Tap varð á rekstri Century, móðurfélags Norðuráls á Grundartanga, á síðasta ári. Var það fyrst og fremst vegna reiknaðra liða, svo sem skatta- og afleiðusamninga. 

Hagnaður var hins vegar af reglubundnum rekstri, að sögn Ágústar Hafberg framkvæmdastjóra viðskiptaþróunar og samskipta hjá Norðuráli.  Hann segir að rekstur Norðuráls á Grundartanga hafi gengið vel í fyrra. Þar voru framleidd 272.000 tonn af áli og var útflutningsverðmæti þess ríflega 60 milljarðar króna.

“Veruleg verðlækkun sem orðið hefur á áli hefur að sjálfsögðu mikil áhrif á rekstrargrundvöll álvera og hefur Century þegar hætt framleiðslu í einu álveri í Bandaríkjunum sem komið var til ára sinna og því ekki lengur samkeppnisfært við núverandi áðstæður. 

 Staða Norðuráls er hinsvegar mjög traust enda er reksturinn á Grundartanga á heimsmælikvarða.  Brugðist hefur verið við erfiðum aðstæðum með lækkun kostnaðar og hagræðingu en engin áform eru uppi um niðurskurð framleiðslu hjá Norðuráli,” segir Ágúst.

Eins og flestir vita þá gaf sjávarútvegsráðherra á dögunum út 15.000 tonna rannsóknarloðnukvóta en í hlut HB Granda komu um 2.800 tonn.  Í frétt á heimasíðu HB Granda kemur fram að áhöfnin á Lundey NS hafi á föstudaginn sl. haldið til loðnuveiða út af Reykjanesi og fengust þar 1.100 til 1.200 tonn af loðnu í þremur köstum.

Einnig kom fram í fréttinni að skipið væri á leiðinni til Vopnafjarðar þar sem loðnan fer til hrognatöku, í frystingu og bræðslu.  Það kom líka fram á heimasíðunni að allur aflinn fari til hrognatöku hjá fiskiðjuveri HB Granda á Vopnafirði. 

Þessa stundina er verið að landa úr Lundey NS á Vopnafirði, Faxi RE er á leiðinni með loðnu til hrognatöku á Vopnafirði og Ingunn Ak er að veiðum við Reykjanesið þessa stundina.

Formaður félagsins gerir að sjálfsögðu ekki athugasemdir við það að fyrirtækið leiti allra leiða til að hagræða í rekstri sínum og ef það er styttra fyrir uppsjávarskip fyrirtækisins að sigla með aflann til vinnslu annars staðar en á Akranesi þá er ekkert við því að segja.  Enda eiga hagræðissjónarmið fyrirtækisins ávalt að vera höfð að leiðarljósi þegar tekin er ákvörðun um hvar vinna á aflann. 

Forsvarsmenn HB Granda verða hins vegar að útskýra það fyrir okkur Skagamönnum á hvað forsendum þeir taka ákvörðun um að láta skip fyrirtækisins sigla með aflann í 35 tíma og það bara aðra leiðina til Vopnafjarðar til hrognatöku.

Eins og áður hefur komið fram þá er loðnan að veiðast við Reykjanesið og það tekur skipin einungis 2 tíma að sigla með aflann á Akranes.  Samkvæmt upplýsingum sem formaður hefur aflað sér þá er allt klárt í vinnslunni hér á Akranesi til að hefja hrognatöku þannig að það er ekki skýringin á því að siglt er með aflann til Vopnafjarðar.

Formaður spyr: hvaða hagræðissjónarmið ráða því að skip fyrirtækisins eru látin sigla með afla sinn í 35 tíma og það með ærnum olíukostnaði?  Það er alveg ljóst að nokkrar milljónir myndu sparast í olíukostnað yrðu skipin látin landa á Akranesi. 

Það hljóta að vera einhverjar eðlilegar skýringar á þessari ákvörðun forsvarsmanna HB Granda en því miður sér formaður félagsins þær ekki. Óhagræðið æpir á fólk þegar það sér skip fyrirtækisins á veiðum örfáar mílur frá Akranesi og þau síðan látin sigla í 35 tíma með aflann til vinnslu. Á þeirri forsendu er mikilvægt að skýring komi á þessari ákvörðun forsvarsmanna HB Granda

Rétt í þessu var að ljúka kynningarfundi um nýgerðan kjarasamning starfsmanna Sementsverksmiðjunnar. Að aflokinni kynningu voru greidd atkvæði um samninginn og er skemmst frá því að segja að hann var samþykktur með öllum greiddum atkvæðum nema einu.

