Forsvarsmenn HB Granda ætla að funda með starfsmönnum síldarbræðslunnar og formanni Verkalýðsfélagsins á morgun.  Tilefni fundarins er sú mikla óánægja starfsmanna með þann samdrátt sem orðið hefur á starfsemi síldarbræðslunnar á liðnu ári.  Eins og fram hefur komið hér á heimasíðunni þá hafa tekjur starfsmanna dregist saman um allt að 56% á milli ára, er það vegna þess að megnið að uppsjávarafla fyrirtækisins hefur verðið landað á Vopnafirði en ekki hér á Akranesi . Nú þegar hafa 5 starfsmenn af 12 hætt störfum og þeir sem eftir eru eru að íhuga einnig að gera það sama.  Sú sérþekking sem starfsmenn Síldar-og fiskimjölsverksmiðjunnar búa yfir er fyrirtækinu afar mikilvæg.  Formaður félagsins og  trúnaðarmaður nefndu því við forsvarsmenn HB Granda á fundinum á miðvikudaginn, að fyrirtækið verði að mæta þeim mikla samdrætti á launum starfsmanna  með einum eða öðrum  hætti.  Væntanlega munu forsvarsmenn fyrirtækisins svara þessari beiðni félagsins á morgun.

Forsvarsmenn HB Granda funduðu með starfsmönnum og formanni VLFA um  framtíðarskipan Síldar-og fiskimjölverksmiðjunar í dag.  Fram kom í máli forsvarsmanna HB Granda að verksmiðjan hér á Akranesi er ætlað að gegna veigamiklu hlutverki á loðnuvertíðinni, en því miður kom líka fram að ekki er útlit á að kolmuna verði landað hér á Akranesi eins og gert hefur verið á liðnum árum.  Starfsmenn bræðslunnar voru ófeimnir við að láta í ljós óánægju sína með þá þróun sem átt hefur sér stað hvað varðar löndun á uppsjávarafla fyrirtækisins.  Starfsmenn bentu á að verksmiðjan hér á Akranesi er sú eina sem framleiðir hágæðamjöl.  Um þessar mundir fæst 10% meira fyrir hágæðamjöl miðað við standardmjöl.  Því er það mat félagsins og starfsmanna að það geti verið hagkvæmara að láta skipin sigla með aflann til bræðslu hér á Akranesi þar sem ekki er hægt að framleiða hágæðamjöl á Vopnafirði.   Nú eru aðilar að leita leiða til að halda í þá starfsmenn sem eftir eru í verksmiðjunni, því sú sérþekking sem starfsmennirnir búa yfir er eigendum HB Granda nauðsynlegur til að hægt sé að starfrækja síldarbræðsluna.  Ef eigendur fyrirtækisins ætla að halda í þá starfsmenn sem eftir eru verða þeir að koma til móts við þá með einum eða öðrum hætti.  Verkalýðsfélag Akraness lagði fram tillögu í þeim efnum á fundinum í dag og ætla forsvarsmenn HB Granda að svara þeirri tillögu eftir helgi.

Jóhann Ársælsson þingmaður Samfylkingarinnar kom í heimsókn á skrifstofu félagsins og átti formaður félagsins um klukkustundar spjall við þingmanninn.  Þau mál sem helst báru á góma voru málefni er líta að erlendu vinnuafli og þau undirboð sem er að eiga sér stað á vinnumarkaðinum samhliða erlendu vinnuafli.   Að sjálfsögðu ræddi formaðurinn við þingmanninn um málefni HB Granda og þann samdrátt sem orðið hefur á starfssemi fyrirtækisins hér á Akranesi og þær áhyggjur sem félagið hefur af þeim samdrætti.

