Sunnubraut 13 | 300 Akranes | Sími 4309900 | skrifstofa@vlfa.is
Stærra letur Minna letur
0

SÉRKJÖR OG AFSLÆTTIR

  • Apótek Vesturlands  
  • Brautin ehf
  • Galleri Ozone
  • LH bókhald ehf
  • Model
  • N1
  • Olís
  • Orkan
  • Omnis
  • Rafþjónusta Sigurdórs ehf
  • Snyrtistofan Dekur
  • Trésmiðjan Akur
  • VÍS 
  • Ökukennsla Sigga Trukks 
  • Ökukennsla Ágústu Friðriksd.
  • Knattspyrnufélag ÍA

0
0

LÖGFRÆÐIÞJÓNUSTA 

Félagsmenn geta fengið ókeypis lögfræðirágjöf hjá lögmanni félagsins með því að panta sér viðtalstíma á skrifstofu félagsins í síma 430-9900

 

0
13. október 2017

6. þingi Starfsgreinasambands Íslands sem haldið var á Selfossi daganna 11. til 12. október lauk í gær.  Það má segja að það hafi verið hálfgerð lognmolla yfir þessu þingi að því undanskildu að hart var tekist á um svokallaða tilgreinda séreign.

 

Því miður hefur nánast engin kynning farið fram um þessa tilgreindu séreign enda var einungis fámennur hópur innan ASÍ sem samdi um hana við Samtök atvinnulífsins. En þessu til viðbótar þá liggur fyrir að ASÍ og SA hafa unnið að því að fá lögum nr. 129/1997 breytt þannig að launafólki verði gert skylt að leggja þessa tilgreindu séreign einungis inn hjá lífeyrissjóðunum og einnig sem er gjörsamlega stórundarlegt að hún verði skerðingarhæf frá greiðslum frá Tryggingastofnun.

 

Með öðrum orðum ASÍ og SA hafa unnið að því að fá lögum breytt þannig að öllu launafólki sé skylt að leggja þessa tilgreindu séreign einungis inn hjá lífeyrissjóðunum og megi því ekki velja sér annan vörsluaðila.

 

Eins og áður sagði hefur engin kynning farið fram á meðal launafólks enda hefur fámenn klíka innan ASÍ deilt og drottnað í þessu máli án þess að bera neitt undir hinn almenna félagsmann.

 

Það var gjörsamlega óskiljanlegt að hlusta á suma forystumenn innan verkalýðshreyfingarinnar tala með því á þingi SGS á Selfossi að þessi svokallaða tilgreinda séreign ætti og þyrfti að vera skerðingarhæf frá Tryggingastofnun og einnig að allar þessar greiðslur yrðu að fara inn til lífeyrissjóðanna. 

 

Formaður félagsins spurði á þinginu hagsmuni hverra forysta ASÍ sé að verja í þessu máli því það er morgunljóst að ekki er verið að verja hagsmuni launafólks með því að semja um nýja tegund af séreignarsparnaði sem mun leiða til þess að launafólk muni skerða greiðslur sínar frá Tryggingastofnun þegar það hefur töku lífeyris. En eins og allir vita þá eru það skerðingar frá TR sem hafa m.a. valdið því að ávinningur launafólks af því að greiða í lífeyrissjóð er því miður oft á tíðum sáralítill. 

 

Þessu mótmælti formaður Verkalýðsfélags Akraness harðlega á þinginu og lagði fram ályktun sem kveður á um að þingið hafni öllum hugmyndum að lagabreytingum sem leiði til þess að svokölluð tilgreind séreign verði skerðingarhæf frá greiðslum frá Tryggingastofnun.

