Samiðn og Samtök atvinnulífsins gengu frá nýjum kjarasamningi í kvöld. Iðnaðarmenn í Verkalýðsfélagi Akraness geta fengið samninginn á Skrifstofu félagsins. Nánar verður fjallað um samninginn og atkvæðagreiðslu um hann á Heimasíðu félagsins á næstunni.

Aðalfundur félagsins fór fram í gær.  Fundurinn hófst kl. 19 og var lokið 00:15.  Þetta var fyrsti aðalfundur nýkjörinnar stjórnar og þótti takast vel.  Ársreikningar fyrir árin 2002 og 2003 voru samþykktir, kosið var í stjórn orlofs- og sjúkrasjóðs, kjörstjórn og skoðunarmenn reikninga.  Nöfn þessara aðila má sjá hér á heimasíðunni undir liðnum "Stjórn og trúnaðarráð".  Munu stjórnir orlofs- og sjúkrasjóðs væntanlega koma saman til fundar strax í næstu viku.  Skýrslur stjórnar og framkvæmdastjóra sem lagðar voru fram á aðalfundinum í gær fylgja hér á eftir.

Aðalfundur Verkalýðsfélags Akraness 29. apríl 2004.

Skýrsla stjórnar

Eins og mönnum er eflaust í fersku minni tók ný stjórn Verkalýðsfélags Akraness við þann 19. nóvember 2003.  Aðkoman að félaginu var ekki betri en menn reiknuðu með nema síður væri.  Það hefur farið mikil orka og tími í að koma starfsemi félagsins í viðunandi horf.

Starfsmannamál

Stjórn félagsins ákvað að segja báðum starfsmönnum á skrifstofu félagsins upp störfum, og voru ráðningarslit Elínar Kjartansdóttur 1. mars 2004 en starfslok Elínborgar Magnúsdóttir voru 1. apríl.  Þeir félagsmenn sem fylgst hafa með málefnum VLFA á undaförnum árum þurfa ekki að láta þessa ákvörðun stjórnar VLFA koma sér á óvart..

 Formaður félagsins hóf störf hjá félaginu 19. nóvember 2003.  Upphaflega var meiningin að hann yrði í hlutastarfi, en fljótlega varð ljóst að það fyrirkomulag myndi ekki ganga upp.  Gríðarlegar annir við samningagerð og þjónustu við félagsmenn gerðu stjórninni ljóst að ekki væri verjandi að formaðurinn þyrfti sífellt að vera að biðja um frí úr annarri vinnu og svo hitt að mikil verkefni voru til staðar sem þurfti að leysa úr.  Stjórnin gekk frá ráðningarsamningi við formann félagsins 23. mars 2004, í fullt starf fyrir félagið.

 15. desember sl. réð stjórn félagsins Harald Ingólfsson viðskiptafræðing sem framkvæmdastjóra, eftir að staðan hafði verið auglýst og var hann valinn úr hópi 19 umsækjenda.  Haraldur tilkynnti stjórn félagsins 9. mars sl. að hann hefði fengið tilboð frá KB banka  Því miður er það tilboð eitthvað sem stjórn VLFA getur ekki keppt við.  Hvenær ráðningarslit við framkvæmdastjórann verða er ekki alveg komið á hreint en verður að öllum líkindum í næsta mánuði.  Það verður mjög mikil eftirsjá í Haraldi því mikið og gott starf liggur eftir hann á þeim stutta tíma sem hann hefur verið framkvæmdastjóri.

 Hugrún Olga Guðjónsdóttir var ráðin sem starfsmaður á skrifstofu félagsins 15. janúar sl.  Alls bárust 29 umsóknir þegar það starf var auglýst.  Starfið felur í sér öll almenn skrifstofustörf s.s svara í síma, skrá iðgjöld, orlofshúsaúthlutun, rita fundargerðir, sem og önnur tilfallandi verkefni.

 Þegar ljóst var að Haraldur myndi hætta störfum fyrir félagið var ákveðið á stjórnarfundi 23. mars að bjóða Hugrúnu Olgu Guðjónsdóttur að taka við stöðu Haraldar sem framkvæmdastjóri félagsins.  Á þeim stutta tíma sem hún hefur starfað fyrir félagið hefur hún margsannað að hún er hæfileikaríkur og duglegur starfskraftur og í ljósi þess og þeirrar menntunar og reynslu sem hún hefur treystir stjórn VLFA Hugrúnu fullkomlega til að taka við starfi sem framkvæmdastjóri félagsins.  Innan tíðar mun stjórn félagsins því fara að huga að ráðningu skrifstofumanns.

Lögfræðiþjónusta við félagsmenn.

Stjórn VLFA gekk frá samningi við Ingólf Hjartarson, hrl 11. desember 2003, um að vera lögfræðingur félagsins.  Boðið er upp á viðtalstíma við lögmann félagsins einu sinni í mánuði á skrifstofu félagsins.  Öll almenn ráðgjöf í viðtalstímum lögmannsins er félagsmönnum að kostnaðarlausu.

Það er vilji stjórnarinnar að taka öll mál er varða réttindi og stöðu félagsmanna föstum tökum og í því skyni hefur stjórn félagsins ákveðið að nýta sér í auknum mæli þá góðu þjónustu sem lögmaður félagsins býður upp á.  Þau mál sem lögmaður félagsins er þessa stundina að vinna fyrir félagið eru málefni er lúta að túlkun kjarasamnings starfsmanna síldarverksmiðjunnar, mál er snú að undirverktakastarfsemi á Grundartangasvæðinu, túlkun á kjarasamningi fyrir starfsmenn Klafa, arðgreiðslur til starfsmanna Íslenska járnblendifélagsins.  Þá vann lögmaðurinn álitsgerð fyrir félagið sem skilaði fullum sigri í ágreiningi félagsins vegna starfsmanna Akraneskaupstaðar.  Auk þessa er hann að vinna að ýmsum álitamálum er snúa að fyrrverandi formanni félagsins og mun hann gera grein fyrir því starfi hér á eftir.

Kjarasamningar

Samningur milli Samtaka atvinnulífsins og Starfsgreinasambands Íslands var undirritaður 7. mars sl.  Nokkur félög skrifuðu ekki undir samninginn, þar með talið Verkalýðsfélag Akraness.  Það sem við vorum óánægð með var að almennar prósentuhækkanir á samningstímabilinu eru of lágar að okkar mati og vildum við sjá þær hækka.  Ekki náðist samstaða um það innan Starfsgreinasambandsins og því er ljóst að ekki yrði lengra náð nema með átökum sem væntanlega myndu litlu skila.

