Jóhanna Sigurðardóttir, forsætisráðherra, kallar eftir víðtækri samstöðu ríkisstjórnar og stjórnarandstöðu um það að eyða óvissu um hvernig skuli fara með gengistryggðu lánin. Formaður Verkalýðsfélags Akraness spyr: Hvað er forsætisráðherrann að fara með slíkum málflutningi? Er ekki búið að kveða upp dóm í hæstarétti sem kveður skýrt á um hvernig taka eigi á gengistryggðu lánunum? Ætlar þessi ríkisstjórn sem kennir sig við félagshyggju, velferð og jöfnuð að virða dóm hæstaréttar að vettugi?

Það liggur fyrir að hæstiréttur dæmdi gengisbundin lán í íslenskum krónum ólögmæt. Hæstiréttur var ekki að dæma að þeir vextir sem tilgreindir voru í samningunum væru ólöglegir og á þeirri forsendu eiga umræddir vextir að standa. Það er ótrúlegt að verða vitni að því að þegar dómur fellur sem er hagstæður fyrir skuldsett heimili þá ætlar allt um koll að keyra hjá íslenskum stjórnvöldum. Að menn eins og Már Guðmundsson seðlabankastjóri og Gylfi Magnússon viðskiptaráðherra byrji að reka skefjalausan hræðsluáróður um að allt fari fjandans til ef fjármálastofnanir sem brutu lög þurfi að fara eftir dómi hæstaréttar. Íslensk alþýða er ekki búin að gleyma hvernig ríkisstjórn Íslands hjálpaði fjármagnseigendum þegar bankakerfið hrundi en eins og allir vita þá settu íslensk stjórnvöld 200 milljarða inn í peningamarkaðssjóðina og tryggðu einnig allar innistæður í bönkum. Á þessu sést að íslensk stjórnvöld eru tilbúin til að verja fjármagnseigendur með kjafti og klóm á meðan skuldsettum heimilum er gert að greiða allar sínar skuldir og jafnvel þó umrædd lán standist ekki íslensk lög. En þegar kemur að því að fjármálastofnanir þurfi að fara eftir dómi hæstaréttar þá er það mat stjórnvalda að það gangi ekki upp.

Eru menn búnir að gleyma því sem fram kom í rannsóknarskýrslu alþingis en þar kemur fram að bankarnir hafi tekið stöðu gegn íslensku krónunni með skelfilegum afleiðingum fyrir samfélagið allt. Þetta samfélag okkar er orðið endanlega sjúkt ef stjórnvöld ætla að hunsa dóma frá hæstarétti. Það er í raun grátbroslegt að verða vitni að viðbrögðum ríkisstjórnarinnar í hinum ýmsu málum er lúta að verkafólki og skuldsettum heimilum í ljósi þess að stjórnin segist hafi félagshyggju, velferð og jöfnuð að leiðarljósi í sínum störfum. Eitt er víst að formaður VLFA hefur ekki orðið var við slík vinnubrögð af hálfu ríkisstjórnar Íslands, svo mikið er víst.

Formaður Verkalýðsfélags Akraness skorar á alþýðu þess lands að standa nú saman og láta stjórnvöld ekki komast upp með að níðast áfram á skuldsettum heimilum.  

Að venju hefur verið mikil aðsókn í orlofshús Verkalýðsfélags Akraness og eru nú allar vikur í þeim 11 orlofshúsum og íbúðum sem félagið býður upp á í sumar að verða bókaðar. Aðeins tvær vikur eru nú lausar og er önnur vikan yfir verslunarmannahelgina (30. júlí-6. ágúst) í orlofshúsi á Eiðum í nágrenni Egilsstaða. Hin vikan er á Akureyri í lok ágúst (20.-27. ágúst). Til að bóka þessar vikur er hægt að hafa samband við skrifstofu í s. 430-9900 eða bóka í gegnum félagavefinn. Fyrstur kemur, fyrstur fær!

