Forsvarsmenn HB Granda hafa orðið við ósk stéttarfélagsins um að halda fund með trúnaðarmönnum síldarbræðslunnar, Víkings AK 100 og formanni Verkalýðsfélags Akraness.  Fundurinn verður haldinn í höfuðstöðvum HB Granda í Reykjavík og hefst kl. 09.00.  Verkalýðsfélag Akraness ásamt trúnaðarmönnum fyrirtækisins ætla að reyna að fá svör frá forsvarsmönnum fyrirtækisins um hvernig rekstri Síldar-og fiskimjölsverksmiðjunnar og Víkings AK 100 verði háttað í framtíðinni.  Það er alveg ljóst að það eru blikur á lofti hvað varðar framtíðskipan síldarbræðslunnar og Víkings Ak 100.  Laun sumra starfsmanna síldarbræðslunnar hafa lækkað um allt að 56% á milli ára.  Starfsmenn eru því eðlilega áhyggjufullir yfir þeirri þróun sem átt hefur sér stað að undanförnu, og alger óvissa  ríkir yfir framtíð bræðslunnar.  Einnig eru áhafnameðlimir Víkings verulega  áhyggjufullir yfir framtíð skipsins.  Skipstjóri Víkings Ak ásamt trúnaðarmönnum áttu fund með forstjóra fyrirtækisins í gær.  Fundurinn var haldinn eftir að ákveðið hafi verið að skipið skyldi ekki fara á síldveiðar um miðjan september eins og áformað hafi verið.  Óskuðu skipstjóri Víkings AK og trúnaðarmenn skipsins eftir að fá heimild til að veiða 4000 þúsund tonn af síld til að brúa bilið á milli úthalda.  Þessari ósk skipverjana munu forsvarsmenn HB Granda  væntanlega svara á fundinum á morgun. 

Formaður og varaformaður Frjálslyndaflokksins hafa óskað eftir fundi með formanni Verkalýðsfélags Akraness.  Fundurinn verður í fyrramálið og hefst kl 10.00.   Formaður félagsins mun gera þingmönnunum grein fyrir þeim málum sem stéttarfélagið hefur verið að vinna að undanförnu, t.b málefni er lýtur að erlendu vinnuafli.  En fyrirtæki hafa því miður í auknu mæli náð í erlent vinnuafl í gegnum starfsmannaleigur og hafa eins og dæmin sanna greitt þessum erlendu starfsmönnum langt undir gildandi kjarasamningum, og ekki eru greiddir skattar og skyldur til okkar samfélags af þessum erlendu starfsmönnum.  Þessu hefur stéttarfélagið verulegar áhyggjur af.  Einnig mun formaður félagsins gera þeim félögum grein fyrir áhyggjum félagsins af þeirri þróun sem átt hefur sér stað hjá HB Granda að undanförnu.    Verkalýðsfélag Akraness er afar ánægt  með að þingmenn kjördæmisins skuli fylgjast með starfsemi félagsins eins og raun ber vitni um.  Ekki alls fyrir löngu kom Jóhann Ársælsson þingmaður Samfylkingarinnar í heimsókn á skrifstofu félagsins til að kynna sér starfsemi félagsins.

Verkalýðsfélag Akraness hefur óskað eftir fundi með æðstu stjórnendum HB Granda.  Ástæða þess að félagið óskar eftir fundi með stjórnendum fyrirtækisins er sú mikla óvissa sem upp er komin í einstaka  rekstrareiningum fyrirtækisins hér á Akranesi.  Starfsmenn Síldar og fiskimjölsverksmiðjunar eru til að mynda orðnir verulega uggandi um sinn hag.  Starfsmennirnir eru uggandi vegna þess að ekki hefur neinum afla verið landað hér til bræðslu frá því 18. mars sem þýðir að tekjur starfsmanna síldarverksmiðjunnar hafa dregist verulega saman og alger óvissa virðist ríkja um framhaldið.  Það hafa 5  starfsmenn síldarbræðslunnar af 12 nú þegar hætt störfum útaf þessu óvissu ástandi sem nú ríkir.  Einnig hafa skipverjar á Víkingi AK 100 óskað eftir því við Verkalýðfélag Akraness að það leiti svara  hjá stjórnendum fyrirtækisins um hvert hlutverk skipsins eigi að vera á næstu misserum.  Skipverjar hafa fengið þau boð að ekki verði haldið til síldveiða um miðjan september eins og áformað hafi verið. Þetta óvissuástand geta skipverjar illa sætt sig við. Stjórn Verkalýðsfélag Akraness hefur orðið töluverðar áhyggjur af þeirri þróun sem virðist vera að eiga sér stað hjá HB Granda hér á Akranesi.  Einnig hefur stéttarfélagið áhyggjur af því hver gætir hagsmuna okkar Akurnesinga eftir að þeir bræður Sturlaugur og Haraldur Sturlaugssynir létu af störfum hjá fyrirtækinu.  Vonandi reynast þessar áhyggjur ástæðulausar.  Við skagamenn verðum samt sem áður að vera vel á verði því hér eru gríðarlega miklir hagsmunir í húfi fyrir okkur Akurnesinga, þetta er jú fjöreggið okkar. 

