Eins og fram hefur komið hér á heimasíðunni þá hefur Arion banki yfirtekið rekstur þrotabús Smellinns og um leið tryggt áframhaldandi rekstur þess. Af 20 starfsmönnum sem störfuðu hjá Smellinn voru 15 endurráðnir og er félagið núna að hefja vinnu við að undirbúa kröfur á þrotabúið því ljóst er að sumir starfsmenn muni eiga útistandandi launakröfur á þrotabúið. Lögmaður félagsins mun aðstoða það við að útbúa þessar kröfur.

Einnig liggur fyrir að sumir starfsmenn hafa lækkað í launum og þar af leiðandi þarf að gera kröfur á þrotabúið varðandi þann mismun sem fólginn er í lækkun launa og þeim uppsagnarfresti sem starfsmenn eiga. Formaður mun vera í sambandi við starfsmenn eftir helgi varðandi gögn sem félagið þarf að fá til að geta reiknað út nákvæmar kröfur til handa starfsmönnum.

Í gær var haldinn formannafundur hjá Alþýðusambandi Íslands en dagskrá fundarins byggðist á eftirfarandi málefnum: Efnahagsmál og komandi kjarasamningar, skipulagsmál ASÍ og stefnumótun ASÍ í lífeyrismálum. Formaður tók til máls undir liðnum efnahags- og kjaramál og einnig varðandi stefnumörkun í lífeyrissjóðsmálum.

Formaður félagsins gagnrýndi harðlega þann stöðugleikasáttmála sem undirritaður var í júní á síðasta ári sem varð þess valdandi að verkafólk þurfti að afsala sér vel á annað hundruð þúsund króna vegna þessa gjörnings og kom fram í máli formanns VLFA að hann vonaðist til að svona stórfelld mistök yrðu aldrei gerð aftur af hálfu verkalýðshreyfingarinnar. Eins og margoft hefur komið fram var Verklýðsfélag Akraness alfarið á móti því að fresta þeim umsömdu launahækkunum samkvæmt kjarasamningi sem gerður var 17. febrúar 2008. Það kom einnig fram í máli hans að hann myndi ekki taka þátt í því að gera slíkan sáttmála aftur því það hefði ekki nema eitt gengið eftir í þessum sáttmála en það voru áðurnefndar frestanir á launahækkunum verkafólks.

Formaður gagnrýndi einnig ríkisstjórnina harðlega fyrir aðgerðaleysi og einnig fyrir það að hafa tekið ákvörðun um að standa ekki við samkomulag er lýtur að hækkun persónuafsláttar sem gert var árið 2006 og 2008 við ríkisstjórn Íslands. Það er með ólíkindum að það skuli vera ríkisstjórn sem kennir sig við félagshyggju, jöfnuð og velferð sem ógildir það samkomulag sem gert var um verðtryggingu persónuafsláttar. En verðtrygging persónuafsláttar hefur verið helsta baráttumál verklýðshreyfingarinnar í áratugi. Það kom einnig fram í máli formanns að það beri að sækja kröftuglega fram í komandi kjarasamningum á þau fyrirtæki sem vel eru stæð og á það sérstaklega við fyrirtæki sem eru í útflutningi. En þetta eru fyrirtæki sem klárlega geta komið með veglegar launahækkanir til handa sínu starfsfólki.

Einnig tók formaður til máls undir liðnum stefnumörkun ASÍ í lífeyrismálum gagnvart Samtökum atvinnulífsins. Það kom fram í máli formanns að það sé með ólíkindum að okkar félagsmenn, sem eru að vinna hjá hinu opinbera, skuli ekki njóta sömu lífeyrisréttinda og starfsmenn sem eru í opinberum stéttarfélögum. Ef þetta verður ekki lagfært í komandi kjarasamningum eiga aðildarfélög ASÍ að mati formanns að taka sig saman og neita að gera samning við ríki og sveitarfélög en við slíkt myndi það gerast að þessir félagsmenn myndu ganga í opinberu félögin og fá þá sjálfkrafa mun betri lífeyrisréttindi en þeir hafa hjá stéttarfélögum innan ASÍ. Allavega mun Verkalýðsfélag Akraness beita sér af fullum þunga fyrir jöfnun þessara lífeyrisréttinda í komandi kjarasamningum því þessi mismunun á milli félagsaðildar á lífeyrisréttindum stenst enga skoðun.