Eins og fram kom hér á heimasíðunni ekki alls fyrir löngu þá fundaði formaður með lögmanni Samtaka atvinnulífsins vegna ágreinings og útfærslu á þeim launahækkunum sem eiga að taka gildi frá og með 1. júní síðastliðnum vegna starfsmanna ISS á Grundartanga.

Í dag fundaði síðan formaður með starfsmönnum ISS á Grundartanga og fór yfir þá möguleika sem eru í stöðunni og upplýsti þá um leiðir til lausnar á þeim ágreiningi sem verið hefur til staðar. Fundurinn var mjög góður og nú liggur fyrir niðurstaða varðandi þær launahækkanir sem eiga að taka gildi frá 1. júní og mun byrjandi verða með grunnlaun upp á 182.107 kr. og starfsmaður sem hefur starfað í 10 ár mun verða með 215.191 kr. í grunnlaun. Eru því grunnlaun starfsmanns á 10 ára taxta að hækka um 10.247 kr. á mánuði eða sem nemur 5%.

Tvö minniháttar ágreiningsefni eru nú til úrlausnar hjá Samtökum atvinnulífsins og á formaður von á að farsæl lausn finnist á þeim ágreiningi. Það lítur að uppfærslu á fyrirtækjasamningi og hækkun á orlofs- og desemberuppbótum. Í dag eru orlofs- og desemberuppbætur samtals 203.994 kr. Þessar uppbætur að mati formanns félagsins þurfa að fara upp í 228.526 kr. til að taka þeim hækkunum sem þeim ber frá því þær hækkuðu síðast.

Nú liggur fyrir að svokallaður stöðugleikasáttmáli sé endanlega úr sögunni eftir að miðstjórn Alþýðusambands Íslands sagði sig frá honum á fundi á miðvikudaginn var. Þar á undan höfðu Samtök atvinnulífsins sagt sig frá sáttmálanum vegna þess að sjávarútvegsráðherra hafði heimilað veiðar á 2000 tonnum af skötusel sem ekki var úthlutað beint til þeirra útgerðarfyrirtækja sem hafa aflaheimildir hér á landi.

Verkalýðsfélag Akraness hefur ætíð verið á móti þessum stöðugleikasáttmála og kom það fram strax í upphafi þegar verið var að gera þennan sáttmála enda hefur komið í ljós að það eina sem hefur gengið eftir í þessum sáttmála er að verkafólk og launþegar þessa lands voru þvingaðir til að fresta og afsala sér sínum launahækkunum sem um var samið 17. febrúar 2008. Verkafólk varð af vegna þessa sáttmála vel á annað hundrað þúsund króna og þess vegna er það afar ánægjulegt að sjá að Verkalýðsfélag Akraness hafði rétt fyrir sér þegar það gagnrýndi þennan sáttmála.

Það er mat formanns að þessi stöðugleikasáttmáli hafi verið einn brandari frá upphafi til enda því eins og áður hefur komið fram þá gekk ekkert eftir í samningnum annað heldur en að launafólk varð af hluta af sínum umsömdu launahækkunum. Á sama tíma vörpuðu ríki, sveitarfélög, verslunareigendur og aðrir þjónustuaðilar allir sínum vanda viðstöðulaust út í verðlagið. Vandi áðurnefndra aðila var látinn falla af fullum þunga á íslenska neytendur.

Það er einnig grátbroslegt að verða vitni að því að Samtök atvinnulífsins segi sig frá sáttmálanum vegna þess að sægreifarnir fengu ekki úthlutað þeim skötuselskvóta sem úthlutað var og núna hefur miðstjórn ASÍ einnig sagt sig frá þessum sáttmála vegna þess að ríkið ætlar ekki að standa við sinn hluta er lýtur að greiðslum í starfsendurhæfingarsjóð. Hefði ekki verið nær að segja sig frá þessum sáttmála á grundvelli þess að atvinnurekendur ætluðu ekki að standa við þann hófstillta kjarasamning sem gerður var 17. febrúar 2008?

