Allt útlit er fyrir að skrifað verði undir nýjan kjarasamning við forsvarsmenn Klafa á morgun.  Lausn er komin á þessu eina atriði sem hefur staðið í vegi fyrir því að hægt hafi verið ganga frá nýjum kjarasamningi.  Samningsaðilar ætla að hittast kl 10:00 í fyrramálið og ganga endanlega frá samningstextanum.  Hugsanlega getur sú vinna tafið undirskriftina á nýjum kjarasamningi eitthvað.  Starfsmenn Klafa unnu eftir kjarasamningi Íslenska járnblendifélagsins 

en núna hefur verið gerður sjálfstæður samningur sem nær eingöngu yfir starfsmenn Klafa.  Samt sem áður byggist nýi kjarasamningur Klafa nánast  alfarið á kjarasamningi Íslenska járnblendifélagsins.  Innihald samningsins verður birt hér á heimasíðunni um leið og gengið hefur verið frá samningnum.

Allt útlit er fyrir að ekki takist að ganga frá nýjum kjarasamningi fyrir starfsmenn Klafa fyrir helgi.  Eins og fram hefur komið hér á heimasíðunni þá ríkti töluverð bjartsýni hjá formanni félagsins að það myndi takast að klára nýjan samning fyrir helgi.  Ljóst er að það var of mikil bjartsýni.  Það er enn ágreiningur um eitt atriði sem því miður kemur í veg fyrir að hægt sé að ganga frá nýjum samningi.  Verkalýðsfélag Akraness lagði fram tillögu til lausnar á þessu eina  atriði sem útaf stendur og var allt útlit fyrir í gær að aðilar væru að ná  saman.  Því miður kom bakslag í dag þar sem forsvarsmenn Klafa höfnuðu tillögu félagsins.  Er félagið því að láta lögmann félagsins skoða tillögu sem forsvarsmenn Klafa lögðu fram til lausnar á þessari deilu.   Túlkun lögmanns félagsins á þessari tillögu forsvarsmanna Klafa mun ráða úrslitum hvort félagið mun samþykkja eða synja tillögunni.  Ef tillögunni verður hafnað mun félagið  vísa deilunni til sáttasemjara fyrir helgi.  Formaður félagsins hefur boðað trúnaðarmann Klafa til fundar í fyrramálið þar sem staðan verður metin.