Eins og fram hefur komið hér á heimasíðu VLFA stóð þing Alþýðusambands Íslands yfir dagana 26. til 28. október.  Verkalýðsfélag Akraness hefur ætíð látið til sín taka á þessum þingum enda eru þing ASÍ æðsta vald innan verkalýðshreyfingarinnar og þar eru stefna í hinum ýmsu málum mótuð.  Á þessu þingi var engin undartekning á og lagði VLFA fram tvær ályktanir. Önnur laut að samningsfrelsi stéttarfélaganna en hin laut að því að skorað var á stjórnvöld og Alþingi að vísitala til neysluverðs til verðtryggingar skv. lögum um vexti og verðtryggingu verði hér eftir reiknuð út án húsnæðisliðar.  

Það er skemmst að segja frá því að þessi tillaga okkar var samþykkt með öllum greiddum atkvæða. Formaður Verkalýðsfélags Akraness skal fúslega viðurkenna að hann var afar ánægður með að hafa fengið þessa tillögu samþykkta enda morgunljóst að hér er um gríðarlega hagsmuni fyrir íslensk heimili um að ræða og nægir að nefna í því samhengi að 12 mánaða verðbólgan í dag er 1,8% en án húsnæðisliðar er hún neikvæð um 0,5%.

Formaður Verkalýðsfélags Akraness fundaði á þriðjudaginn síðastliðinn með félagsmönnum VLFA sem starfa hjá Elkem Ísland. Tilefnið var kjarasamningur þeirra sem rennur út í janúar á næsta ári. Farið var yfir hugmyndir að kröfugerð, SALEK samkomulagið og fleira. Fínar og gagnlegar umræður sköpuðust á milli starfsmanna Elkems og formanni en tveir fundir voru haldnir þann daginn.

Í dag 24. október verður skrifstofa Verkalýðsfélags Akraness lokað klukkan 14:00 í tilefni af kvennafrídeginum.  Eins og allir vita Þá er kvennafrídagurinn – dagurinn þar sem konur meta árangur jafnréttisbaráttunnar og brýna sig til frekari baráttu. Kynbundinn launamunur á vinnumarkaði er því miður bláköld staðreynd og er samfélagslegt mein sem verður að vinna bug á.

Það liggur fyrir að meðal atvinnutekjur kvenna eru 70,3% af meðal atvinnutekjum karla. Konur eru því með 29,7% lægri meðaltal atvinnutekna. Samkvæmt því eru konur búnar að vinna fyrir sínum launum eftir 5 klukkustundir og 38 mínútur miðað við fullan vinnudag frá kl. 9–17. Daglegum vinnuskyldum kvenna er því lokið kl. 14:38.

Verkalýðsfélags Akraness hvetur konur til að taka þátt í því að ganga út á slaginu 14:38 og sækja útifundi og viðburði um allt land í tilefni dagsins. Íslenskar konur hafa vakið verðskuldaða athygli um allan heim vegna baráttugleði og skilyrðislausrar kröfu um jafnrétti en baráttunni en hvergi nærri lokið. Stöndum saman og útrýmum birtingamyndum misréttis!

Eftir rétt rúma viku eða nánar til getið 26. október hefst 42. þing Alþýðusambands Íslands og stendur þingið yfir í 3 daga. Rétt er að geta þess að þing Alþýðusambandsins eru æðsta vald í málefnum sambandsins, en þau eru haldin á tveggja ára fresti. Hvert aðildarfélag hefur rétt á að senda a.m.k. einn fulltrúa á þing sambandsins og á þingin mæta þrjú hundruð fulltrúar launafólks af öllu landinu til að móta heildarsamtökunum stefnu og starfsáætlun og velja þeim forystu. Verkalýðsfélag Akraness  á 8 þingfulltrúa á þinginu í ár.

Verkalýðsfélag Akraness tekur ætíð virkan þátt á þingum ASÍ og það gerir félagið með því að taka þátt í umræðum og koma þeim sjónarmiðum sem félagið telur að séu til hagsbóta fyrir félagsmenn vel á framfæri.

Þessu til viðbótar leggur VLFA ætíð lagt fram ályktanir til afgreiðslu á þingum ASÍ og það eru fá félög innan ASÍ sem hafa lagt fram fleiri ályktanir en Verkalýðsfélag Akraness á síðastliðnum þingum. Þetta gerir VLFA í ljósi þess að þing ASÍ eru æðsta vald í málefnum sambandsins og það er þingið sem mótar stefnu heildarsamtakanna í hinum ýmsu hagsmunamálum er lúta að félagsmönnum. Á þeirri forsendu er mikilvægt að stéttarfélögin séu virk í að leggja fram tillögur og ályktanir sem félögin telja að séu til hagsbóta fyrir sína félagsmenn.