Verkalýðsfélag Akraness bíður eftir drögum að nýjum fyrirtækjasamningi frá eigendum Fangs ehf.  Eins og fram hefur komið hér á heimasíðunni þá hafa forsvarsmenn fyrirtækisins sýnt jákvæðan vilja til að ganga frá fyrirtækjasamningi við Verkalýðsfélag Akraness.  Í þessum fyrirtækjasamningi munu öll helstu kjaraatriði vera sem áunnist hafa í stóriðjusamningum Íslenska járnblendifélagsins eins og launatafla, veikindaréttur, starfsaldurshækkanir, orlofs og desemberuppbætur.  Öll þessi kjaraatriði eru mun betri heldur en gerast í kjarasamningum á hinum almenna vinnumarkaði.  Verkalýðsfélag Akraness á von á því að drög að nýjum  fyrirtækjasamningi muni liggja fyrir í byrjun næstu viku.  Vissulega getur brugðið til beggja vona í þessu máli, en eigendur hafa sýnt mikinn vilja til að klára samning á þessum nótum.

Svæðisvinnumiðlun Vesturlands, Verkalýðsfélag Akraness og Akraneskaupstaður hafa gert þjónustusamning við Ráðgjafarstofu um fjármál heimilanna.

Ráðgjafar Ráðgjafarstofu munu veita endurgjaldslausa fjárhagsráðgjöf til atvinnuleitenda á starfssvæði Svæðisvinnumiðlunar Vesturlands, félagsmanna Verkalýðsfélags Akraness og íbúa Akraneskaupstaðar.  Ráðgjöfinni er ætlað að veita fólki sem á í greiðsluerfiðleikum yfirsýn yfir stöðu fjármála sinna og aðstoð við að gera greiðsluáætlanir, velja úrræði og semja við lánardrottna.

Þeir sem telja sig hafa þörf fyrir ráðgjöf panta viðtalstíma í síma 433-1000 en ráðgjafi verður staddur á Akranesi einn dag í mánuði.  Þeim sem ekki komast í viðtal er boðið upp á símaviðtal þann sama dag og ráðgjafinn verður á Akranesi.

Samningurinn er gerður til reynslu og gildir út árið 2005.

Verkalýðsfélag Akraness hvetur  félagsmenn sína sem þurfa á fjárhagsráðgjöf að halda að nýta sér þessa þjónustu

Verkalýðsfélag Akraness, Svæðismiðlun Vesturlands og Akraneskaupstaður munu á mánudaginn kemur undirrita samning við Ráðgjafastofu heimilanna.  Samningurinn er fólginn í því að ráðgjafar frá Ráðgjafastofunni munu koma einu sinni í mánuði upp á Akranes og veita einstaklingum í fjárhagsvandræðum endurgjaldslausa fjárhagsráðgjöf.  Ráðgjöfinni er ætlað að veita fólki yfirsýn yfir stöðu fjármála sinna og aðstoð við að gera greiðsluáætlanir velja úræði og semja við lánadrottna.   Verkalýðsfélag Akraness er ekki í neinum vafa um þörfina fyrir þjónustu af þessu tagi.  Fyrirkomulagið á þessari þjónustu verður auglýst þegar nær dregur.  En áætlað er að byrja að veita þessa þjónustu 25. ágúst.

