Eins og fram kom hér á heimsíðunni í gær þá hefur félagið á undanförnum dögum verið að rannsaka málefni er lúta að félagslegum undirboðum gagnvart erlendum starfsmönnum sem starfa hér í nágrenni við Akraness.

Formaður félagsins ásamt pólskum túlki og starfsmanni VLFA voru búin að funda með þeim erlendu starfsmönnum sem um ræðir í tvígang og á þeim fundum kom í ljós að verið var að brjóta gróflega á þeirra réttindum.  Í kjölfarið veittu erlendu starfsmennirnir  Verkalýðsfélagi Akraness fullt og ótakmarkað umboð til að gæta sinna hagsmuna gagnvart vinnuveitanda sínum.

Formaður félagsins var ekki tilbúinn í gær að upplýsa um hvaða fyrirtæki væri að ræða þar sem félagið var enn að rannsaka málið og reyna að fá fyrirtækið til að afhenda gögn t.d. launaseðla og tímaskýrslur.  Hins vegar var viðtal við Hansínu B. Einarsdóttur á fréttastofu Ruv í gær þar sem hún staðfesti að það væri Hótel Glymur sem Verkalýðsfélag Akraness væri að rannsaka, en Hansína er hótelstjóri hjá Glymi.

Hægt er að lesa meira með því að smella á meira.

Hansína B Einarsdóttir sagði í áðurnefndu viðtali við fréttastofu að ásakanir um félagsleg undirboð væru fleipur. Hún sagði ráðningarsamninga staðfesta af Vinnumálastofnun og ef Vilhjálmur héldi því fram að verið væri að svindla á starfsfólki væri hann í raun að draga um hæfni starfsmanna Vinnumálastofnunar í efa.

Þessum ummælum er fljótsvarað. Rétt er það að Vinnumálastofnun staðfestir að ráðningarsamningar uppfylli kjarasamninga. Í þessu tilfelli er það hins vegar svo að þeir ráðningarsamningar sem Glymur skilaði inn til Vinnumálastofnunar eru alls ekki þeir sömu og starfsfólkið er að vinna eftir, enda hefur lögfræðingur Samtaka Atvinnulífsins staðfest við formann að ráðningarkjör starfsmanna Glyms séu of lág.

Í viðtalinu sagði hótelstýran einnig að formaður VLFA hafi ítrekað ónáðað starfsmenn sína, m.a. bankað upp á í þeirra bústað. Átaldi hún vinnubrögð formanns og sagði þau algjörlega ólíðandi.

Hið sanna er að Verkalýðsfélag Akraness fékk í síðustu viku alvarlega ábendingu um að verið væri að brjóta gróflega á þessu fólki og af þeim sökum setti formaður sig í samband við starfsmennina. Átti formaður og starfsmaður félagsins mjög góða fundi með starfsmönnum og á þeim fundum fékk formaður fjölmargar spurningar er lúta að réttindum starfsfólksins. Formaður fékk afhent þau gögn sem þau höfðu og veittu þau einnig félaginu, eins og áður hefur komið fram, fullt umboð til að gæta sinna hagsmuna gagnvart atvinnurekanda sínum.

Rétt er að geta þess að upphaf þessa máls má rekja til 24. ágúst sl. en þá barst tölvupóstur frá Póllandi þar sem óskað var eftir því að skoðað væri hvort verið væri að brjóta á starfsmönnum Hótelsins. Hægt er að skoða þennan tölvupóst með því að smella hér. Verkalýðsfélag Akraness lét þá þegar Stéttarfélag Vesturlands vita af þessu máli þar sem Glymur er á félagssvæði þess félags. Stóð formaður í þeirri trú að málefni starfsmannanna væru í réttum farvegi þar. Formanni er kunnugt um að Stéttarfélag Vesturlands hefur einnig verið að skoða málið á undanförnum vikum. Það var svo eftir þá alvarlegu ábendingu sem barst í liðinni viku að formaður fór sjálfur og hitti fólkið og eftir það fór boltinn fyrst að rúlla.