Margt jákvætt er þó í samningnum og meðal mikilvægustu atriðanna er ný launatafla, lífeyrisframlag atvinnurekenda fer í 8% á samningstímanum og fræðslugjald festir fræðslusjóði í sessi til framtíðar með 0,15% fræðslusjóðsgjaldi.  Slysatryggingar hækka um 40% að lágmarki í upphafi samningstímans.  Stjórnin lagðist því ekki gegn samningnum.  Samningur var síðan borinn upp til atkvæðagreiðslu og var hann samþykktur í félaginu í póstatkvæðagreiðslu 29. mars 2004.

Þegar farið var að ræða við samninganefnd ríkisins vegna samninga starfsfólks á sjúkrahúsum kom í ljós að það var skýlaus krafa ríkisins að ef VLFA ætlaði sér að vera með í þeim heildarkjarasamningi sem gera átti við öll félögin, þá yrði félagið að afsala sér þeim sérákvæðum sem kjarasamningur þeirra hafði umfram aðra.  Stjórn félagsins lét hagfræðing ASÍ meta sérákvæðin og hversu stór hluti þau væru af heildarkjörum starfsmanna SHA.  Í ljós kom að um 5% til 6% var að ræða og kom því aldrei til greina að félagið afsalaði sér þessum sérkjörum.  Það ríkti afar góð samstaða meðal starfsmanna SHA um þetta mál og með einbeittum vilja og ákveðni tókst að halda þeim öllum inni og skrifa undir samkomulag við samninganefnd ríkisins 4. apríl um þau sérmál sem starfsmenn sem vinna á Sjúkrahúsi Akraness hafa.  Stjórn félagsins er afar þakklát fyrir þann mikla og góða stuðning sem starfsfólkið sýndi, en vill nefna sérstaklega framlag þeirra Jónu Birnu Bjarnadóttur og Önnu Signýjar Árnadóttur trúnaðarmanns, við gerð á þessum samningum og einnig þátt þeirra við gerð heildarsamnings við ríkið.  Kann stjórnin þeim bestu þakkir fyrir.

Nýr heildarkjarasamningur aðildarfélaga Starfsgreinasambands Íslands við ríkið, var undirritaður á miðnætti 8. apríl 2004.  Samningurinn sem gildir til 31. mars 2008, kemur í stað 14 mismunandi samninga einstakra félaga, sem áður giltu.  Markmið samningsins er að færa kjaraumhverfi félagsmanna aðildarfélaga SGS nær því sem gildir um aðra starfsmenn ríkisins.  Meginatriði í kröfugerð aðildarfélaganna gagnvart ríkinu eru í höfn. Mótframlag ríkisins í lífeyrissjóð hækkar til jafns við framlag til starfsmanna ríkisins, úr 6% í 11,5% á samningstímanum.  Auk framlags starfsmanna verður framlag í lífeyrissjóð því alls 15,5%.  Ný launatafla tók gildi 1. mars 2004 og stofnanasamningar verða gerðir á hverri stofnun fyrir sig.  Kosið verður um samninginn eigi síðar en 15. maí.  Undirbúningur að stofnanasamningi við SHA er í fullum gangi og hefur formaður félagsins fundað með trúnaðarmönnum að undanförnu.  Binda starfsmenn sem vinna eftir ríkissamningnum miklar vonir við að leiðrétting á þeirra launakjörum náist í þetta sinn.

Töluvert hefur verið fundað með starfsmönnum síldarbræðslunnar að undaförnu en kjarasamningur þeirra er laus 1. maí.  Ákveðið hefur verið að semja við allar fiskimjölsverksmiðjur í einu lagi.  Funduðu starfsmenn sem vinna í verksmiðjunni með formanni félagsins og fóru menn yfir þau sérákvæði sem starfsmenn síldarverksmiðjunnar hafa í sínum kjarasamningi, og gerð verður krafa um að halda í nýjum heildarsamningi.  Ekki hefur verið boðað til fundar um heildarsamning fiski og síldarmjölsverksmiðjanna þegar þetta er skrifað, en búist er við að það verði gert von bráðar.

Starfsmenn Spalar eru að leggja lokahönd á sinn kjarasamning og verður því verki vonandi lokið fljótlega.  Hafa starfsmenn ásamt formanni fundað með forsvarsmönnum Spalar nokkrum sinnum við gerð þessa samnings.

Varðandi aðra kjarasamninga sem verða lausir hjá félaginu er um þá að segja að kjarasamningur hjá ÍJ verður laus 1. desember 2004.  Undirbúningur fyrir þann samning er að hefjast.  Formaður hefur verið í sambandi við aðaltrúnaðarmann ÍJ vegna mála er snú að bónusgreiðslum vegna ofnar 3 en samningi við starfsmenn átti að vera lokið í byrjun árs 2003.  Hefur félagið óskað eftir viðræðum við stjórnendur ÍJ um það mál.  Annað mál sem félagið er að kanna eru arðgreiðslur til starfsmanna en aðstoðarframkvæmdastjóra Íslenska járnblendifélagsins hefur verið skrifað bréf þar sem óskað hefur verið skýringa á því hvers vegna ÍJ fari ekki eftir eigin stjórnarsamþykkt og greiði þessa greiðslu.  Ef ekki verður staðið við stjórnarsamþykktina um arðgreiðslur mun stjórn VLFA vísa þessu máli til lögmanns til skoðunar og frekari aðgerða.

Kjarasamningur Sementverksmiðjunnar er einnig laus 1. desember.  Undirbúningur að kröfugerð er ekki hafinn.

Kjarasamningur við Norðurál er laus um áramótin og er undirbúningur þegar hafinn að fullu.  Formenn þeirra félaga sem eiga aðild að þessum kjarasamningi hittust 12. mars sl. með trúnaðarmönnum NA þar sem aðaltrúnaðarmaður NA kynnti launasamanburð á milli Ísal og Norðuráls.  Verkalýðsfélag Akraness gerði það að tillögu á þessum fundi að hagfræðingi ASÍ yrði falið að gera launasamanburð milli Norðuráls, ÍJ og Ísal.  Áttum við fund með hagfræðingi ASÍ 17. mars, þar sem við báðum hann um að gera þennan samanburð fyrir okkur, ætlaði hagfræðingur ASÍ að reyna að fara eins fljótt í þessa vinnu og kostur væri.  Var hagfræðingur ASÍ sammála því að nauðsynlegt væri að sjá hver raunverulegur launamunur væri miðað við sama vinnustundafjölda hjá þessum þremur verksmiðjum, því ef einhver launamunur er getur hann nýst vel í komandi kjarasamningum við Norðurál.  Ljóst er að starfsmenn Norðuráls vænta mikils af komandi samningum og mun VLFA ekki láta sitt eftir liggja við samningsgerðina.