Fram kom hjá fundarmönnum að þeir voru almennt ánægðir með samninginn og þá sérstaklega í ljósi þess ástands sem nú ríkir á íslenskum vinnumarkaði.

Boðaður hefur verið fundur fimm félaga innan Así vegna erindis sem borist hefur frá forseta ASÍ þar sem félögin eru spurð hvort þau óski að segja sig frá samfloti aðildarfélaga ASÍ.

Formenn viðkomandi félaga eru nú að leita samráðs við samninganefndir félaganna og samverkafólk sitt hjá félögunum.

Fundurinn í dag verður símafundur en búast má við að félögin haldi fund á morgun eða fimmtudag þar sem formenn og aðrir í forystu félaganna hittist til að ræða óvænt erindi forseta ASÍ.

Mótmælendur, trúðar, ungabörn, draugar, bændur og búalið eru á meðal þeirra furðuvera sem litið hafa inn á skrifstofu félagsins í dag, öskudag, og skemmt starfsfólki með söng og einstaka dansspori. Þeim hefur að sjálfsögðu verið vel launað fyrir vikið.

Hér má sjá nokkrar myndir sem teknar voru á skrifstofunni í dag.

Í dag rennur út frestur til að skila inn umsóknum um orlofshús sumarið 2018. Hægt er að skila inn umsókn á Félagavefnum til miðnættis og einnig er hægt að skila umsókn inn um bréfalúguna á Sunnubraut 13 og á tölvupósti This email address is being protected from spambots. You need JavaScript enabled to view it.. Umsóknir sem berast í bréfpósti á morgun verða með í úthlutuninni, en ekki er hægt að skrá umsóknir sem berast í pósti eftir það.

Úthlutun fer fram á morgun og hjá þeim félagsmönnum sem fá úthlutað mun myndast bókun á Félagavefnum seinnipartinn á morgun. Hægt verður að ganga frá greiðslu strax á Félagavefnum.

Í gær náðist samkomulag á milli ASÍ og SA um frestun á endurskoðun og framlengingu kjarasamninga. Þetta þýðir að þeim launahækkunum sem hefðu átt að koma inn þann 1. mars nk. hefur nú verið frestað. Í samkomulaginu felst að ákvörðun um framlengingu og endurskoðun verði tekin eigi síðar en 30. júní á þessu ári. 

Þrátt fyrir frestun launahækkana náðist mikilvægur áfangi er varðar kauptryggingu lægstu launa. Frá og með 1. mars hækkar lágmarkstekjutrygging úr kr. 145.000 í kr. 157.000 eða um 12.000 krónur. Þessi upphæð verður lágmarkstekjutrygging fyrir fullt starf (173,33 tíma á mánuði).  Þetta var einn af þeim þáttum sem fimm aðildarfélög á landsbyggðinni hafa verið að benda á, að það gangi alls ekki upp að vera með lágmarkslaun lægri en atvinnuleysisbætur og því mikilvægt að þessi áfangi skuli hafa náðst.

Stjórn og trúnaðarráð Verkalýðsfélags Akraness vildi ekki fresta endurskoðun og þeim launahækkunum sem áttu að koma til 1. mars nk.  Því miður taldi meirihluti verkalýðshreyfingarinnar þá leið heppilegri og líklegri til árangurs, en því var VLFA ósammála.  Með öðrum orðum, það fór fram lýðræðisleg umræða um hvaða leið skyldi farin varðandi frestun launahækkana og fimm stéttarfélög á landsbyggðinni urðu undir í sinni skoðun og við því er ekkert að gera, enda virkar lýðræðið með þeim hætti að meirihlutinn ræður.