Ummæli Hansínu B Einarsdóttur um fleipur formanns dæma sig algerlega sjálf. Til að sýna fram á það ætlar VLFA að birta ráðningarsamning sem starfsmönnum VLFA var afhentur á þessum fundum.  Í þeim ráðningarsamningi sem gerður er 16. nóvember 2007 kemur fram að dagvinnulaun eru 635 kr. á tímann, hins vegar fái starfsmaðurinn einungis 50% af þeirri upphæð fyrsta mánuðinn, sem sagt 317 kr. á tímann. Hægt er að skoða ráðningarsamninginn með því að smella hér.

Formaður VLFA vill áætla að afbrotafræðingurinn og hótelhaldarinn Hansína B Einarsdóttir eigi að vita að tímakaup upp á 317 kr. stenst hvorki íslenska kjarasamninga né 7. gr. laga  um stéttarfélög og vinnudeilur.  Einnig á afbrotafræðingurinn og hótelhaldarinn að vita að það stenst ekki lög að láta starfsmann vinna 180 tíma á mánuði og það í þrjá og  hálfan mánuð án þess að fá nein laun, einungis fæði og húsnæði.  Þessu til viðbótar eiga forsvarsmenn Glyms að vita að fyrirtækjum ber að greiða yfirvinnukaup eftir að starfsmenn hafa uppfyllt dagvinnuskyldu sína.  Að sögn starfsmanna Glyms þá fengu þeir ekki greidda yfirvinnu þegar þeir voru búnir að uppfylla dagvinnuskylduna, fyrr en í nóvember á þessu ári.  Að sögn starfmanna voru þeir að vinna þetta á bilinu 250 og uppí 320 tíma á mánuði og því ljóst að hér sé um gróft brot á kjarasamningum að ræða.

Í morgun, þegar starfsmenn VLFA mættu til vinnu, beið þeirra fax frá Hótel Glymi þar sem kom fram að starfsmenn væru búnir að afturkalla það umboð sem Verkalýðsfélag Akraness hafði. Það er alveg ljóst í huga formanns félagsins að hér hafa starfsmenn verið beittir þvingunum til að afturkalla umboð félagsins. Telur afbrotafræðingurinn og hótelhaldarinn að með því að afturkalla umboð félagsins að þessu máli þá komi brotin ekki í ljós? Nei, slíkt mun Verkalýðsfélag Akraness ekki láta gerast og mun því afhenda Stéttarfélagi Vesturlands öll þau gögn sem félagið hefur aflað sér og sýna fram á þau grófu brot sem átt hafa sér stað á undanförnum mánuðum. Félagið hefur undir höndum undirritaðan vitnisburð starfsmanna þar sem fram kemur hvaða kjaraatriði það eru sem fyrirtækið hefur verið að brjóta gegn. Hægt er að skoða íslenska þýðingu þess vitnisburðar með því að smella hér.

Það er alveg ljóst að Verkalýðsfélag Akraness mun fylgjast grannt með því að þeir starfsmenn sem brotið hefur verið á muni fá leiðréttingu sinna launa

Félagsleg undirboð verða ekki liðinVerkalýðsfélag Akraness hefur nú til rannsóknar mál nokkurra erlendra félagsmanna sinna. Þeir hafa veitt félaginu fullt og ótakmarkað umboð til að gæta sinna hagsmuna gagnvart vinnuveitanda sínum.

Starfsmenn Verkalýðsfélags Akraness hafa fundað með erlendu starfsmönnunum að undanförnu og aflað gagna í þessu máli. Samkvæmt upplýsingum frá starfsmönnum og fyrirliggjandi gögnum þá liggur fyrir að hér er um mjög alvarleg brot að ræða.

