NTV skólinn í samstarfi við Vinnumálstofnun býður einstaklingum í atvinnuleit uppá sérstakt námskeið í „Sölu-, markaðs- og rekstrarmálum“ sem byrja nú í vikulok og standa yfir fram í byrjun júnímánaðar.
Námskeiðin eru tvö aðskilin námskeið þar sem annað er á íslensku og hitt er kennt á ensku.
Námskeiðin verða keyrð sem staðarnám og fjarnám.
Námskeiðin byggja á námsbrautinni „Sölu-, markaðs- og rekstrarnám“ sem NTV skólinn hefur boðið í mörg ár.
VMST niðurgreiðir námskeiðin þannig að hlutur þátttakenda er 28.000,- kr. Þátttakendur eiga möguleika á að sækja sinn hluta í starfsmenntasjóði.
VMST þarf að samþykkja hvern og einn umsækjanda inn á námskeiðin.
Námskeiðin byrja strax – Örfá sæti laus.
Almennt um námið
Sölu-, markaðs- og rekstrarnám NTV og Mímis-símenntunar hentar sérstaklega þeim sem hafa áhuga á að vinna við viðskipta-, sölu- og markaðsmál og þeim sem vilja stofna til eigin reksturs. Eftir námið hefur nemandinn öðlast nægjanlega innsýn og færni í viðskipta-, markaðs- og sölumálum til að undirbúa eigin rekstur eða til að starfa sem sölu- og markaðsfulltrúi stærri fyrirtækja.
Námið samanstendur af kennslu og verklegum æfingum og eru próf í helstu námsgreinum. Rétt er að gera ráð fyrir nokkurri heimavinnu. Í lok náms fá nemendur viðurkenningarskjal og prófskírteini.
Öll fög í náminu eru kennd frá grunni. Námið er haldið í samvinnu við Mími - símenntun.
Kennt er eftir vottaðri námskrá Fræðslumiðstöðvar atvinnulífsins og er námið á 2. þrepi hæfniramma um íslenska menntun. Mögulega er hægt að meta námið til allt að 22 eininga á framhaldsskólastigi en það fer eftir mati þess skóla sem nemendur sækja um, hve margar einingar eru samþykktar. Ekki er tryggt að námsmaður geti nýtt allar einingar til styttingar á námi í framhaldsskóla, það fer eftir tegund náms og námsferli viðkomandi námsmanns.
Hér er linkur á námskeiðsupplýsingar á íslensku
Here are more information in english
Ég hef áður sagt að lífskjarasamningurinn sem undirritaður var 3. apríl 2019 hafi verið einn sá besti sem ég hef komið að hvað almenna vinnumarkaðinn varðar.
Enda nægir að nefna þá miklu kaupmáttaraukningu sem átt hefur sér stað frá því samningurinn var undirritaður. En í mars 2019 til janúar 2021 eða á tæpum tveimur árum hefur neysluvísitalan hækkað um 5,3% en á sama tímabili hefur launavísitalan hækkað um 15,29%. Þetta þýðir að lífskjarasamningurinn hefur skilað launafólki kaupmáttaraukningu sem nemur rétt tæpum 10% á samningstímanum.
Rétt er að geta þess að lágmarkslaun hafa hækkað um 17% á samningstímanum sem skila 11,69% kaupmáttaraukningu á tæpum tveimur árum.
Rétt er einnig að geta þess að í lífskjarasamningum var samið um svokallaðan hagvaxtarauka sem öllu jöfnu hefði getað skilað frá 3.000 kr. uppí 13.000 kr. en hann miðast við hagvöxt á pr. mann. Ekki kom til hans vegna efnahagssamdráttar útaf COVID. En það er alveg ljóst í mínum huga að við eigum eftir að semja aftur um hagvaxtartengingu í næsta samningi.