 Viðræðunefnd Samiðnar hefur setið á fundum undanfarna mánuði en því miður ber töluvert ennþá þar í milli og eftir samninga Rafiðnaðarsambandsins hefur allt staðið í stað eða þokast afturábak.

 Samninganefnd sjómanna hefur verið að funda undanfarna mánuði en mikið ber á milli.  Formaður sjómannadeildar Hjörtur Júlíusson fór á fund með stóru samninganefndinni hjá SSÍ 30. mars þar sem farið var yfir stöðu mála.  Eins og staðan er í dag er útlitið ekki bjart um að samningur við sjómenn verði gerður í bráð.

Atvinnuhorfur

Það verður að segjast alveg eins og er að framtíðarhorfur í atvinnumálum eru mjög góðar á okkar félagssvæði.  Framkvæmdir vegna stækkunar Norðuráls munu hefjast von bráðar, og er gert ráð fyrir að stækkunin verði tekin í notkun vorið 2006.  Munu yfir 100 ný störf skapast til frambúðar vegna þessa.  Norðurál hefur nú óskað eftir viðræðum um enn frekari stækkun sem fyrirhugað er að hefja framkvæmdir við þegar lokið er byggingu Fjarðaráls.  Það var afar jákvætt að Grandi og HB fjölskyldan skyldu hafa náð samkomulagi, og keypt fyrirtækið saman.  Stjórn VLFA telur að þessi kaup hafi verið það besta í stöðunni, og vonandi tryggir þetta störf fiskvinnslufólks og sjómanna hér á Akranesi til frambúðar.

Fundahöld ofl.

Á þeim 5 mánuðum sem liðnir eru frá því að núverandi stjórn tók við, hafa verið haldnir 22 stjórnarfundir, 3 stjórnar- og trúnaðarráðsfundir, 3 í stjórn sjúkrasjóðs, 2 félagsfundir, 6 aðalfundir deilda og 2 námskeið fyrir trúnaðarmenn.  Auk þessa hafa vinnustaðir verið heimsóttir og rætt við félagsmenn.

Skrifstofa félagsins er að hefja undirbúning að fiskvinnslunámskeiði, og verður það auglýst von bráðar.  Framhaldstrúnaðarmannanámskeið er fyrirhugað að halda í haust.  Stjórn félagsins mun leggja mikið kapp á að gera trúnaðarmenn félagsins eins hæfa og virka eins og kostur er.  Höfum við verið í sambandi við Félagsmálaskóla Alþýðu sem mun sjá um þessi námskeið fyrir okkur.

Fréttabréf

Stjórn félagsins hefur rætt um að gefa út tvö fréttabréf á ári til upplýsingagjafar fyrir félagsmenn, og er stefnt að því að fyrsta blaðið komi út í sumar eða haust.

80 ára afmæli félagsins 14. október 2004

Gerður hefur verið samningur við Kristján Kristjánsson rithöfund um gefa út afmælisrit fyrir félagið.  Þar verður farið yfir sögu félagsins og m.a tekin viðtöl við gamla félagsmenn, blaðið mun koma út í október og verður dreift í öll hús á Akranesi.  Stjórn félagsins hefur ákveðið að minnast þessara merku tímamóta og halda upp á daginn.  Nánari tilhögun um útfærslu verður auglýst þegar nær dregur.

Það sem stjórn og starfsmenn hafa áorkað

Þegar núverandi stjórn tók við voru útistandandi kröfur félagsins yfir 20 milljónir króna og áttu sumar skuldir rætur sínar að rekja til ársins 1997.  Stjórn og starfsmönnum félagsins tókst að innheimta 5,6 milljónir af þeim kröfum fyrir áramót, eins og reikningar félagsins sýna glögglega og hefur auk þess tekist að innheimta um 4,5 milljónir það sem af er þessu ári.  Allar skilagreinar fram til þessa dags hafa nú verið færðar.  Í undanfara kosninganna sl. haust gáfum við ýmis loforð um meiri og betri þjónustu við félagsmenn.  Þessi loforð hafa flest verið uppfyllt nú þegar og má þar nefna að jólatrésskemmtun var haldin í desember fyrir börn félagsmanna og heimasíða félagsins hefur verið tekin í notkun og er uppfærð nánast daglega.  Stjórn félagsins beitti sér fyrir því að fá bæjaryfirvöld til að opna leikskólann Vallarsel fyrr á morgnana eða kl. 6:45, var það gert að ósk starfsfólks sem vinnur í stóriðjunum á Grundartangasvæðinu.  Hér á eftir, undir liðnum um reglugerðabreytingar mun verða lögð fram tillaga um greiðslur úr sjúkrasjóði vegna krabbameinsskoðunar.  Þessu til viðbótar var félagsmönnum boðið upp á ókeypis framtalsaðstoð sem tugir manna nýttu sér.  Stjórnin hefur þegar ákveðið að framhald verði þar á og að þetta verði að föstum lið í starfi félagsins.  Mikið hefur mætt á stjórn og starfsmönnum félagsins vegna ýmissa ágreiningsmála félagsmanna við atvinnurekendur.  Öllum málum hefur verið sinnt og hafa margir fengið góða úrlausn.  Ber þar hæst sá árangur sem náðist fyrir tímakaupsfólk sem starfar hjá Akraneskaupstað.  Leiðrétting til þeirra starfsmanna nam hundruðum þúsunda króna.  Nokkur mál eru enn í vinnslu sem ekki er hægt að tíunda hér.

Málefni fyrrverandi formanns

Stjórn félagsins tók þá ákvörðun að vísa máli Hervars Gunnarssonar fyrrverandi formanns félagsins, varðandi óútskýrða reikninga og óuppgerðar kröfur, til lögmanns VLFA.  Hann mun hér á fundinum gera nokkra grein fyrir stöðu þess máls og hvert stefnir.  Hefur hann gert greinargerð til stjórnar Verkalýðsfélags Akraness sem dreift verður hér til félagsmanna ásamt athugasemdum endurskoðanda félagsins því það er stefna stjórnar VLFA að félagsmenn séu vel upplýstir um málefni félagsins.

Lokaorð

Stjórn Verkalýðsfélags Akraness tók við 19. nóvember 2003.  Nýkjörin stjórn félagsins er einungis búin að vera fimm mánuði við stjórnartaumanna en á þeim stutta tíma hefur félagið tekið algjörum stakkaskiptum, innheimtumálin eru að verða komin í lag, heimasíðan er farin að virka, iðgjaldaskráningin er færð jafnóðum og boðið er upp á framtalsaðstoð fyrir félagsmenn.  Síðan lagði varaformaður ásamt framkvæmdastjóra félagsins fram tillögur að reglugerðabreytingum fyrir sjúkrasjóð, og verður gerð tillaga um að krabbameinsransóknir verði greiddar að hluta úr sjúkrasjóði.  Er það gert í samræmi við kosningaloforð sem við gáfum fyrir kosningarnar.

