Formaður hélt fund með starfsmönnum Heilbrigðisstofnunar Vesturlands í dag þar sem farið var yfir stöðuna í kjaramálum félagsins við ríkið.

Það er ljóst að verulegrar óþreyju er farið að gæta hjá starfsmönnum eðlilega enda hartnær eitt ár liðið frá því að kjarasamningurinn rann út.

Formaður fór yfir stöðuna og kom fram í máli hans að strandað hafi á viðræðum er lúta að breytingum á styttingu vaktavinnu en verulegur ágreiningur hefur verið uppi hvað það varðar. Það kom einnig fram í máli formanns að vonandi fer að sjást til lands í þeim ágreiningi.

Starfsmenn hvöttu formann til að gera allt sem í hans valdi stæði til að þessi kjarasamningur yrði kláraður sem allra fyrst enda ekki ásættanlegt að vera á launabreytinga í heilt ár eins og nú er orðið í þessum samningi.

Formaður vonast að þessi samningur klárist á næstu dögum en þar til er lítið annað að gera en að bíða og vona það besta.

Rétt í þessu lauk talningu um kosningu á kjarasamningi við Elkem Ísland á Grundartanga. En gengið var frá nýjum kjarasamningi þann 13. febrúar síðastliðinn og hefur kosningu um samninginn staðið  yfir frá þeim tíma en henni lauk núna í hádeginu.

Kjarasamningurinn bar þess merki  að fyrirtækið á við erfiðleika að etja þessi misserin og þá sérstaklega vegna umtalsverðar hækkunar á raforku til fyrirtækisins sem tók gildi þann 1. apríl í fyrra, en með þeim samningi er raforkuverð til fyrirtækisins að hækka um 1,3 til 1,5 milljarða á ári.

Á þessari forsendu óskaði fyrirtækið eftir að gera skammtímasamninginn til eins árs og var það gert en samningurinn skilar starfsmönnum 2,55 % launahækkun frá 1. Janúar 2020 og þremur auka orlofsdögum.

Það er skemmst frá því að segja að kjarasamningurinn var samþykktur með afgerandi hætti eða 73,14%.

Atkvæði féllu með eftirfarandi hætti:

Á kjörskrá:                          124

Þeir sem kusu:                  108 eða 87,09%

Já:                                      79 eða 73,14%

Nei:                                    28 eða 25,92%

Auðir:                                  1 eða 0,92%

Níundi samningafundurinn vegna kjarasamnings Norðuráls var haldinn síðasta fimmtudag. Fyrir fundinn lág orðið fyrir að samkomulag er nánast í höfn er lýtur að því að bjóða starfsmönnum möguleika á því að skipta um vaktakerfi eða úr 12 tíma kerfi yfir í 8 tíma kerfi.

Á þessum fundi var verið að ræða möguleika á því að stytta vinnuvikuna hjá dagmönnum en það er ljóst að þær hugmyndir sem fyrirtækið lagði fram í þeim efnum var algerlega hafnað samstundis. Samninganefnd stéttarfélaganna hafa aðrar hugmyndir uppi hvað varðar styttingu á vinnuvikunni hjá dagvinnumönnum.

Örlítið var rætt um bónuskerfi starfsmanna en líklegast er að gerð verði bókun um að það skuli endurnýjað í samvinnu við trúnaðarmenn en á meðan sú vinna fer fram gildi gamla bónuskerfið sem hefur á samningstímanum verið að gefa á bilinu 7-8%

Ekki er enn farið að ræða aðalkröfuna sem lýtur að beinum launahækkunum starfsmanna og lýsti formaður VLFA því yfir á fundinum að honum finnist þessar viðræður ganga og hægt enda að verða tveir mánuðir frá því kjarasamningur á milli aðila rann út.

Á þessari forsendu var ákveðið að setja niður tvo fundi í þarnæstu viku þar sem forsvarsmenn Norðuráls eru uppteknir í komandi vinnuviku.

Nú er ljóst að það fer að draga til tíðinda um hvort okkur takist að landa nýjum samningi eða ekki en eins og margoft hefur komið fram þá er það ófrávíkjanleg krafa frá starfsmönnum að haldið verði áfram að miða við launavístölu Hagstofunnar hvað launabreytingar varðar.