Formaður vill hins vegar að það komi skýrt fram að það er mjög mikilvægt að þessi nýi starfsendurhæfingarsjóður hafi burði til að starfa á þeim forsendum sem hann á að gera enda er hann liður í að efla og treysta stöðu launafólks á vinnumarkaði sem lendir á áföllum vegna veikinda og slysa. En hins vegar eins og áður sagði er það undarlegt að miðstjórn ASÍ skuli segja sig frá sáttmálanum á grundvelli þess að ríkið standi ekki við sinn hluta varðandi starfsendurhæfingarsjóðinn en fannst ekki ástæða til að segja sig frá honum þó svo að atvinnurekendur ætluðu ekki að standa við þann hófstillta samning sem gerður var 17. febrúar 2008.

Rætt var við formann Verkalýðsfélags Akraness um þetta mál í hádegisfréttum Rásar 1 og má hlusta á það hér.

Eins og fram kom í fréttum í gær þá hefur þýska þingið sett fram það skilyrði fyrir fullri aðild Íslands að Evrópusambandinu að Íslendingar hætti hvalveiðum.

Svona hótanir er alls ekki hægt að láta átölulaust. Ef að þetta er það sem koma skal í viðræðum um aðild Íslands að Evrópusambandinu þá er það skoðun formanns Verkalýðsfélags Akraness að afturkalla eigi aðildarumsókn tafarlaust. Ef við Íslendingar höfum ekki heimild til að nýta okkar fiskistofna að höfðu samráði og tillögu frá Hafrannsóknarstofnun Íslands þá höfum við ekkert inn í Evrópusambandið að gera.

Það voru 150 manns sem höfðu atvinnu af hvalveiðum í fyrra í það minnsta og meðallaun starfsmanna í hvalstöðinni í Hvalfirði og á Akranesi voru nálægt 600 þúsund krónum þó vissulega hafi mikil vinna legið að baki þeim tekjum. Við getum ekki undir nokkrum kringumstæðum látið aðrar þjóðir segja okkur hvort við megum nýta okkar auðlindir þegar í ljós hefur komið að stofnarnir þola þær veiðar sem stundaðar eru. Og einnig er rétt að benda á það gríðarlega atvinnuleysi sem herjar á okkur Íslendinga um þessar mundir.

Ef þetta er það sem koma skal í þessum aðildarviðræðum þá virðist ekki vera von á góðu fyrir okkur Íslendinga og því ítrekar formaðurinn þá skoðun sína að betra sé að afturkalla aðildarumsóknina heldur en að liggja undir svona hótunum.

Formaður félagsins fundaði í dag með lögmanni Samtaka atvinnulífsins, Ragnari Árnasyni, vegna málefna starfsmanna ISS á Grundartanga vegna fyrirtækjasamnings áðurnefndra starfsmanna. Örlítill ágreiningur hefur verið um túlkun á fyrirtækjasamningnum og hvernig launahækkunum skuli háttað til handa starfsmönnum.

Eins og fram hefur komið hér á heimasíðunni þá yfirtók ISS rekstur mötuneytis og ræstingar hjá Elkem Ísland en reksturinn hafði áður verið hjá fyrirtæki að nafni Fang sem var í 100% eigu Elkem Ísland. Ágreiningurinn hefur staðið um að öll þau réttindi sem starfsmenn höfðu hjá Fangi færðust yfir til hins nýja rekstraraðila.

Fundurinn var nokkuð góður og eru hugmyndir að lausn á málinu nú til skoðunar hjá félaginu og mun formaður funda með starfsmönnum um eða eftir helgi um þær tillögur sem liggja nú fyrir af hálfu Samtaka atvinnulífsins.

Stjórnir Landsmenntar og Sveitamenntar hafa ákveðið að taka upp eftirfarandi viðbót við reglur sjóðanna um afgreiðslu einstaklingsstyrkja: Starfstengt réttindanám: Félagsmenn sem ekki hafa nýtt sér rétt sinn síðustu þrjú ár eiga rétt á styrk allt að kr. 132.000.- fyrir eitt samfellt námskeið/nám samkvæmt nánari reglum sjóðsins.