Formaður félagsins fundaði með framkvæmdastjóra Fangs ehf. í dag.  Tilefni fundarins var að  ræða hugsanlega útfærslu á fyrirtækjasamningi fyrir starfsmenn Fangs .  Fundurinn í dag var mjög góður og er félagið nokkuð bjartsýnt á að lausn finnist vonbráðar.  Formaður félagsins gerðir þó grein fyrir þeim kröfum sem starfsmenn og stéttarfélagið telja að þurfi klárlega að vera í nýjum fyrirtækjasamningi svo hægt sé að ganga frá nýjum samningi.  Eins og áður sagði þá finnur Verkalýðsfélag Akraness fyrir miklum samnings vilja hjá forsvarsmönnum Fangs.  Verkalýðsfélag Akraness mun samt sem áður standa fast á þeim kjaraatriðum sem skipta starfsmenn hvað mestu máli.  Einnig að almennar kauphækkanir verði með sambærilegum hætti og gerður voru í kjarasamningum Íslenska járnblendifélagsins og Klafa.

Fyrrverandi starfsmenn Knarrar ehf leituðu til Verkalýðsfélags Akraness  vegna vangreiddra launa, en fyrirtækið var tekið til gjaldþrotaskipta í desember 2004.  Óskuðu starfsmennirnir eftir aðstoð stéttarfélagsins við að ná launum sínum út hjá fyrirtækinu.  Ekki reyndust neinar eignir vera í þrotabúi Knarrar ehf.  Verkalýðsfélag Akraness gerði því kröfu á ábyrgðarsjóðlauna fyrir hinum vangreiddu launum starfsmanna.  Á föstudaginn barst  síðan greiðsla frá ábyrgðarsjóðlauna til fyrrverandi starfsmanna Knarrar og náði stéttarfélagið að koma greiðslum til allra starfsmanna fyrir verslunarmannahelgi.  Voru starfsmenn afar þakklátir stéttarfélaginu fyrir þessa þjónustu sem félagið býður upp á.  Þjónustan er starfsmönnunum Knarrar að sjálfsögðu að kostnaðarlausu.  Það getur skipt miklu máli að vera í öflugu stéttarfélagi, eins og dæmin sanna !

Eins og fram hefur komið hér á heimasíðunni þá var Verkalýðsfélag Akraness búið að ákveða að vísa ágreiningi við eigendur Fangs fyrir félagsdóm.  Ágreiningurinn byggðist á því að starfsmenn Fangs hafa unnið eftir sérkjarasamningi Íslenska járnblendifélagsins, en sá samningur rann út 30. nóvember 2004.  Eigendur Fangs halda því fram að kjarasamningur á hinum almenna vinnumarkaði sem undirritaður var 7. mars 2004 gildi fyrir starfsmenn Fangs eftir að sérkjarasamningurinn rann út.   Þessu hefur Verkalýðsfélag Akraness alfarið hafnað og talið fráleitt.  Því ákvað félagið í samráði við starfsmenn að fara með málið fyrir félagsdóm þar sem eigendur fyrirtækisins höfnuðu að ræða við stéttarfélagið um nýjan kjarasamning.  Nú hafa forsvarsmenn Fangs óskað eftir því við Verkalýðsfélag Akraness að ágreiningurinn fari ekki fyrir félagsdóm. Heldur vilja forsvarmenn fyrirtækisins að deiluaðilar setjist niður og reynt verði að ná niðurstöðu sem stéttarfélagið og starfsmenn geta sætt sig við.

Verkalýðsfélag Akraness hefur verið að aðstoða eigendur Spútnik báta við að sækja um dvalar og atvinnuleyfi fyrir Pólverjana fimm.  Félagið gekk frá ráðningarkjörum fyrir Pólverjana í gær og verður tímakaupið í dagvinnu 948 krónur og tímakaupið í yfirvinnunni verður 1.587.  Eins fram hefur komið hér á heimasíðunni þá var haft eftir Pólverjunum sjálfum að þeir væru með 320 kr. á tímann að jafnaði.  Með þessum nýja ráðningarsamningi við eigendur Spútnik báta hækka Pólverjarnir um 196.2% í launum.  Er Verkalýðsfélag Akraness afar stolt af því hvernig mál þetta endaði.  Einnig vill félagið þakka Ingólfi Árnasyni stjórnarmanni Spútnik báta fyrir að hafa viljað leysa málið jafn vel og raunin varð.   Það er og verður stefna Verkalýðsfélags Akraness að verja hagsmuni okkar félagsmanna eins og kostur er, ekki mun verða horft í tíma né aura í þeirri hagsmunagæslu.