Verkalýðsfélag Akraness bíður enn eftir drögum að nýjum fyrirtækjasamningi frá eigendum Fangs ehf.  En kjarasamningur starfsmanna rann út 1. desember 2004 og hafa starfsmenn því verið samningslausir í 9 mánuði sem er með öllu óásættanlegt.  Starfsmenn Fangs sjá um mötuneyti og ræstingu fyrir Íslenska járnblendifélagið og einnig um ræstingu og þvott fyrir Norðurál.  Töluvert er síðan forsvarsmenn fyrirtækisins lofuðu Verkalýðsfélagi Akraness tillögum að nýjum fyrirtækjasamningi og er því þolinmæði félagsins algerlega á þrotum.  Félagið vísaði deilunni til sáttasemjara fyrir um tveimur mánuðum og var einn fundur  haldinn hjá sáttasemjara.  Því fljótlega eftir fundinn hjá sáttasemjara lofuðu forsvarsmenn Fangs ehf. að koma með drög að nýjum fyrirtækjasamningi og eins og áður sagði hefur ekkert gerst í þeim málum.  Stéttarfélagið hefur gert eigendum Fangs ehf. grein fyrir því að komi ekki drög að nýjum fyrirtækjasamningi fyrir helgi, muni stéttarfélagið íhuga það sterklega að grípa til einhverja aðgerða.

Framkvæmdastjóri Fangs ehf. hafði samband við formann Verkalýðsfélags Akraness í morgun.  Óskaði framkvæmdastjórinn eftir því við stéttarfélagið að það sýndi enn meiri biðlund hvað varðar nýjan fyrirtækjasamning handa starfsmönnum Fangs.  Ástæðan fyrir því að ekki hefur tekist að gera drög að nýjum fyrirtækjasamningi er vegna mikilla anna hjá Samtökum atvinnulífsins að sögn forsvarsmanna Fangs.  Einnig kom fram hjá framkvæmdastjóranum að eigendur Fangs hefðu mikinn vilja til að klára fyrirtækjasamning fyrir 15. september.  Ef það tekst þá hafa starfsmenn verið samningslausir í tæpt ár.  Verkalýðfélag Akraness mun heyra í starfsmönnum eftir helgi og fara yfir stöðuna og ákveða hvað gera skuli.   Þessi framkoma eigenda Fangs ehf. er til háborinnar skammar og er þar vægt til orða kveðið, en Fang er í 100% eigu Íslenska járnblendifélagsins.  Verkalýðsfélag Akraness hefur ítrekað reynt að fá eigendur Fangs að samningaborðinu til að klára samning fyrir starfsmenn Fangs eins og aðra starfsmenn á Grundartangasvæðinu en ekkert hefur gengið.  Hjá Fangi ehf. eru 12 starfsmenn sem allt eru konur sem starfa við ræstingar og í mötuneyti Íslenska járnblendifélagsins.  Rétt er að það komi fram að gengið var frá kjarasamningum fyrir starfsmenn Íslenska járnblendifélagsins og starfsmenn Klafa ehf. snemma í vor.  En kjarasamningar Íslenska járnblendifélagsins, Klafa og Fangs runnu allir út á sama tíma eða 1. desember 2004.   En það virðist vera að konurnar í ræstingu og mötuneyti skipti ekki eins miklu máli og aðrir starfsmenn Íslenska járnblendifélagsins.  Enn og aftur er það mat Verkalýðsfélags Akraness þetta sé eigendum Fangs ehf. (Íslenska járnblendifélagsins á Fang ehf 100%) til mikilla vansa.

Met þátttaka er í ferðina sem Verkalýðsfélag Akraness býður eldri félagsmönnum í.  Það hafa um 130 eldri félagsmenn nú þegar  skráð sig í ferðina sem farin verður á morgun og sjaldan eða aldrei verið fleiri sem ætla þiggja boð félagsins.   Leiðin mun liggja um Snæfellsnesið og verða áhugaverðustu staðirnir á Snæfellsnesinu skoðaðir.   Borðaður verður hádegisverður að Búðum og síðan verður stoppað í Bjarnarhöfn og smakkað á hákarli og harðfiski.  Leiðsögumaður í ferðinni verður hinn geðþekki leiðsögumaður Björn Finsen sem þekkir Snæfellsnesið eins og lófana á sér.