Miklar umræður urðu um þessa ályktun og voru nokkrir forystumenn verkalýðshreyfingarinnar sem fundu henni allt til foráttu en það kom fram breytingartillaga sem var á endanum samþykkt en hún hljóðar svona:

 

„6. þing Starfsgreinasambands Íslands haldið 11. til 12. október 2017 hafnar alfarið öllum hugmyndum að lagabreytingum á lögum nr. 129/1997 sem gera allar lífeyrisgreiðslur skerðingarhæfar frá greiðslum frá Tryggingastofnun ríkisins.“

 

Þessa tillögu gátu þingfulltrúar Verkalýðsfélags Akraness stutt enda kemur hún algerlega í veg fyrir að forysta ASÍ geti unnið áfram að því að kalla eftir lagabreytingum sem leiða til þess að tilgreinda séreignin verði skerðingarhæf. 

Formaður telur þetta gríðarlegan sigur fyrir allt launafólk enda verkefni verkalýðshreyfingarinnar að draga úr skerðingum frá greiðslum frá Tryggingastofnun en ekki auka þær skerðingar.

 

Nú liggur fyrir að SGS sem er stærsta landssamband innan ASÍ hefur ályktað að það hafni alfarið öllum hugmyndum að lagabreytingum á lögum nr. 129/1997 sem gera allar lífeyrisgreiðslur skerðingarhæfar frá greiðslum frá Tryggingastofnun ríkisins.  Því er ljóst að ASÍ mun ekki geta haldið áfram að vinna að þessum lagabreytingum á þessum grunni, svo mikið er víst.

 

 

 

 

 

9. október 2017

Í pallborði sátu Vilhjálmur Birgisson, Ragnar Þór Ingólfsson, Már Guðmundsson og dr. Ólafur Margeirsson
Síðastliðinn laugardag stóðu Verkalýðsfélag Akraness og VR fyrir opnum fundi í Háskólabíói sem bar yfirskriftina "Guð blessi heimilin -  okurvextir og verðtrygging, mesta böl þjóðarinnar". Framsögu á fundinum höfðu Ragnar Þór Ingólfsson formaður VR, Vilhjálmur Birgisson formaður Verkalýðsfélags Akraness, Ólafur Margeirsson doktor í hagfræði, Ásta Lóa Þórsdóttir formaður Hagsmunasamtaka heimilanna og Már Guðmundsson seðlabankastjóri. Auk þess var fulltrúum allra stjórnmálaflokka sem bjóða fram til Alþingis boðið að senda fulltrúa á fundinn til að kynna hvað þeirra flokkur ætlar að gera varðandi okurvextina og verðtrygginguna á lánum heimilanna.

 

Í sinni framsögu gagnrýndi Vilhjálmur, formaður VLFA, harðlega Seðlabankann og stjórnvöld og hvatti þau til að vera á tánum en ekki á hnjánum gagnvart fjármagnseigendum þegar kemur að því að verja heimili landsins gegn okurvöxtum og verðtryggingu. Hann benti meðal annars á það að verðtryggðir vextir á Íslandi eru hærri en óverðtryggðir vextir í löndunum í kringum okkur.

 

Einnig sagði Vilhjálmur að í raun ætti Seðlabankinn að vera fremstur í flokki í baráttunni fyrir afnámi verðtryggingar því þegar ókostir verðtrygginar á neytendalánum eru skoðaðir kemur í ljós að hún leiðir af sér aukið pen­inga­magn í um­ferð og verðbólguþrýst­ing, gengur gegn eðli­leg­um lög­mál­um og var­færni í lán­töku, hvet­ur til of mik­ill­ar skuld­setn­ing­ar og dreg­ur úr virkni pen­inga­mála­stefnu Seðlabank­ans.

 

Glærur Vilhjálms má skoða með því að smella hér.

 

Glærur Ólafs Margeirssonar má skoða með því að smella hér.

 

Fundinum var streymt beint á netinu og er hægt að hlusta og horfa hér.

