• Þjóðbraut 1, 300 Akranes
  • Mán - Fim: 8:00 - 16:00, Föstudaga 08:00 - 15:15
Subscribe to this RSS feed
14
 Feb

Staða kjaraviðræðna

Aðalsamninganefnd Starfsgreinasambands Íslands fundaði í allan gærdag vegna nýs kjarasamnings á hinum almenna vinnumarkaði í húsakynnum ríkissáttasemjara.

Samninganefndin mun koma aftur kl. 10 í dag og liggur fyrir að menn eru að hefja lokakaflann í samningalotunni. Hins vegar er ljóst að nokkur atriði standa ennþá útaf sem erfitt getur reynst að ganga frá. Þess vegna er alls óvíst á þessari stundu hvenær skrifað verður undir nýjan kjarasamning.

Hörð gagnrýni Verkalýðsfélags Akraness og ASÍ skilaði árangri
11
 Feb

Hörð gagnrýni Verkalýðsfélags Akraness og ASÍ skilaði árangri

Það er morgunljóst sú harða gagnrýni sem Verkalýðsfélag Akraness og ASÍ hafa haldið uppi á forsvarsmenn HB Granda vegna brota á lögum um hópuppsagnir skilaði árangri.

Uppsagnir HB Granda á yfir 60 starfsmönnum fyrirtækisins á Akranesi hafa verið til umfjöllunar í fjölmiðlum að undanförnu. Komið hefur fram sú afstaða Alþýðusambands Íslands að uppsagnir fyrirtækisins og hvernig að þeim var staðið hafi brotið í bága við lög um hópuppsagnir.

Eftir að umfjöllun um fyrirhugaðar uppsagnir HB Granda hófst og gagnrýni verkalýðshreyfingarinnar á framgöngu fyrirtækisins var látin í ljós, hafa orðið umtalsverðar breytingar á afstöðu fyrirtækisins til málsins. Þær breytingar birtast með skýrum hætti í því samstarfi sem nú hefur tekist með forsvarsmönnum HB Granda, trúnaðarmönnum, Verkalýðsfélagi Akraness og Vinnumálastofnun um endurmenntunaráætlun og ráðgjöf til þeirra sem missa vinnuna þegar uppsagnir starfsfólks koma til framkvæmda. Viðkomandi starfsmönnum verður veitt aðstoð við atvinnuleit, aðgengi að viðeigandi námskeiðum, gerð ferilsskrár og greiningu áhugasviðs síns.

Full ástæða er til að fagna þessu framtaki og því samstarfi sem tekist hefur, enda er það mjög í anda laganna um hópuppsagnir og markmiða þeirra.

Þá liggur fyrir að í framhaldi af þeim ágreiningi og deilum sem ítrekað hafa komið upp um framkvæmd laga um hópuppsagnir og hlutverk stjórnvalda í þeim efnum hefur félags- og tryggingamálaráðherra ákveðið að kanna í samráði við aðila vinnumarkaðarins hvort rétt sé að styrkja reglur um hópuppsagnir, þ.m.t. að skýra og taka af öll tvímæli um hvernig standa á að framkvæmd þeirra.

Að mati ASÍ felur það í sér að skýra þurfi hvaða ferli upplýsinga og samráðs þurfi að fara fram áður en ákvörðun er tekin um uppsagnir og tilkynning um þær sendar vinnumiðlun þannig að fullnægjandi teljist. Jafnframt verði tekin af tvímæli um hvaða stjórnvald skuli fara með eftirlit og framkvæmd laganna.

Alþýðusamband Íslands telur að með því sem að framan greinir hafi náðst mikilvægur árangur í málinu. Markmiðið með afskiptum ASÍ og aðildarfélaga þess af framkvæmd laganna um hópuppsagnir er að tryggja að launafólk njóti þeirra réttinda sem lögin kveða á um og sjá til þess að stjórnvöld grípi í taumana ef útaf er brugðið.

