Næsti samningafundur vegna kjarasamnings Klafa verður haldinn miðvikudaginn 18 maí.  Það liggur fyrir að það verður tekist á um nokkur kjaraatriði sem starfsmenn Klafa leggja mikla áherslu á að komi inn í nýjan kjarasamning.  Formaður félagsins mun funda með starfsmönnum Klafa á næsta þriðjudag.

Formaður félagsins heimsótti starfsmenn Laugarfisks í morgun.  Eins og hefur komið fram hér á heimasíðunni þá hefur  Verkalýðsfélag Akraness verulegar áhyggjur af þeirri ákvörðun heilbrigðisnefndar Vesturlands að Laugarfiski skuli gert að draga úr starfsemi sinni um 50% yfir sumarmánuðina.  Það er mjög líklegt að öllum rekstrargrundvelli verði kippt undan starfssemi fyrirtækisins ef þessi ákvörðun muni standa.  Formaður félagsins tók eftir því í heimsókn sinni í morgun, að starfsmenn eru nokkuð uggandi yfir þeirri óvissu sem hefur skapast vegna þeirra ákvörðunar sem heilbrigðisnefndin tók á fundi sínum 20. apríl sl.  Það er alveg ljóst að þær aðgerðir sem heilbrigðisnefndin hefur nú gripið til ógnar klárlega starfsöryggi um 35 starfsmanna fyrirtækisins.  Verkalýðsfélag Akraness hefur sett sig í samband við fulltrúa  bæjarráðs og lýst yfir áhyggjum félagsins á þessu máli.  Verkalýðsfélag Akraness veit vel að forsvarsmenn Laugafisks eru að reyna hvað þeir geta til að finna lausn á þessu vandamáli.  Holt er fyrir okkur Akurnesinga að muna að við byggjum okkar afkomu af stórum hluta upp á sjárútvegi, því er ekkert óeðlilegt að þeir sem búa í næsta nágrenni við fiskvinnslustöðvarnar finni einhverja fiskilykt.  Vissulega verður fyrirtækið að reyna eftir fremsta megni að takmarka lyktina eins og kostur er.    Formaður félagsins hefur óskað eftir fundi með bæjarráði og verður þetta mál til umfjöllunar á þeim fundi.  Hægt er að skoða myndir frá heimsókn formanns félagsins frá því í morgum með því að smella á myndir og síðan velja Laugarfiskur.

Verkalýðsfélag Akraness hefur gríðarlega miklar áhyggjur vegna þeirrar alvarlegu stöðu sem er upp komin hjá Laugafiski.  Eins og fram kom í frétt sem birtist í Skessuhorni 4. maí þá hefur heilbrigðisnefnd Vesturlands  vítt Laugafisk vegna kvörtunar um lyktarmengun, og var fyrirtækinu gert að draga úr framleiðslu sinni um 50% yfir sumarmánuðina.  Verkalýðsfélag Akraness vill ekki hugsa það til enda ef aðgerðir heilbrigðisnefndar Vesturlands gera það að verkum að starfsemin hjá Laugarfiski leggist af hér á Akranesi.  Það eru um 35 félagsmenn í Verkalýðsfélagi Akraness sem starfa hjá Laugafiski, þar af eru um 15 konur.  Verkalýðsfélagið hefur sett sig í samband við forsvarsmenn fyrirtækisins og lýst yfir áhyggjum á þeirri stöðu sem upp er komin.  Verkalýðsfélag Akraness veit fyrir víst að fyrirtækið er að leita allra leiða til að finna lausn á þessu hvimleiða vandamáli.  Hér verða allir að taka höndum saman og finna lausn á þessu vandamáli.  Það eru mjög miklir hagsmunir í húfi fyrir okkur Akurnesinga að farsæl lausn finnist sem allra fyrst.  Ekki mun Verkalýðfélag Akranes láta sitt eftir liggja til aðstoðar í þeim málum. 

Ekki ætlar félagið að gera litið úr þeim kvörtunum sem komið hafa frá nágrönnum nema síður sé.  Það eru samt sem áður einu sinni svo að við lifum á sjávarfangi og við búum þar sem fiskvinnsla er mjög stór þáttur í okkar atvinnulífi. 