Útlitið er er ekki gott hvað varðar nýjan kjarasamning fyrir starfsmenn Fangs.  Verkalýðsfélag Akraness hefur verið í sambandi við Samtök atvinnulífsins en þau fara með samningsumboðið fyrir eigendur Fangs.  Stjórn Fangs tók einhliða ákvörðun um hversu mikið laun starfsmanna Fangs skyldu hækka.  Við þá ákvörðun var litið til þeirra almennu kjarasamninga sem um störfin gilda sem og annarra launabreytinga á vinnumarkaði vegna sambærilegra starfa.  Einnig ákvað stjórn fyrirtækisins að fresta viðræðum hvað varðar önnur kjaraatriði  þar til haustsins.  Við þetta getur Verkalýðsfélag Akraness alls ekki unað.  Það er ekki á valdi stjórnar Fangs að ákveða það einhliða hversu mikið laun starfsmanna hækka.  Eins og áður sagði tók stjórn Fangs líka ákvörðun um að fresta viðræðum um nýjan kjarasamning til haustsins, og það án nokkurs samráðs við þau stéttarfélög sem hafa samningsumboð fyrir þau störf sem hér um ræðir.  Rétt er að það komi skýrt fram að kjarasamningur starfsmanna Fangs rann út 30. nóvember 2004, og hafa starfsmenn því verið samningslausir í 7 mánuði. Félagið hefur sett sig í samband við fulltrúa ríkissáttasemjara og greint honum frá þeirri stöðu sem upp er komin.  Á það skal bent enn og aftur að það er búið að semja fyrir starfsmenn Ij og Klafa.  Þær  launahækkanir sem stjórn Fangs hefur boðið sínum starfsmönnum er því miður ekki í samræmi við þá kjarasamninga sem gerðir hafa verið við starfsmenn Íslenska járnblendifélagsins og Klafa.    Krafa starfsmanna Fangs er skýr þ.e sambærilegar launahækkanir og aðrir á svæðinu fengu.  Annað er ekkert samgirni.

Verkalýðsfélag Akraness bíður eftir svari frá Samtökum atvinnulífsins um hvort og þá hvenær þeir geta hafið viðræður um nýjan kjarasamning fyrir starfsmenn Fangs.  Eins og fram hefur komið hér á heimasíðunni þá hefur stjórn Fangs ákveðið einhliða að fresta viðræðum þar til í haust.  Einnig hefur  stjórn Fangs tekið ákvörðun um hversu mikið laun starfsmanna skulu hækka.  Verkalýðsfélag Akraness vill ítreka það, að það er ekki á valdi stjórnar Fangs að ákveða þetta einhliða. Þessar ákvarðanir verða að vera teknar í samráði við þau stéttarfélög sem fara með  samningsumboðið fyrir umrædd störf.   Kjarasamningur starfsmanna Fangs rann út 30. nóvember og það mun ekki koma til greina að fresta viðræðum fram á haustið.  Verkalýðsfélag Akraness hefur óskað eftir því við Samtök atvinnulífsins að hefja viðræður um nýjan kjarasamning fyrir starfsmenn Fangs strax.  Ef ekki berst jákvætt svar við þessari beiðni í dag frá Samtökum atvinnulífsins, mun félagið vísa deilunni til ríkissáttasemjara og það seinni partinn í dag.

