• Þjóðbraut 1, 300 Akranes
  • Mán - Fim: 8:00 - 16:00, Föstudaga 08:00 - 15:15
Fréttir

Fréttir

25
 Jan

Útlitið orðið verulega dökkt !

Það verður að segjast alveg eins og er að útlitið er orðið verulega dökkt í kjaraviðræðum við forsvarsmenn Íslenska járnblendifélagsins.  Allavega er það mat formanns félagsins eftir  samningafundinn sem haldinn var í dag hjá ríkissáttasemjara.  Einnig er það mat Verkalýðsfélags Akraness að töluverðar líkur séu orðnar á því að til verkfalls geti komið hjá starfsmönnum Íslenska járnblendifélagsins.  Eins og áður segir er þetta mat formanns félagsins miðað við þær viðræður sem áttu sér stað í dag. Vonandi er þetta mat rangt, en því miður telur VLFA að svo sé alls ekki. 

Yfir 90% starfsmanna Íslenska járnblendifélagsins eru félagsmenn í Verkalýðsfélagi Akraness.  Það liggur því alveg ljóst fyrir að hagsmunir félagsins í þessum kjaraviðræðum er feyki miklir.  Forsvarsmönnum Íslenska járnblendifélagsins voru afhent áhersluatriði á blaði fyrir nokkrum dögum, sem eru forsenda félagsins til að hægt verði að ganga frá nýjum kjarasamningi og það er alveg ljóst að hvergi verður hvikað frá þeim áhersluatriðum.  Og eitt er víst að Verkalýðsfélag Akraness er svo sannarlega tilbúið að berjast fyrir bættum hag starfsmanna Íslenska járnblendifélagsins, með öllum tiltækum ráðum.  Verkalýðsfélag Akraness er búið að reyna frá því í byrjun október að leysa þessa kjaradeilu bæði í formlegum viðræðum sem og óformlegum, og hefur félagið lagt gríðarlega mikla vinnu í að leysa þessa kjaradeilu.  Því veldur þessi niðurstaða í dag verulegum vonbrigðum.  Ekki verður farið efnislega í þau ágreiningsatriði sem um ræðir að svo stöddu.  Formaður félagsins mun setja sig í samband við starfsmenn Íj og gera þeim grein fyrir þeirri alvarlegu stöðu sem upp er komin.  Í framhaldi af þeim viðræðum við starfsmenn mun félagið taka ákvörðun um hvað sé heppilegast að gera í framhaldinu.  Næsti samningafundur verður mánudaginn 31. janúar, en eins og áður sagði er útlitið verulega dökkt, og er þar vægt til orða tekið. 

25
 Jan

Gengið var frá samkomulagi um gildissviðið í kjarasamningi Norðuráls í gær

Gengið var frá samkomulagi um gildissviðið í kjarasamningi Norðuráls í gær.  Loksins náðu samningsaðilar niðurstöðu eftir að haldnir hafa verið margir fundir um það atriði samningsins.  Verkalýðsfélag Akraness er afar ánægt með að þessu atriði samnings skuli loks vera lokið og samningsaðilar geti nú farið að snú sér að fullum krafti að öðrum óleystum kjaraatriðum og er þar af nógu að taka.  Það var einnig ákveðið á þessum fundi að fastsetja þrjá fundi fram í tímann og er næsti fundur  föstudaginn 28. jan. síðan aftur 1. feb. og 4. feb.  Það liggur fyrir að mikil vinna er framundan hjá samninganefnd Norðuráls því væntingar starfsmanna er allverulegar í þessum kjaraviðræðum eðlilega.