Það er ljóst að forsvarsmenn hafa hafnað að miða við launavísitöluna eins og gert var í síðasta kjarasamningi og því allt eins líklegt að menn nái ekki saman en tíminn einn mun leiða það í ljós.

Eins og fram hefur komið hér á heimasíðu félagsins þá var skrifað undir nýjan kjarasamning við Elkem Ísland 13. Apríl síðastliðinn og á síðasta miðvikudag kynnti formaður VLFA samninginn fyrir starfsmönnum.

En tveir kynningarfundir voru haldnir á Gamla kaupfélaginu þar sem formaður fór yfir innihald samningsins en gildistími samningsins er einungis eitt ár og rennur út um næstu áramót.

Kjarasamningurinn er með svona stuttan gildistíma vegna þess að fyrirtækið treystir sér ekki í lengri samning vegna óvissu í raforkumálum en eins og fram hefur komið fékk fyrirtækið umtalsverða hækkun á raforkusamningum við Landsvirkjun en hún nemur um 1,3 milljarði á ári.

Þessi kjarasamningur er því gerður í ljósi þessara aðstæðna og munu laun starfsmanna hækka um 2,5% frá 1. janúar 2020 auk þess verður orlof starfsmanna aukið og tvær svokallaðir skilavaktir aflagðar.

Kosningu um kjarasamninginn lýkur á næsta miðvikudag.

Rétt í þessu gekk Verkalýðsfélag Akraness frá lánagreiðslum til 35 fyrrverandi starfsmanna Ísfisk sem ekki höfðu fengið laun né uppsagnarfrestinn sinn greiddan frá fyrirtækinu frá því í september í fyrra.

Eins og fram hefur komið hér á heimasíðunni þá var Ísfiskur tekið til gjaldþrotaskipta nýverið og því var orðið endalega ljóst að vangreidd laun myndi ekki verða greidd frá fyrirtækinu. Margir starfsmenn hafa eðlilega lent í miklum hremmingum vegna þessa eins og alltaf gerist þegar fyrirtæki verða gjaldþrota.

Verkalýðsfélag Akraness hefur nú unnið að því útbúa launakröfur fyrir félagsmenn sína í þrotabú fyrirtækisins og nema þær kröfur um 42 milljónum króna, en ef ekkert verður til í þrotabúi fyrirtækisins mun Ábyrgðarsjóður launa ábyrgjast vangreidd laun starfsmanna.

Í ljósi þessara hremminga og vandræða sem þetta hefur valdið fyrrverandi starfsmönnum Ísfisks ákvað stjórn Verkalýðsfélags Akraness að lána öllum starfsmönnum sem vildu lán að fjárhæð 250 þúsund með veði í kröfu á Ábyrgðarsjóð launa.

Stór hluti starfsmanna þáðu þetta boð félagsins og nemur lánveitingin tæpum 10 milljónum króna og er stjórn félagsins mjög ánægð með að geta aðstoðað þessa félagsmenn sína, sem hafa sumir hverjir þurft að taka yfirdráttarlán til aðgeta framfleytt sér og sínum.

Það er stefna stjórnar að standa ætíð með sínum félagsmönnum þegar svona mál koma upp en þetta er í þriðja sinn sem félagið hleypur undir bagga með sínum félagsmönnum þegar fyrirtæki sem það starfar hjá fer í gjaldþrot.

Áttundi samningafundurinn vegna kjarasamnings Norðuráls var haldinn í gær. Á þessum fundi var haldið áfram að fara yfir stöðuna sem lýtur að því að bjóða starfsmönnum möguleika á því að skipta um vaktakerfi eða úr 12 tíma kerfi yfir í 8 tíma kerfi. Þessi vinna er á lokametrunum.

Einnig voru aðrar kröfur ræddar í gær og kom formaður því á framfæri við forsvarsmenn Norðuráls að mikilvægt væri nú að klára samninginn þannig að hægt væri að leggja hann í dóm starfsmanna Norðuráls.

Vonast formaður til þess að á næsta fundi sem verður á fimmtudaginn í næstu viku að það fari að sjást til lands í þessum viðræðum þótt vissulega sé nokkur atriði ókláruð og brugðið getur til beggja átta hvað þau atriði varðar.