 Verkalýðfélag Akraness vísaði kjaradeilunni við Fang til ríkissáttasemjara í dag.  Félagið hefur ítrekað óskað eftir viðræðum um nýjan kjarasamning fyrir starfsmenn Fangs en án árangurs.  Verkalýðsfélag Akraness sendi  bréf til  Samtaka  atvinnulífsins og gaf þeim lokafrest til að svari þeirri beiðni félagsins,  um hvort og þá hvenær Samtökin gætu hafið viðræður um nýjan kjarasamning.  Það verður að segjast alveg eins og er að svarið sem barst frá SA í gær hefur valdið gríðarlegum vonbrigðum.  Samtök atvinnulífsins telja að í gildi sé bindandi kjarasamningur milli SA og vlf. Akraness sem nái til umræddra starfa hjá Fangi ehf.  Einnig telja Samtök atvinnulífsins að ekki sé lagaskilyrði fyrir vísun félagsins til sáttasemjara.   Fang ehf. var stofnað í júní 2002 tilgangur þess var að sjá um ræstingu, mötuneyti, þvott-þrif og launavinnslu.  Öll þessi ofangreindu störf voru unnin af starfsmönnum Íslenska járnblendifélagsins.  Þegar Fang var stofnað var starfsmönnum sem unnu við umrædd störf hjá Íj boðin áframhaldandi vinna hjá Fangi.  Verðandi starfsmönnum Fangs var réttur ráðningasamningur  og eftir þeim upplýsingum sem félagið hefur aflað sér var ekkert val um hvort starfsmenn vildu það sem í boði var eða ekki.  Ef starfsmenn vildu ekki ganga að þessum ráðningarkjörum sem þarna var í boði gátu starfsmenn einfaldlega hætt þetta voru skilaboðin sem starfsmenn fengu.   Nú er klárlega komið í ljós hver hinn eiginlegi tilgangur var með stofnun Fangs það var að lækka kjör starfsmanna.

Það sem er alvarlegast í þessum ráðningarsamningum er að í þeim kemur fram að kjarasamningur Íslenska járnblendifélagsins sem starfsmenn hafa unnið eftir í áratugi  fell úr gildi 30. nóvember 2004.  Eftir það á kjarasamningur á hinum almenna vinnumarkaði að gilda.  Þennan gjörning gerðu eigendur Fangs algerlega án samráðs við þau stéttarfélög sem hafa samningsumboð fyrir þau störf sem um ræðir.  Lögfræðingur félagsins hefur skilað stjórn félagsins álitgerð um þetta mál.  Í áliti lögmannsins kemur skýrt fram að eigendur Fangs geta ekki einhliða ákveðið laun og önnur kjör án samráðs við þau stéttarfélög sem hafa samningsumboð fyrir starfsmenn Fangs.  Ef Samtök atvinnulífsins munu halda þessu til streitu mun Verkalýðsfélag Akraness senda málið fyrir félagsdóm.  Reyndar á félagið ekki von á öðru en að sáttasemjari boði til sáttafundar von bráðar, og vonandi leysist þessi deila þar.

Verkalýðsfélag Akraness bíður eftir að ríkissáttasemjari boði til fundar vegna kjaradeilu stéttarfélagsins við Fang ehf.  Félagið vísaði kjaradeilunni til ríkissáttasemjara á miðvikudaginn var.  Ekki er ósennilegt að sáttafundur verði haldinn fljótlega eftir helgi.  Formaður félagsins mun funda með starfsmönnum á  mánudaginn kemur, og gera ýtarlega grein fyrir þeirri stöðu sem upp er komin.  Krafa stéttarfélagsins er hvell skýr og frá henni verður ekki hvikað þ.e sambærilegur samningur og gerður var við Klafa ehf.   Eins og fram kom hér á heimasíðunni þá telja Samtök atvinnulífsins að í gildi sé Kjarasamningur fyrir starfsmenn Fangs.  Verkalýðsfélag Akraness hefur þegar sett sig í samband við lögmann félagsins vegna þessara túlkunar Samtaka atvinnulífsins  á ráðningarsamningum starfsmanna.  Félagið hefur þegar tekið ákvörðun um að haldi Samtök atvinnulífsins þessari túlkun til streitu þá muni félagið fara með málið fyrir félagsdóm.  Það er  mat félagsins að það geti ekki staðist að hægt sé að breyta kjarasamningum starfsmanna algerlega án samráðs við þau stéttarfélög sem hafa samningsumboð fyrir umrædd störf.