Sú vítaverða vanræksla og sjálftaka sem viðhöfð hefur verið á skrifstofu félagsins um langt árabil og það sinnu- og eftirlitsleysi þeirra sem stjórnað hafa félaginu á liðnum árum eru hlutir sem mega aldrei endurtaka sig.

Það hefur gustað verulega um Verkalýðsfélag Akraness undanfarin ár.  Ástæðurnar þekkja allir og þarf ekki að tíunda hér.  Ég vil þó benda mönnum á, að sá sem hér talar og harðast hefur barist, hefur alla tíð verið málefnalegur í sinni gagnrýni.  Aldrei voru settar fram órökstuddar eða ósannar fullyrðingar.  Þvert á móti hefur allt sem ég hef sagt, staðist.  Það er þó mikilvægt að sýna aðhald og halda uppi gagnrýni og hvet ég menn til að gera það, en við skulum muna að sú gagnrýni þarf að vera málefnaleg og sett fram með rökum.  Sú yfirlýsing sem Lárus Ingibergsson kom með á síðasta framhaldsaðalfundi um að gefa stjórn félagsins algjöran frið í þau tvö ár sem hún var kjörin til að koma félaginu á lappirnar að nýju til þess að það gæti unnið að hagsmunum félagsmanna, var mikils virði fyrir þessa stjórn og gott væri að fleiri fylgdu fordæmi hans.  Stjórn félagins vill að lokum þakka félagsmönnum fyrir allan þann stuðning sem við höfum fundið fyrir eftir að við tókum við stjórnartaumunum.

Skýrsla framkvæmdastjóra

Ég kom til starfa þann 15. desember 2003 og hef því starfað hjá félaginu í fjóra og hálfan mánuð.  Á þessum stutta tíma hefur heilmikið gerst og í þeim störfum sem mér var falið hefur ýmislegt áunnist.  Það var erfið aðkoma fyrir mig, um miðjan desember, að koma að tómri skrifstofu og reyna að setja sig inn í öll þau margvíslegu verkefni sem tengjast rekstri félagsins.  Fyrstu vikurnar fóru í að kynna sér starfsemi félagsins, læra á tölvukerfið, læra hvernig iðgjöld og sjúkrabætur eru skráð og hvernig ýmsar skýrslur eru keyrðar út úr kerfinu.  Eftir að Elínbjörgu Magnúsdóttur var sagt upp um áramótin þá fóru fyrstu 3 vikur janúarmánaðar í að sjá um daglegan rekstur félagsins.  Þann 20. janúar var Hugrún Olga Guðjónsdóttir ráðin til starfa á skrifstofu félagsins og hefur hún verið fljót að setja sig inn í hin ýmsu verkefni skrifstofunnar.  Verkaskipting okkar á skrifstofunni frá því að Hugrún kom til starfa hefur verið með þeim hætti að ég hef séð um fjármálin, þar með talið innheimtu iðgjalda, greiðslu reikninga og sjúkrabóta, uppsetningu heimasíðu og fleira.  Vilhjálmur hefur séð um félagslega þáttinn, þ.e. kjarasamningamál og ýmis önnur mál sem snúa að félagsmönnum og má þá sérstaklega nefna fjölmörg mál þar sem brotið hefur verið á réttindum félagsmanna.  Þessi mál hafa verið óhemju tímafrek hjá honum en sú vinna hefur líka skilað árangri.  Hugrún hefur síðan séð um hin daglegu verkefni á skrifstofunni, svo sem svara í síma, bóka orlofshús, selja miða í göngin, skrá iðgjöld og svara fyrirspurnum um kjarasamninga.  Við höfum að sjálfsögðu gengið í störf hvers annars þegar það hefur átt við og upplýst hvert annað um þau verkefni sem við erum að sinna hverju sinni.  Rétt er að taka fram að við erum öll ný á skrifstofu félagsins og erum langt frá því fullnuma í þeim verkefnum sem liggja fyrir á vegum félagsins.

Varðandi iðgjaldaskráninguna í félaginu þá komst ég að því á öðrum degi í starfi að það var óskráð iðgjaldamappa vegna maí 2003 uppi á skáp á skrifstofunni.  Þetta þurfti að slá inn í kerfið og var Anna Jóna Gísladóttir hjá Lífeyrissjóði Vesturlands fengin til þess í byrjun janúar enda þekkir hún iðgjaldakerfið mjög vel.  Verður það að teljast gagnrýnisvert að ekki hafi verið hugsað um skráninguna betur en svo að það gleymdist að skrá heilan mánuð af iðgjöldum.  Iðgjöldin eru jú undirstaða félagsins og skráning þeirra sjálfsagður hluti af daglegum rekstri félagsins.  Ekki var hægt að loka bókhaldinu fyrr en í lok febrúar þegar búið var að gera margvíslegar leiðréttingar og uppfærslur með hjálp Lilju Harðardóttur hjá Streng.  Hefur hún verið ómetanleg hjálp í þessum efnum.  Þá fyrst var hægt að sjá raunverulega stöðu skuldara og senda út aðallaunagreiðandayfirlit, en það hefur ekki verið gert áður.  Enda kom í ljós að margir launagreiðendur sátu inni í kerfinu með skuld, sem má rekja til dráttarvaxta mörg ár aftur í tímann.  Vakti það misjafna hrifningu hjá þeim að greiða þessar skuldir enda höfðu þeir staðið í þeirri meiningu að þeir væru skuldlausir við félagið.  Töluvert margir launagreiðendur eru enn með skekkju í kerfinu og á það eftir að taka töluverðan tíma að leiðrétta þá.  En fyrsta skrefið er stigið með því að senda út þessi yfirlit og er stefnt að því að það verði gert a.m.k. á 3ja mánaða fresti í framtíðinni. 

Varðandi innheimtumál, þá voru iðgjaldakröfur félags-, sjúkra- og orlofssjóðs samtals 17.500.000 um síðustu áramót samkvæmt ársreikningi félagsins.  Við þetta má bæta skuldajöfnunun upp á kr. 5.600.000 sem eru inni í ársreikningum 2002 og  2003 en var gengið frá af minni hálfu og fyrir milligöngu endurskoðanda félagsins í mars sl.  Ekki er heldur búið að taka tillit til þeirra skilagreina sem ekki höfðu borist félaginu.  Það liggur ljóst fyrir að þau iðgjöld eru a.m.k. á aðra milljón króna.  Samanlagðar iðgjaldakröfur með áföllnum dráttarvöxtum voru því yfir 23 milljónir um síðustu áramót.  Kallað hefur verið eftir töluvert af skilagreinum og skrifuð innheimtubréf til fjölmargra aðila og höfum við náð að innheimta 4,5 milljónir króna frá því að við hófum innheimtuaðgerðir í byrjun mars, eða alls yfir 10 milljónir að skuldajöfnunum meðtöldum.  Nokkrir aðilar hafa enn ekki sýnt viðbrögð við innheimtuaðgerðum okkar og eru þeir til alvarlegrar skoðunar um harðari innheimtuaðgerðir.  Það verður að teljast ámælisvert að iðgjaldakröfur hjá félaginu séu svo háar og að elstu kröfur eigi rætur sínar að rekja allt til ársins 1997.