Það er hins vegar rétt að geta þess að þessar viðræður hafa gengið bara nokkuð vel til þessa þrátt fyrir að viðfangsefnið sé afar flókið enda um mikla kerfisbreytingu að ræða hvað vaktarkerfið varðar.

Í gær undirritaði Verkalýðsfélag Akraness, ásamt trúnaðarmönnum og hinum stéttarfélögunum sem eiga aðild að kjarasamningi Elkem Ísland undir nýjan kjarasamning við forsvarsmenn Elkem.

Það er skemmst frá því að segja að kjarasamningurinn gildir einungis til næstu ármóta sem var ósk fyrirtækisins. En eins og kom fram hér á heimsíðunni í október á síðasta ári þá hækkaði raforkusamningur fyrirtækisins við Landsvirkjun gríðarlega eða sem nam 1,3 milljarði á ári.

Forstjóri Elkem sagði í kjölfarið á fundi að fyrirtækið þyrfti að grípa til róttækra hagræðingaraðgerða m.a. með því að fækka starfsmönnum um 15%. Hann sagði einnig að framtíð fyrirtækisins myndi ráðast á næstu 12 til 14 mánuðum og á þessari forsendu treysti fyrirtækið sér ekki til að gera lengri kjarasamning.

Þessi kjarasamningur er því gerður í ljósi þessara aðstæðna og munu laun starfsmanna hækka um 2,5% frá 1. Janúar 2020 auk þess verður orlof starfsmanna aukið og tvær svokallaðir skilavaktir aflagðar.

Verkalýðsfélag Akraness mun kynna kjarasamninginn næsta miðvikudag (19. febrúar) og verða tveir fundir haldnir á Gamla Kaupfélaginu, en sá fyrri hefst klukkan 13:00 og sá síðari klukkan 18:30.

Eins og fram kom hér á heimasíðunni þá kom upp ágreiningur við Sambands íslenskra sveitafélaga um það hvort tímakaupsfólk ætti rétt á eingreiðslu sem kom til útborgunar í febrúar í fyrra.

Verkalýðsfélag Akraness hélt því staðfastlega fram að tímakaupsfólk ætti eins og aðrir starfsmenn sveitafélaganna rétt á umræddri eingreiðslu en Samband íslenskra sveitafélaga var á öndverðu meiði hvað það varðaði.

Verkalýðsfélag Akraness sá sig knúið að fara með málið fyrir Félagsdóm og er skemmst frá því að segja að dómurinn tók undir allar dómskröfur félagsins í málinu.  Núna er búið að greiða eingreiðsluna til tímakaupsfólks á Akranesi og nemur leiðréttingin í heildina 1.347.970 kr.

Eftir að þessi dómur í Félagsdómi var kveðinn upp kom í ljós að önnur eingreiðsla sem greidd var út í ágúst á síðasta ári vegna dráttar á nýjum kjarasamningi var ekki heldur rétt reiknuð út hjá tímakaupsfólki og gerði Verkalýðsfélag Akraness athugsemdir við hana við Akraneskaupstað.  Ekki var ágreiningur um að sú eingreiðsla væri vitlaust reiknuð út og var hún því leiðrétt og nam sú leiðrétting 1.855.304 kr.

Samtals hefur því Verkalýðsfélag Akraness náð að verja réttindi tímakaupsfólks í þessum tveimur málum að fjárhæð 3.203.274 kr.

En leiðréttingum vegna vangreiddra launa hjá tímakaupsfólki er ekki lokið, því leiðrétta á eftir útreikning á orlofs-og desemberuppbótum tvö ár aftur í tímann.

Í gær lauk tveggja daga trúnaðarmannanámskeiði fyrir trúnaðarmenn Verkalýðsfélags Akraness.

Á þessu námskeiði var kenndur þriðji hluti námskeiða fyrir trúnaðarmenn,  en þessi hluti laut að lestri á launaseðlum og launaútreikningum sem kennt var fyrri daginn, en síðari dagurinn laut að almannatryggingum og lífeyrissjóðum.