Í ljósi framanritaðs hefur Verkalýðsfélag Akraness í samráði við ASÍ ákveðið að aðhafast ekki frekar varðandi hugsanleg málaferli vegna uppsagna hjá HB Granda á Akranesi.

08
 Feb

Fundað um málefni innflytjenda

Formaður félagsins átti fund í morgun með félagsmálastjóra Akraneskaupstaðar og tveimur öðrum fulltrúum bæjarins vegna málefna innflytjenda sem búa á Akranesi. 

Í dag eru um 500 erlendir félagsmenn í Verkalýðsfélagi Akraness og hefur þeim farið fjölgað hratt á undanförnum tveimur árum. Langstærsti hluti erlendra félagsmanna VLFA kemur frá Póllandi.

Hugmyndin með þessum fundi var fyrst og fremst sú að efla samstarf þeirra aðila sem eru að vinna að málefnum innflytjenda á svæðinu.  Var rætt um að skipa samstarfshóp þeirra aðila sem vinna hvað mest með innflytjendum og var rætt um að funda reglulega þar sem aðilar gætu skipst á hinum ýmsu upplýsingum er varða málefni innflytjenda á Akranesi.

Formaður fór á fundinum í morgun yfir þá aðstoð og þjónustu sem Verkalýðsfélag Akraness hefur verið að veita sínum erlendu félagsmönnum og er sú aðstoð og þjónusta æði margbreytileg.  Félagið hefur t.d. innheimt á síðustu þremur árum rúmar 6,2 milljónir vegna brota og félagslegra undirboða á erlendu verkafólki. 

Því miður eru enn til atvinnurekendur sem misbjóða þessum erlendu félagsmönnum okkar gróflega og með slíku háttarlagi er um leið verið að gjaldfella launakjör íslenskra verkamanna, við slíkt verður ekki unað.  Verkalýðsfélag Akraness hefur tekið og mun taka mjög hart á þeim óprúttnu atvinnurekendum sem ekki geta farið eftir íslenskum kjarasamningum og þeim leikreglum sem gilda á íslenskum vinnumarkaði.

Það er alveg ljóst að það má alltaf gera betur í þessum málefnum og þess vegna er þetta framtak bæjaryfirvalda um að efla samstarf vegna innflytjenda hið besta mál.

07
 Feb

Greiðslur úr starfsmenntasjóðum til félagsmanna námu vel á fimmtu milljón

Verkalýðsfélag Akraness, sem er aðili að starfsmenntsjóðum Landsmenntar, Ríkismenntar, Sveitamenntar og Sjómenntar, greiddi vel á fimmtu milljón í styrki á síðastliðnu ári og er um að ræða umtalsverða aukningu frá árinu áður.

Þeir styrkir sem Verkalýðsfélag Akraness greiddi til sinna félagsmanna voru m.a. vegna íslenskukennslu, tölvunámskeiða, aukinna ökuréttinda, framhaldsnáms, háskólanáms, starfsnáms og tungumálanáms.

Stjórn félagsins er afar ánægð að sjá hversu duglegir félagsmenn eru að nýta sér styrki úr áðurnefndum sjóðum. Markmiðið er að félagsmenn verði ennþá duglegri við að sækja námskeið á árinu sem nú er nýhafið.

Það sem Samtök atvinnulífsins hafa verið að bjóða er allt of rýrt
06
 Feb

Það sem Samtök atvinnulífsins hafa verið að bjóða er allt of rýrt

Stjórn félagsins kom saman til fundar í gærkveldi og voru kjaraviðræður við Samtök atvinnulífsins og uppsagnir starfsmanna HB Granda helstu málin sem voru til umræðu.