Lausafjárstaða félagssjóðs er ekki góð um þessar mundir og hefur ekki verið það síðustu þrjú árin eða allt frá því húsnæðið að Sunnubraut 13 var keypt.  Bankainnistæður félagssjóðs um síðustu áramót voru um 6,7 milljónir þegar tekið hefur verið tillit til þeirra millifærslna sem átti eftir að gera milli sjóða, en á móti kemur að skammtímaskuldir voru um 8,5 milljónir, auk þess sem nýframfærð krafa frá HB hf. vegna endurgreiðslu á sjúkra- og orlofssjóðsgjöldum hefur áhrif á umsýslugjald félagssjóðs um kr. 1.500.000 og með tilliti til þess var handbært fé því neikvætt um 3,3 milljónir um áramótin.  Vonandi tekst að snúa við þessari þróun síðustu ára með betri innheimtu á iðgjöldum félagsins og aðhaldi í rekstri.  Einnig má velta upp þeirri spurningu hvort kanna eigi þann möguleika að selja 3ju hæðina á Kirkjubraut 40.  Þar liggur bundið fjármagn upp á tugi milljóna króna sem hægt væri að nýta til að bæta lausafjárstöðuna og auðveldlega væri hægt að ávaxta þetta fjármagn betur en þá húsaleigu sem nú er greidd af húsnæðinu.

Töluverð vinna er í kringum sjúkrasjóð félagsins.  Umsóknir virðast koma í hálfgerðum hriðjum, einn mánuðinn eru þær margar og annan fáar.  Oft er um viðkvæm mál að ræða og því mikilvægt að gæta fyllsta trúnaðar við meðferð umsóknanna.  Vinnan felst aðallega í því að kanna rétt félagsmanna og hvort öll gögn fylgi með.  Eigi félagsmaður rétt þarf að skrá inn upplýsingar á fjórum stöðum í kerfinu áður en hægt er að borga út bætur.  Sjúkrasjóðurinn hefur verið rekinn með töluverðum hagnaði undanfarin ár, þrátt fyrir nýframkomna kröfu HB hf., og hefur hann því vaxið vel á undanförnum árum.  Spurningin er hversu mikill hagnaður á að vera af sjóðnum og hvort taka eigi upp fleiri bótaflokka í framtíðinni sem komi félagsmönnum til góða.  Fullar bætur úr sjóðnum eru nú kr. 78.900 á mánuði og spurning um hvort hækka eigi bæturnar og miða þær við lágmarkslaun eða atvinnuleysisbætur.   En ég legg áherslu á að það þarf að fara varlega út í slíkar breytingar og áætla nákvæmlega þann kostnað sem felst í slíkum breytingum.  Það verður verkefni nýrrar stjórnar sjúkrasjóðs að kanna þessi mál.

Umsjón og bókun orlofshúsa félagsins er í okkar höndum á skrifstofunni.  Nýtingin á húsunum hefur verið 75% frá áramótum.  Því miður hefur verið nokkuð um það að félagsmenn gangi illa um orlofshúsin og þrífi ekki eftir sig og höfum við þurft að gera fjárkröfu á tvo félagsmenn frá áramótum vegna skemmda og óþrifnaðar á orlofshúsunum.  Ekki er hægt að hafa eftirlit með orlofshúsunum í Húsafelli, Svínadal og Hraunborgum og fáum við því ekki fréttir af ástandi húsanna fyrr en næsti félagsmaður hefur verið þar.  Það er því rétt að brýna fyrir félagsmönnum að ganga vel um orlofshúsin enda eru þau sameign okkar allra.  Varðandi rekstur orlofshúsanna þá liggur fyrir, eftir að nýja krafan frá HB kom í ljós, að handbært fé orlofssjóðs var neikvætt um 1,3 milljónir um síðustu áramót.  Það er því ekki til fjármagn til að nota í viðhald og endurbætur á þeim 8 orlofshúsum í eigu félagsins að svo stöddu.  Reyndar liggur töluvert fé bundið í eignum orlofssjóðs og stóra spurningin er sú hvort selja eigi eitt eða fleiri orlofshús til að losa fjármagn til viðhalds og endurbóta á öðrum eignum sjóðsins og leigja ný orlofshús í staðinn yfir sumartímann.  Það verður því að verk nýrrar stjórnar orlofssjóðs að kanna þessi mál ásamt því að láta taka út öll orlofshúsin af óháðum aðilum og tel ég að best fari á að einn eða fleiri trésmiðir úr iðnsveinadeild félagsins verði fengnir í þá vinnu. 

Kosningar um nýjan kjarasamning milli SA og SGS fóru fram í mars og voru félagsmenn í almennu deild og matvæladeild á kjörskrá.  Fram fór póstkostning og var samningurinn samþykktur með 62% atkvæða en þáttaka var aðeins rúmlega 22%.  Margir félagsmenn höfðu samband og sögðust ekki hafa fengið kjörseðil og þegar að var gáð þá voru þeir einhverja hluta vegna skráðir í opinberu deild félagsins.  Margir kærðu sig inn á kjörskrá en a.m.k. nokkrir tugir félagsmanna eru ennþá skráðir í ranga deild.  Félagatalið er því að nokkrum hluta gallað en vinna er hafin við að leiðrétta það.  Í byrjun apríl fór fram kosning um verkfallsheimild hjá félagsmönnum sem vinna á Heilbrigðisstofnun Akraness.  Atkvæðin voru talin en ekki kom til þess að úrslitin yrðu tilkynnt opinberlega þar sem verkfalli var frestað. 

