Aðalfundur Verkalýðsfélags Akraness var haldinn í dag laugardaginn 26. apríl í matstofu Fortuna í sal Sementsverksmiðjunnar. Formaður félagsins, Vilhjálmur Birgisson, flutti skýrslu stjórnar og greindi frá því helsta sem stjórn og starfsmenn fengust við á annasömu ári. Félagsmönnum fjölgaði um 722 á síðasta ári og hagnaður af rekstri sjóða félagsins nam rúmlega 77 milljónum króna, samanborið við rúmlega 54 milljónir árið á undan. Félagssjóður skilaði rekstrarafgangi upp á tæpar 23 milljónir en var rekinn með halla þegar þessi stjórn tók við í árslok 2003. Staða sjúkrasjóðs er sterk og jókst hagnaður um 30% á milli ára þrátt fyrir auknar styrkveitingar, sem jukust um 37%. Sama er upp á teninginn með aðra sjóði félagsins, Orlofssjóð og Verkfallssjóð, staða þeirra hefur styrkst verulega.

Áhyggjur af þróun efnahags- og atvinnumála

Í máli Vilhjálms  kom fram að stjórn félagsins hefði áhyggjur af þróun efnahagsmála síðustu tveggja mánaða sem hefði leitt til þess að ávinningur nýrra kjarasamninga hefði tapast. Telur stjórn félagsins að allt stefni í að samningum yrði sagt upp strax í mars á næsta ári.

Formaður félagsins lét í ljós þungar áhyggjur af þróun atvinnumála í sjávarútvegi á Akranesi og var ómyrkur í máli um afleiðingar sameiningar HB hf og Granda sem leitt hefði til þess að yfir 150 manns hafi misst atvinnuna. Sagði Vilhjálmur forsvarsmenn HB Granda hafa sýnt Skagamönnum ótrúlegan fantaskap og að ekkert lát virtist ætla að verða á honum.

Setja markið hátt

Í skýrslu stjórnar kemur fram að hún sé stolt yfir því hvernig til hefur tekist þau fjögur ár sem stjórnin hefur starfað. Stórbætt afkoma félagsins og aukin þjónusta sjáist m.a. í því að yfir 90% félagsmanna eru ánægðir með það sem félagið hefur upp á að bjóða, samkvæmt könnun Capacent Gallup á síðasta ári. Markmið núverandi stjórnar er að Verkalýðsfélag Akraness verði það stéttarfélag sem mest og best þjónar sínum félagsmönnum hér á landi.

Í fundarlok var fundarmönnum boðið uppá lambalæri með öllu tilheyrandi.

Á morgun verður aðalfundur Verkalýðsfélags Akraness haldinn. Fundur verður settur kl. 13:00 í matsal Sementsverksmiðjunnar, Mánabraut (Fortuna).

Dagskrá fundarins er á þessa leið:

1.   Skýrsla stjórnar fyrir liðið starfsár

2.   Endurskoðaðir reikningar lagðir fram til afgreiðslu

3.   Kosningar sem þurfa að fara fram samkvæmt 28. grein

4.   Ákvörðun félagsgjalda

5.   Önnur mál

Félagsmenn eru eindregið hvattir til að mæta og láta málefni síns stéttarfélags sig varða.

Eftir fundinn verður boðið upp á veglegar veitingar úr eldhúsi Fortuna.

Nú er unnið að gerð fréttabréfs félagsins sem mun koma út rétt fyrir 1. maí. Eins og ávalt verður blaðið stútfullt af fréttum af starfsemi félagsins.

Í blaðinu verður gerð grein fyrir nýgerðum kjarasamningum á hinum almenna vinnumarkaði. Einnig er farið yfir mál er lúta að orlofshúsum félagsins en nú er verið að taka bæði sumarhúsin í Svínadal og Hraunborgum í gegn fyrir komandi sumarúthlutun.

Blaðið verður væntanlega borið út til allra Akurnesinga og nærsveitunga þriðjudaginn 29. apríl. Einnig verður hægt að nálgast blaðið hér á heimasíðunni sem og eldri blöð sem félagið hefur gefið út.

Samninganefnd Starfsgreinasambands Íslands vegna ríkissamningana mun koma saman til fundar á morgun í húskynnum ríkissáttasemjara.  Kjarasamningur SGS við ríkið rann út um síðustu mánaðarmót og bera ófaglærðir hjá ríkinu töluverðar væntingar til nýs kjarasamnings.  Enda hafa þeir ekki notið þess launaskriðs sem verið hefur á hinum almenn vinnumarkaði á undanförnum árum.