Verkalýðsfélag Akraness hefur t.d. nýlegan ráðningarsamning undir höndum, þar sem fram kemur að dagvinnukaup starfsmannsins er 635 kr. á tímann. Hins vegar kemur fram í ráðningarsamningnum að starfsmanninum sé skylt að vinna fyrsta mánuðinn til reynslu á 50% launanna, sem gerir 317 kr. á tímann. Á þessu sést að hér er um gróft brot að ræða.

Einn starfsmaður fyrirtækisins tjáði starfsmönnum VLFA að á síðasta ári hefði hann unnið í þrjá og hálfan mánuð, án þess að fá nein laun fyrir. Hann fékk einungis frítt fæði og húsnæði á þessu tímabili. Starfsmaðurinn stóð í þeirri trú að þetta væri eðlilegt þar sem hann væri að læra í faginu. Í dag er hann með 659 kr. á tímann, sem er klárlega undir lágmarkslaunum.

Fram kom hjá starfsmönnunum að þó svo að þau ynnu meira en 173 tíma í mánuði og jafnvel upp í 300 tíma á mánuði þá fengu þau einungis greidd dagvinnulaun og vaktarálag, en ekki yfirvinnu eins og ber að gera eftir að starfsmaðurinn hefur uppfyllt dagvinnuskyldu sína.

Einnig kom fram hjá starfsmönnunum að þeir telji að rauðir dagar sem falla á virka daga hafi ekki verið greiddir eins og kjarasamningar kveða á um. 

Starfsmenn komu líka með fyrirspurnir varðandi hvíldarákvæði og orlofs- og desemberuppbætur, en starfsmenn tóku fyrst eftir slíkum greiðslum í síðasta mánuði. 

Formaður hefur undir höndum samning sem segir að starfsmenn skuli greiða fyrir fæði og húsnæði 25.000 kr. á mánuði. Hins vegar segja starfsmenn að fyrirkomulag sé með þeim hætti að starfsmenn greiði 25.000 á mánuði plús það að 35 tímar eru dregnir af þeim í hverjum mánuði til viðbótar. Þannig að starfsmaður getur verið að greiða yfir 70.000 krónur fyrir fæði og húsnæði á mánuði. Samt er þess getið í kjarasamningi að starfsmenn skuli hafa frítt fæði á meðan þeir eru að störfum.

Starfsmenn hafa ítrekað óskað eftir því að fá launaseðla sína afhenta, en þrátt fyrir ítrekaðar óskir þá hefur það ekki gengið eftir hingað til. Starfsmenn hafa einungis fengið október og nóvember launaseðla.  Þegar starfsmenn fá ekki launaseðla eins og kjarasamnmingar kveða á um, þá gerir það þeim mjög erfitt að fylgjast með hvort verið sé að greiða eftir þeim kjarasamningum sem í gildi eru.

Á þeirri forsendu hefur Verkalýðsfélag Akraness nú kallað eftir launaseðlum, tímaskriftum og öðrum hugsanlegum samningum sem gerðir hafa verið við starfsmenn. Þegar þetta er skrifað hefur fyrirtækið ekki orðið við þeirri ósk. Lögmaður félagsins hefur haft málið til skoðunar og einnig hefur Verkalýðsfélag Akraness gert Vinnumálastofnun grein fyrir þessu máli og mun félagið upplýsa Vinnumálastofnun um framvindu þess.

Við rannsókn málsins kom ennfremur í ljós að engir starfsmannanna eru með dvalarleyfi hér á landi, og eru þar af leiðandi að greiða sína skatta og sín gjöld án þess að njóta þeirra réttinda sem þeim annars bæri.

Krafa Verkalýðsfélags er hvellskýr í þessu máli, það er að launaseðlar og tímaskýrslur verði skoðaðar aftur í tímann og starfsmenn fái leiðréttingu á sínum launum samkvæmt þeirri úttekt sem gerð verður. Það er algjörlega ljóst í huga formanns félagsins að þar getur verið um umtalsverðar fjárhæðir að ræða miðað við þau gögn sem liggja fyrir í málinu.