24
 Jan

Aðalfundi stóriðjudeildar lokið

Aðalfundur stóriðjudeildar var haldinn í kvöld, á þriðja tug félaga mættu á aðalfundinn.  Dagskrá fundarins var t.d. kosning í stjórn deildarinnar.  Stjórn stóriðjudeildar er þannig skipuð nú: Formaður er Tómas Andrésson, varaformaður Jón Jónsson, meðstjórnandi Páll Jónsson, varameðstjórnandi Ólafur Geir Óskarsson, ritari Leiknir Sigurbjörnsson, og vararitari er Sigurður Gunnarsson.  Að kosningu lokinni fór formaður félagsins ýtarlega yfir stöðuna í kjaraviðræðunum við Norðurál, Íslenska járnblendifélagið og Sementsverksmiðjuna.  Einnig gerði formaður félagsins fundarmönnum grein fyrir starfsemi félagsins, hvað hefði áunnist á liðnu ári og hver markmið stjórnar væru á þessu ári.

Lögð var fram ályktun  á fundinum þar sem skorað er á viðsemjendur og samninganefnd NA að koma á fót stóriðjuskóla eins fljótt og verða má, því mikilvægi stóriðjuskólans hefði svo sannarlega sýnt sig hjá Ísal í gegnum árin.  Ályktunin hljóðar svona í heild sinni:

Aðalfundur stóriðjudeildar VLFA haldinn 24. janúar 2005 skorar á samninganefnd og viðsemjendur VLFA í stóriðjunni að komið verði á fót stóriðjuskóla á Vesturlandi.  Það er hagur beggja, atvinnurekenda og launamanna að komið verði á fót skóla fyrir starfsfólk í stóriðjunni.  Reynslan af slíkum skóla er það góð að óhjákvæmilegt er að slíkur skóli verði settur á stofn.  Því verkafólk á Vesturlandi getur ekki sætt sig við að vera eftirbátar annarra stóriðja hvað menntun áhrærir.

23
 Jan

Fundað verður á morgun um gildissvið samnings Norðuráls

Fundað verður um gildissvið kjarasamnings Norðuráls á morgun.  Fundurinn verður haldinn í húsakynnum Logos sem er lögmannsstofa sem Norðurál er í viðskiptum við.  Það er von félagsins að það náist niðurstaða um gildissvið samningsins fljótlega, svo samningsaðilar geti farið að snú sér að öðrum kjaraatriðum.  En vissulega er gildissvið samnings eitt af stóru atriðunum í þessum kjaraviðræðum og stéttarfélögin verða að gefa sér þann tíma sem þau telja sig þurfa.

23
 Jan

Samninganefnd Íslenska járnblendifélagsins fundar hjá ríkissáttasemjara

Samninganefnd stéttarfélaganna  mun hittast á morgun vegna kjaradeilu stéttarfélaganna við Íslenska járnblendifélagið, fundurinn verður haldinn í húsakynnum ríkissáttasemjara kl. 10:00.  Eins og áður hefur komið fram hér á heimasíðunni er þolinmæði Verkalýðsfélags Akraness orðin afar takmörkuð, vegna þess hversu illa gengur að leggja lokahönd á þau atriði sem eftir standa.  Ríkissáttasemjari hefur boðað til samningafundar þriðjudaginn 25. janúar.  Samningafundurinn á þriðjudaginn verður að mati Verkalýðsfélags Akraness úrslitatilraun, hvort það verði gengið frá nýjum kjarasamningi við forsvarsmenn Íslenska járnblendifélagið án átaka eða ekki.

20
 Jan

Fiskvinnslunámskeiðinu að ljúka

Nú er farið að síga á seinni hlutann á fiskvinnslunámskeiðinu sem Verkalýðsfélag Akraness stendur fyrir.  Vel á þriðja tug þátttakenda eru á námskeiðinu og koma þeir fá HB-Granda og Laugafiski.  Námskeiðinu lýkur á mánudaginn og munu starfsmennirnir fá nafnbótina sérhæfðir fiskvinnslumenn eftir námskeiðið, einnig hækka þeir um tvo launaflokka, og munar um minna.  Að sögn þeirra leiðbeinanda sem hafa kennt á námskeiðinu hafa allir þátttakendur sýnt námskeiðinu mikinn áhuga og verið sýnum fyrirtækjum sínum til mikils sóma.  Vill Verkalýðsfélag Akraness þakka leiðbeinendum og þátttakendum kærlega fyrir samveruna á liðnum tveimur vikum.

