Sjúkrahúsið og heilsugæslustöðin á Akranesi hefur sagt upp  núverandi vinnufyrirkomulagi með þriggja mánaða fyrirvara við starfsfólk í ræstingu og býtibúri.  Breytingin mun taka gildi 1. janúar 2005.   Í bréfi til starfsmanna kemur fram að að tímabilið til áramóta verði notað til þess að undirbúa og kynna fyrirhugaðar breytingar og leita samráðs við viðkomandi starfsfólk.  Töluverðrar gremju gætir meðal starfsmanna með þessar breytingar. 

Verkalýðsfélag Akraness skilur gremju þeirra mjög vel.  Breytingar á vinnufyrirkomulagi koma á slæmum tíma, það er jú nýbúið að gera kjarasamning við starfsmenn SHA.  Allar breytingar af þessu tagi valda starfsmönnum óþægindum, og einverjir starfsmenn verða fyrir skerðingu á launum í kjölfar þessarra breytinga.  Forsvarsmenn SHA hafa leyft Verkalýðsfélaginu að fylgjast vel með í þessu máli og er það mjög gott.  Forsvarsmenn SHA hafa líka tjáð félaginu að reynt verði eftir fremsta megni að koma til móts við starfsmenn og að skerðing á launakjörum starfsmanna verði sem minnst.

Fundað verður stíft í næstu viku vegna kjarasamnings Íslenska járnblendifélagsins.  Kjarasamningurinn rennur út 1. desember n.k.  Ákveðið hefur verið að hittast  miðvikudaginn 24. kl. 13.00 og verður til umfjöllunar á þeim fundi krafa stéttarfélaganna um  stóriðjuskóla.  Krafan er að skólinn verði með sambærilegu sniði og er hjá Ísal bæði hvað varðar námsefni sem og launahækkanir að námi loknu.

Aftur verður fundað fimmtudaginn 25.  Til umræðu á þeim fundi verða bónusmálin.  Er það afar stórt og mikið mál sem þarfnast mikillar skoðunar. Forsvarsmenn Íj hafa vissar hugmyndir um nýtt bónuskerfi, og munu jafnvel leggja fram einhverjar tillögur í þeim efnum.  Forsvarsmenn Íj lögðu fram hugmyndir að breyttu bónuskerfi fyrir nokkrum vikum sem starfsmönnum leist alls ekki vel á.  Formaður VLFA og trúnaðarmenn Íj hafa verið að skoða þessi mál og erum við með vissar hugmyndir varðandi nýtt bónuskerfi.

Ákveðið hefur verið að hittast mánudaginn 29. og fara yfir sérkröfur ofngæslumanna og dagmanna á þeim fundi.

Þriðjudaginn 30. verður fundur hjá ríkissáttasemjara þar sem gildissvið kjarasamningsins verður til um ræðu og munu forsvarsmenn Íj leggja fram tillögu til lausnar á því máli á þeim fundi.