Félagið mun fylgja þessu máli eftir af fullum þunga því það er með öllu ólíðandi að félagsleg undirboð af þessum toga séu látin viðgangast á íslenskum vinnumarkaði.  Háttsemi af þessum toga er að grafa undan íslenskum vinnumarkaði og ógnar því markaðslaunakerfi sem hér er í gildi.

Rétt í þessu var að ljúka fundi sem formaður félagsins átti með bæjarráði Akraneskaupstaðar. Tilefni fundarsins voru þær sértæku launahækkanir sem sveitarfélögin á höfuðborgarsvæðinu hafa verið að veita sínum starfsmönnum að undanförnu. Þær sértæku aðgerðir hafa fyrst og fremst beinst að þeim tekjulægstu og hafa laun einstaka hópa t.d. skólaliða og starfsmanna og leikskólum, hækkað um 6 - 16 þúsund á mánuði.

Einnig hafa sveitarfélögin á höfuðborgarsvæðinu verið að veita starfsmönnum sínum ýmis hlunnindi eins og líkamsræktarkort og annað slíkt.

Verkalýðsfélag Akraness skoraði á bæjarráð að greiða starfsmönnum Akraneskaupstaðar 30.000 kr. jólabónus líkt og starfsmenn Hafnarfjarðarbæjar fá. Einnig skoraði Verkalýðsfélag á bæjarráð að skoða með jákvæðum hug þær launahækkanir sem beinst hafa að tekjulægstu starfsmönnum sveitarfélaganna á höfuðborgarsvæðinu, enda er það með öllu ólíðandi að laun fyrir sambærileg störf séu lakari á landsbyggðinni en á höfuðborgarsvæðinu. Við slíkt verður ekki unað.

Bæjarráð ætlar að skoða þessi mál og nú er bara að vona að þeir fylgi fordæmi sveitarstjórnarmanna á höfuðborgarsvæðinu og geri vel við sína starfsmenn öllum til heilla.

Í morgun var fundað með Samtökum Atvinnulífsins vegna þeirra sérkjarasamninga sem Verkalýðsfélag Akraness er aðili að, þ.e.a.s. sérkjarasamningur starfsmanna Síldarbræðslunnar og einnig sérkjarasamningur starfsmanna Spalar.

Farið var yfir þær kröfur sem starfsmenn áðurnefndra fyrirtækja hafa lagt fram og viðbrögð fengin frá Samtökum Atvinnulífsins. Það er mat formanns eftir þessa fundi, að töluverð gjá sé á milli samningsaðila og er ljóst að ef takast á að ganga frá nýjum kjarasamningum fyrir áramót þá þurfi nánast kraftaverk til.

Næsti fundur hefur ekki verið ákveðinn, hvorki vegna sérkjarasamnings bræðslumanna né starfsmanna Spalar, en að öllum líkindum verður fundað aftur fyrir jól.

Eins fram hefur komið hér á heimasíðunni þá óskaði Verkalýðsfélag Akraness eftir fundi með bæjarráði vegna þeirra sértæku aðgerða í launamálum sem sveitarfélögin á höfuðborgarsvæðinu hafa verið að grípa til á undanförnum dögum og vikum. Formaður hefur verið boðaður til fundar með bæjarráði á föstudaginn nk. kl. 16:30 vegna þessara mála.

Það liggur fyrir að Kópavogur, Hafnarfjörður og Reykjavíkurborg hafa verið að grípa til launahækkana til þeirra sem eru með hvað lægstu launin og nægir þar að nefna störf við umönnun, á leikskólum sem og í grunnskólum.

Það liggur einnig fyrir að Hafnarfjarðarbær hefur hækkað laun leiðbeinenda á leikskólum og skólaliða og nema þær hækkanir frá 6.000 upp í 16.000 krónur á mánuði.