Það er mat formanns félagsins að ekki sé hægt að semja á þeim forsendum sem gert var á hinum almenna vinnumarkaði ekki alls fyrir löngu.  Ástæða þess að ekki er hægt að gagna frá samningi við ríkið á sömu nótum og gert var á hinum almenna vinnumarkaði er sú að verðbólgan var þá 5,7% en í dag er hún 8,7% og töluverðar líkur á að hún fari yfir 10% í næstu mælingu.

Ársfundur Festu Lífeyrissjóðs var haldinn í gær á Selfossi.  Flestir félagsmenn Verkalýðsfélags Akraness greiða sínar lífeyrissjóðgreiðslur til Festu lífeyrissjóðs. 

Lífeyrissjóður Festa varð til við sameiningu Lífeyrissjóðs Suðurlands og Lífeyrissjóðs Vesturlands á miðju ári 2006.  Á síðasta ári greiddu til samtryggingardeilda sjóðsins samtals 16.000 sjóðsfélagar hjá 1.934 atvinnurekendum.

Það var afar ánægjulegt að heyra á fundinum í gær að Festa lífeyrissjóður var með hæstu hreinu raunávöxtun allra lífeyrissjóða á landinu. Einfaldlega vegna þess að Það skiptir okkar félagsmenn gríðarlega miklu máli að ávöxtun sé jafn góð og raunin varð, enda getur ávöxtun lífeyrissjóða spilað stóra rullu hvað varðar réttindi okkar félagsmanna úr sjóðnum.  Ávöxtun sjóðsins er sérstaklega ánægjuleg í ljósi þeirra aðstæðna sem urðu á hlutabréfamarkaðnum seinni hluta síðasta árs.

Norðurál á Grundartanga var stærsti launagreiðandinn til sjóðsins með 5,2% allra iðgjalda og Flugþjónustan Keflavíkurvelli kom næst með 3,8% heildariðgjalda til sjóðsins.

Samanburður á raunávöxtun við aðra lífeyrissjóði hér á landi er eftirfarandi:

Undirbúningur fyrir komandi aðalfund stendur nú yfir á fullu hjá starfsmönnum félagsins.  En aðalfundurinn verður haldinn laugardaginn 26. apríl kl. 13:00.  Rétt er að vekja athygli á því að aðalfundurinn verður haldinn í matsal Sementsverksmiðjunnar (Fortuna)  

Eins og áður hefur komið fram hér á heimasíðunni var afkoma félagsins afar góð á síðasta ári og endurspeglast hún af gríðarlegri fjölgun á félagsmönnum á milli ára.  En félagsmönnum fjölgaði um 700 á síðasta ári.

Einnig eru starfsmenn félagsins að vinna að fréttablaði félagsins sem mun koma út rétt fyrir 1. maí og verður borið út í öll hús hér á Akranesi sem einnig í nærsveitir. 

Stjórn félagsins mun bjóða félagsmönnum uppá  lambalæri með öllu tilheyrandi í lok aðalfundar.  Stjórn félagsins hvetur félagsmenn eindregið til að mæta á aðalfundinn. 

Eggert B Guðmundsson forstjóri HB GrandaFormaður Verkalýðsfélags Akraness og bæjarstjóri Akraneskaupstaðar munu á morgun eiga fund með forstjóra HB Granda, Eggert B. Guðmundssyni.

Eins og áður hefur komið fram hér á heimasíðunni þá fól bæjarráð Akraneskaupstaðar áðurnefndum aðilum að leita skýringa hjá forsvarsmönnum HB Granda á því hvers vegna 7633 tonn af bolfiski hafi verið flutt frá skipum fyrirtækisins yfir á skip annarra útgerða.

Er þessara skýringa óskað vegna þess gríðarlegs samdráttar sem orðið hefur í landvinnslu fyrirtækisins á Akranesi og þeirra miklu hagsmuna sem um ræðir fyrir starfsfólk landvinnslunnar á Akranesi sem og allt bæjarfélagið.

HB Grandi hefur verið fjöregg okkar Skagamanna í rúm 100 ár og sú ákvörðun forsvarsmanna fyrirtækisins að segja upp öllum starfsmönnum nema 20 í landvinnslunni hefur lagst afar illa í samfélagið hér á Akranesi.

Eins og áður hefur einnig komið fram þá geta verið eðlilegar skýringar á þessum tilfærslum og ef svo er munu þær skýringar væntanlega vera lagðar fram á fundinum á morgun.  