Samningafundur var haldinn í dag um nýjan kjarasamning fyrir starfsmenn Klafa.  Á fundinum í dag svörðu forsvarsmenn  fyrirtækisins þeim kröfum sem stéttarfélagið hafði lagt fram.  Ljóst er töluverð vinna er framundan við gerð nýs kjarasamnings fyrir starfsmenn Klafa.  Fram að næsta fundi ætla samningsaðilar að velta fyrir sér hvernig hægt er að taka upp lifandi bónuskerfi og munu báðir  aðilar koma með tillögur á næsta fundi.  Það er afar ánægjulegt að viðræðurnar séu komnar á fullt skrið

Samningafundur verður haldinn í dag um nýjan kjarasamning fyrir starfsmenn Klafa, fundurinn hefst kl. 13:30 .  Verkalýðsfélag Akraness lagði fram kröfur starfsmanna í síðustu viku.  Forsvarsmenn Klafa munu væntanlega svara þeim kröfum á fundinum á morgun.  Kröfur stéttarfélagsins og starfsmanna eru skýrar það er sambærilegur kjarasamningur og gerður var við starfsmenn Íslenska járnblendifélagsins.  Einnig er skýr krafa um að kjarasamningur Íslenska járnblendifélagsins gildi hvað varðar önnur kjaraatriði, eins og verið hefur.

Til stendur að halda samningafund vegna kjarasamnings Klafa og Fangs á miðvikudaginn nk.  Reyndar átti að funda á morgun, en forsvarsmenn Klafa óskuðu eftir því í dag við Verkalýðsfélag Akraness að fundinum yrði frestað allavega til miðvikudags.  Formaður félagsins hefur verið í nánu sambandi við starfsmenn fyrirtækjanna að undanförnu.  Þolinmæði starfsmanna er nánast lokið eðlilega, þar sem 6 mánuðir eru liðnir frá því kjarasamningar þessara fyrirtækja runnu út.  Eins og fram hefur komið hér á heimasíðunni þá mun Verkalýðsfélag Akraness vísa þessum deilum til sáttasemjara í vikulok ef ekkert markvisst gerist í þessari viku.

Fyrsti fundur stýrihóps Starfsgreinasambands Íslands með Launanefnd sveitarfélaga var haldinn 3. maí í húsakynnum ríkissáttasemjara.  Á fundinum voru lagðar fram samningskröfur SGS félaga og var gerð grein fyrir þeim.  Launanefnd sveitarfélaganna gerði grein fyrir markmiðum sínum vegna komandi kjarasamningsgerðar.  Einnig óskaði LN eftir því að stéttarfélögin leggðu fram þau sérákvæði sem þau hafa við sínar sveitarstjórnir.   Það eru um 30  félagsmenn sem vinna eftir sveitafélagssamningnum.  Kjarasamningurinn rann út 30. apríl.

Fundað var um nýjan kjarasamning fyrir starfsmenn Fangs á föstudaginn.  Stéttarfélögin lögðu fram kröfur sínar á fundinum og gerði formaður félagsins grein fyrir þeim.  Kröfurnar eru í samræmi við það sem um samdist við Íslenska járnblendið.   Verkalýðsfélag Akraness á eftir að semja við tvö fyrirtæki á Grundartangasvæðinu þ.e Klafi og Fang.  Verkalýðsfélag Akraness hefur miklar áhyggjur yfir þeim seinagangi  sem hefur einkennt allt í kringum þessar samningaviðræður.  Því eins og áður hefur komið  hér á síðunni, þá vilja starfsmenn og stéttarfélagið að eitthvað fari að gerast í þessum samningaviðræðum.  Kjarasamningar þessara fyrirtækja runnu út 1. desember 2004.  Ef ekkert markvisst gerist í næstu viku mun Verkalýðsfélag Akraness vísa deilunum til ríkissáttasemjara.

Samningafundur um nýjan kjarasamning fyrir starfsmenn Fangs sem eru starfsmenn sem starfa í eldhúsi og ræstingu hjá Íslenska járnblendifélaginu verður haldinn á föstudaginn nk.  Kröfur starfsmanna Fangs eru með sama hætti og hjá starfsmönnum Klafa, það er sömu hækkanir og starfsmenn Íslenska járnblendifélagsins sömdu um fyrir skemmstu.  Frá þeirri kröfu verður ekki kvikað.

Verkalýðsfélag Akraness og trúnaðarmaður Klafa lögðu fram í morgun kröfur starfsmanna Klafa og gerðu forsvarsmönnum fyrirtækisins grein fyrir þeim.  Starfsmenn og stéttarfélögin eru orðin nokkuð pirruð yfir þeim seinagangi sem hefur verið með að hefja viðræður um nýjan kjarasamning.  Kjarasamningur starfsmanna var laus 1. desember . Ef ekkert markvisst gerist í næstu viku þá er allt eins líklegt að deilunni verði vísað til ríkissáttasemjara.  Verkalýðsfélag Akraness hefur óskað eftir að samningafundur verði á mánudaginn nk og tóku forsvarsmenn Klafa vel í það.  Á þeim fundi mun væntanlega skýrast hvort mikið beri á milli samningsaðila.  Það verður að vera forgangsverkefni hjá samningsaðilum að klára nýjan kjarasamning eins fljótt og verða má.