Einnig liggur fyrir að Hafnarfjarðarbær ætlar að láta alla sína starfsmenn fá 30.000 króna jólauppbót, 16.000 kr. styrki til líkamsræktar og hálfsárs sundkort á einungis 1.000 krónur. Í Fréttablaðinu ekki alls fyrir löngu sagði Ellý Erlingsdóttir, forseti bæjarstjórnar Hafnarfjarðar, Hafnafjörð vilja vera til fyrirmyndar í launamálum sinna starfsmanna.

Á þeirri forsendu mun formaður Verkalýðsfélags Akraness spyrja bæjarráð Akraness hvort þeir ætli að fylgja fordæmi sveitarfélaganna á höfuðborgarsvæðinu hvað varðar þær sértæku aðgerðir sem sveitarfélögin hafa veri að grípa til vegna launamála sinna starfsmanna. Formaður er ekki í neinum vafa um að bæjarstjórn Akraness vill vera til fyrirmyndar í þessum málum eins og t.a.m. Hafnarfjarðarbær hefur verið.

Það er með öllu óþolandi að launakjör á höfuðborgarsvæðinu séu með allt öðrum hætti en gengur og gerist fyrir sömu störf á landsbyggðinni. Það er skoðun formanns að slíkt eigi ekki að viðgangast og mun hann beita sér af fullum þunga fyrir því að laun starfsmanna sveitarfélaga á landsbyggðinni verði samræmd launakjörum á höfuðborgarsvæðinu, enda eru allir starfsmenn þessara sveitarfélaga að vinna eftir sama kjarasamningi.

Í dag verður jólablaði Verkalýðsfélags Akraness dreift til allra Akurnesinga og nærsveitunga, sem og í fyrirtæki og stofnanir á svæðinu.

Fréttablaðið er mjög vandað og hefur aldrei verið jafn stórt og í ár, en blaðið er fjórum síðum stærra en vant hefur verið.

Eðli málsins samkvæmt er mest fjallað um komandi kjarasamninga í fréttablaðinu. T.a.m. er haft eftir formanni félagsins að sú kröfugerð sem Starfsgreinasambandið hefur lagt fram vegna komandi kjarasamninga á hinum almenn vinnumarkaði sé hófstillt og hvetur formaður til þess að ekki verði gefinn neinn afsláttur af þeirri kröfugerð sem lögð hefur verið fram til Samtaka atvinnulífsins.

Hægt er að lesa fréttablaðið með því að smella á myndina sem fylgir þessari frétt.

Formaður fór í vinnustaðaheimsókn til Norðuráls síðasta föstudag, en stjórn félagsins leggur mikla áherslu á að vera í nánu og góðu sambandi við félagsmenn sína og var þessi vinnustaðaheimsókn einn liður í þeirri vinnu.

Á föstudaginn var það C vaktin sem formaður heimsótti og fór formaðurinn víða um verksmiðjuna og tók tugi starfsmanna tali en heimsóknin stóð í tæpa þrjá tíma.

Þau mál sem brunnu helst á starfsmönnum voru öryggis og launamál og fékk formaður fjölmargar spurningar þessum málum tengdar.  Formaður er ekki í neinum vafa um að öryggismál Norðuráls verða tekin föstum tökum á næstu misserum. Sérstaklega í ljósi þess að öll orka fyrirtækisins á liðnum árum hefur farið í stækkun verksmiðjunnar, nú er þeim kafla hins vegar lokið.  Á þeirri forsendu munu forsvarsmenn Norðurál geta einbeitt sér mun betur að þeim þáttum er lúta að innri kjarastarfsemi fyrirtækisins t.d. öryggismálum.

Fram kom í máli formanns að í næstu kjarasamningum verður gerð skýlaus krafa um að minnka launamuninn  á milli Alcan og Norðuráls enn frekar.  Enda er það með öllu óásættanlegt að það skuli ríkja launamunur á milli verkasmiðja í sömu starfsgrein.

Þessi heimsókn var feikilega vel heppnuð og mun formaður stefna að því að heimsækja allar vaktirnar á næstu vikum.  Í dag starfa um 500 manns hjá Norðuráli og eru um 400 þeirra félagsmenn Verkalýðsfélags Akraness. 