Farið var ítarlega yfir málefni HB Granda og harmaði stjórn félagsins að til þessara uppsagna hafi þurft að koma. Er það mat stjórnar að þessi ákvörðun sé afar undarleg sérstaklega í ljósi þess að öll hagræðissjónarmið segja að hagkvæmara sé fyrir fyrirtækið að reka landvinnsluna hér á Akranesi.  Fram kom í máli stjórnarmanna að það sé með öllu óþolandi að þeir sem hafa tímabundinn umráðrétt yfir auðlindum hafsins skuli ekki sýna þá samfélagslegu ábyrð sem slíku valdi fylgir. 

Það getur ekki verið eðlilegt að verkafólk í fiskvinnslu sé eitt og sér látið axla ábyrgð á þeim niðurskurði sem orðið hefur á aflaheimildum í þorski á undanförnum árum eins hefur gerst vítt og breitt um hinar dreifðu byggðir þessa lands að undanförnu.  Það ábyrgðarleysi sem kvótagreifar þessa lands hafa sýnt íslensku þjóðinni á undanförnum mánuðum kallar á algjöra uppstokkun á úthlutun á aflaheimildum.  Enda hefur það fiskveiðistjórnunarkerfi og framsalskerfi sem hér hefur verið við lýði í 24 ár nánast lagt heilu byggðarlögin í rúst. 

Kjaramálin voru einnig mikið til umræðu og kom fram í máli stjórnarmanna að þolinmæðin er gjörsamlega á þrotum komin.  Farið var yfir tillögur sem SA hefur verið að kynna að undanförnu og féllu þær tillögur í grýttan jarðveg hjá stjórn félagsins.  Það var mat stjórnar að tölurnar í launaliðnum sem SA hafa boðið séu einfaldlega of lágar.  Einnig kom fram skýr krafa um að nýr kjarasamningur þyrfti að gilda frá þeim tíma sem sá eldri hafi runnið út, sem var eins flestir vita 1. janúar sl.  Einnig kom fram að mönnum hugnast það alls ekki að þeir félagsmenn sem hafa náð kauphækkunum á sínum eigin verðleikum á tímabilinu 1. mars 2007 til 1. mars 2008 ættu lítinn sem eigan rétt til kauphækkana í komandi kjarasamningum.

Það er því niðurstaða stjórnar VLFA að það sem SA hefur verið að bjóða sé einfaldlega alltof rýrt til að hægt sé að ganga frá nýjum kjarasamningi. 

Öskudagur 2008
06
 Feb

Öskudagur 2008

Eins og venja er á öskudaginn er mikið líf og fjör í bænum í dag. Meðal annarra má sjá síamstvíbura, grímuklædda riddara og skrímsli af ýmsum stærðum og gerðum þræða götur bæjarins og syngja hástöfum fyrir sælgæti eða smádóti í pokann sinn.

Hingað á skrifstofu Verkalýðsfélags Akraness hafa ýmsar furðuverur lagt leið sína síðan snemma í morgun og að sjálfsögðu verið vel tekið af starfsfólki skrifstofunnar. Gaman hefur verið að sjá hversu mikla vinnu krakkarnir hafa greinilega lagt í búningargerð og söngþjálfun og eru krökkunum færðar hinar bestu þakkir fyrir sönginn og skemmtunina.

Page 335 of 490

Fréttir

Nýjar fréttir

Verkalýðsfélag Akraness

Verkalýðsfélag Akraness
Kt. 680269-6889

Til skrifstofunnar geta félagsmenn leitað eftir
upplýsingum og annarri aðstoð.

  • Þjóðbraut 1,

    300 Akranes

  • Sími:

    4309900

  • Netfang:

    skrifstofa@vlfa.is

Afgreiðslutími

Mánudag-fimmtudag kl. 08:00-16:00 og föstudaga kl. 8:00-15:15. Utan afgreiðslutíma félagsins er hægt að ná í formann félagsins, Vilhjálm Birgisson, í síma 865-1294.

Nýjar fréttir

Style Switcher
Layout Style
Predefined Colors
Background Image