Það voru 14 trúnaðarmenn Verkalýðsfélags Akraness sem voru skráðir á þetta námskeið,  það skiptir öll stéttarfélög miklu máli að vera með öfluga trúnaðarmenn enda eru þeir tengiliðir stéttarfélaganna inn á vinnustaðina.

Eitt höggið enn sem við Akurnesingar verðum fyrir er orðið að staðreynd, en í dag rann upp sú stund að stjórn Ísfisks hefur óskað eftir gjaldþrotaskiptum á félaginu og því klárlega komið á hreint að endurkoma tæplega 50 starfsmanna í fiskvinnslu til starfa hjá þessu ágæta fyrirtæki verður ekki að veruleika.

Það liggur fyrir að flestir eygðu þá von að Ísfiskur myndi ná að endurfjármagna sig og hefja vinnslu af fullum krafti að nýju, eftir nokkra mánaða hlé, en nú er þeirri draumsýn endalega lokið.

Það má segja að það séu takmörk fyrir því hvað hægt er að leggja miklar hremmingar á eitt samfélag  í atvinnumálum, en það verður ekkert undan því litið að atvinnuástand hér á Akranesi er ekki glæsilegt um þessar mundir og er þar vægt til orða kveðið.

Að hugsa sér að fyrirkomulag um stjórn fiskveiða skuli vera þess valdandi að einn stærsti útgerðabær landsins skuli hafa verið lagður í rúst, hvað varðar veiðar og vinnslu sjávarafurða.

Formaður Verkalýðsfélags Akraness vill minna á að fyrir sameiningu Haraldar Böðvarssonar & co við Granda árið 2004 störfuðu 350 manns hjá fyrirtækinu og fyrirtækið greiddi út laun það árið fyrir 2,2 milljarða, núvirt eru þetta 4,7 milljarðar. Það var landað um 170 þúsundum tonna á Akranesi árið 2004, en í dag er allt farið.

Nú kalla sum sveitarfélög eftir mótvægisaðgerðum frá stjórnvöldum vegna loðnubrests, en hvað megum við Akurnesingar segja þar sem öllum aflaheimildum okkar hefur nánast verið rænt af samfélaginu vegna græðgisvæðingar tengdum framsalskerfinu.

Takið eftir, enn og aftur, að árið 2004 greiddi Haraldur Böðvarsson laun vegna veiða og vinnslu inn í okkar samfélag sem námu 2,2 milljörðum, núvirt 4,7 milljarðar og ekkert kom í staðin. Til að setja þetta í samhengi þá væri þetta eins og að Reykjavíkurborg myndi missa launagreiðenda sem greiddi laun fyrir 75 milljarða á ári!

Var einhver að tala um að einhver sveitafélög þyrftu mótvægisaðgerðir? Já, við Akurnesingar þurfum svo sannarlega mótvægisaðgerðir af hálfu stjórnvalda, enda er ábyrgð stjórnmálamanna á þessum hamförum sem nú hefur enn og aftur riðið yfir okkar dásamlega samfélag verið mikil.

Verkalýðsfélag Akraness hefur verið á fullu að aðstoða félagsmenn sína sem ekki fengu greidd laun sín frá því september á síðasta ári og mun Verkalýðsfélag Akraness lána öllum þeim félagsmönnum sínum 250 þúsund krónur strax eftir helgi með veði í kröfu á Ábyrgðarsjóðlauna. En vangreidd laun starfsmanna Ísfisks nema rétt tæpum 42 milljónum króna til félagsmanna VLFA.

Hugur formanns og stjórnar Verkalýðsfélags Akraness er hjá félagsmönnum sínum sem hafa þurft, enn og aftur að upplifa tekjumissi og atvinnumissi, en stór hluti þeirra sem starfaði hjá Ísfiski fengu uppsögn hjá HB Granda þegar þeir fóru í skjóli nætur í burtu frá Akranesi með allar okkar aflaheimildir árið 2017.

Formaður VLFA vísar ábyrðinni á stjórnmálamenn sem hafa skapað þetta umhverfi í kringum fiskveiðistjórnunarkerfið þar sem einstaka útgerðamenn eða útgerðir geta labbað út úr greininni og skilið fólkið eftir í djúpum sárum og um leið veitt samfélaginu öllu þungt högg í kviðinn með þeim afleiðingum að samfélagið er í keng!