En það er ekki bara að lífskjarasamningurinn hafi skilað þetta mikilli kaupmáttaraukningu heldur stuðlaði hann að stífu stýrivaxtalækkunarferli hjá Seðlabankanum en fyrir samninginn voru vextir Seðlabankans 4,25% en eru í dag 0,75% Þetta hefur gert það að verkum að þúsundir heimila hafa endurfjármagnað húsnæðislán sín sem hefur leitt til lækkunar á vaxtabyrði sem nemur í mörgum tilfellum tugum þúsunda.
Ekki má heldur gleyma að aldrei í kjarasamningssögunni hefur aðkoma stjórnvalda verið jafn mikil og við gerð lífskjarasamningsins en stjórnvöld komu með 45 atriði til stuðnings samningnum. Kostnaður stjórnvalda til stuðnings lífskjarasamningnum nam um 80 milljörðum.
Helstu atriði sem stjórnvöld komu með voru:
Þótt þetta hafi verið virkilega góður kjarasamningur þá var hann einungis skref í átt þess að lagfæra kjör launafólks en baráttu fyrir bættum kjörum launafólks henni lýkur aldrei enda um eilífðarverkefni að ræða.
Nú höfum við opnað fyrir umsóknir í orlofshúsin okkar um páskana.
Leigutíminn er 31. mars til 6. apríl. Páskaúthlutunin virkar þannig að félagsmenn sækja um páskavikuna í þau hús sem það vill, hægt er að sækja um í öll húsin okkar.
Öll nöfnin eru svo sett í pott og við drögum út vikuna í hvert hús fyrir sig. Haft verður samband við þann sem hreppir páskavikuna um leið og búið er að draga út.
Ekki eru dregnir orlofspuntar af félagsmönnum fyrir páskavikuna og punktastaða hefur heldur engin áhrif á úrdráttinn.
Nú er að ljúka framkvæmdum við orlofshús félagsins í Hraunborgum en undanfarið hefur verið unnið að því að bæta þar ýmislegt sem var orðið viðhaldsþurfi.
Bústaðurinn var málaður og skipt um allt parket. Einnig var skipt um þann búnað sem nauðsynlegt var að endurnýja og má þar nefna rúm, eldavél og uppþvottavél.
Ofnalagnir verða svo endurnýjaðar á næstu vikum.
Við stefnum að því að allar framkvæmdir verði búnar um mánaðarmótin febrúar/mars.
Óhætt er að segja að vel hafi tekist til og lítur bústaðurinn mun betur út eftir þessa andlitslyftingu eins og sjá má á meðfylgjandi myndum.
En það er alveg morgunljóst að þessi gamli og sjarmerandi bústaður tapaði ekki sjarmanum við þessar endurbætur. Hann er enn alveg ótrúlega hlýlegur og notalegur.
Samningafundur um nýjan kjarasamning til handa starfsmönnum Elkem Ísland á Grundartanga fór fram í morgun.
Viðræðurnar ganga ágætlega en umtalsverð vinna hefur farið í að samlesa yfir kjarasamninginn í heildsinni, en sá samlestur byggist á því að eyða út greinum, bókunum og fylgiskjölum sem ekki eiga við lengur.
Fyrirhugað er að funda aftur í næstu viku og þá er allt eins líklegt að farið verði að ræða atriði sem lúta að launabreytingum í nýjum kjarasamningi og vonast formaður til þess að ekki beri mjög mikið á milli samningsaðila.
Það liggur fyrir að allflestar stóriðjur á Íslandi hafa nýverið gengið frá nýjum kjarasamningi og hefur kjarasamningur Norðuráls verið til viðmiðunar hjá þeim stóriðjum sem nýverið hafa gengið frá sínum samningum.
Krafa starfsmanna er að ekki verði samið undir því sem samið hefur verið í öðrum stóriðjum að undanförnu enda mun slíkt aldrei geta orðið samningsforsenda.