Á liðnum þingum hefur VLFA lagt fram margar tillögur og ályktanir og nægir að nefna tillögu um að stjórnarmenn í lífeyrissjóðum verði kosnir af öllum sjóðsfélögum og atvinnurekendur fari úr stjórnum sjóðanna, að forseti ASÍ sé kosinn í allsherjarkosningu á meðal allra félagsmanna ASÍ en ekki inná lokuðum þingum ASÍ einnig hefur VLFA lagt fram ályktun um að ASÍ vilji að verðtrygging á neytendalánum verði afnumin og sett verði þak á óverðtryggða vexti.

Á komandi þingi mun Verkalýðsfélag Akraness leggja fram tvær ályktanir. Önnur lýtur að nýju samningalíkani þar sem allt bendir til að mikilvægasti réttur launafólks verði skertur gróflega, en að sjálfsögðu er hér verið að tala um samningsréttinn. Síðari ályktunin lýtur að því að ASÍ beiti sér fyrir því að húsnæðisliðurinn verði tekin út úr mælingu neysluvísitölunnar enda hefur sá liður knúið verðbólguna áfram bæði fyrir og eftir hrun. Þetta er afar mikilvægt í ljósi þess að nánast allar fjárskuldbindingar heimilanna eru tengdar við umrædda neysluvísitölu.

Það er ljóst að fulltrúar Verkalýðsfélags Akraness munu berjast fyrir því að þessar ályktanir fái brautargengi á þinginu enda eru miklir hagsmunir undir í báðum þessum málum en eins og allt launafólk veit þá er samningsréttur launafólks hornsteinn stéttarfélagsbaráttunnar á Íslandi og hann má ekki skerða undir nokkrum kringumstæðum. 

Hægt er að skoða ályktanir Verkalýðsfélags Akraness með því að smella hér og hér.

Nú er lokið kosningu um ótímabundið verkfall félagsmanna Verkalýðsfélags Akraness sem starfa á fiskiskipum samkvæmt kjarasamningi Sjómannasambands Íslands og Samtaka fyrirtækja í sjávarútvegi (SFS).

Kosningaþátttaka var nokkuð góð, á kjörskrá voru 72 sjómenn og greiddu 49 atkvæði, eða 68%. Verkfall var samþykkt með yfirgnæfandi meirihluta eða 96% greiddra atkvæða og er því ljóst að vinnustöðvun mun hefjast kl. 23:00 þann 10. nóvember hafi ekki náðst kjarasamningar milli aðila fyrir þann tíma.

Það er óhætt að segja að nóg sé að gera hjá Verkalýðsfélagi Akraness um þessar mundir við réttindagæslu fyrir okkar félagsmenn en félagið rekur nú þrjú mál fyrir dómstólum og tvö önnur eru á leið fyrir Héraðsdóm Vesturlands. Þessi fimm mál tengjast þremur fyrirtækjum á félagssvæði Verkalýðsfélags Akraness og lúta að ágreiningi um greiðslu á hvíldartímum, vikulegum frídegi, uppsagnarfresti, túlkun á útreikningi á orlofs- og desemberuppbótum og túlkun á því hvernig ávinnsla á starfsaldri er reiknuð út.

Eins og áður sagði þá eru þrjú mál nú þegar fyrir dómstólum og núna er lögmaður félagsins að undirbúa stefnu á fyrirtækið Skagann ehf. m.a. vegna ágreinings um greiðslu á áunnum hvíldatímum og vikulegum frídegi og skerðingar á kjarasamningsbundnum uppsagnarfresti.

Þau fyrirtæki sem Verkalýðsfélag Akraness hefur stefnt vegna áðurnefnds ágreinings eru auk Skagans ehf, Norðurál og Hvalur hf. Það er ljóst að hér er um mikla fjárhagslega hagsmuni um að ræða og ef þessi mál vinnast öll þá er einnig ljóst að þau munu hafa fordæmisgildi sem mun þýða að fjárhagslega geta þessi mál numið mörgum milljónum jafnvel vel á annan tug milljóna króna.

Rétt er að geta þess málflutningur fyrir Félagsdómi vegna tveggja mála er lúta að túlkun á útreikningi á orlofs- og desemberuppbótum fer fram á miðvikudaginn í næstu viku, en það mál er höfðað gegn Norðuráli. Og síðan er félagið með annað mál sem tekið verður fyrir 25. október gegn Norðuráli og lýtur að ávinnslu á réttindum vegna starfsaldurs.

