Skelfilegt slys varð í járnblendiverksmiðjunni að Grundartanga í gær þegar sprenging varð þar í ofni 1.  Einn starfsmaður sem er félagsmaður í Verkalýðsfélagi Akraness brenndist alvarlega og er honum haldið sofandi á gjörgæsludeild Landsspítalans. 

Í tilkynningu frá Elkem kemur fram að um kl. 19:30 í gærkvöldi hafi orðið sprenging í járnblendiverksmiðju Elkem. Eldtunga og málmslettur hafi brotist út úr einum af þremur ofnum verksmiðjunnar og brenndist starfsmaður sem þar var við vinnu alvarlega.

„Ítarlegri viðbragðsáætlun Elkem er fylgt þegar aðstæður sem þessar skapast. Slökkt hefur verið á ofnum verksmiðjunnar og starfsemi hennar stöðvuð. Unnið er að rannsókn á tildrögum slyssins og verður upplýst nánar um málsatvik þegar frumathugun lýkur.

Formaður félagsins veit að starfsmenn og forsvarsmenn fyrirtækisins munu leita allra leiða við að upplýsa hvað varð þess valdandi að sprenging varð í einum af 3 ofnum fyrirtækisins, enda er mjög mikilvægt að upplýsa það til að hægt sé að fyrirbyggja að slíkt slys endurtaki sig.  Formaður veit einnig að starfsmenn og forsvarsmenn fyrirtækisins er mjög um hugað um öryggi í verksmiðjunni enda er lagt umtalsverð áhersla á öryggismál hjá fyrirtækinu.  Það er löngu vitað að vinna í stóriðjum getur verið hættuleg og á þeirri forsendu er afar mikilvægt að lögð sé mikil áhersla á öryggismál og hagsmunir starfsmanna séu ávalt hafðir  að leiðarljósi þegar kemur að öryggismálum.

Eðli málsins samkvæmt eru starfsmenn Elkems  slegnir yfir þessu slysi og er hugur stjórnar Verkalýðsfélags Akraness hjá fjölskyldu mannsins sem slasaðist og einnig hjá öllum starfsmönnum Elkem Ísland.

Getur verið að Pétur horfi eingöngu á naflann á sjálfum sér?Fjölmenni var á borgarafundi um áhrif dóma Hæstaréttar um ólögmæti gengistryggingar sem haldinn var í Iðnó í gærkvöldi.

Færri komust að en vildu en þökk sé öflugu hljóðkerfi og veðurblíðu að fólk hafði kost á að fylgjast með fundinum fyrir utan húsið.

Í pallborði á fundinum voru Gylfi Magnússon viðskiptaráðherra, Lilja Mósesdóttir þingmaður, Pétur Blöndal þingmaður, Guðmundur Andri Skúlason, talsmaður Félags lánþega, Ragnar Baldursson lögmaður og Marinó G. Njálsson frá Hagsmunasamtökum heimilanna.

Formaður Verkalýðsfélags Akraness fór á fundinn og lagði nokkrar spurningar fram á fundinum. Í framsögu efnahags- og viðskiptaráðherra kom fram að það væri hagsmunamál allra landsmanna að bankakerfið fái ekki annað högg á sig. Formaður félagsins spurði ráðherrann hvort ríkisstjórn sem kennir sig við félagshyggju, velferð, jöfnuð og réttlæti ætli virkilega að virða dóm Hæstaréttar að vettugi?  Gylfi Magnússon svaraði því til að dómurinn myndi standa en það væri hins vegar veruleg óvissa um hvaða vexti ætti að miða við og sagði það ósanngjarnt gagnvart öðrum lántökum og fjármálastofnunum að þeir vextir sem tilgreindir eru í samningunum verði látnir standa.

Ragnar Baldursson lögmaður sem rak annað dómsmálið fyrir Hæstarétti sagði að dómur Hæstaréttar væri hvellskýr og menn væru að búa til óvissu. Hann sagði að þeir vextir sem væru tilgreindir í lánasamningunum ættu skýlaust að standa óhaggaðir og að dómurinn væri afar skýr.

það var með ólíkindum að hlusta á ráðherrann svara, því hann hefur ekki talað um að það hafi verið ósanngjarnt að skuldsett heimili þyrftu að horfa upp á gengistryggðu lánin sín hækka um og yfir 100% vegna falls bankanna.  Gylfi Magnússon hefur ekki verið tilbúinn að fara í almennar leiðréttingar á stökkbreyttum höfuðstól gengistryggðra og verðtryggðra lána. En núna þegar fallinn er dómur sem er hagstæður alþýðu þess lands þá talar hann um að það verði að finna sanngjarna niðurstöðu með hagsmuni allra að leiðarljósi. Þetta er ótrúlegur málflutningur í ljósi þess að ráðherrann hefur ekki verið tilbúinn að koma til móts við þann forsendubrest á skuldastöðu heimilanna fyrr en dómur Hæstaréttar féll. 

Það var einnig afar fróðlegt að hlusta á framsögu Péturs Blöndal þar sem hann sagði skuldara sjálfhverfa og minntist á tap sparifjáreigenda. Pétur sagði einnig að fundarmenn horfðu aðallega á naflann á sjálfum sér.  Formaður Verkalýðsfélags Akraness sagði á fundinum að það væri ekki sæmandi þingmanni að tala niður til fólks með þessum hætti sem væri einungis að fara fram á að dómur frá Hæstarétti væri virtur. Formaður VLFA spurði Pétur einnig hvort það gæti ekki verið staðreynd að hann væri að horfa á naflann á sjálfum þegar hann talaði í sífellu um að verja þurfi fjármagnseigendur í hvívetna. 

Formaður minnti fundarmenn á hvernig ríkisstjórn Íslands hjálpaði fjármagnseigendum þegar bankakerfið hrundi en eins og allir vita þá settu íslensk stjórnvöld 200 milljarða inn í peningamarkaðssjóðina og tryggðu einnig allar innistæður í bönkum. Á þessu sést að íslensk stjórnvöld eru tilbúin til að verja fjármagnseigendur með kjafti og klóm á meðan skuldsettum heimilum er gert að greiða allar sínar skuldir og jafnvel þó umrædd lán standist ekki íslensk lög.

Það kom fram í máli Gylfa að ef dómur Hæstaréttar stendur þá muni það kosta 100 milljarða það var eins og áður sagði ekkert mál að slá skjaldborg um fjármagnseignendur með því að setja 200 milljarða inn í peningamarkaðssjóðina og tryggja einnig allar innistæður í bönkum.  Svo tala þessir menn um að það þurfi að ríkja sanngirni. Því segir formaður Verkalýðsfélags Akraness við svona málflutningi: Sveiattan.