Rétt í þessu lauk 9. þingi Starfsgreinasambands Íslands á Hotel Natura í Reykjavík. Þar átti Verkalýðsfélag Akraness 11 þingfulltrúa en þingið stóð yfir frá 25.-27. október.

Það er skemmst frá því að segja að Vilhjálmur Birgisson, formaður VLFA og SGS fékk mótframboð sem formaður SGS og mótframboðið var frá Signýju Jóhannesdóttur, fyrrverandi formanni Stéttarfélags Vesturlands og varaforseta ASÍ.

Niðurstaða kosningarinnar var afdráttarlaus en Vilhjálmur hlaut 81,1% atkvæða sem er frábær niðurstaða og veitir honum sem formanni mikinn styrk í þeim störfum sem eru framundan. Það var einnig afar ánægjulegt að sjá að varaformaður SGS, Guðbjörg Kristmundsdóttir, hafi verið sjálfkjörin áfram sem varaformaður enda hefur samstarf hennar og formannsins verið gríðarlega gott síðustu tvö ár.

Á þinginu fór einnig fram mjög góð vinna í málefnanefndum en þing SGS er æðsta vald sambandsins sem mótar stefnu og áherslur sambandsins í hinum ýmsu málum eins og til dæmis í kjara- og byggðamálum. Þessi vinna mun auðvelda forystu SGS að fylgja eftir áherslum og stefnum sem æðsta vald sambandsins í komandi kjaraviðræðum.

Áherslur þingsins eru til dæmis eftirfarandi:

Að samið verði í anda lífskjarasamningsins frá árinu 2019.

Að samið verði um krónutöluhækkanir.

Að samið verði um að halda áfram að lagfæra launatöflu verkafólks.

Að ráðist verði í kerfisbreytingar varðandi fjármálamarkaðinn og búið til nýtt húsnæðislánakerfi.

Að Landsbankinn verði að samfélagsbanka.

Að fengnir verði óháðir, erlendir aðilar til að meta kosti og galla íslensku krónunnar sem og að kanna kosti og galla þess að taka upp annan gjaldmiðil.

Þetta eru aðeins nokkur dæmi um það sem þingið samþykkti sem áherslur en hægt er að lesa um áherslur þingsins inni á heimasíðu SGS á sérstökum þingvef.