Í síðasta kjarasamningi Verkalýðsfélags Akraness við Samband íslenskra sveitarfélaga var samið um svokallaðan félagsmannasjóð. Sá sjóður byggist á því að samningsaðilar sem eru í þessu tilfelli Akraneskaupstaður, Hvalfjarðarsveit og hjúkrunar- og dvalarheimlið Höfði greiða sem nemur 1,5% af heildarlaunum starfsmanna inn í þennan sérstaka sjóð. Í samningnum var síðan kveðið á um að útgreiðsla úr sjóðnum skyldi eiga sér stað einu sinni á ári eða í febrúar ár hvert og núna er komið að því að greiða fyrstu greiðsluna úr sjóðnum.
Gríðarleg vinna hefur farið í að koma þessu öllu heim og saman en nú hefur öllum félagsmönnum sem starfa hjá áðurnefndum sveitarfélögum og stofnun verið sent bréf frá Verkalýðsfélagi Akraness þar sem fram kemur hver upphæðin er sem lögð verður inn á reikning viðkomandi félagsmanns samkvæmt skilagreinum sem félaginu hefur borist.
Rétt rúmlega 700 félagsmenn sem starfa eftir umræddum kjarasamningi hafa nú fengið áðurnefnt bréf og mun greiðsla til þeirra berast á allra næstu dögum. Heildarupphæð sem greidd verður út úr félagssjóði er um 21 milljón króna en aðili sem hefur verið í 100% starfi getur verið að fá á bilinu 70.000 til 100.000 kr. en hæsta einstaka greiðslan nemur 133 þúsundum en flestir eru að fá á bilinu 50-60.000 kr.
Verkalýðsfélag Akraness fer aðra leið heldur en önnur stéttarfélög hafa gert en eftir upplýsingum VLFA framkvæma önnur félög þetta með þeim hætti að félagsmaðurinn þarf að sækja um umrædda greiðslu og ef hann ekki gerir það á hann á hættu að greiðslan detti niður dauð. VLFA hinsvegar fer allt aðra leið sem er fólgin í því að félagið greiðir öllum greiðsluna og enginn þarf að sækja um enda var það megintilgangur með þessu 1,5% framlagi að það kæmi að fullu til skila til starfsmanna. Félagið greiðir út eftir iðgjaldaskilum sveitarfélaganna og ítrekar að enginn þarf að sækja um heldur sér félagið alfarið um að koma greiðslunum til þeirra sem eiga rétt á þeim samkvæmt gildandi kjarasamningi.
Verkalýðsfélag Akraness hefur átt í ágreiningi við Samband íslenskra sveitarfélaga því það var aldrei skilningur félagsins að farin yrði þessi leið heldur var skilningur félagsins sá að það væru sveitarfélögin sem myndu sjá um útgreiðslu á þessum greiðslum án aðkomu stéttarfélagsins. Einnig var ágreiningur um lögmæti þess að framkvæma greiðsluna með þessum hætti en Samband íslenskra sveitarfélaga og sveitarfélögin hafa fullyrt að framkvæmdin standist fulla skoðun og þar af leiðandi ákvað VLFA að framkvæma þetta með þessum hætti en það er gert á ábyrgð áðurnefndra aðila.
Nú geta félagsmenn nálgast vasadagbækur fyrir árið 2021 á skrifstofu félagsins að Þjóðbraut 1.
Dagbækurnar eru alltaf vinsælar hjá félagsmönnum VLFA, enda gott að geta skipulagt sig bæði í leik og starfi.
Félagsmenn utan Akraness geta haft samband við starfsfólk skrifstofu og fengið vasadagbokin senda til sín í pósti.
Það er óhætt að fullyrða að í aðild að öflugu stéttarfélagi er fólgin umtalsverð tryggingar- og réttindavernd sem og aðgengi að fræðslusjóðum sem stéttarfélögin eru aðilar að.
Núna um þessi mánaðarmót eða nánar tiltekið fyrir janúarmánuð greiðir Verkalýðsfélag Akraness út til félagsmanna 10,3 milljónir vegna réttinda sem þeir eiga í sjúkra- og fræðslusjóðum félagsins. 6,2 milljónir eru vegna ýmissa réttinda sem félagsmenn eiga úr sjúkrasjóði eins og sjúkradagpeninga og annarra styrkja sem félagið býður félagsmönnum uppá.
3,1 milljón er greidd í umræddum mánuði úr fræðslusjóðum sem félagið er aðili að vegna námskeiða og skólagjalda sem okkar félagsmenn eru að sækja.
Það er engum vafa undirorpið hversu mikilvæg stéttarfélögin eru fyrir félagsmenn og á það jafnt við þegar kemur að greiðslum úr þeim fjölmörgu sjóðum sem félagsmenn eiga réttindi í sem og þegar félagsmenn vilja auka færni sína eða menntun með fjárhagsaðstoð frá fræðslusjóðunum. Að ógleymdu hinu mikilvæga starfi sem stéttarfélögin gegna sem lýtur að því að verja og vernda launakjör og kjarasamninga sinna félagsmanna.
Kæru félagsmenn, endilega skoðið starfsmiðuð fjarnámskeið NTV, að fullu fjármögnuð af starfsmenntasjóðum sem hefjast í byrjun febrúarmánaðar.
Gerður hefur verið samningur milli NTV skólans og starfsmenntasjóðanna Landsmennt, Sjómennt, Sveitamennt og Ríkismennt um að bjóða aðildarfélögum sjóðanna fulla fjármögnun á 6 námskeiðum/námsleiðum sem allt eru starfsþróunarmiðuð og verkefnadrifin.
Námskeiðin sem um ræðir eru:
Bókhald Grunnur - 8 vikur (120 kes.)
Digital marketing - 7 vikur (112 kes.)
Frá hugmynd að eigin rekstri - 5 vikur (75 kes.)
App og vefhönnun - 6 vikur (90 kes.)
Vefsíðugerð í WordPress - 4 vikur (50 kes.)
Skrifstofu og tölvufærni - 6 vikur (96 kes.)
Nánari upplýsingar um námskeiðin má finn áhttp://www.ntv.is/is/um-ntv/yfirlit-flokka/view/stettarfelags-namskeid
Við hvetjum félagsmenn okkar til að nýta sér þessi námskeið , hér er hægt að skrá sig : http://www.ntv.is/is/namskeid/nam-i-bodi-stettarfelags
Samninganefndir stéttarfélaganna sem eiga aðild að kjarasamningi Elkem Ísland á Grundartanga komu saman til fundar með forsvarsmönnum fyrirtækisins á síðasta miðvikudag, en eins og fram hefur komið hér á heimasíðunni þá rann kjarasamningur starfsmanna út um síðustu áramót.
Á fundinum var klárað að samlesa allar kjarasamningsgreinar samningsins og bera þær saman við kjarasamninga í sambærilegum iðnaði og yfirfara bókanir og yfirlýsingar með það að markmiði að setja þær inn í kjarasamninginn þar sem það á við sem og að henda þeim bókunum sem ekki eiga við lengur.
Ekki var á þessum fundi farið yfir kröfugerð eða hugmyndir stéttarfélaganna að launabreytingum en ljóst er að krafan lýtur að því að launabreytingar og kjör verði ekki lakari en samið var um í kjarasamningi Norðuráls nýverið.
Það er sameiginlegur skilningur samningsaðila að kjarasamningurinn gildi frá þeim tíma sem hann rann út eða nánar tilgetið frá 1. janúar 2021 og því eru samningsaðilar sammála að taka sér þann tíma sem til þarf við að ná fram nýjum kjarasamningi. Vissulega er mikilvægt að hraða þeirri vinnu eins og kostur er til að starfsmann fái notið þeirra launabreytinga sem kveðið verður á um í samningum sem fyrst.
Í kjarasamningum sem undirritaðir voru í fyrra á milli Verkalýðsfélags Akraness og Samband íslenskra sveitarfélaga var samið um að allir starfsmenn sem heyrðu undir kjarasamning félagsins og starfa hjá Akraneskaupstað, Hvalfjarðarsveit og hjúkrunar-og dvalarheimilinu Höfða ættu rétt á greiðslu 1. febrúar ár hvert sem næmi 1,5% af heildarlaunum starfsmanns.