Síðan er einnig rétt að geta þess að aðalmeðferð í máli sem félagið höfðaði gegn Hval hf. meðal annars vegna skerðingar á hvíldartímum og vikulegum frídegi verður væntanlega fyrir jól í Héraðsdómi Vesturlands.

Það er stefna Verkalýðsfélags Akraness að standa ætíð þéttan vörð um réttindi okkar félagsmanna og ef við teljum að verið sé að brjóta á réttindum okkar fólks þá að sjálfsögðu fer félagið af fullum þunga í að fá niðurstöðu í slík mál og ef ekki tekst að ná samkomulagi við fyrirtækin þá endar slíkur ágreiningur eðli málsins samkvæmt fyrir dómstólum. Verkalýðsfélag Akraness horfir ekki í krónur og aura við að verja hagsmuni sinna félagsmanna.

Síðastliðinn mánudag óskaði Gylfi Dalmann Aðalsteinsson, dósent við Háskóla Íslands sem kennir nú vinnumarkaðsfræði í meistaranámi, eftir því að formaður Verkalýðsfélags Akraness kæmi og hitti nemendur eina kennslustund. Gylfi hefur í gegnum árin nokkrum sinnum óskað eftir slíkum heimsóknum og að sjálfsögðu hefur formaður félagsins tekið jákvætt í það, en þetta er í sjötta sinn á nokkrum árum sem hann hittir nemendur Gylfa í þessum tilgangi.

Tilgangur heimsóknarinnar var sá að fara yfir stöðu verkalýðshreyfingarinnar, mikilvægi hennar og hin ýmsu mál er lúta að starfsemi hreyfingarinnar. Formaður fór víða í klukkustundarlöngu erindi sínu og eðli málsins samkvæmt fjallaði hann mikið um svokallað Salek samkomulag sem aðilar vinnumarkaðarins og stjórnvöld reyna nú að koma á hér á landi. 

Fram kom í máli formanns að stjórn og trúnaðarráð Verkalýðsfélags Akraness telur að þær hugmyndir sem eru uppi um nýtt vinnumarkaðsmódel að norrænni fyrirmynd séu ein sú mesta ógn sem launafólk og stéttarfélögin hafi staðið frammi fyrir frá stofnun verkalýðshreyfingarinnar. Fór formaður yfir það að VLFA telur að nýtt vinnumarkaðsmódel muni leiða til mikillar skerðingar á samningsfrelsi launafólks og stéttarfélaganna enda snúast hugmyndir um nýtt vinnumarkaðslíkan um að færa ákvörðunartöku um hámarkslaunabreytingar yfir á miðstýrt apparat sem aðilar Salek samkomulagsins eru að móta og koma sér saman um. 

Formaður fór líka yfir að hugmyndir eru uppi um að breyta vinnulöggjöfinni til þess að festa nýtt samningalíkan í sessi. Formaður sagði í erindi sínu að samningsfrelsi launafólks væri hornsteinn íslenskrar verkalýðsbaráttu og það samningsfrelsi megi ekki skerða með nokkrum hætti.

Formaðurinn fór líka yfir skýrslu sem Steinar Holden frá Óslóar Háskóla gerði fyrir aðila Salek samkomulagsins og fjallaði um hugmyndir um nýtt vinnumarkaðsmódel. Í skýrslunni kemur skýrt fram að samningsfrelsi verður stórlega skert ef þessar hugmyndir ná fram að ganga enda gengur nýtt samningalíkan útá að festa í sessi samræmda láglaunastefnu þar sem öllum verður skylt að semja um hóflegar launahækkanir og nefndi formaður í erindi sínu að í skýrslu Steinars hefðu orðin "hóflegar launahækkanir" komið 19 sinnum fyrir í 20 blaðsíðna skýrslu!

Formaður fór líka yfir það vaxtaokur og verðtryggingarofbeldi sem íslenskur almenningur hefur þurft að þola hér á landi í tugi ára með skelfilegum lífsgæðamissi fyrir neytendur. Hann nefndi að það væri gríðarlega mikilvægt að lækka vexti og afnema verðtryggingu á fjárskuldbindingum neytenda. Hann sagði líka að okurvextir og verðtrygging væru ekkert náttúrulögmál heldur mannanna verk sem auðvelt væri að breyta. Vilji, kjarkur og þor er allt sem þarf til þess.