25. september 2017

Frá námskeiðinu
Dagana 21. og 22. september fór fram námskeið fyrir trúnaðarmenn Verkalýðsfélags Akraness. Þátttaka var góð en námskeiðið sátu 13 trúnaðarmenn félagsins. Um var að ræða annað þrep þessa náms en trúnaðarmenn þurfa ekki að taka þrepin í ákveðinni röð og því voru sumir trúnaðarmennirnir að koma á sitt fyrsta námskeið en aðrir eru reyndari og hafa setið nokkur trúnaðarmannanámskeið. Trúnaðarmönnum er heimilt að sækja námskeið í eina viku á ári án skerðingar á launum. Markmið slíkra námskeiða er að styrkja og efla trúnaðarmenn í sínum störfum en það er Félagsmálaskóli Alþýðu sem sér um skipulagningu og kennslu á slíkum námskeiðum.

 

Á fyrri degi námskeiðsins var fjallað um lestur launaseðla þar sem meðal annars var farið yfir helstu reiknitölur launaútreiknings, útreikning á staðgreiðslu og iðgjöldum og hvernig launaseðlar eru uppbyggðir frá grunni. Seinni dagurinn hófst á því að formaður félagsins fór yfir starfsemi Verkalýðsfélags Akraness, kjarasamninga þess og sjóði. Eftir hádegi var svo fjallað um einelti á vinnustað og meðal annars farið yfir birtingarmyndir þess og viðbrögð við einelti. Námskeiðið heppnaðist vel og hér má sjá myndir frá því.  

 

20. september 2017

Stöndum vörð um hagsmuni verkafólks!

Stjórn- og trúnaðarráð Verkalýðsfélags Akraness skorar á alla stjórnmálaflokka að gera það að stefnumálum sínum að vinna af alefli að hagsmunum íslenskra heimila, verkafólks og þeirra sem höllustum fæti standa í íslensku samfélagi.

 

Það geta stjórnmálaflokkarnir gert með því að taka upp áherslur Verkalýðsfélags Akraness í þessum málum sem eru m.a. eftirfarandi:

 

  • Unnið verði að því að lágmarkslaun og bætur almannatrygginga verði skattlausar. En það er hægt að gera með því að taka upp þrepaskiptan persónuafslátt.
  • Tekið verði á okurvöxtum og verðtryggingu á húsnæðis- og neytendalánum til einstaklinga og heimila.
  • Tekið verði á þeim gríðarlega húsnæðisvanda sem ríkir hjá ungu og tekjulágu fólki.
  • Sérstakur hátekjuskattur verði setur á ofurlaun,kaupauka og bónusa.
  • Lögum um lífeyrissjóði verði breytt þannig að sjóðirnir hafi heimild til að stofna og reka lítil hagnaðardrifin leigufélög.
  • Lögum um lífeyrissjóði verði breytt þannig að þeim verði gert að fækka umtalsvert og að sjóðsfélagar kjósi alla stjórnarmenn sjóðanna.
  • Unnið verði að endurskipulagningu á fjármálakerfinu þar sem hagsmunir almennings verði hafðir að leiðarljósi.
  • Frítekjumark eldri borgara verði afnumið með öllu.
  • Tryggð verði með afgerandi hætti í lögum byggðafesta á aflaheimildum til að tryggja hina dreifðu byggð í landinu. En slík byggðafesta á aflaheimildum myndi tryggja mun betur atvinnuöryggi fiskvinnslufólks og sjómanna.
  • Að staðin verði vörð um mikilvægasta rétt launafólks sem er samningsfrelsið og öllum hugmyndum um að skerða og takmarka samningsfrelsi launafólks og stéttarfélaga verði hafnað.

 

Stjórn- og trúnaðarráð Verkalýðsfélags Akraness hvetur alla stjórnmálaflokka til þess að tala máli verkafólks á Alþingi en það er mat stjórnar- og trúnaðarráðs félagsins að slíku hafi ekki verið til að dreifa um alllanga hríð.

 

 

20. september 2017
9. júní 2017
0
0