Formaður undraðist á þessum fundi að allir sem tóku til máls voru sammála því að halda óbreyttu kerfi við stjórnarval í lífeyrissjóði. Með öðrum orðum, verkalýðshreyfingin vill að atvinnurekendur eigi 50% á móti verkalýðshreyfingunni en eins og margir muna þá hefur Verkalýðsfélag Akraness eitt stéttarfélaga hér á landi barist fyrir því að tekið verði upp sjóðsfélagalýðræði við val á stjórnarmönnum. Félagið hefur barist fyrir því að það verði sjóðsfélagarnir sem kjósi alla stjórnarmenn beinni kosningu en ekki sé fyrirfram gefið að verkalýðshreyfingin eigi helming stjórnarmanna og atvinnurekendur hinn helminginn. Verkalýðsfélag Akraness lét gera könnun hjá Capacent Gallup þar sem fram kom í 1200 manna úrtaki að 72% vildu þetta svokallaða sjóðsfélagalýðræði. En á fundinum í gær kom fram að menn könnuðust ekki við að það væri einhver óánægja með það fyrirkomulag sem núna ríkir.

Á þeirri forsendu lagði formaður Verkalýðsfélags Akraness fram tillögu á fundinum í gær fyrir forseta ASÍ um að gerð yrði allsherjar skoðanakönnun á meðal sjóðsfélaga innan ASÍ um hvort þeir vildu taka upp svokallað sjóðsfélagalýðræði. Sjóðsfélagalýðræði sem fólgið væri í því að sjóðsfélagar kysu alla stjórnarmenn beinni kosningu. Það var nöturlegt að verða vitni að því að þessari tillögu hafnaði forseti ASÍ á þeirri forsendu að þá væri verið að taka valdið af stjórnum og trúnaðarráðum stéttarfélaganna.

Nei, mat formanns VLFA er einfalt: Einstaka forystumenn í verkalýðshreyfingunni eru ugglaust að verja sinn eigin hag með því að vilja ekki breyta því fyrirkomulagi sem nú er við lýði enda eru umtalsverðir hagsmunir fyrir þá sem sitja í stjórnum lífeyrissjóða. Það blasir við ef marka má skoðanakönnun Capacent Gallup sem félagið lét gera og það sem heyrist víða í samfélaginu að hinn almenni félagsmaður og sjóðsfélagi í verkalýðshreyfingunni vill breytingu á þessu kerfi. En verkalýðshreyfingin undir forystu ASÍ vill halda í þetta óbreytta kerfi og virða kröfu sjóðsfélaga um aukið lýðræði að vettugi og er ekki einu sinni tilbúið til að láta kanna það í allsherjar skoðanakönnun hver vilji sjóðsfélaga og félagsmanna er í þessu viðkvæma máli.

Áframhaldandi starfsemi einingaverksmiðju Smellinn á Akranesi hefur nú verið tryggð með yfirtöku Arion banka á rekstri verksmiðjunnar.

Fyrir helgi var öllum starfsmönnum var sagt upp störfum, um 20 talsins. Nú hafa 15 starfsmenn verið endurráðnir, þannig að 5 manns misstu vinnuna við yfirtökuna. Samkvæmt þeim upplýsingum sem félagið hefur aflað sér þá hafa þeir 15 sem eftir eru þurft að taka á sig einhvers konar launaskerðingu.

Félagið á eftir að yfirfara þá ráðningasamninga sem starfsmenn hafa gert við hinn nýja eiganda.

Á fundi sjávarútvegs- og landbúnaðarnefndar Alþingis í dag var ákveðið að taka hvalafrumvarpið, sem verið hefur mikið í umræðunni að undanförnu út af málaskrá vorþings, en þessi í stað endurflytja það á Alþingi næst haust. 

Ástæður sem nefndin tilgreinir vegna þessarar ákvörðunar eru tvær. Að umrætt hvalafrumvarp sé ekki forgangsmál ríkisstjórnarinnar og óheppilegt sé að skipta um veiðileyfi á miðri vertíð.

Atli Gíslason alþingismaður og formaður nefndarinnar tilgreindi á fundi nefndarinnar í dag að hann væri andvígur breytingum á fyrirkomulagi veiðileyfa á miðri vertíð eins og stefndi í ef frumvarpið hefði verið samþykkt nú á vorþinginu. 

Kristjáni Loftssyni framkvæmdastjóra Hvals hf. mun hafa verið tilkynnt um þessa ákvörðun sjávarútvegs- og landbúnaðarnefndar. Kristján hafði látið að því liggja að ef umrætt frumvarp yrði samþykkt á vorþinginu myndi hann ekki senda skipin til hvalveiða í vor. 

Samkvæmt þessu ætti frumvarpið sem slíkt ekki að verða fyrirstaða þess að hvalvertíð geti hafist innan tíðar, veiðarnar munu skapa um 150 störf þegar þær verða komnar á fulla ferð.