Sumarbústaður að Stóru SkógumNú er skráningu umsókna um sumardvöl í orlofshúsum félagsins lokið en frestur til að skila inn umsóknum rann út sl. föstudag. Öllum umsækjendum verður sent bréf, þar sem þeim verður tilkynnt hvort þeir hafi fengið úthlutað eður ei.

Ljóst er að aðsóknin hefur aldrei verið meiri og hefur stjórn orlofssjóðs því gripið til þess ráðs að leigja eitt orlofshús til viðbótar. Þetta hús er í eigu BSRB og er staðsett að Stóru Skógum, skammt frá Munaðarnesi. 

Í endurúthlutun sem fram fer þann 7. maí nk. verða þessar vikur að Stóru Skógum í boði, ásamt öllum þeim vikum sem ekki ganga út í fyrstu úthlutun.

Þeir sem ekki fá úthlutað nú í fyrri úthlutun eru sjálfkrafa með í seinni úthlutun. Þeir hafa, eins og vant er, möguleika á því að breyta umsókn sinni áður en til endurúthlutunar kemur. Þeir sem ekki náðu að senda umsókn sína inn fyrir sl. föstudag, hafa tækifæri til að senda inn umsókn í seinni úthlutun.

Upplýsingar um bústaðinn að Stóru Skógum er að finna hér.

Aðalssamninganefnd Starfsgreinasambands Íslands hefur fundað stíft síðustu daga með Samtökum atvinnulífsins í húsakynnum Ríkissáttasemjara.

Eins og fram hefur komið hér á síðunni þá lögðu Samtök atvinnulífsins fram samningstilboð á laugardaginn var og liggur fyrir að það tilboð er of rýrt og ljóst að bæta þarf í launaliði þess tilboðs.

Fundur hefur verið boðaður aftur á morgun og má allt eins reikna með því að reynt verði til þrautar næstu daga og væntanlega skýrist það fyrir helgi hvort samningsaðilar nái saman eður ei.

Bæjarráð Akraneskaupstaðar hefur falið formanni Verkalýðsfélags Akraness og bæjarstjóra Akranes að kalla eftir skýringum frá forsvarsmönnum HB Granda á því að 7.693 tonn af bolfiski (5.442 þorsksígildistonn) hafa farið frá fyrirtækinu yfir á önnur skip sem ekki eru í eigu HB Granda á yfirstandandi fiskveiðiári.

Ástæða þess að óskað er eftir þessum skýringum er sá gríðarlegi samdráttur sem orðið hefur í landvinnslu fyrirtækisins hér á Akranesi.  Eins og flestir muna var öllum nema 20 starfsmönnum fyrirtækisins í landvinnslunni sagt upp störfum vegna aflasamdráttar í þorskveiðum á yfirstandandi fiskveiðiári.

Á þeirri forsendu er eðlilegt að kallað sé eftir skýringum á því hvert áðurnefndar aflaheimildir hafa farið, sérstaklega í ljósi þess að verið er að taka lífsviðurværi af fólki sem starfað hefur hjá fyrirtækinu í tugi ára.  Vissulega geta verið eðlilegar skýringar á því að farin séu tæp 8.000 tonn frá fyrirtækinu yfir á önnur skip og ein skýring gæti verið sú að HB Grandi sé að láta önnur skip en sín eigin veiða umræddar aflaheimildir til vinnslu.  Það kemur þá væntanlega í ljós ef svo er og þá einnig hvert sá afli hefur farið í vinnslu.

Formaður félagsins telur það mjög mikilvægt að forsvarsmenn HB Granda útskýri þennan flutning á aflaheimildum fyrir bæjarfélaginu og stéttarfélaginu sérstaklega í ljósi þess gríðarlegs samdráttar sem orðið hefur á landvinnslu fyrirtækisins hér á Akranesi.  Enda eiga þeir aðilar sem hafa tímabundinn umráðarétt yfir auðlindum hafsins að sýna samfélagslega ábyrgð.

Það er alvitað að margar útgerðir eru að braska með aflaheimildir sínar. Það er hins vegar skoðun formanns félagsins að þær útgerðir sem ekki eru að nýta þær aflaheimildir sem þeim er úthlutað hafi lítið við þær að gera.  Það á að vera skýlaus krafa að útgerðir nýti að stærstum hluta þær aflaheimildir sem þeim eru úthlutaðar.

Samkvæmt opinberum gögnum frá Fiskistofu þá kemur fram að það hafa farið 7.693 tonn frá fyrirtækinu yfir á aðrar útgerðir eða nánar eins og hér segir: