Rétt í þessu lauk aðalfundi sjómannadeildar Verkalýðsfélags Akraness en á annað hundrað sjómenn tilheyra henni. Eðli málsins samkvæmt var staða kjaramála sjómanna efst á dagskrá þessa fundar auk venjubundinna aðalfundarstarfa.
Eins og allir vita hafa íslenskir sjómenn verið með lausan kjarasamning frá 1. janúar 2011 eða í rétt tæp 5 ár. Djúpstæður ágreiningur hefur verið á milli samningsaðila en ein af aðalkröfum útvegsmanna hefur verið að sjómenn tækju þátt í aukinni kostnaðarhlutdeild í veiðigjöldum, tryggingagjöldum og kolefnisgjaldi. Þessi krafa útvegsmanna myndi þýða að laun sjómanna gætu lækkað um 10-15% ef gengið yrði að henni.
Þessi krafa er náttúrulega með ólíkindum og er hún uppfull af óbilgirni og ósanngirni, sérstaklega í ljósi þeirrar bláköldu staðreyndar að afkoma sjávarútvegs hefur aldrei nokkurn tímann verið jafn góð og á undanförnum árum. Sem dæmi þá liggur fyrir að arðgreiðslur til eigenda sjávarútvegsins námu 13,5 milljörðum á árinu 2014 og rúmum 11 milljörðum árið 2013. Þessu til viðbótar hafa skuldir sjávarútvegsins hríðlækkað á undanförnum árum eða um 153 milljarða sem gera 31% frá árinu 2009.
Fundarmönnum var heitt í hamsi yfir þeirri óbilgirni sem þeir finna frá útgerðarmönnum og brann meðal annars heitt á þeim mál er snýst um fækkun skipverja en það hefur verið stefna útgerðarmanna að undanförnu að fækka verulega til dæmis á uppsjávarskipunum og í sumum tilfellum eru skipverjar einungis 8 um borð í þessum stóru og öflugu skipum. Kom skýrt fram hjá sjómönnum sem sóttu fundinn að þeir telji að verið sé að ógna þeirra öryggi illilega með þeirri fækkun sem er að eiga sér stað. Töldu þeir afar brýnt að hvergi yrði hvikað frá þeirri kröfu að tryggð yrði lágmarksmönnun um borð í skipunum enda eru þeir eins og áður sagði farnir að telja að þessi fækkun sé farin að auka verulega slysahættu og að öryggi þeirra sé ógnað.
Rétt er að vekja sérstaka athygli á að það er ekki bara að hagnaður sjávarútvegsfyrirtækja og arðgreiðslur til eigenda hafi stóraukist eins og áður sagði heldur hafa rekstrarskilyrði sjávarútvegsins líka batnað gríðarlega og nægir að nefna í því samhengi að olíuverð það sem af er árinu 2015 hefur verið 44% lægra að meðaltali en á árinu 2014. Þrátt fyrir þessar staðreyndir og mikinn hagnað sjávarútvegsfyrirtækja á undanförnum árum þá hafa útgerðarmenn gert þessa óbilgjörnu kröfu á íslenska sjómenn. Það gætir mikillar gremju á meðal sjómanna í þessari kjaradeilu enda er þolinmæði þeirra á þrotum. Meginkrafa sjómanna er að þeir fái bætur vegna afnáms sjómannaafsláttar en hann var tekinn af sjómönnum í þrepum. Einnig er krafa frá sjómönnum um að tekið verði á verðmyndun sjávarafurða og allur fiskur fari á markað. Eins og áður sagði vilja sjómenn einnig að tekið verði á mönnunarmálum á skipum en krafa er um að á uppsjávarskipunum verði eigi færri en 10 skipverjar þegar veiðar eru stundaðar með flottrolli og eigi færri en 12 þegar um nótaveiðar er að ræða og 15 á ísfiskstogurum. Öllum þessum kröfum hafa útvegsmenn alfarið hafnað.
Það er ljóst að sjómenn íhuga sterklega að láta sverfa til stáls en verið er að kanna núna á meðal íslenskra sjómanna vítt og breitt um landið hvað þeir vilja raunverulega gera en á þessum fundi var þungur tónn í sjómönnum og virðist vera að menn séu tilbúnir að láta kné fylgja kviði til að ná fram sanngjörnum og réttlátum kjarasamningi sem á að gagnast báðum samningsaðilum ágætlega. Semsagt, sjómenn sem tilheyra Verkalýðsfélagi Akraness eru svo sannarlega tilbúnir til að knýja fram sanngjarnar kröfur sínar, til dæmis er lúta að mönnunarmálum, með því að fara í verkfallsátök. Mun formaður koma þessum skilaboðum áleiðis til Sjómannasambands Íslands sem fer með samningsumboð fyrir Verkalýðsfélag Akraness sem og önnur aðildarfélög sín.
Aðalfundur sjómannadeildar Verkalýðsfélags Akraness verður haldinn í dag kl. 14:00 í fundarsal félagsins að Sunnubraut 13. Á dagskrá eru hefðbundin aðalfundarstörf, staða kjaramála og önnur mál.
Sjómenn eru eindregið hvattir til að mæta!
Stjórn og starfsfólk Verkalýðsfélags Akraness sendir félagsmönnum sínum nær og fjær og landsmönnum öllum hugheilar jóla- og nýárskveðjur með þökkum fyrir góð samskipti á líðandi ári og óskum um farsæld á ári komandi.
Skrifstofa Verkalýðsfélags Akraness er lokuð frá hádegi í dag Þorláksmessu. Lokað er á Aðfangadag, Gamlársdag og Nýársdag, en annars gildir hefðbundnin opnunartími yfir hátíðarnar.
Þeir félagsmenn sem eiga bókaða bústaði yfir jól hafa þegar sótt leigusamninga sína. Þeir sem eiga bókaðan bústað yfir áramót þurfa að sækja leigusamninga í síðasta lagi fyrir kl. 16 þriðjudaginn 30. desember.
Styrkir og sjúkradagpeningar verða greiddir út þann 30. desember og þurfa gögn í tengslum við þær umsóknir að hafa borist fyrir kl. 16 þriðjudaginn 29. desember.
Sjómannadeild Verkalýðsfélags Akraness sendi öllum sjómönnum sem tilheyra deildinni bréf í dag vegna þeirrar grafalvarlegu stöðu sem upp er komin í kjaradeilu þeirra við Samtök fyrirtækja í sjávarútvegi. Eins og flestir vita þá er kjarasamningur sjómanna búinn að vera laus frá 1. janúar 2011 eða í rétt tæp 5 ár. Þrátt fyrir ítrekaðar tilraunir Sjómannasambands Íslands sem fer með samningsumboðið fyrir aðildarfélög sín hefur ekki tekist að ganga frá kjarasamningi til handa íslenskum sjómönnum en það hefur ekki tekist vegna ótrúlegrar óbilgirni útgerðarmanna.
Það liggur fyrir að útgerðarmenn hafa algjörlega hafnað lagfæringu varðandi fiskverð. Sjómenn krefst þess t.d. að Alþingi Íslendinga sjái til þess að viðskipti með fisk milli útgerðar og fiskvinnslu verði gagnsæ og uppfylli skilyrði um heilbrigða samkeppni og góða viðskiptahætti. Eins og reglurnar eru í dag getur kaupandi og seljandi fisks verið einn og sami aðilinn sem í krafti einokunaraðstöðu sinnar ákveður verðið í eigin viðskiptum. Að mati sjómanna getur þetta verðmyndunarkerfi ekki gengið lengur og því nauðsynlegt að setja reglur sem skylda útgerðina til að selja allan afla, sem fer til vinnslu innanlands, á uppboðsmarkaði fyrir sjávarfang. Það liggur líka fyrir að útgerðamenn hafna því alfarið að tekið verði á mönnunarmálum og einnig hafa þeir hafnað því algjörlega að koma með bætur vegna afnáms sjómannaafsláttar.
Nú er staðan þannig að sjómenn þurfa að taka afstöðu til þess hvað gera skuli og þess vegna sendi félagið út bréf með skoðanakönnun þar sem meðal annars er spurt um hvort hefja eigi undirbúning verkfallsaðgerða. Vonast formaður félagsins eftir að sjómenn sendi skýr skilaboð um hvað þeir vilji gera til að knýja fram eðlilegan, sanngjarnan og réttlátan kjarasamning til handa sjómönnum því það er ótækt með öllu að sjómenn einir séu án þess að hafa gildandi kjarasamning um sín störf.
