Rétt í þessu var að ljúka fundi sem formaður Verkalýðsfélags Akraness átti með mannauðsstjóra Norðuráls, Rakel Heiðmarsdóttur, og lögmanni fyrirtækisins, Árna Vilhjálmssyni. Gengið var frá kjarasamningi við fyrirtækið ekki alls fyrir löngu, kjarasamningi sem gaf starfsfólki góðar launahækkanir enda var hann samþykktur með 85% atkvæða.

Hins vegar bárust formanni þau válegu tíðindi að fámennur hópur starfsmanna sem eru svokallaðir sérkjaramenn en tilheyra margir hverjir samt sem áður stéttarfélögunum, hafi ekki fengið umsamda eingreiðslu að fjárhæð 150.000 krónur eins og aðrir starfsmenn. Þetta gerði Verkalýðsfélag Akraness alvarlegar athugasemdir við og á þeim forsendum var þessi fundur í dag. Þau rök sem Verkalýðsfélag Akraness lagði fram í dag eru að mati formanns alveg hvellskýr, að fyrirtækinu ber að greiða þessa umræddu eingreiðslu upp á 150 þúsund krónur. Félagið mun fara með þetta mál fyrir dóm til að innheimta þessa eingreiðslu því lögmaður fyrirtækisins féllst ekki á rök félagsins.

Í sérkjarasamningi þessara starfsmanna sem um ræðir er kveðið á um að það sem ekki er getið um í sérkjarasamningnum skuli gilda hinn svokallaði aðalkjarasamningur Norðuráls við stéttarfélögin. Sérkjaramenn hafa ætíð fengið allar launahækkanir sem um hefur verið samið frá 1998 og á þeirri forsendu er rík hefð fyrir því hvernig þetta hefur verið framkvæmt. Þessu til viðbótar voru sumir sérkjaramenn á kynningarfundum um gerðan kjarasamning og einnig á kjörskrá og greiddu atkvæði um samninginn. Verkalýðsfélag Akraness hefur ákveðið að boða sérkjaramenn til fundar á mánudaginn næstkomandi klukkan 19 á Gamla kaupfélaginu þar sem farið verður yfir þessi mál og önnur mál sem einnig eru grafalvarleg og lúta að samningum sérkjaramanna.

Það var afar ánægjulegt að lesa viðtal við Kristján Loftsson, forstjóra Hvals, þar sem hann staðfestir að veiðar á hval muni hefjast í kringum miðjan júní. En eins og fram kom hér á heimasíðunni var komin upp óvissa með komandi hvalavertíð vegna lagafrumvarps um hvalveiðar sem lagt var fram en nú hefur verið tekin ákvörðun um að fresta þessu frumvarpi fram á haust.

Það eru 150 manns sem munu fá vinnu í kringum þessar veiðar og það er morgunljóst að það er afar jákvætt að fá þessi störf á þessum tímum þegar atvinnuleysi er umtalsvert á okkar svæði. Tekjumöguleikar þeirra sem starfa við hvalvinnsluna eru umtalsverðir en meðallaun hjá þeim sem tilheyrðu Verkalýðsfélagi Akraness í fyrra voru 571 þúsund krónur en rétt er að geta þess að gríðarleg vinna lá að baki þeim launum.