Ný heimasíða félagsins var tekin í notkun í janúar.  Samið var við Nepal í Borgarnesi um að búa til nýtt útlit á síðuna og kostaði sú vinna 130.000 kr.  Þjónustusamningur var þegar til milli Nepal og Starfsgreinasambandsins og gengum við inn í hann sem aðildarfélag og greiðum því kr. 6.225 á mánuði í þjónustugjöld.  Sambærileg þjónusta kostar á bilinu 13-17 þúsund á mánuði hjá öðrum aðilum.  Talsverður tími hjá mér hefur farið í uppsetningu síðunnar og innsetningu á upplýsingum á síðuna.  Það mesta er komið inn en ekki hefur enn gefist tími til að koma upplýsingum og myndum af orlofshúsum félagsins á síðuna.  Það verður gert síðar á árinu og er góður möguleiki á því að hægt verði að senda inn umsóknareyðublað um orlofshús beint af heimasíðunni á næsta ári.  Við höfum einnig verið dugleg við að setja inn fréttir af því helsta sem er að gerast í félaginu inn á síðuna.  Í byrjun apríl var settur upp teljari á heimasíðuna og hafa heimsóknir á síðuna verið um 10 á dag nú í apríl, eftir að teljari var settur á síðuna.  Við höfum einnig fengið nokkrar fyrirspurnir af heimasíðunni og höfum við reynt að svara þeim öllum af bestu getu.  Ég hvet félagsmenn eindregið til að kynna sér og nota heimasíðu félagsins og allar ábendingar um hvað betur megi fara á síðunni eru vel þegnar.

Eins og mörgum er kunnugt um þá hef ég sagt upp störfum hjá félaginu og hætti í kringum 15. maí næstkomandi.  Ástæða þessa er sú að haft var sambandi við mig frá KB banka og mér boðið nýtt starf.  Eftir að hafa hugsað málið vel og vandlega þá fannst mér starfið vera þess eðlis að ég gæti ekki hafnað því.  Því miður kemur þetta á óheppilegum tíma fyrir félagið en ég tel að ég sé búinn að koma flestum málum sem mér var falið í ákveðinn farveg og óttast því ekki að skilja við félagið á þessum tímapunkti.  Stjórn félagsins hefur ákveðið að ráða Hugrúnu Olgu Guðjónsdóttur í starf framkvæmdastjóra í minn stað og treysti ég henni fullkomlega fyrir því, enda er hún heiðarleg, samviskusöm, staðföst og ákveðin í þeim verkefnum sem hún tekur sér fyrir hendur.  Þetta hefur verið lærdómsríkur og skemmtilegur tími hjá félaginu en jafnframt erfiður þar sem félagið er að ganga í gegnum miklar breytingar á þessum mánuðum.  Ég hef starfað af heilindum fyrir félagið í þennan stutta tíma og vona að ég hafi gert félaginu einhvert gagn.  Ég þakka stjórn og samstarfsmönnum fyrir samstarfið og óska félaginu og félagsmönnum þess bjartrar framtíðar.

Með kveðju,

Haraldur Ingólfsson.

Samninganefnd Verkalýðsfélags Húsavíkur fundaði í gærkvöldi um stöðu kjaramála ásamt trúnaðarmönnum af öllum helstu vinnustöðum á félagssvæðinu. Fram kom megn óánægja með stöðu mála og þann drátt sem orðið hefur, þar sem enn hefur ekki verið gengið frá nýjum kjarasamningi þrátt fyrir að þeir hafi verið lausir um síðustu áramót. Tilboð atvinnurekenda um launahækkanir vakti undrun og reiði fundarmanna. Þá fengu stjórnvöld heldur ekki góða dóma fyrir viðbrögð þeirra við kröfum verkalýðshreyfingarinnar um hækkun atvinnuleysisbóta og aðkomu að lífeyrissjóðsmálum.

Samninganefndin taldi mikilvægt að verkafólk um land allt stæði saman og boðaði til verkfalla til að knýja á um bætt kjör haldi atvinnurekendur sig við fyrirliggjandi tillögur um launahækkanir. Samninganefndin var sammála um að félagsmenn í Verkalýðsfélagi Húsavíkur væru tilbúnir í átök enda ekki vanir því að láta troða á sér. Formanni félagsins sem jafnframt á sæti í samninganefnd Starfsgreinasambands var falið að koma þessum skoðunum á framfæri við samninganefnd Starfsgreinasambands Íslands sem fundar í Reykjavík á föstudag um stöðuna og næstu skref í kjaradeilu sambandsins við atvinnurekendur.  

Tímavinnufólk hjá Akraneskaupstað fær sína desemberuppbót. 

Ánægjuleg niðurstaða segir formaður Verkalýðsfélags Akraness.

Eins og fram hefur komið í Skessuhorni mótmælti Verkalýðsfélag Akraness því að Akranesbær greiddi ekki orlofsbætur og desemberuppbót til tímavinnufólks fyrir árið 2003. Akranesbær vísaði til túlkunar samstarfsnefndar Launanefndar Sveitarfélaganna og Starfsgreinasambands Íslands og bókunar þar að lútandi frá 23. desember s.l.

Málið var tekið fyrir á fundi Samstarfsefndarinnar þann 25. febrúar s.l. og þar var afstaða nefndarinnar endurskoðuð og fallist á röksemdir Verkalýðsfélags Akraness. Tímavinnufólki hjá Akranesbæ verða því greiddar orlofsbætur og desemberuppbót eins og verið hefur.

“Við höfðum rétt fyrir okkur og höfum fengið það staðfest og erum ánægð fyrir hönd okkar skjólstæðinga,” segir Vilhjálmur Birgisson formaður Verkalýðsfélags Akraness. Hann segir að um sé að tefla mikla fjármuni þar sem maður í fullu starfi eigi rétt á 53.700 krónum í desemberuppbót og 10.000 kr. í orlofsuppbót. “Fólki munar um minna þannig að þetta er ánægjuleg niðurstaða” 

Förum eftir leikreglum

“Samningaumboðið okkar er hjá Launanefnd sveitarfélaga og þar fer fram túlkun á samningunum. Verkalýðsfélag Akraness var ekki sammála túlkun Launanefndarinnar og ekki heldur sammála sínu fólki í Starfsgreinasambandinu, því það var sameiginleg niðurstaða LN og SGS í desember að okkur bæri ekki að greiða orlofsuppbót og desemberuppbót til tímavinnufólks, ” segir Jón Pálmi Pálsson bæjarritari Akraneskaupsstaðar. “Þegar erindið kom til okkar að nýju eftir mótmæli Verkalýðsfélagsins var  því vísað til samningsaðila. Þeir hafa nú breytt fyrri samþykkt sinni og komist að því að okkur beri að greiða þessar bætur og við unum því að sjálfsögðu. Við erum ekki að brjóta að neinum heldur förum eftir leikreglum á hverjum tíma”

Fundað í dag með Samtökum atvinnulífsins
Fulltrúar frá Starfsgreinasambandi Íslands funduðu í dag með Samtökum atvinnulífsins. Á fundinum var farið yfir þau mál sem útaf standa, launahækkanir, lífeyrissjóðsmál, starfsmenntamál og aðkomu stjórnvalda að kjarasamningunum.