Alþýðusamband Íslands hefur boðað til formannafundar nk. þriðjudag. Dagskrá fundarins er aðallega um skipulagsmál ASÍ og stefnumál þess í lífeyrismálum gagnvart Samtökum atvinnulífsins. Það var haldinn fundur um stefnumótun ASÍ í málefnum lífeyrissjóðanna í febrúar og var sá fundur einmitt hugsaður til þess að móta stefnu ASÍ í samningnum við Samtök atvinnulífsins um lífeyrissjóðsmál.

Það kom fram hjá fjölmörgum fundarmanna á þessum stefnumótunarfundi í febrúar að vilji væri til að auka lýðræðið við stjórnarkjör í lífeyrissjóðum en eins og flestir muna þá hefur Verkalýðsfélag Akraness barist fyrir því að tekið verði upp sjóðsfélagalýðræði þar sem stjórnarmenn verði allir kosnir beinni kosningu af sjóðsfélögunum sjálfum. En núverandi fyrirkomulag er með þeim hætti að Samtök atvinnulífsnis fara með helming stjórnarsæta á móti verkalýðshreyfingunni. Nú hefur ASÍ lagt fram stefnumótunardrög og í þeim drögum kemur fram að ekki eigi að breyta neinu hvað varðar helmingaskipti Samtaka atvinnulífsins og verkalýðshreyfingarinnar.

Það er að mati formanns VLFA með ólíkindum að ekki skuli vera hlustað á hinn almenna félagsmann og sjóðsfélaga þar sem krafan hefur verið að sjóðsfélagarnir sjálfir fari með stjórn sjóðanna og hætt verði með helmingaskiptin eins og þau eru í dag. Verkalýðsfélag Akraness lét Capacent Gallup gera könnun varðandi þetta mál og í niðurstöðum hennar kom fram að yfir 72% vildu að sjóðsfélagarnir kysu alla stjórnarmennina beinni kosningu.

Verkalýðsfélag Akraness mun halda áfram að berjast fyrir þessu máli enda er það vilji sjóðsfélaga að lýðræðið í lífeyrissjóðunum verði stóraukið og það er dapurlegt til þess að vita að ASÍ skuli ætla að hunsa vilja sjóðsfélaga hvað það varðar. Verkalýðsfélag Akraness vill líka beita sér af fullum þunga fyrir því að lífeyrisréttindi á hinum almenna vinnumarkaði verði jöfnuð við lífeyrisréttindi opinberra starfsmanna. Það er algjörlega óásættanlegt að starfsmenn sem starfa hlið við hlið hafi mismunandi lífeyrisréttindi eftir því hvort þeir eru í opinberu félagi eða ASÍ og getur sá munur numið yfir 30%. Á þessu verður að taka. Verkalýðsfélag Akraness vill einnig beita sér fyrir því að lífeyrissjóðum verði fækkað umtalsvert og sér félagið fyrir sér að það verði einn lífeyrissjóður fyrir alla landsmenn. En fyrsta skrefið gæti hinsvegar verið það að lífeyrissjóðum innan Starfsgreinasambands Íslands, sem eru um sjö talsins í dag, verði fækkað niður í einn.

Eins og fram kom í fréttum  í gær þá ákvað Stjórn BM Vallár að leggja fyrir Héraðsdóm Reykjavíkur beiðni um að félagið verði tekið til gjaldþrotaskipta.  BM Vallá á og rekur einingaframleiðslu Smellinn á Akranesi en hjá Smellinn starfa um 20 starfsmenn.

Formaður Verkalýðsfélags Akraness fór og fundaði með starfsmönnum til að upplýsa þá um þau réttindi sem þeir eiga og þá aðstoð sem félagið hefur uppá að bjóða. Félagið hefur haft samband við lögmann félagsins til að tryggja að réttindi starfsmanna verði tryggð í hvívetna.

Nú rétt fyrir hádegi í dag var skipaður skiptastjóri yfir þrotabúinu og er félagið og starfsmenn að bíða eftir að hann tilkynni hvort fyrirhugað sé að halda úti starfsemi í einingaverksmiðjunni áfram.  Það er alveg ljóst að þessi óvissa sem nú ríkir hjá starfsmönnum er eðlilega mjög óþægileg. 

Nú er bara að vona að starfsemin verði endurreist enda um að ræða mjög gott fyrirtæki sem hefur sannað sig rækilega á undarförnum árum. 

Í síðustu viku lauk umfangsmiklum framkvæmdum í orlofshúsi félagsins í Ölfusborgum og er húsið nú klárt til útleigu. Miklar breytingar voru gerðar á innviðum hússins, eldhús og baðherbergi endurnýjað í hólf og gólf, hiti lagður í gólfin, milliveggur í stofunni færður til og svefnherbergjum fækkað úr þremur í tvö rúmgóð herbergi. Að auki var reist glæsileg sólstofa við húsið sem eykur notkunargildi hússins talsvert.

