komandi kjarasamningum og lyfta lágmarkslaunum úr 125.000 í átt að þeim markaslaunum sem almennt er nú verið að greiða.  Samkvæmt könnum sem SGS lét gera í september 2006 eru meðal dagvinnulaun í kringum 176.000.

Til að það náist þarf eins og áður sagði víðtæka samstöðu innan verkalýðshreyfingarinnar og ekki mun standa á Verkalýðsfélagi Akraness í þeim efnum, svo mikið er víst. 

Við sem erum í forystu stéttarfélaga getum ekki lengur horft uppá þá lágmarkstaxta sem nú eru í gildi, launataxtar sem ekki duga fyrir lágmarksframfærslu og eru verkalýðhreyfingunni til skammar.  Þess vegna segir formaður VLFA, nú er komið að því að verkafólk á hinum almenna vinnumarkaði fái leiðréttingu á sínum lúsarlaunum.  Formaður VLFA vill að það komi skýrt fram að hann undirritaði ekki síðustu kjarasamninga sem gerðir voru 7. mars 2004 á þeirri forsendu hversu rýrir þeir voru. 

Ef verkalýðshreyfingin ætlar að lagfæra launakjör þeirra sem verst eru settir á hinum almenna vinnumarkaði þá verður hún að standa saman, öðruvísi verður það aldrei hægt.

Karlmaður á fertugsaldri lést er hann lenti í árekstri á mótorhjóli sínu við strætisvagn um kl. 19 í gærkvöldi. Hann var á leið til vinnu í Norðuráli ásamt tveimur samstarfsfélögum sínum.  Hinn látni var félagsmaður í Verkalýðsfélagi Akraness. 

Slysið varð á Akrafjallsvegi við gatnamót Innnesvegar og Akrafjallsvegar. Bifhjólinu var ekið austur Akrafjallsveg og strætisvagninum í vestur með fyrirhugaða akstursstefnu suður Innnesveg, samkvæmt upplýsingum frá lögreglu.

Bifhjólið lenti framan á strætisvagninum og hafnaði ökumaður þess utan vegar. Talið er að hann hafi látist samstundis. Hinn látni var á leið til vinnu eins og áður sagði ásamt tveimur félögum sínum og missti annar þeirra stjórn á hjóli sínu við slysið og féll í götuna. Hann meiddist þó ekki.

Tildrög slyssins voru ekki ljós seint í gærkvöldi en ekkert á vettvangi bendir til hraðakstur.

Formaður félagsins er ánægður með hvernig forsvarsmenn Norðuráls hafa brugðist við þessu skelfilega slysi.  Þeir kölluðu strax út áfallateymi frá sjúkrahúsi Akraness til að ræða við samstarfsfók hins látna.

Vinnuveitendur hins látna og formaður félagsins hafa verið í sambandi í gær og í dag vegna þessa skelfilega slys enda voru þetta allt félagsmenn Verkalýðsfélags Akraness sem komu að þessu hörmulega slysi. 

Stjórn Verkalýðsfélags Akraness vill votta eiginkonu hins látna, börnum hans, ættingum sem og samstarfsfólki hans, okkar dýpstu samúð.

Á föstudaginn átti formaður fund með Ragnari Guðmundssyni framkvæmdastjóra Norðuráls og Skúla Skúlasyni starfsmannastjóra. 

Eins og fram hefur komið hér á heimasíðunni þá hefur formaður félagsins átt í viðræðum við forsvarsmenn Norðuráls að undanförnu.  Viðræðurnar eru vegna nokkurra atriða sem tengjast hagsmunum þeirra félagsmanna VLFA sem starfa hjá Norðuráli.

Unnið er að lausn á þessum ágreiningi en á þessari stundu er alls óvíst hvort það takist eða ekki.

Eins og formaður hefur sagt áður þá er gríðarlega mikilvægt að gæta vel að hagsmunum starfsmanna Norðuráls í ljósi þess að Norðurál er orðin langstærsti vinnustaðurinn á Vesturlandi.  Í dag eru um 430 starfsmenn að störfum í Norðuráli og eru 360 þeirra félagsmenn í Verkalýðsfélagi Akraness.

Formaður félagsins átti fund með forsvarsmönnum Íslenska járnblendifélagsins.  Tilefni fundarins voru hin ýmsu hagsmunamál er lúta að þeim félagsmönnum VLFA sem starfa hjá IJ.

Nú starfa um 110 félagsmenn Verkalýðsfélags Akraness hjá Íslenska járnblendinu.  Það er hlutverk félagsins að gæta að réttindum sinna félagsmanna í hvívetna og var þessi fundur einn liður í þeirri vinnu.

Fram kom á fundinum að undirbúningur að nýrri framleiðslu sem nefnist FSM er nú í fullum gangi og er fyrirhugað að framleiðslan hefjist í febrúar á næsta ári.

Ljóst er að mun meiri stöðuleiki mun koma í rekstur Íslenska járnblendifélagsins þegar framleiðslan á FSM byrjar en rekstur ÍJ hefur ætið verið nokkuð sveiflukenndur.

Vegna þessarar nýju sérframleiðslu þarf að fjölga starfsmönnum um 35 og er nú þegar búið að ráða 25 starfsmenn.  Eftir á að ráða 10 nýja starfsmenn og er fyrirhugað að því verði lokið í byrjun ágúst að sögn mannauðsstjóra Íslenska járnblendifélagsins.