Eftir þann fund var ákveðið að halda viðræðum áfram á morgun í Karphúsinu. Samninganefnd Starfsgreinasambands Íslands fundaði í morgun og aftur eftir fundinn með Samtökum atvinnulífsins. Mikill hugur er í samninganefnd Starfsgreinasambandsins að gera sitt besta til að ná fram bættum kjörum fyrir verkafólk. 

Samninganefnd Starfsgreinasambandsins hefur verið boðuð til fundar á morgun klukkan 17 í húsakynnum ríkissáttasemjara. Í samninganefnd SGS eru formenn aðildarfélaga sambandsins, alls 27 formenn utan við aðildarfélög Flóans. Kynnt verður á þessum fundi drög að nýjum samningi milli Samtaka atvinnulífsins og Starfsgreinasambands Íslands en í seinni partinn í dag náðist samkomulag sem samningarnefnd SGS telur að sé grundvöllur að samningi. Það mun því koma í hlut þessara 27 formanna að ákveða hvort gengið verði frá samningi á þeim forsendum sem kynntar verða á morgun,  en eins og staðan er nú er alls óvíst að spá um niðurstöðu þeirra fundar.

Laun hækka um 15% á samningstímanum samkvæmt drögum að nýjum kjarasamningi Flóabandalagsins og Starfsgreinasambandsins við atvinnurekendur. Ef niðurstaða fæst í viðræður við ríkisstjórnina í dag er gert ráð fyrir að kjarasamningar verði undirritaðir síðdegis eða í kvöld.

Hjólin byrjuðu að snúast í gær í Karphúsinu þegar alvöru viðræður um hækkun almennra launa og lífeyrismál byrjuðu. Þegar samningafundum laun á níunda tímanum sagði Ásmundur Stefánsson ríkissáttasemjari að vel hefði miðað í viðræðunum og að hann væri vongóður um að samningar yrðu undirritaðir í dag. Þó að mörg atriði sé óljós sem snúa að ríkisstjórn ríkir bjartsýni um að samningarnir verði undirritaðir í kvöld.

Stóra samninganefnd sambandsins hefur verið boðið i Karphúsið klukkan fimm í dag og Flóabandalagið hefur boðað sína 130 manna samninganefnd í Kiwanishúsið við Engjateig klukkan 18 þar sem samningarnir verða kynntir. Samkvæmt drögunum sem nú liggja fyrir er gert ráð fyrir að almenn laun hækki strax um 3,25% og að auki um 1% sem felst í nýrri launatöflu. Á næsta ári eiga laun að hækka um 3%, 2006 um 2,5% en þá bætist líka við 1% vegna launatöflunnar. Á síðasta árinu hækka svo laun um 2,25%.

Samanlagt hljóða þessar hækkanir upp á um 14% á samningstímanum. Við bætast svo hækkanir á mótframlagi atvinnurekenda á samningstímanum um 1og hálft prósentustig eða úr 6% í 7,5%. Ef þessi hækkun er talin með hækka laun kringum 15 af hundraði. Hækkunin verður í tvennulagi, 2005 og 2007. Kostnaður atvinnurekenda verður þó ekki sem svarar til 1,5% hækkunar því breytingar verða á reglum sem gilda um framlag þeirra í séreignasjóði. Atvinnurekendur greiða 2% í séreignasjóði á móti 2% launþega á verður sú regla áfram við lýði. Hins vegar hefur þeim borið að greiða annað prósentið til launamanna sem ekki greiða í séreignasjóði og verður fallið frá því.

Þá eru hugmyndir um að hluti af tryggingagjaldi verði notaður til að styrkja sjóðina. Ríkisstjórnin þarf að ákveða það og atvinnurekendum þykir þessi kostur ekki fýsilegur. En framhaldi ræðast af viðbrögðum ríkisstjórnarinnar við kröfum verkalýðshreyfingarinnar sem meðal annar eru um að ríkissjóður taki að sér að greiða örorkubætur, atvinnuleysisbætur verði hækkaðar og staða starfsmenntunarsjóðs verði tryggð.

ruv.is.

Á miðnætti sunnudaginn 7. mars voru nýir kjarasamningar  Flóabandalagsins, Starfsgreinasambands Íslands og Samtaka atvinnulífsins undirritaðir. Samningurinn er til fjögurra ára og heildarlaunahækkun á samningstímanum er 14.%. Heildarkostnaðaráhrif samningsins er 15.7%.  Meðal mikilvægustu atriða samningsins er ný launatafla, lífeyrisframalag atvinnurekenda fer í 8% á samningstímanum og fræðslugjald festir fræðslusjóði í sessi til framtíðar með 0.15% fræðslusjóðsgjaldi. Slysatryggingar hækka um 40% að lágmarki í upphafi samningstímans.  Helstu atriði samningsins fara hér á eftir.

Grunnkaup hækkar þannig á samningstímanum

·           Almenn launahækkun 1. mars 2004      3,25%

·           Almenn launahækkun 1. janúar 2005    3,00%

·           Almenn launahækkun 1. janúar 2006    2,50%

·           Almenn launahækkun 1. janúar 2007    2,25%

Ný launatafla  treystir öryggisnetið

Tekin er upp ný 25 flokka launatafla með fimm starfsaldursþrepum. Miklar væntingar eru bundnar við þessa nýju töflu. Taflan gefur möguleika á auknu svigrúmi í launahækkunum og launaskriði.

Við innröðun í töflu var farin sama leið og 1997 við innfærslu á bónusum, yfirborgunum og ýmsum álagsgreiðslum. Sem dæmi var í fiskvinnslunni fært inn í taxtakerfið í tveimur áföngum, tvisvar sinnum 15% af bónus þó að hámarki 30 krónur í hvort sinn. Í öðrum tilvikum gat verið um að ræða innfærslu fæðisgjalds.

Markmiðið með þessari leið var að færa taxta nær greiddu kaupi og hækka dagvinnulaun. Um leið treystum við öryggisnet og hækkum  lægstu laun umtalsvert.

Sameiginlegt mat samningsaðila á kostnaðaráhrifum innfærslu í launatöflu er að frá undirritun samnings sé kostnaður 1,00% og aftur 1,00% hinn 1. janúar 2006.

Tekjutrygging

Tekjutrygging hækkar  verulega á samningstímanum. Tekjutrygging fyrir fulla dagvinnu verður frá gildistöku samnings kr. 100.000 á mánuði, árið 2005 kr. 103.500, árið 2006 kr. 106.000 og árið 2007 kr. 108.000.