En þessi greiðsla kom til vegna þess samningsatriðis sem laut að jöfnun lífeyrisréttinda milli almenna vinnumarkaðarins og opinbera markaðarins, en það hallaði á starfsmenn sem unnu hjá sveitarfélögunum sem nam 1,5%.
Í fyrstu samdi VLFA við Samband íslenskra sveitarfélaga um að hækka launatöflur um þessi 1,5% umfram almenna launahækkanir.
Frá þessari leið var horfið vegna þess að Samband íslenskra sveitarfélaga óttaðist að opinberu félögin myndu einnig krefjast þess að fá hækkun á sínum launatöflum um 1,5% þrátt fyrir að eiga ekki rétt á því vegna þess að þessi hækkun var leiðrétting á lífeyrisréttindum milli opinbera markaðarins og almenna. Samband íslenskra sveitarfélaga lagði hart að VLFA að greiða frekar þessi 1,5% einu sinni á ári með því að stofna svokallaðan Félagsmannasjóð m.a. til að lágmarka ágreining við opinberu félögin um þetta 1,5%.
Það var meinlaust af hálfu VLFA að fara þessa leið enda átti að vera gulltryggt að starfsmenn myndu fá fulla greiðslu sem næmi þessu 1,5% af heildarlaunum sínum greitt einu sinni á ári og tryggt væri að sveitarfélögin myndu eðli málsins samkvæmt sjá alfarið um útgreiðslu til starfsmanna.
Núna hefur hins vegar það gerst að Samband íslenskra sveitarfélaga hefur gert samkomulag við stóran hluta af verklýðshreyfingunni um að greiða þessi 1,5% inn í einhvern Félagsmannasjóð sem er á forræði verkalýðshreyfingarinnar, sem sér síðan um að greiða út til starfsmanna sveitarfélaganna einu sinni á ári.
Verkalýðsfélag Akraness hefur ætíð alfarið hafnað þessari aðferðafræði, enda er það mat félagsins að þessi gjörningur standist hvorki skattalög né lög um lífeyrisréttindi. Enda er ekki tekin staðgreiðsla, tryggingargjald né mótframlag í lífeyrissjóði af þessu 1,5% eins og lög kveða skýrt á um að eigi að gera varðandi allar launagreiðslur.
Það er umhugsunarefni að af öllum sé Samband íslenskra sveitarfélaga og verkalýðshreyfingin í samkrulli um að finna leiðir til að koma sér hjá greiðslu opinberra gjalda, enda skýrt kveðið á um að greiða þarf opinber gjöld af öllum launagreiðslum.
VLFA hefur eins og áður sagt neitað alfarið að fara þessa leið og hefur bæði komið þeim skilaboðum til Sambands íslenskra sveitarfélaga sem og Akraneskaupstaðar. Einnig hefur félagið talað við ríkisskattstjóra til að kanna hvort félagið hafi skattalega heimild til að framkvæma þessar launagreiðslur án þess að af þeim séu dregin þau opinberu gjöld sem kveðið er á um í skattalögum.
Í samtali VLFA við ríkisskattstjóra sem byggðist á því að fá upplýsingar og leiðbeiningar um hvernig eigi að meðhöndla þessar launagreiðslur til starfsmanna sveitarfélaganna. VLFA gat ekki skilið annað á fulltrúa frá RSK að þeir leggja sama skilning og VLFA gerir í þessu máli, þ.e.a.s. að þessi framkvæmd standist ekki skattalög. Formaður veit ekki annað en að RSK ætli að óska eftir skýringum frá Sambandi íslenskra sveitarfélaga og verkalýðshreyfingunni um framkvæmd á þessari útgreiðslu á 1,5% af heildarlaunum starfsmanna sveitarfélaga.