20
 Jan

Viðræður að hefjast aftur við forsvarsmenn Norðuráls eftir nokkurt hlé

Byrjað verður að funda aftur eftir nokkurt hlé við forsvarsmenn Norðuráls um nýjan kjarasamning.  Ákveðið hefur verið að hittast fljótlega eftir helgi, á þeim fundi verður gildissvið samningsins til umræðu.  Nú þegar  liggur fyrir tillaga frá forsvarsmönnum Norðuráls um gildissviðið, sem samninganefnd stéttarfélaga ásamt trúnaðarmönnum hefur verið með til skoðunar.

19
 Jan

Farið að reyna verulega á þolinmæðina í kjaraviðræðum við Íslenska járnblendifélagið

Ríkissáttasemjari hefur boðað til fundar þriðjudaginn 25. janúar vegna kjaradeilu stéttarfélaganna við Íslenska járnblendifélagið.  Samninganefnd stéttarfélaganna og trúnaðarmanna munu funda mánudaginn 24. janúar til að fara yfir þá atburði sem gerst hafa á síðustu samningafundum.  Ekki er annað hægt en að hafa verulegar áhyggjur af því hversu hægt viðræðurnar ganga, samningsaðilar hafa verið að funda meira og minna í rúma þrjá mánuði, án þess að klára þau fáu atriði sem eftir eru.  Samningsaðilar verða  að gera heiðarlega tilraun  þriðjudaginn 25. janúar til að klára þessa kjaradeilu.  Hvað áhrærir Verkalýðsfélag Akraness þá er farið að reyna verulega á þolinmæðina hversu erfiðlega gengur að leggja lokahönd á nýjan kjarasamning.

Samningsaðilum verður að takast að leysa þessa kjaradeilu farsællega og það sem allra fyrst.   

19
 Jan

Aðalfundir deildanna haldnir á næstunni

Aðalfundir deilda Verkalýðsfélags Akraness verða haldnir eftirfarandi daga:

 

Stóriðjudeild    -   Mánud. 24. jan. að Kirkjubraut 40, 3. hæð.

Iðnsveinadeild -   Þriðjud. 25. jan. að Sunnubraut 13.

Matvæladeild   -   Miðvikud. 26. jan. að Sunnubraut 13.

Opinber deild   -   Fimmtud. 27. jan. að Kirkjubraut 40, 3. hæð.

Almenn deild   -    Mánud. 31. jan. að Sunnubraut 13.

 

Allir fundirnir hefjast kl. 20:00.  Félagsmenn eru eindregið hvattir til að mæta.

 

Dagskrá aðalfundanna er eftirfarandi:

1.   Venjuleg aðalfundarstörf.

2.   Önnur mál.

 

18
 Jan

Fundað um nýjan kjarasamning við Íslenska járnblendifélagið í dag

Hún ætlar að verða erfið fæðingin að nýjum kjarasamningi við Íslenska járnblendifélagið.  Deiluaðilar hófu viðræður í dag kl. 15:00 og lauk fundinum kl. 20:15 án þess að samningsaðilar hafi nálgast hvorn annan.  Samningsaðilar eru enn með nokkur atriði sem gengur erfiðlega að ganga frá.  Reiknað er með að næsti fundur verði á fimmtudaginn, en það mun væntanlega skýrast betur á morgun. 

Page 190 of 207

Fréttir

Nýjar fréttir

Verkalýðsfélag Akraness

Verkalýðsfélag Akraness
Kt. 680269-6889

Til skrifstofunnar geta félagsmenn leitað eftir
upplýsingum og annarri aðstoð.

  • Þjóðbraut 1,

    300 Akranes

  • Sími:

    4309900

  • Netfang:

    skrifstofa@vlfa.is

Afgreiðslutími

Mánudag-fimmtudag kl. 08:00-16:00 og föstudaga kl. 8:00-15:15. Utan afgreiðslutíma félagsins er hægt að ná í formann félagsins, Vilhjálm Birgisson, í síma 865-1294.

Nýjar fréttir

Style Switcher
Layout Style
Predefined Colors
Background Image