Reglan taki gildi f.o.m. 1. júlí 2010 og gildir gagnvart námi/námskeiðum sem hefjast eftir þann tíma. Þar sem Verkalýðsfélag Akraness er aðili að þessum tveimur fræðslusjóðum gildir hún fyrir félagsmenn Verkalýðsfélags Akraness sem starfa hjá sveitarfélögum og á almenna vinnumarkaðinum eftir kjarasamningi Samtaka atvinnulífsins og SGS.  

Á mánudaginn síðastliðinn hélt formaður Verkalýðsfélags Akraness fund með svokölluðum sérkjaramönnum í Norðuráli. Eins og fram hefur komið hér á heimasíðunni þá hafa forsvarsmenn fyrirtækisins tilkynnt þessum aðilum að þeir muni ekki fá svokallaða eingreiðslu upp á 150 þúsund krónur sem um samdist í síðustu samningum.

Eins og einnig hefur komið fram hér á síðunni þá hefur Verkalýðsfélag Akraness ákveðið að sækja þessa eingreiðslu fyrir sérkjaramennina í gegnum dóm og voru þeir aðilar sem sátu fundinn á mánudaginn því sammála að leita réttar síns fyrir dómsstólum með þetta mál. Það ríkti góð samstaða á fundinum um að stéttarfélögin myndu gæta að hagsmunum sérkjaramanna í þessu máli sem og öðrum málum er lúta að réttindum þeirra.

Í hátíðarguðsþjónustu í Akraneskirkju í gær voru heiðraðir merkismenn í tilefni sjómannadagsins. Þeir sem heiðraðir voru eru þeir Sigurður Jóhannsson fyrrv. bátsmaður og Böðvar Þorvaldsson fyrrv. stýrimaður.

Að heiðruninni lokinni var gengið fylktu liði að minnismerki sjómanna á Akratorgi þar sem Jóhann Matthíasson formaður Sjómannadeildar Verkalýðsfélags Akraness lagði blómsveig að því eftir stutta athöfn.

Það er Verkalýðsfélag Akraness sem stendur að þessari athöfn er lýtur að heiðrun sjómanna, minningarathöfninni um týnda sjómenn og athöfninni sem fram fer á Akratorgi þar sem blómsveigur er lagður að minnisvarða um látna sjómenn.

Akraneskaupstaður bauð síðan þeim sem heiðraðir voru og mökum þeirra til kvöldverðar á Galito og ber að þakka fyrir það.

Hins vegar er ekki annað hægt en að harma það að hér á Akranesi hafi ekki verið haldin nein dagskrá eins og undanfarin ár í tilefni sjómannadagsins en undanfarin ár hefur sveitarfélagið staðið fyrir dagskrá undir heitinu Hátíð hafsins en að þessu sinni var ákveðið að standa ekki fyrir dagskrá vegna sparnaðar. 

Bæjaryfirvöld flögguðu ekki einu sinni íslenska fánanum í tilefni dagsins, sem er móðgun við alla íslenska sjómenn.

Einnig má spyrja af hverju Faxaflóahafnir halda afar veglega dagskrá í Reykjavík en ekki á Akranesi?  Erum við Akurnesingar ekki hluti af Faxaflóahöfnum? 

Verkalýðsfélag Akraness óskar áðurnefndum aðilum innilega til hamingju með heiðrunina.

Í morgun fengu leikskólabörn á Akranesi glaðning frá Verkalýðsfélagi Akranesi í tilefni sjómannadagsins sem er á sunnudaginn. Jóhann Örn Matthíasson formaður sjómannadeildar og Tómas Rúnar Andrésson  færðu yfir 400 börnum á öllum leikskólum bæjarins harðfisk.

Börnin á Teigaseli gerðu sér glaðan dag í tilefni dagsins og hittu þeir félagar börnin á hafnarsvæðinu þar sem þau skemmtu sér við pokahlaup og ýmsa aðra leiki tengda sjómannadeginum. Einnig komu þeir færandi hendi á Vallarsel, Garðasel og Akrasel.