Forsvarsmenn Íslenska járnblendifélagsins lögðu fram tilboð að nýjum kjarasamningi á fundi sem var haldinn á föstudaginn.  Í þessu tilboði hefur verið komið verulega til móts við þær kröfur sem trúnaðarmenn og stéttarfélögin lögðu upp með í sinni kröfugerð.  Verkalýðsfélag Akraness hefur notað helgina til að skoða þetta tilboð eins vel og hægt er.  Ennfremur hefur formaður félagsins verið í sambandi við starfsmenn til að meta stöðuna og kynna þeim innihald tilboðsins.  Ákveðið hefur verið að funda hjá ríkissáttasemjara á morgun kl. 14:00 og mun væntanlega skýrast á þeim fundi hvort deiluaðilar nái saman eða ekki, því enn ber á milli deiluaðila. 

Fundað var um gildissviðið í  kjarasamningi Norðuráls á föstudaginn.  Forsvarsmenn Norðuráls lögðu fram tillögu að nýju gildissviði fyrir kjarasamning Norðuráls.   Munu formenn stéttarfélaganna og trúnaðarmenn NA funda á mánudagsmorgunn um tillögu forsvarsmanna NA.  Er síðan fyrirhugað að funda með forsvarsmönnum Norðuráls og jafnvel að ganga frá nýju gildisviði samningsins, ef samninganefndin verður sammála um það.