Hins vegar er formaður félagsins afar ósáttur við þá ákvörðun samninganefndar ASÍ að bera ekki samkomulagið sem gert var við Samtök atvinnulífsins undir þá félagsmenn sem vinna eftir umræddum kjarasamningum í allsherjaratkvæðagreiðslu á meðal þeirra.  Þessi fimm félög á landsbyggðinni höfðu lagt fram tillögu á formannafundi ASÍ þess efnis að slíkt skyldi gert þegar samkomulagið lægi fyrir við SA. Því miður varð samninganefnd ASÍ ekki við þessari ósk þeirra fimm landsbyggðafélaga.

Það geta ekki kallast lýðræðisleg vinnubrögð að fara ekki með þetta stórar ákvarðanir í atkvæðagreiðslu, ákvarðanir sem lúta að því að vinnandi fólk fær ekki sínar umsömdu launahækkanir samkvæmt gildandi kjarasamningi.

Almenningur í þessu landi kallar eftir því að ástunduð séu lýðræðisleg vinnubrögð í íslensku samfélagi, þau vinnubrögð að leggja frestun kjarasamninga ekki undir hinn almenna félagsmann í allsherjaratkvæðagreiðslu flokkast ekki sem lýðræðisleg vinnubrögð, svo mikið er víst.   

Það er óhætt að segja að félagsmenn kunni að meta heilsueflingarstyrkinn sem félagið býður upp á en samkvæmt bótareglum sjúkrasjóðs á fullgildur félagsmaður rétt á 50% endurgreiðslu vegna heilsueflingar að hámarki 15.000 kr. á hverjum 12 mánuðum.

Greiðslur vegna heilsueflingarstyrkja til félagsmanna hafa aukist um 108% miðað við sama tíma í fyrra. Það liggur alveg fyrir að félagsmenn nýta sér þá heilsueflingu sem hér er boðið upp á á Akranesi og skýrir ástandið á vinnumarkaðnum ugglaust að einhverju leyti þessa miklu fjölgun.

Í þessum mánuði námu heildargreiðslur úr sjúkrasjóði vegna sjúkradagpeninga, heilsueflingarstyrkja, gleraugnastyrkja, útfararstyrkja og annarra styrkja sem félagið býður uppá vel á þriðju milljón króna. Félagið hefur lagt sig í líma við að upplýsa sína félagsmenn um þau réttindi sem félagið býður upp á og er þessi fjölgun einnig tilkomin vegna þess.

Bótareglur félagsins má finna með því að smella hér.

Greiðslur úr sjúkrasjóði Verkalýðsfélags Akraness á árinu 2008 voru 26,5 milljónir og jukust um 4 milljónir á milli ára.  Ástæða þessarar aukningar er sú að félagið hefur að undanförnu að fjölgað og hækkað styrki sem félagsmönnum standa til boða. 

Það er afar ánægjulegt að geta látið félagsmenn njóta góðrar afkomu félagsins undanfarinna ára með hækkun og fjölgun á nýjum styrkjum, enda er það yfirlýst stefna stjórnar félagsins að reyna eftir fremsta megni að þjónusta sína félagsmenn eins vel og kostur er. 

Námsvísir vorannar hefur komið inn um lúguna um þetta leyti, en brugðið verður út af vananum í þetta sinn. Ástæðan er sú að Símenntunarmiðstöðin á 10 ára afmæli á þessu ári eða 19. febrúar nk.

Af því tilefni hefur stjórn stofnunarinnar skipað afmælisnefnd sem mun vinna að veglegu afmælisblaði sem verður gefið út á vormánuðum.  Einnig er fyrirhugað að halda upp á þessi tímamót með ýmsu móti sem mun vara allt afmælisárið.

Námskeið vorannar verða birt á vefnum okkar www.simenntun.is og einnig munu námskeið verða auglýst í staðarmiðlum og með öðrum hætti jafnt og þétt alla vorönnina.

Við vonum að þetta valdi ekki óþægindum og hlökkum til að vinna áfram  að því að byggja upp öfluga  stofnun á sviði sí- og endurmenntunar á Vesturlandi.

Ef þú hefur ósk um námskeið eða ábendingar um bætta þjónustu þá sendu endilega póst á This email address is being protected from spambots. You need JavaScript enabled to view it.  eða hringdu í okkur í síma 437-2390.

Með afmæliskveðjum,

Inga Dóra Halldórsdóttir framkvæmdastjóri