Þetta var afar skemmtileg stund að mati formanns enda fékk hann margar spurningar tengdar hinum ýmsu málefnum hreyfingarinnar. Svona tækifæri eru líka ágæt til að koma upplýsingum á framfæri um starfsemi íslenskrar verkalýðshreyfingar. Starfsemi verkalýðshreyfingarinnar er mikilvæg og verður mikilvæg áfram, en það kom fram í máli formanns að það er grundvallaratriði fyrir forystumenn í verkalýðshreyfingunni að hlusta vel á rödd alþýðunnar því það er alveg morgunljóst að hægt er að gera betur í hinum ýmsu baráttumálum er lúta að hagsmunum launafólks og nægir að nefna í því samhengi kjör þeirra sem hvað höllustum fæti standa í íslensku samfélagi.

Æfing fyrir kjarabaráttu framtíðarinnar, með hnefann á loftiEitt DAB að lokum

Í morgun komu góðir gestir á skrifstofu Verkalýðsfélags Akraness þegar nemendur í 3. bekk Grundaskóla heimsóttu skrifstofu félagsins. Um var að ræða vinnustaðaheimsókn nemenda, en hópurinn ætlaði að heimsækja ýmsa vinnustaði á Akranesi í dag. Tilefnið var þemavinna sem krakkarnir eru að vinna um þessar mundir um Akranes, þar sem þau læra um örnefni og vinna ýmis verkefni í tengslum við heimabæinn sinn.

Hópurinn fékk kynningu á starfsemi félagsins og skoðunarferð um húsið hátt og lágt þar sem þau kíktu inn á allar skrifstofur og í fundarsalinn á efri hæðinni og fengu síðan hressingu á eftir. Það var ekki annað að heyra á þeim en þeim litist dável á aðstöðuna og mörg gátu alveg hugsað sér að vinna hjá Verkalýðsfélaginu þegar þau yrðu stór.

Nú er hafin leynileg rafræn atkvæðagreiðsla um ótímabundið verkfall félagsmanna Verkalýðsfélags Akraness sem starfa á fiskiskipum samkvæmt kjarasamningi Sjómannasambands Íslands og Samtaka fyrirtækja í sjávarútvegi (SFS), en kosningin fer samtímis fram meðal allra aðildarfélaga Sjómannasambands Íslands. Verði verkfall samþykkt mun vinnustöðvun hefjast kl. 23:00 þann 10. nóvember hafi ekki náðst kjarasamningar milli aðila fyrir þann tíma. Athugið að þessi samningur nær ekki til sjómanna á smábátum.

Allir atkvæðisbærir félagsmenn VLFA fá sent bréf um framvindu samningaviðræðna við SFS auk leyniorðs sem nota má við atkvæðagreiðsluna. Einnig er hægt að auðkenna sig með Íslykli eða rafrænum skilríkjum á farsíma þegar atkvæði er greitt og því er hægt að kjósa strax þótt bréfið hafi ekki borist.

Hnappur hefur verið tengdur hér hægra megin á heimasíðunni merktur "Sjómenn - atkvæðagreiðsla um verkfall". Þegar smellt er á hann opnast gluggi sem eftir innskráningu opnar leið að atkvæðaseðli. Einungis félagsmenn á kjörskrá hafa aðgang að atkvæðaseðlinum. Telji félagsmaður sig hafa atkvæðisrétt en er ekki inni á kjörskrá skal hann hafa samband við skrifstofu félagsins eða senda tölvupóst til kjörstjórnar Verkalýðsfélags Akraness á netfangið This email address is being protected from spambots. You need JavaScript enabled to view it..

Eins og flestir landsmenn vita þá hafa sjómenn verið kjarasamningslausir í hartnær 6 ár eða nánar til getið frá 1. janúar 2011. Rétt er að geta þess að sjómannadeild Verkalýðsfélags Akraness sem og flest önnur sjómannafélög fólu Sjómannasambandi Íslands samningsumboð til kjarasamningsgerðar við Samtök fyrirtækja í sjávarútvegi. Þann 24. júní síðastliðinn undirritaði Sjómannasamband Íslands og Samtök fyrirtækja í sjávarútvegi nýjan kjarasamning, en því miður var innihald þess samnings afar rýrt enda var samningurinn kolfelldur af sjómönnum í atkvæðagreiðslu sem lauk 8. ágúst síðastliðinn.

Í ljósi þeirrar stöðu að sjómenn höfnuðu algerlega þeim kjarasamningi sem undirritaður var 24. júní var reynt til þrautar að ná fram viðbót við samninginn en algerlega án árangurs og því hefur nú slitnað uppúr viðræðum við útgerðarmenn. Það er morgunljóst að reiði kraumar meðal sjómanna vegna þess skeytingarleysis sem þeir finna frá Samtökum fyrirtækja í sjávarútvegi og þeirra atriða sem sjómenn telja að þurfi að koma til svo hægt sé að ganga frá nýjum sanngjörnum kjarasamningi.