Í lok árs 2005 gerði stjórn Verkalýðsfélags Akraness mjög góðan samning við Landsbankann á Akranesi um öll bankaviðskipti félagsins. Í einu ákvæði samningsins er kveðið á um að Landsbankinn greiði Verkalýðsfélagi Akraness kr. 500.000 í sérstakan styrktarsjóð sem nota á til að styrkja góðagerðarmál á félagssvæði VLFA.

Þetta er í annað sinn sem stjórn félagsins útdeilir úr styrktarsjóðnum.  Þau félög og samtök sem fá styrki úr sjóðnum í ár eru:

• Styrktar-og líknarsjóður Akraneskirkju 100.000 kr.
• Björgunarfélag Akraness unglingastarf 100.000 kr.
• Mæðrastyrksnefnd Akraness               100.000 kr.
• Skátafélagið Akranesi unglingastarf     100.000 kr.
• Sambýlið Akranesi Vesturgötu              50.000 kr.
• Sambýlið Laugabraut                           50.000 kr

Undanfarna mánuði hefur formaður félagsins verið með kynningarfundi fyrir starfsmenn Íslenska járnblendifélagsins um réttindi og skyldur starfsmanna Íj og í dag voru það starfsmenn á C vakt sem fengu sína kynningu.  Formaður er búinn að halda kynningarfundi með öllum vöktunum og nú á einungis eftir að funda með dagmönnunum.

Þessir kynningafundir hafa heppnast alveg ótrúlega vel og hafa starfsmenn látið mjög vel af þessum fundum og ávalt hafa skapast skemmtilegar umræður um hin ýmsu mál er lúta að starfi starfsmanna Íslenska járnblendifélagsins.

Þessir fundir hafa klárlega skilað árangri og sem dæmi má nefna að á þeim hefur formaður farið ítarlega yfir bónuskerfi starfsmanna sem því miður hefur ekki verið að skila þeim árangri sem samningsaðilar vonuðust til þegar bónuskerfið var sett á.  Það eru þættir í bónuskerfinu sem starfsmenn geta haft áhrif á og hefur formaður farið yfir þá þætti á fundunum sem haldir hafa verið.  Það hefur skilað þeim árangri að bónusinn hefur aldrei mælst jafnhár eins og síðustu tvo mánuði.

Fundartörnin við Samtök atvinnulífsins vegna kjarasamnings á hinum almenna vinnumarkaði hélt áfram í dag.  Þau málefni kjarasamningsins sem voru til umfjöllunar í dag voru m.a. sérmál fiskvinnslunnar, ræstingin og málefni er lúta þjónustusviði samningsins.  Á morgun verður hins vegar fundað um sérmál er lúta að iðnaðarkafla kjarasamningsins.

Þrátt fyrir nokkuð stíf fundarhöld síðustu daga þá er ekkert byrjað að ræða um launaliði samningsins og ekki er vitað á þessari stundu hvenær þær viðræður muni hefjast.

Í Morgunblaðinu í dag er talað um að efasemdir séu innan verkalýðshreyfingarinnar um að það takist að klára samninga fyrir jól.  Erfitt er að leggja mat á slíkar vangaveltur þar sem samningsaðilar eru ekki farnir að ræða aðalmálið sem er að sjálfsögðu launaliðir kjarasamningsins.  En vonandi næst að ganga frá nýjum kjarasamningi í desember eins og viðræðuáætlun samningsaðila gerir ráð fyrir. 

Eins og fram hefur komið hér á heimasíðunni þá er VLFA með tvo sérkjarasamninga sem eru lausir nú um áramótin, annarsvegar vegna starfsmanna síldarbræðslunnar og hins vegar vegna starfsmanna gjaldskýlisins við Hvalfjarðagöng.  Formaður hefur lagt fram kröfugerð vegna þessara samninga til Samtaka atvinnulífsins og er áformað að funda fljótlega vegna þessara samninga með forsvarsmönnum SA.