Sameignarsjóður / séreignarsjóður

Frá 1. janúar 2005 hækkar framlag atvinnurekenda í sameignarsjóð í 7,00% og á sama tíma fellur niður skylda til að greiða 1,00% fast í séreignasjóð óháð framlagi starfsmanns.         Frá 1. janúar 2007 verður iðgjald atvinnurekenda til sameignarsjóðs 8% um leið og tryggingagjald lækkar um 0,45%.

Áfram á launamaður rétt á 2% mótframlagi atvinnurekanda í séreignarsjóð ef launamaður sparar sjálfur 2% af launum eða meira.

Starfsmenntamál treyst til framtíðar – framlag atvinnurekenda samningsbundið

Með þessum samningum innsigla samningsaðilar þann mikla árangur sem náðist á síðasta samningstímabili í starfsmenntamálum með því að festa starfsmenntasjóði almenns launafólks í sessi til framtíðar.

Ásamt áframhaldandi framlagi stjórnvalda til starfsmenntamála, 190 milljónir á samningstímabilinu, munu atvinnurekendur hefja greiðslur í starfsmenntasjóð á samningstímabilinu. Með þessu er í fyrsta sinn skotið varanlegum stoðum undir starfsmenntun almenns launafólks til framtíðar. Frá 1. janúar 2006 greiða atvinnurekendur 0,05% í sjóði til fræðslumála og 0,10% til viðbótar frá 1. janúar 2007, þ.e. samtals 0,15% frá þeim tíma.

Menntareikningar – bókun

Ásamt starfsmenntasjóðum skrifuðu aðilar undir bókun um menntareikninga. Með þessari bókun lýsa samningsaðilar sig tilbúna til að vinna að því gagnvart stjórnvöldum að slíkir reikningar fái sömu skattalegu meðferð og séreignasjóðir lífeyrissjóðanna. Sett verður á nefnd samningsaðila sem mun vinna að málinu á samningstímabilinu.

Með þessari bókun er kominn grundvöllur að því að fyrirtæki og launafólk geti tekið málið upp í samningum sín á milli.

Hækkun slysatryggingar – a.m.k. 40% hækkun

Slysatryggingar launafólks taka verulegum hækkunum við þessa samningsgerð. Gert er ráð fyrir að farið verði í endurskoðun á slysatryggingarákvæðum með það að markmiði að stórhækka tryggingarvernd starfsmanna. Þessari endurskoðun skal vera lokið fyrir 15. júní 2004.

Að lágmarki munu slysatryggingar samkvæmt samningum hækka um 40%.

Uppsagnarfrestur samræmdur og einfaldaður

Samkvæmt samningnum verður uppsagnarfrestur og einfaldaður til mikilla muna. Þannig mun allt verkafólk hafa uppsagnarfrest samkvæmt einni einfaldri reglu:

Eftir tveggja vikna samfellt starf hjá sama atvinnurekenda er uppsagnarfrestur 12 almanaksdagar. Eftir þriggja mánaða samfellt starf er uppsagnarfrestur 1 mánuður miðað við mánaðamót og eftir þriggja ára samfellt starf  hjá sama atvinnurekanda er uppsagnarfrestur 3 mánuðir miðað við mánaðamót en áður tók 5 ár að ávinna sér þennan rétt.

Desemberuppbót

Desemberuppbót verður kr. 38.500 árið 2004, kr. 39.700 árið 2005, kr 40.700 árið 2006 og kr. 41.800 árið 2007.

Orlofsuppbót

Orlofsuppbót verður kr. 21.100  á orlofsárinu sem hefst 1. maí 2004, kr. 21.800 á orlofsárinu sem hefst 1. maí 2005, kr. 22.400 á orlofsárinu sem hefst 1. maí 2006 og kr. 23.000 á orlofsárinu sem hefst 1. maí 2007.

Starfsmannaviðtöl

Með þessum samningi eru fest niður réttindi til reglubundinna starfsmannaviðtala, en samkvæmt könnunum félaganna hafa starfsmannaviðtöl skilað árangri. Þetta gildir þegar atvinnurekandi skipuleggur reglubundin starfsmannaviðtöl á vinnustað.

Tilflutningur á fimmtudagsfrídögum samkvæmt fyrirtækjaþætti

Samkvæmt samningnum er heimilt að semja svo um á vinnustað að samningsbundin frí sem lenda á fimmtudögum (uppstigningadagur og sumardagurinn fyrsti) verði færð á föstudag eða mánudag. Um þetta verði samið á hverjum vinnustað.

Mæðraskoðun á vinnutíma

Í samningnum er staðfest að barnshafandi konur skuli eiga rétt á nauðsynlegum fríum vegna mæðraskoðunar án frádráttar á föstum launum, þurfi slík skoðun að fara fram í vinnutíma.

Atvinnuleysisbætur hækka

Með samningnum og yfirlýsingu ríkisstjórnarinnar er staðfest að atvinnuleysisbætur  hækki strax frá 1. mars í kr. 88.767 en hækki síðan um 3% 1. janúar 2005, og 2,5% frá 1. janúar 2006, og 2,25% frá 1. janúar 2007.

Erlendir starfsmenn – aðkoma trúnaðarmanna

Trúnaðarmenn eiga nú á grundvelli samkomulags aðila samningsins rétt á upplýsingum þegar um rökstuddan grun er að ræða á brotum gegn kjarasamningnum eða lögum er varða starfskjör erlends launafólks. Trúnaðarmaður skal hafa aðgang að launaseðlum og öðrum gögnum er staðfesti launagreiðslur og önnur starfskjör hlutaðeigandi starfsmanna. Trúnaðarmanni er heimilt að ráðfæra sig við viðkomandi stéttarfélag um þessar upplýsingar.

Samningsforsendur

Forsendur samninganna eru tvær. Annars vegar að verðlag þróist í samræmi við verðbólgumarkmið Seðlabanka Íslands en hins vegar að sú launastefna og þær kostnaðarhækkanir sem í samningnum felast verði almennt stefnumarkandi fyrir aðra í samningagerð á vinnumarkaði.

Sérkjarasamningar

Til viðbótar við aðalkjarasamning voru gerðir fjölmargir sérkjarasamningar þar sem tekið er á sérmálum viðkomandi starfsgreinar eða vinnustaðar.

Í kvöld  kl. 19 mun stjórn og trúnaðarráð Verkalýðfélags Akraness  koma saman til að yfirfara nýgerðan kjarasamning Starfsgreinasambands Íslands og Samtaka atvinnulífsins sem félagið er aðili að.  Jafnframt verður ákveðið hvernig staðið verður að atkvæðagreiðslu um samninginn.  Síðan  kl. 20 hefst  opinn kynningarfundur félagsins á ný gerðum kjarasamningi.  Kristján Bragason fyrrverandi framkvæmdastjóri SGS mun sjá  um að kynna samninginn.