Þau atriði sem sjómenn telja að þurfi að koma til svo hægt sé að ganga frá nýjum kjarasamningi eru þessi helst:

- Verðlagsmálin
- Mönnunarmálin
- Afnám á nýsmíðaálagi
- Bætur vegna afnáms á sjómannaafslætti
- Hækkun á fatapeningum
- Sjómenn fái orlofs- og desemberuppbætur eins og annað launafólk
- Tekið sé á miklum kostnaði sjómanna vegna fjarskipta

Á þessu sést að það ber töluvert á milli aðila og að sjálfsögðu eru sum þessara mála stærri en önnur eins og verðlagsmálin, en sjómenn vilja að sjálfsögðu að markaðsverð á sjávarafurðum verði látið gilda enda munar allt að 30% á uppgjörsverði til sjómanna og markaðsverði. Sjómenn eru líka afar ósáttir við að þurfa að greiða 10% af sínum launum vegna nýsmíðaálags í 7 ár og það án þess að eignast neitt í viðkomandi skipi.

Bara til að benda á óréttlætið sem felst í þessu nýsmíðaálagi þá er ekkert óalgengt að dregið sé af sjómanni vegna nýsmíðaálagsins sem nemur uppundir 7 milljónum á 7 ára tímabili vegna endurnýjunar á fiskiskipi og það án þess að sjómaðurinn eignist neina hlutdeild í viðkomandi skipi! Þetta væri svipað og ef flugstjórar, flugfreyjur og flugvirkjar greiddu 10% af sínum launum til vinnuveitenda sinna Icelandair og Wow air svo fyrirtækin geti endurnýjað flugflota sinn! Eða að læknar og aðrir heilbrigðisstarfsmenn yrðu látnir greiða 10% af sínum launum vegna byggingar á nýjum Landsspítala. Það sjá allir skynsamir menn að þetta nýsmíðaálag er afar óréttlátt svo ekki sé fastar að orði kveðið.

Það er líka rétt að rifja upp að árið 2009 var sjómannaafslátturinn tekinn af sjómönnum í þrepum og er hann nú allur dottinn út en við það varð sjómannastéttin af 1,6 milljarði án þess að nokkrar bætur kæmu til handa sjómönnum vegna þessa.

Það er líka rétt að vekja sérstaka athygli á því að sjómönnum hefur fækkað gríðarlega á undanförnum árum. Árið 2009 voru þeir um 6.000 en árið 2014 hafði þeim fækkað niður í 4.400. Það liggur fyrir að útgerðarmenn hafa verið að fækka verulega um borð í fiskiskipaflotanum og tala sjómenn núna um að þessi fækkun sé farin að ógna öryggi þeirra um borð í skipunum. Þess vegna leggja sjómenn mikla áherslu á að fá í kjarasamninginn ákvæði sem kveður á um lágmarksmönnun um borð í fiskiskipum.

Að þessu sögðu liggur fyrir að himinn og haf skilur á milli deiluaðila í kjaradeilu sjómanna við útgerðamenn og hafa aðildarfélög Sjómannasambands Íslands því hafið undirbúning að kosningu um allsherjarverkfall sjómanna. Kosning um verkfall hefst eftir helgi og samþykki sjómenn það mun verkfall hefjast 10. nóvember klukkan 23.00. Rétt er að geta þess að um rafræna kosningu verður að ræða og munu kjörgögn berast sjómönnum eftir helgina með leiðbeiningum um hvernig á að kjósa. Sjómannadeild VLFA vill vekja athygli á því að þeir sjómenn sem telja sig ekki hafa fengið kjörgögn í hendurnar fyrir lok næstu viku skulu setja sig í samband við skrifstofu Verkalýðsfélags Akraness. Rétt er að taka það fram að smábátasjómenn heyra ekki undir þennan kjarasamning við Samtök fyrirtækja í sjávarútvegi og eru því ekki að kjósa um verkfall, enda fara kjör þeirra eftir öðrum kjarasamningi.

Sjómannadeild Verkalýðsfélags Akraness skorar á alla sjómenn að kjósa og sýna afstöðu sína í verki með því að segja já við verkfalli því við viljum fá sanngjarnan og réttlátan kjarasamnig við útgerðarmenn, en rétt er að geta þess að útgerðin skilar hreinum hagnaði sem nemur einum milljarði í hverri viku!