Félagið tók fram í þessu bréfi að hægt yrði að skila skoðanakönnuninni á skrifstofu félagsins eða senda hana í pósti á Sunnubraut 13, 300 Akranesi fyrir 10. janúar næstkomandi. Nú er runnin upp ögurstund um hvað gera skuli í þessari erfiðu deilu því það eru engir aðrir en sjómennirnri sjálfir sem þurfa að taka efnislega afstöðu til þess. Á þeirri forsendu var þessi skoðanakönnun send út en félagið vill einnig minna á að aðalfundur sjómannadeildar Verkalýðsfélags Akraness verður haldinn þriðjudaginn 29. desember næstkomandi í fundarsal félagsins að Sunnubraut 13 þar sem farið verður ítarlega yfir þessi mál.
Það er óhætt að segja að það sé nóg að gera hjá Verkalýðsfélagi Akraness við að verja réttindi félagsmanna sinna. Nú þegar er félagið með eitt mál fyrir Félagsdómi vegna svokallaðs SALEK samkomulags. Eins og fram hefur komið hér á heimasíðunni þá gerði Samband íslenskra sveitarfélaga þá skýlausu kröfu á Verkalýðsfélag Akraness að SALEK samkomulagið skyldi fylgja með sem fylgiskjal í kjarasamningi sem félaginu stóð til boða vegna starfsmanna sem starfa hjá Akraneskaupstað. Slíku hafnaði Verkalýðsfélag Akraness eðli málsins samkvæmt algjörlega enda liggur fyrir að SALEK samkomulagið er að mati félagsins gróf skerðing á frjálsum samningsrétti stéttarfélaga og því mikilvægt að fá úr því skorið fyrir Félagsdómi hvort röksemdir VLFA eigi við rök að styðjast. Að mati félagsins er ekki hægt að fara fram á að fylgiskjal fylgi með kjarasamningi sem er andstætt lögum um stéttarfélög og vinnudeilur sem og 74. grein stjórnarskrárinnar en það er mat VLFA að samningsrétturinn sé einn af hornsteinum stéttarfélagsbaráttunnar á Íslandi. Með þessu samkomulagi er verið að taka og færa samningsréttinn meðal annars yfir til þjóðhagsráðs sem til stendur að setja á laggirnar og mun ákvarða hverjar hámarkslaunabreytingar í kjarasamningum mega vera á hverjum tíma fyrir sig og stéttarfélögunum á að vera skylt að semja innan þess svigrúms.
Verkalýðsfélag Akraness er einnig á leið með annað mál fyrir dómstóla en það er vegna túlkunar á ráðningarsamningi starfsmanns sem hefur starfað við vinnslu á hvalaafurðum í hvalstöðinni í Hvalfirði. Einnig snýst það mál um lágmarksbónus sem samið var um samhliða kjarasamningum á hinum almenna vinnumarkaði til handa fiskvinnslufólki en slíkri greiðslu var ekki til að dreifa hjá starfsmönnum í hvalstöðinni á liðinni vertíð.
Einnig er félagið nú með til skoðunar mál er lýtur að túlkun á útreikningi á orlofs- og desemberuppbótum en eins og staðan er í dag eru yfirgnæfandi líkur á því að félagið muni fara með þann ágreining fyrir dómstóla. Það er stefna Verkalýðsfélags Akraness að verja réttindi og kjör sinna félagsmanna í hvívetna ef félagið hefur minnsta grun um að verið sé að hafa laun og réttindi af þeim. Það skiptir máli að vera í öflugu stéttarfélagi sem hefur burði til að ráðast í slíka réttindabaráttu því öll svona mál kosta mikla yfirlegu og fjármuni og því skiptir það miklu máli að félagið standi vel félagslega sem fjárhagslega til að ráðast í slíka réttindabaráttu.
Verkalýðsfélag Akraness
Kt. 680269-6889
Til skrifstofunnar geta félagsmenn leitað eftir
upplýsingum og annarri aðstoð.
300 Akranes
4309900
skrifstofa@vlfa.is
Mánudag-fimmtudag kl. 08:00-16:00 og föstudaga kl. 8:00-15:15. Utan afgreiðslutíma félagsins er hægt að ná í formann félagsins, Vilhjálm Birgisson, í síma 865-1294.