Eftir breytingarnar verður óneitanlega rýmra um dvalargesti sem munu vonandi eiga ánægjulega dvöl í Ölfusborgum.

Gríðarlega mikil aðsókn hefur verið í Veiðikortin sem félagsmenn geta keypt á skrifstofu félagsins. Ákveðið hefur verið að bjóða fleiri kort til sölu og eru þau væntanleg í vikunni. Eins og áður var auglýst er takmarkað magn í boði.

Enn er nóg til af Útilegukortum og Gistimiðum á Edduhótel.

Það er óhætt að segja að grásleppuvertíðin hér á Akranesi í ár sé ein sú besta í manna minnum.  Sem dæmi þá hafa þeir félagar Eiður Ólafsson og Kristófer Jónsson á Ísaki Ak 67 fiskað 29,3 tonn af grásleppuhrognum en þeir luku vertíðinni fyrir fáeinum dögum síðan. Þeir félagar á Keili Ak eru einnig að ljúka sinni vertíð en þeir klára sína 62 daga 16. maí og er afli hjá Keilismönnum einnig í kringum 30 tonn sem er frábært. Rétt er að geta þess að vertíðin hjá hverjum grásleppubát er einungis í 62 daga og að fá tæp 30 tonn á þeim dögum er glæsilegur árangur eins og áður sagði.

Það er ekki bara að veiðin hafi verið góð heldur var verðið á grásleppuhrognum í sögulegu hámarki í ár en um 1000 kr. fengust fyrir kílóið upp úr sjó.  Því má áætla að aflaverðmetið sé um 30 milljónir hjá þeim félögum á Ísaki og hásetahluturinn því nálægt 5,3 milljónum fyrir vertíðina sem stóð í 62 daga.  Það hefur áður komið fram hér á heimasíðunni að hér eru á ferðinni miklir jaxlar til sjós og það liggur mikil vinna að baki þessum tekjum.

Þeir félagar á Keili og Ísaki Ak eru félagsmenn í sjómannadeild Verklýðsfélags Akraness og vill félagið óska þeim til hamingju með glæsilega vertíð og að skapa um leið umtalsverðar gjaldeyristekjur fyrir þjóðarbúið sem ekki veitir af um þessar mundir. 

Ríkisstjórn Íslands hefur nú lagt fram lagafrumvarp um hvalveiðar og er frumvarpið þess valdandi að verið er að setja veiðarnar í fullkomið uppnám ef marka má orð Kristjáns Loftsonar forstjóra Hvals í Morgunblaðinu í morgun.  

Kristján segir í viðtalinu að verði frumvarpið að lögum þá falli niður þau leyfi sem nú séu til staðar og í framhaldinu af samþykkt frumvarpsins færi af stað kerfisvinna sem gæti tekið uppundir 2 mánuði að ganga frá þar til veiðar mættu hefjast að nýju en þá er vertíðinni í raun lokið.  Á Þessari forsendu treystir forstjóri Hvals sér ekki til að ráða 150 manns í vinnu á meðan þetta óvissuástans ríkir.

Formaður veltir fyrir sér hvað sé í gangi hjá þessari Ríkisstjórn, það að stefna 150 störfum í stórhættu í því ástandi sem nú ríkir á íslenskum vinnumarkaði er hreint ótrúlegt og er þar vægt til orða tekið.  Það eru um 16.000 þúsund manns án atvinnu í dag þar af eru um 300 manns á Akranesi og að leggja fram frumvarp sem getur leitt til þess að 150 störf glatist er ámælisvert.

Rétt er að geta þess að meðallaun þeirra sem störfuðu hjá Hval í fyrra og voru félagsmenn Verkalýðsfélags Akraness voru um 570.000 kr.  Vissulega var gríðarleg vinna að baki þessum launum en þessi mikla vinna og tekjumöguleikar standa almennt ekki verkafólki til boða í dag.  Því er það grátlegt að verða vitni að því að ríkistjórnin sé að ógna 150 störfum með þessu frumvarpi sínu.

Verkalýðsfélag Akraness krefst þess að Ríkisstjórn Íslands gangi þannig frá þessu lagafrumvarpi að það ógni á engan hátt komandi hvalavertíð og stefni ekki 150 störfum í óþarfa hættu.  Við Íslendingar eigum að sjálfsögðu að nýta alla okkar nytjastofna, þar með talið hvali að fengnu áliti frá Hafrannsóknarstofnun.