Verkalýðsfélag Akraness hefur alltaf sagt bæði við fulltrúa Sambands íslenskra sveitarfélaga sem og fulltrúa Akraneskaupstaðar að félagið sé ekki að fara að gerast launagreiðandi fyrir sveitarfélögin. Og þaðan að síður að taka þátt í því að meðhöndla launagreiðslur upp á marga milljarða án þess að greitt sé að þeim öll þau launatengdu gjöld sem lög á Íslandi kveða skýrt á um.
Félagið hefur á liðnum mánuðum átt í samtali við samningsaðila um lausn á þessu máli en nú eru einungis örfáir dagar þar til útgreiðsla á þessu 1,5% á að berast til starfsmanna og mikilvægt að sú greiðsla berist starfsmönnum eins og lög og kjarasamningar kveður á um.
Formaður hefur upplýst kjörna fulltrúa um stöðuna á þessum ágreiningi því á endanum eru það kjörnir fulltrúar sem bera ábygð á því að kjarasamningar og skattalög séu virkt í þessu mikla hagsmunamáli.
Viðræður um nýjan kjarasamning milli þeirra stéttarfélaga sem eiga aðild að kjarasamningi Elkem Ísland á Grundartanga eru komnar á fullt skrið. Í morgun var haldinn fundur í fundarsal Verkalýðsfélags Akraness.
Á þessum fundi var verið að lesa yfir allar samningsgreinar í samningum því sumar greinar samningsins eiga ekki lengur við. Ekki er farið að ræða að neinu marki launalið samningsins en þó er ljóst að ekki verður samið um minni launabreytingar en um var samið í kjarasamningi Norðuráls á síðasta ári.
Næsti samningafundur hefur verið bókaður á næsta miðvikudag og á þeim fundi er stefnt að því að klára yfirlestur á kjarasamningnum.
Ásmundur Einar Daðason félags-og barnamálaráðherra kom í heimsókn á skrifstofu Verkalýðsfélags Akraness og áttu formaður félagsins og ráðherrann gott samtal um málefni er lúta að hagsmunum launafólks og stöðunni á íslenskum vinnumarkaði.
Þetta var góður fundur en samskipti VLFA við félagsmálaráðherra hafa ætíð verið góð, en ráðherrann hefur verið duglegur að kíkja í heimsókn á liðnum árum á skrifstofu félagsins, til að fara yfir stöðuna á vinnumarkaðnum og eftirfylgni á þeim atriðum sem lutu að stuðningi stjórnvalda samhliða gerð Lífskjarasamningsins.
Sjúkrasjóður Verkalýðsfélags Akraness greiddi til félagsmanna upp undir 100 milljónir úr sjóðnum á árinu sem nú var að líða.
En um umtalsverða aukningu er að ræða á milli ára eða sem nemur tæpum 19%. Af þessum 100 milljónum voru tæpar 60 milljónir vegna sjúkradagpeninga en félagsmenn eru tryggðir fyrir allt að 80% af launum sínum eftir að greiðsluskyldu atvinnurekanda lýkur vegna veikinda.
Fæðingarstyrkur til félagsmanna sem eignuðust barn á árinu nam tæpum 13 milljónum og gleraugnastyrkir til félagsmanna námu 4,5 milljónum. Heilsueflingarstyrkir námu 4,6 milljónum og heilsufarsskoðunarstyrkir námu 5,7 milljónum.
Það er afar ánægjulegt að sjá hversu meðvitaðir félagsmenn eru um þá styrki sem félagið bíður sínum félagsmönnum uppá en upp undir 40% af þeim félagsmönnum sem eru greiðendur í félagið nýttu sér styrki úr sjúkrasjóði félagsins.
Verkalýðsfélag Akraness
Kt. 680269-6889
Til skrifstofunnar geta félagsmenn leitað eftir
upplýsingum og annarri aðstoð.
300 Akranes
4309900
skrifstofa@vlfa.is
Mánudag-fimmtudag kl. 08:00-16:00 og föstudaga kl. 8:00-15:15. Utan afgreiðslutíma félagsins er hægt að ná í formann félagsins, Vilhjálm Birgisson, í síma 865-1294.
